YUAV UA LI CAS THIAJ TSIS NYUAJ SIAB

Kev Nyuaj Siab Yog Li Cas Tiag?

Peb lub cev yuav zoo li cas thaum peb raug kev nyuaj siab? Txojkev nyuaj siab ua rau lub hlwb xa xov mus rau lub cev kom lub plawv dhia ceev, kom ntshav siab, kom ua pa txog siav, thiab kom tej leeg nruj tuaj. Ua li no, peb thiaj thev taus qhov xwm txheej uas raug peb. Thaum dhau qhov xwm txheej lawd, lub siab mam nqig thiab lub cev mam rov nyob tus.

KEV NYUAJ SIAB KUJ PAB TAU PEB THIAB

Zoo yam li peb nyuam qhuav hais, kev nyuaj siab pib saum peb lub hlwb los. Nyob ntawm txojkev nyuaj siab, tej zaum kuj muaj peev xwm pab tau peb thev taus peb qhov teeb meem thiab pab peb txiav txim seb yuav ua li cas tamsim ntawd. Tej zaum tseem pab peb xeem tau ntawv zoo dua, muaj tswvyim nrhiav haujlwm, lossis hajyam muaj zog sib xeem dhia ua si. Yog li ntawd, muaj tej hom kev nyuaj siab uas kuj pab tau peb.

Txawm li ntawd los, yog peb pheej nyuaj siab tas li ces yuav tsis zoo rau peb lub cev. Tej zaum yuav ua rau peb muaj mob, chim, tu siab, tsis meej pem, thiab muaj tus cwj pwm tsis zoo. Cov neeg uas muaj kev nyuaj siab tau ntev los, muaj tej tug tau noj tsau haus qaug, quav yeeb quav tshuaj, haus luam yeeb, thiab ua lwm yam los pab lawv thev kom taus. Yog lawv ua li no, lawv yuav muaj tus mob nyuaj siab, lub zog yuav ntaug lossis yuav xav muab lawv txojsia txo.

Tsis tas li ntawd, txojkev nyuaj siab ua rau lub cev muaj mob ntau qhov. Tiamsis nyob ntawm tus neeg, nyias mob txawv nyias.

KEV NYUAJ SIAB UA RAU LUB CEV MUAJ MOB

Lub hlwb yuav ua li no.

Lub hlwb xa xov mus rau lub cev kom lub plawv dhia ceev zog, kom ntshav siab, thiab kom muaj ntshav qab zib. Zoo li no, tus neeg yuav hajyam muaj zog tiv thaiv nws tus kheej. Tiamsis yog nyuaj siab dhau lawd ces tej zaum

peb ua tsis taus siab ntev, txhawj xeeb, ntxhov siab, mob taub hau, pw tsis taus

Tej pob txha thiab tej nqaij tej leeg yuav ua li no.

Tej leeg yuav nruj kom lub cev thiaj thev taus mob. Tiamsis yog nyuaj siab dhau lawd ces tej zaum

peb yuav mob ib ce, mob taubhau, tu leeg

Lub ntsws yuav ua li no.

Peb yuav siv zog ua pa. Tiamsis yog nyuaj siab dhau lawd ces tej zaum

peb yuav txog siav ua tsis taus pa lossis peb ib ce yuav ceeb thiab ntshai

Lub plawv thiab tej hlab ntsha yuav ua li no.

Lub plawv yuav dhia ceev zuj zus. Cov hlab ntsha yuav nruj kom cais cov ntshav mus rau lwm qhov chaw hauv lub cev, xws li cov leeg. Tiamsis yog nyuaj siab dhau lawd ces tej zaum

peb yuav muaj ntshav siab, plawv yuav nres, hlab ntsha yuav txhaws lossis tawg nyob rau lub hlwb

Tej qog hauv cev yuav ua li no.

Tej qog yuav xa haumoos (hormone) mus pab lub cev thev taus tej kev nyuaj siab. Lub siab yuav ua kom ntshav qab zib, lub cev thiaj muaj zog. Tiamsis yog nyuaj siab dhau lawd ces tej zaum

peb yuav mob ntshav qab zib, tsis muaj zog tiv thaiv kab mob, puv zog tuaj, ua neeg siab luv, tu siab sai sai

Tej plab hnyuv yuav ua li no.

Tej plab hnyuv yuav tsis zom zaub mov zoo mus yug lub cev. Tiamsis yog nyuaj siab dhau lawd ces tej zaum

peb yuav xeev siab, ntuav, raws plab, cem quav

Lub cev xeeb menyuam yuav ua li no.

Kev nyuaj siab yuav ua rau peb tsis xav pw ua txwj ua nkawm lawm. Tiamsis yog nyuaj siab dhau lawd ces tej zaum

cov txivneej yuav ua tsis taus txivneej, cov pojniam yuav tsis coj khaub ncaws txhua lub hlis