Yuav Thev Taus Kev Nyuaj Siab Li Cas

Ua Siab Ntev Peem Ib Hnub Dhau Ib Hnub

“Yog li ntawd, nej tsis txhob txhawj rau tagkis, rau qhov tagkis yeej muaj kev txhawj txaus rau tagkis lawm.”​—MATHAIS 6:34.

Lub ntsiab: Ua neej nyob ces sawvdaws yeej txhawj txog ntau yam. Tiamsis tsis txhob txhawj ntau dhau txog tej yam uas tsis tau muaj tshwm sim. Txog thaum ntawd yog muaj li cas tiag, yuav ua li cas mam ua.

• Kev nyuaj siab yuav hajyam ua rau peb ntxhov siab xwb. Yog li ntawd, muab xav tias yog peb pheej txhawj txog qhov teeb meem uas peb ua tsis tau dabtsi los daws, ces peb yuav hajyam nyuaj siab xwb. Tsis tas li ntawd, tej zaum kuj yuav tsis muaj raws li peb xav.

Ua Li Peb Ua Tau

“Tus neeg khavtheeb yuav poob ntsejmuag, tiamsis tus neeg txawj ntse paub txo hwjchim.”​—PAJLUG 11:2.

Lub ntsiab: Peb ua tsis tau txhua yam zoo. Txhob xav tias lwm tus yuav ua tau txhua yam zoo thiab.

• Txo hwjchim, ua li peb ua tau xwb, thiab txaus siab rau tej yam uas lwm tus ua. Yog peb ua li no, sawvdaws thiaj tsis tshua nyuaj siab thiab paub sib pab ua haujlwm. Kuj zoo rau peb nrog lwm tus tso dag tso luag. Rau qhov thaum muaj ib yam twg tsis mus raws li peb lub siab xav, peb thiaj li ua taus siab ntev thiab kaj siab dua.

Paub Seb Dabtsi Ua Rau Koj Nyuaj Siab

“Tus neeg uas ua siab ntev yog tus txawj ntse.”​—PAJLUG 17:27.

Lub ntsiab: Yog peb pheej xav txog qhov phem xwb ces peb yuav ua tsis taus siab ntev.

• Ua zoo xav seb dabtsi ua rau peb nyuaj siab. Puas muaj tej yam twg peb ua tau kom tej ntawd tsis txhob ua rau peb nyuaj siab lawm? Tej zaum yuav zoo rau peb muab tej yam ntawd sau cia. Sau seb peb xav li cas thiab coj tus cwjpwm zoo li cas. Ua li no, peb thiaj paub tias dabtsi ua rau peb nyuaj siab, ces peb yuav paub hloov thiab tsis ua tej yam ntawd ntxiv lawm. Tiamsis yog peb tseem nyuaj siab, ces tej zaum twb yog vim peb tsis paub teem sijhawm zoo lossis peb muaj haujlwm ntau dhau lawm.

• Tej zaum zoo rau peb hloov peb txojkev xav, rau qhov tej yam uas ua rau peb nyuaj siab yuav tsis ua rau lwm tus nyuaj siab. Cia peb xyaum xav li no:

  1. Txhob maj xav tias lwm tus txhob txwm ua phem rau peb. Xws li thaum ib tug neeg txeeb peb hauv ntej. Yog peb xav tias nws tsis paub cai ces peb yuav npau taws. Tiamsis tej zaum twb yog nws muaj xwm dabtsi lawm xwb, tsis yog nws txhob txwm ua li ntawd rau peb.

  2. Xav seb peb yuav siv peb lub sijhawm li cas. Xws li, thaum peb ceeblaj tos tus kws kho mob lossis ceeblaj tos nkag mus caij dav hlau. Tej zaum zoo rau peb siv lub sijhawm ntawd los nyeem ntawv lossis ua lwm yam haujlwm, peb thiaj yuav tsis nco qab nyuaj siab lawm.

  3. Xav seb yam twg yog yam uas tseem ceeb tshaj. Yog tias peb nyuaj siab, peb yuav tsum ntsuas seb qhov teeb meem ntawd loj los me. Tej zaum twb tsis tsim nyog peb nyuaj siab kiag li.

Txawj Ntsuas Sijhawm Kom Zoo

“Txhua yam uas nej ua, nej yuav tsum ua kom zoo thiab tsis txhob lam ua dog ua dig.”​—1 KAULEETHAUS 14:40.

Lub ntsiab: Txhua yam hauv peb lub neej yuav tsum muaj chaw txawb chaw rau.

• Txhua yam hauv peb lub neej, peb yeej xav ua kom zoo. Tiamsis yog peb pheej laug sijhawm ces peb ua dabtsi los zoo nkaus li pheej tsis tiav. Cia peb ua li no:

  1. Teem caij nyoog kom raws li lub sijhawm peb muaj xwb.

  2. Xav seb dabtsi pheej ua rau peb laug sijhawm ces peb yuav tau hloov yam ntawd.

Muaj Caij Ua Haujlwm Muaj Caij So

“Qhov uas yus muaj kev kaj siab me ntsis zoo dua li yus ob txhais tes ua haujlwm txhua lub sijhawm. Tej ntawd tsuas zoo ib yam li caum cua xwb.”​—TEJ LUS QHIA 4:6.

Lub ntsiab: Cov tibneeg khwv ua haujlwm tsis so li, tsis pom tus nqe zog uas lawv “ob txhais tes ua haujlwm.” Yog lawv pheej coj li no, ces tej zaum lawv lub zog yuav ntaug zuj zus thiab yuav tsis muaj sijhawm ua dabtsi li lawm.

• Peb yuav tsum nkag siab tias nyiaj txiag tsis yog yam uas tseem ceeb tshaj. Txhob xav tias yog peb nplua nuj ces peb yuav tsis txhawj txog dabtsi li lawm. Yog hajyam muaj nyiaj ces hajyam nyuaj siab xwb. Tej Lus Qhia 5:12 twb hais tias: “Tus neeg muaj txiag npluanuj muaj ntau yam kev nyuaj siab ua rau nws pw tsis tsaug zog.” Yog li ntawd, muaj li cas ces siv li ntawd xwb.

• Nrhiav sijhawm los so. Yog peb ua tej yam uas peb nyiam ces peb yuav kaj siab dua. Tiamsis tsis yog txhua yam peb xav ua yuav pab tau peb, xws li saib this vis.

• Ntsuas seb thaum twg zoo rau peb siv tej twj koos pis tawj, xws li email, ntaus ntawv hauv xov tooj lossis tej vej xaij ntaus phoojywg. Thaum tsis yog lub caij ua haujlwm, yog tias tsis tsim nyog teb ces tsis txhob mus saib email.

Saib Xyuas Peb Lub Cev Kom Zoo

“Yog peb xyaum khiav lossis xyaum ua li ub li no yuav muaj nqis mentsis rau peb lub cev.”​—1 TIMAUTES 4:8.

Lub ntsiab: Niaj hnub taug kev lossis khiav ua si thiaj li noj qab nyob zoo.

• Xyaum ua tej yam zoo kom pab peb lub cev. Tsis txhob yoo mov, tiamsis noj tej zaub mov zoo los yug peb lub cev, thiab mus ua tej yam kom peb tsis txhob xav txog peb tej kev nyuaj siab. Ua li no, peb thiaj yuav kaj siab dua. Tsis tas li ntawd, nco ntsoov nrhiav sijhawm los so.

• Thaum muaj kev nyuaj siab tsis txhob mus xyaum haus luam yeeb, ua yeeb ua tshuaj, thiab haus dej haus cawv. Tej no pab tsis tau peb tiamsis yuav ua rau peb hajyam nyuaj siab xwb. Tsis tas li ntawd, tej no kuj yuav ua rau peb muaj mob thiab nkim tej nyiaj txiag uas peb mus khwv tau los.

• Yog tias peb thev tsis taus kev nyuaj siab ces tsis txhob txaj muag nrhiav kev pab ntawm tej kws kho mob uas paub pab cov neeg muaj kev nyuaj siab.

Paub Yam Twg Tseem Ceeb Dua

“Paub hais tias yam twg yog yam uas zoo dua ntais.”​—FILIPIS 1:10.

Lub ntsiab: Peb yuav tau ntsuas seb yam twg tseem ceeb dua.

• Ntsuas tej haujlwm peb ua, seb txoj twg yog txoj tseem ceeb tshaj. Yog peb ua li no, peb thiaj paub tias yuav ua txoj haujlwm twg ua ntej, txoj twg tom qab, thiab txoj twg yog txoj peb muab faib tau rau lwm tus ua.

• Ib lub lim tiam twg, sau tseg txhua yam peb ua. Tom qab ntawd, saib seb peb puas siv tau sijhawm kom zoo zog. Yog peb siv sijhawm mus ua tej yam tseem ceeb xwb ces peb yuav tsis tshua nyuaj siab.

• Nrhiav sijhawm so kom los siav. Yog tias peb so mentsis xwb ces twb pab tau peb rov qab tuaj zog thiab tsis tshua nyuaj siab lawm.

Nrog Lwm Tus Tham

“Kev txhawjxeeb ua tau rau koj kev zoo siab ploj mus, tiamsis tej lus zoo yuav txhawb tau koj lub zog.”​—PAJLUG 12:25.

Lub ntsiab: Tej lus zoo uas lwm tus hais yuav cuab peb lub zog.

• Qhia peb tej kev nyuaj siab rau ib tug uas peb tso siab, peb lub siab thiaj li nqig. Tej zaum nws yuav hais tau tej yam uas yuav pab tau peb xav mus rau qhov zoo thiab tseem yuav nrhiav tau lwm txoj hau kev los daws peb tej teeb meem.

• Thov lwm tus pab. Puas muaj tej haujlwm uas peb muab tau rau lwm tus pab ua?

• Yog peb ua haujlwm nrog ib tug uas pheej ua rau peb nyuaj siab, xav seb peb yuav hais li cas rau tus ntawd. Tej zaum zoo rau peb mus nrog nws tham tiamsis ua tib zoo hais tias tej nws tau ua ntawd ua rau peb nyuaj siab. (Pajlug 17:27) Tom qab ntawd, yog tias nws tseem coj li qub ces zoo rau peb tsis txhob nrog nrog nws ua ke lawm.

Muaj Kev Sib Raug Zoo Nrog Vajtswv

“Tsis yog mov xwb thiaj cawm tau neeg txojsia, tiamsis yog Vajtswv tej lus txhua lo thiaj cawm tau.”​—MATHAIS 4:4.

Lub ntsiab: Tibneeg yuav tsum muaj zaub muaj mov noj, muaj khaub ncaws hnav, thiab muaj vaj muaj tse nyob tiamsis qhov tseem ceeb tshaj yog txojkev sib raug zoo nrog Vajtswv. Yog li ntawd, peb yuav tau paub Vajtswv zoo peb thiaj muaj kev zoo siab.

• Kev thov Vajtswv yuav pab tau peb. Vajtswv xav kom peb muab peb “tej kev nyuaj siab huv tibsi tso plhuav rau Vajtswv” vim nws hlub peb. (1 Petus 5:7) Cia peb thov Vajtswv thiab xav rau qhov zoo, peb thiaj yuav kaj siab.​—Filipis 4:6, 7.

• Mus nyeem tej yam uas yuav txhawb kom peb muaj kev sib raug zoo nrog Vajtswv. Phau ntawv uas koj tabtom nyeem no, tej hauv paus ntsiab lus yog rho tawm hauv phau Vajlugkub los. Vajtswv muab phau Vajlugkub rau peb xwv peb thiaj li paub nws zoo. Tsis tas li ntawd, yog tias peb muab nyeem, peb yuav muaj “tswvyim thiab kev txawj ntse.” (Pajlug 3:21) Yog koj tsis paub seb yuav nyeem tog twg tuaj, ces mus nyeem phau Pajlug ua ntej los tau.