Yehauvas Txoj Kev Zam Txim Yuav Pab Koj Li Cas?

1. Vim li cas peb ho tsis paub tseeb tseeb thaum ib tug twg zam txim rau peb?

YOG koj tau hais los sis ua ib yam twg ua rau ib tug tu siab lawm, thaum koj hnov nws hais tias, “Kuv zam txim rau koj,” ces yuav ua rau koj lub siab loj nteev rov tuaj. Tiam sis muaj ntau zaus peb tsis paub tias nws zam txim li cas. Ua li tus tib neeg uas koj ua tu siab ntawd puas xav nrog koj ua phooj ywg ntxiv? Los sis puas yog tus neeg ntawd hais tias nws tsis xav rov tham txog tej uas koj tau ua rau nws tu siab? Tib neeg nyias xav nyias lawm ib yam thaum lawv hais tias lawv zam txim rau koj.

2. Cov nqe Vajlugkub hais li cas txog Yehauvas txoj kev zam txim? (Saib cov taw ntawv.)

² Qhov uas Yehauvas zam txim rau noob txaug neeg txhaum txawv dua li peb ib leeg zam txim rau ib leeg. Yeej tsis muaj leej twg zam tau txim thooj li Yehauvas. Tus sau phau ntawv nkauj hais li no txog Yehauvas tias: “Koj thiaj yog tus zam txim rau peb tiag tiag, sawv daws thiaj hwm koj.”a (Phau Ntawv Nkauj 130:4) Yehauvas txoj kev zam txim thiaj li yog txoj tseem kev zam txim tiag tiag. Nws yog tus qhia rau peb tias kev zam txim yog li cas rau li cas. Muaj qho zaug nyob hauv cov nqe lus Henplais, cov sau phau Vajlugkub siv ib lo lus los mus hais txog Yehauvas txoj kev zam txim uas tsis zoo thooj li tib neeg txoj kev sib zam txim.

3. Yehauvas txoj kev zam txim txawv tib neeg txoj li cas? (Yaxayas 55:6, 7)

³ Qhov uas Yehauvas zam txim rau tib neeg zoo tsis thooj li peb ib leeg zam txim rau ib leeg. Thaum Yehauvas zam txim rau peb ces peb tej kev txhaum yeej tsis muaj ntxiv li lawm. Peb haj tseem nrog tau nws sib raug zoo. Peb ua Yehauvas tsaug uas nws zam peb tag los zam dua.​—Nyeem Yaxayas 55:6, 7.

4. Yehauvas pab kom peb paub txoj kev zam txim tiag tiag li cas?

⁴ Yog tias Yehauvas txoj kev zam txim txawv peb txoj, peb yuav ua li cas peb thiaj li yuav paub zam txim rau lwm tus li cas rau li cas? Yehauvas siv tej yam los ua piv txwv kom peb thiaj nkag siab. Nyob rau hauv zaj kawm no peb yuav mus tham txog qho yam. Tej yam ntawd yuav pab tau kom peb paub tias thaum peb hloov dua siab tshiab, Yehauvas yuav muab peb tej kev txhaum tshem tawm thiab cia peb nrog nws sib raug zoo dua. Yog peb ua tib zoo soj ntsuas tej piv txwv no ces peb yuav ris Yehauvas txiaj ntsig thiab peb txoj kev hlub rau nws yuav tob zuj zus ntxiv.

YEHAUVAS TSHEM TAWM KEV TXHAUM

5. Muaj li cas xwb thaum Yehauvas zam peb lub txim?

⁵ Nyob rau hauv phau Vajlugkub, kev txhaum zoo ib yam li ib lub nra hnyav heev. Vaj Ntxwv Daviv hais txog nws tej kev txhaum li no: “Kuv tej kev txhaum nphau los tsuam kuv; tej kev txhaum ntawd ua lub nra hnyav rau kuv ris tsis taus li lawm.” (Phau Ntawv Nkauj 38:4) Tiam sis Yehauvas zam cov neeg uas tso lawv tej kev txhaum tseg. (Phau Ntawv Nkauj 25:18; 32:5) Lo lus Henplais rau lo lus “zam” yog hais txog “muab tsaws tawm” los sis “nqa.” Yog li ntawd, thaum Yehauvas zam peb tej kev txhaum ces cuag li nws tsaws hlo peb lub nra mus lawm.

6. Yehauvas zam peb tej kev txhaum ntau npaum li cas?

⁶ Nyob hauv phau Vajlugkub siv ib lo lus piv txwv los mus pab kom peb pom tias Yehauvas zam peb tej kev txhaum li cas. Phau Ntawv Nkauj 103:12 hais tias: “Hnubtuaj deb hnubpoob npaum li cas, [Yehauvas] tshem peb tej kev txhaum mus povtseg deb npaum li ntawd.” Hnub tuaj thiab hnub poob yeej tsis sib cuag ib zaug li. Qhov no qhia tau tias Yehauvas tshem peb tej kev txhaum mus deb tshaj li tej uas peb xav tau. Yog li ntawd, Yehauvas yeej zam peb tej kev txhaum tag nrho!

7. Yehauvas piav tias nws muab peb tej kev txhaum ua li cas? (Mikhas 7:18, 19)

⁷ Thaum Yehauvas zam peb tej kev txhaum, nws yeej tsis khaws chim ntxiv lawm. Vaj Ntxwv Hexekiyas sau li no txog Yehauvas: “Koj muab kuv lub txim huvsi laim pov tseg rau tom koj nrob qaum.” (Yaxayas 38:9, 17) Qhov no qhia tau tias thaum Yehauvas muab ib tug uas hloov dua siab tshiab tej kev txhaum laim pov tseg lawm, nws yeej tsis rov mus nrhiav dua. Peb kuj muab tau nqe ntawd txhais li no tias: “Koj tshem kuv tej kev txhaum cuag li ib txwm tsis muaj li.” Yehauvas kuj hais ib qho piv txwv ntxiv nyob rau ntawm Mikhas 7:18, 19. (Nyeem.) Ob nqes no qhia tias Yehauvas muab peb tej kev txhaum pov tseg mus ti nkaus hauv qab thu hiav txwv. Yav puag thaum ub, yog muaj ib yam twg poob rau hauv qab thu hiav txwv lawm ces yeej yuav nrhiav tsis tau rov los.

8. Peb kawm tau dab tsi txog txoj kev zam txim?

⁸ Nyob hauv phau Vajlugkub qhia meej tseeb tias thaum Yehauvas zam txim rau peb, nws yeej tshem hlo peb tej kev txhaum lawm ces peb tsis txhob ntxhov siab txog. Daviv hais tias, “thaum Vajtswv zam txim thiab tsis cim ntsoov tus twg tej kev txhaum, tus ntawd yuav kaj siab. Thaum Vajtswv Yehauvas tsis suav txim rau tus twg, tus ntawd yuav nyob kaj siab lug.” (Loos 4:7, 8) Ua li no thiaj li yog zam txim tiag tiag!

YEHAUVAS MUAB PEB TEJ KEV TXHAUM NTXUAV TAWM

9. Yehauvas siv lo lus piv txwv twg los qhia peb txog nws txoj kev zam txim?

⁹ Vim muaj tus nqi txhiv, Yehauvas thiaj li muab tau peb tej kev txhaum ntxuav tawm mus. Nyob hauv phau Vajlugkub, peb nyeem tias Yehauvas muab tau tej kev txhaum ntxuav mus. Qhov no thiaj ua rau tus neeg txhaum dawb huv. (Phau Ntawv Nkauj 51:7; Yaxayas 4:4; Yelemis 33:8) Yehauvas muab piav li no tias: “Txawm yog nej tej kev txhaum yuav liab cuag ntshav los kuv yuav ua kom dawb paug li daus, txawm yog nej tej kev txhaum dub doog los kuv yuav ua kom dawb paug li tej plaub yaj.” (Yaxayas 1:18) Yeej tsis yooj yim rau ib tug twg ntxuav tej yam liab uas tsuas rau ib daim ntaub dawb tawm. Yehauvas thiaj li siv lo lus piv txwv no los qhia rau peb tias nws yeej ntxuav tau peb tej kev txhaum tawm huv tib si, twb tsis paub tias muaj nyob rau ntawd.

10. Zaj lus piv txwv twg qhia ntxiv txog Yehauvas txoj kev zam txim?

¹⁰ Zoo ib yam li zaj kawm tas los no tau hais, kev txhaum zoo thooj li tiv nuj tiv nqi. (Mathais 18:32-35) Txhua txhua zaus peb ua txhaum, peb huab yam tiv nuj tiv nqi ntxiv. Tiam sis thaum Yehauvas zam peb lub txim, zoo ib yam li nws them peb tej nuj nqis tag lawm. Nws tsis rob kom them rov qab rau nws. Thaum hnov zaj lus piv txwv no ua rau peb lub siab kaj nrig tias Yehauvas kam zam peb lub txim lawm tiag!

11. Nyob hauv phau Vajlugkub thaum hais txog muab peb tej kev txhaum ntxuav tawm, yog li cas tiag? (Tes Hauj Lwm 3:19)

¹¹ Yehauvas tsis yog zam peb lub txim tiam sis nws muaj ntxuav tawm kom du lug. (Nyeem Tes Hauj Lwm 3:19.) Muab ua piv txwv li no tias koj tiv nyiaj ntau heev tiam sis muaj ib tug cia li xuas cwj mem kos tsis pub them. Txawm nws muab kos li ntawd los txhua tus tseem pom tias koj tiv npaum li cas. Tiam sis yav thaum ub cov kua mem uas tib neeg siv ntawd kuj muab tau dej los ntxuav tawm. Thaum ib tug muab cov nuj nqis ntxuav tawm ces tsis pom ntxiv lawm, cuag li ib txwm tsis muaj nyob rau ntawd. Peb zoo siab kawg li uas Yehauvas zam peb lub txim zoo li ntawd!​—Phau Ntawv Nkauj 51:9.

12. Peb kawm tau li cas los ntawm zaj lus piv txwv txog tauv huab uas tsaus nti?

¹² Muaj dua ib qho piv txwv qhia txog qhov uas Yehauvas muab peb tej kev txhaum ntxuav tawm. Nws hais tias: “Kuv twb tshem koj tej kev fav xeeb ploj ntais yam li tauv huab, thiab tshem koj lub txim yam li tej huab pw hav.” (Yaxayas 44:22) Thaum Yehauvas zam peb lub txim ces zoo yam nkaus li nws siv ib tauv huab tsaus nti los npog peb tej kev txhaum kom tsis txhob pom ntxiv lawm.

13. Peb xav li cas xwb thaum Yehauvas zam peb tej kev txhaum?

¹³ Tag nrho cov piv txwv no qhia li cas rau peb? Thaum Yehauvas zam peb lub txim lawm, peb yuav tau tsis txhob cia peb lub siab rov qab nkaug peb tas zog. Yexus Khetos tus nqi txhiv twb daws peb tej kev txhaum tag nrho huv tib si. Nco ntsoov tias thaum Yehauvas zam ib tug twg tej kev txhaum ces cuag li ib txwm yeej tsis tau muaj hlo li. Tej no yog Yehauvas txoj kev zam txim yog tias peb hloov siab tshiab lawm tiag tiag.

YEHAUVAS ROV QAB TXAIS PEB

14. Vim li cas peb ho tso siab tau tias Yehauvas zam peb lub txim lawm tiag tiag? (Saib daim duab.)

¹⁴ Thaum Yehauvas zam peb lub txim, nws yeej cia peb nrog nws sib raug zoo ces tsis tas peb lub siab yuav rov qab nkaug peb tsis tseg. Peb tsis tas ntshai nyob tsam Yehauvas ho cib nyeej thiab nrhiav kev los rau txim rau peb. Thaum Yehauvas hais tias nws zam txim, peb cia li tso siab plhuav rau nws cov lus. Yehauvas hais rau Yelemis tias: “Kuv yuav zam txim rau lawv thiab kuv yuav tsis cim ntsoov lawv tej kev txhaum li lawm.” (Yelemis 31:34) Povlauj yeej siv tib co lus no thaum nws hais tias: “Kuv . . . yuav tsis cim ntsoov lawv lub txim ib zaug li lawm.” (Henplais 8:12) Ua li qhov no yog li cas tiag?

15. Vim li cas ho hais tias Yehauvas tsis nco qab peb tej kev txhaum lawm?

¹⁵ Nyob rau hauv phau Vajlugkub thaum hais txog “nco txog,” tsis yog kom ib tug xav txog ib yam dab tsi uas muaj yav tas los lawm tiam sis yog hais txog ib tug twg yuav ua ib yam dab tsi. Xws li thaum tus yawg raug txim uas dai ntawm Yexus ib sab tau hais tias: “Yexus, thaum koj ua Vaj Ntxwv kav, thov koj nco txog kuv.” (Lukas 23:42, 43) Tus yawg ntawd tsis tau thov kom Yexus xav txog nws rau lub sij hawm ntawd. Yexus thiaj teb tias nws yuav tsa tus yawg ntawd sawv rov qab los. Yog li ntawd, thaum Yehauvas hais tias nws tsis nco qab peb tej kev txhaum lawm, yog nws hais tias nws zam txim rau peb thiab yuav tsis rau txim ntxiv rau peb yav tom ntej.

16. Nyob hauv phau Vajlugkub tau muab peb piv rau dab tsi?

¹⁶ Thaum Yehauvas zam txim pub rau peb, ua rau peb dim plaws txhua yam. Nyob rau hauv phau Vajlugkub kuj siv dua ib qho lus piv txwv los pab peb nkag siab txog qhov no. Vim peb yog noob txaug neeg txhaum ces peb yog “kev txhaum qhev.” Tiam sis thaum Yehauvas zam txim pub rau peb ces peb “twb dim tsis ua kev txhaum qhev lawm.” (Loos 6:17, 18; Tshwmsim 1:5) Yog li ntawd, thaum peb paub tias Yehauvas zam peb lub txim lawm, ua rau peb kaj siab lug ib yam li ib tug tub qhe uas dim plaws cev qhev.

17. Yehauvas txoj kev zam txim pab kho tau peb li cas? (Yaxayas 53:5)

¹⁷ Nyeem Yaxayas 53:5. Nyob hauv phau Vajlugkub hais tias vim peb yog noob txaug neeg txhaum ces zoo yam li peb ev rawv ib tug kab mob. Vim Yehauvas tau tso nws tus Tub los tuag txhiv peb lub txim ces zoo yam li nws kho peb tus mob zoo du lug. (1 Petus 2:24) Thaum peb ua txhaum ces kuj rhuav tau peb txoj kev sib raug zoo nrog Yehauvas. Tiam sis vim muaj tus nqi txhiv, nws kuj zam tau peb lub txim thiab peb kuj muaj rab peev xwm rov qab los nrog nws sib raug zoo dua. Zoo ib yam li ib tug neeg mob hnyav heev zoo siab thaum kho tau nws tus mob, peb los kuj zoo siab thaum Yehauvas zam peb lub txim, txais yuav peb thiab peb rov qab los nrog nws sib raug zoo.

YEHAUVAS TXOJ KEV ZAM TXIM TSAV TAU PEB LUB NEEJ

18. Peb kawm tau li cas los ntawm cov lus piv txwv uas hais txog Yehauvas txoj kev zam txim? (Saib lub ntsiab “Yehauvas Zam Peb Lub Txim.”)

¹⁸ Peb kawm tau ntau yam los ntawm cov lus piv txwv uas hais txog Yehauvas txoj kev zam txim. Thaum Yehauvas zam peb lub txim, yeej zoo tam li peb ib txwm tsis tau ua txhaum thiab nws yuav tsis rau txim rau peb yav tom ntej. Yog li ntawd, peb muaj tau ib txoj kev sib raug zoo nrog peb Leej Txiv saum ntuj ceeb tsheej. Peb yuav tau nco ntsoov tias txoj kev zam txim tiag tiag yog ib qho khoom pub uas Yehauvas pub vim nws muaj kev hlub nplua mias rau peb noob neej. Peb tsis tsim nyog tau tej no tiam sis Yehauvas muab pub dawb dawb do do rau peb.​—Loos 3:24.

19. (1) Yuav kom Yehauvas zam peb lub txim, peb yuav tau ua dab tsi? (Loos 4:8) (2) Nyob rau zaj txuas ntxiv tom ntej no peb yuav kawm txog dab tsi?

¹⁹ Nyeem Loos 4:8. Peb ris txiaj ntsig kawg li uas Yehauvas yog tus Vajtswv uas “zam txim rau peb tiag tiag.” (Phau Ntawv Nkauj 130:4) Nco ntsoov tias yuav kom Yehauvas zam tau peb lub txim, peb yuav tau ua ib yam tseem ceeb. Yexus hais tias: “Yog nej tsis zam tej uas lwm tus ua txhaum rau nej ces nej Leej Txiv yuav tsis zam nej ib yam nkaus.” (Mathais 6:14, 15) Yog li ntawd, peb yuav tau xyaum Yehauvas es zam lwm tus lub txim. Nyob rau zaj kawm txuas ntxiv tom ntej no yuav pab kom peb paub ua li ntawd.