ZAJ KAWM 4
ZAJ NKAUJ 18 Nco Txiaj Ntsig Rau Tus Nqe Txhiv
Tus Nqi Txhiv Qhia Li Cas?
“Vajtswv ua li ntawd twb yog Vajtswv qhia rau peb hais tias nws hlub peb.”—1 YAUHAS 4:9.
LUB NTSIAB RAU ZAJ NO
Thaum peb kawm txog tus nqi txhiv ces peb yuav pom Vajtswv Yehauvas thiab Yexus Khetos nkawd tej yeeb yam qhuas lug.
1. Vim li cas zoo rau peb nco ntsoov ua kev cai nco txog Yexus txhua txhua xyoo?
YEHAUVAS muab ib yam zoo zoo pub rau peb uas yog thaum nws txib nws tus Tub los tuag theej tib neeg! (2 Kauleethaus 9:15) Vim muaj Yexus los tuag, koj thiaj muaj rab peev xwm nrog tau Yehauvas sib raug zoo thiab nyob tau mus ib txhis. Yog li ntawd, peb yuav tau ris Yehauvas txiaj ntsig vim nws txoj kev hlub nws thiaj cia kom muaj tus nqi txhiv! (Loos 5:8) Yuav kom peb nco ntsoov ris txiaj ntsig, Yexus thiaj li sam hwm kom ua kev cai nco txog nws txhua txhua xyoo.—Lukas 22:19, 20.
2. Nyob rau hauv zaj kawm no yuav tham txog dab tsi?
2 Xyoo no peb yuav ua kev cai nco txog Yexus rau Hnub 6 (Saturday), lub 4 Hlis tim 12 xyoo 2025. Peb txhua tus yeej npaj siab lug yuav mus koom. Nyob rau ncua sij hawm ntawd, zoo rau peb lauj sij hawm los xav txog tej uas Yehauvas thiab nws tus Tub nkawd tau ua rau peb. Nyob rau hauv zaj kawm no peb yuav mus tham txog seb tus nqi txhiv qhia peb li cas txog Yehauvas thiab nws tus Tub. Hos nyob rau zaj txuas ntxiv tom ntej, yuav pab kom peb to taub tias tus nqi txhiv pab tau peb li cas thiab yuav ua li cas peb thiaj paub ris txiaj ntsig rau.
TUS NQI TXHIV QHIA PEB LI CAS TXOG YEHAUVAS?
3. Vim li cas ib tug txiv neej los tuag ho cawm tau tib neeg ntawm kev txhaum thiab kev tuag? (Saib daim duab.)
3 Tus nqi txhiv qhia peb txog Yehauvas txoj kev ncaj ncees. (2 Kevcai 32:4) Thaum Adas tsis mloog Vajtswv lus, nws thiaj li poob kev txhaum thiab tuag. Vim peb yog nws cov xeeb leej xeeb ntxwv, peb thiaj saws tau kev txhaum thiab tuag tib yam nkaus. (Loos 5:12) Yuav kom peb dim kev txhaum thiab kev tuag, Yehauvas thiaj li cia Yexus los ua tus nqi txhiv. Tiam sis ua li cas ib tug neeg tsis muaj txhaum ho daws tau tib neeg ntawm kev txhaum thiab kev tuag? Tus tub txib Povlauj qhia li no tias: “Ib tug [uas yog Adas] tsis mloog lus thiaj ua rau txhua tus ua txhaum. Ib yam li ntawd, ib tug [uas yog Yexus] mloog lus thiaj ua rau coob tus ncaj ncees.” (Loos 5:19; 1 Timautes 2:6) Raws li hais no Povlauj tus nru lus yog txhua tus puav leej muaj txhaum thiab txawj tuag vim ib tug txiv neej uas tsis muaj txhaum tsis mloog Vajtswv lus. Yuav kom cawm tau txhua tus dim, yuav tsum muaj ib tug txiv neej uas tsis muaj txhaum thiab mloog Vajtswv lus los tso.
Vim ib tug txiv neej, peb thiaj li saws tau txoj kev txhaum thiab txawj tuag. Tiam sis muaj ib tug txiv neej cawm peb dim (Saib nqe 3)
4. Vim li cas Yehauvas tsis cia li cia Adas cov xeeb leej xeeb ntxwv uas mloog lus nyob mus ib txhis?
4 Puas tas Yehauvas cia Yexus los tuag daws peb? Cas Yehauvas tsis cia li tseg Adas tej xeeb leej xeeb ntxwv uas mloog Nws lus nyob mus ib txhis xwb? Tej zaud peb xav tias ua li ntawd yuav zoo tiam sis Yehauvas txoj kev ncaj ncees tsis zoo thooj li neeg xav. Vim Yehauvas ncaj ncees, nws yuav tsis cia qhov uas Adas tsis mloog lus ntawd tag dawb tag do, cuag li Adas twb tsis tau ua txhaum thiab nws tej xeeb leej xeeb ntxwv tsis muaj txhaum.
5. Vim li cas peb ho paub hais tias Yehauvas yuav ua qhov yog?
5 Yog Yehauvas tsis cia kom muaj tus nqi txhiv es cia Adas cov xeeb leej xeeb ntxwv uas yog noob txaug neeg txhaum nyob tau mus ib txhis ces Yehauvas kuj tsis coj raws li nws tej kev cai lawm. Txawm hais txog lwm yam los ntshe tib neeg yuav xav tias Yehauvas yuav tsis coj raws li nws tej kev cai thiab. Ntxiv ntawd, tib neeg yuav tsis ntseeg nws tej lus cog tseg. Tiam sis txhob poob siab rau tej no, Yehauvas yeej ib txwm coj ncaj ncees. Nws thiaj li cia nws tus Tub los mus tuag theej peb lub txhoj.
6. Qhov yeeb yam twg ntxiv ua rau Yehauvas tso nws tus Tub los tuag? (1 Yauhas 4:9, 10)
6 Tus nqi txhiv kuj qhia peb txog Yehauvas txoj kev hlub. (Yauhas 3:16; nyeem 1 Yauhas 4:9, 10.) Yehauvas xav kom peb yog ib feem ntawm nws tsev neeg thiab nws xav kom peb nyob mus ib txhis. Thaum Adas poob kev txhaum, nws tsis yog ib tug ntawm Yehauvas tsev neeg ntxiv lawm. Ces thaum peb yug los peb thiaj tsis yog Yehauvas tsev neeg. Vim muaj tus nqi txhiv, Yehauvas thiaj zam tau tib neeg lub txim txhaum, thiab cia cov uas mloog nws lus thiab ntseeg nws los ua nws tsev neeg dua. Vim muaj li no peb thiaj nrog tau Yehauvas thiab cov kwv tij nkauj muam sib raug zoo. Tej no ua puav pheej tias Yehauvas hlub peb tiag tiag li!—Loos 5:10, 11.
7. Tej uas Yexus raug pab kom peb nkag siab tias Yehauvas hlub peb npaum li cas?
7 Peb yuav to taub hais tias Yehauvas hlub peb npaum li cas thaum peb ua tib zoo xav tias mob Yehauvas siab heev uas cia nws tus Tub los tuag txom nyem ntsuav. Xatas hais tias thaum ib tug twg thev tsis taus ces lawv yeej yuav tsis npuab siab rau Yehauvas kiag li. Qhov uas qhia tias Xatas dag yog Yehauvas tsis tav tej yam uas Yexus raug ua ntej Yexus tuag. (Yauj 2:1-5; 1 Petus 2:21) Thaum Yexus raug tib neeg thuam, cov tub rog nplawm, thiab raug ntsia rau saum tus ncej ntoo, Yehauvas yeej pom txhua yam tag. Nws kuj pom nws tus Tub tuag txom nyem ntsuav. (Mathais 27:28-31, 39) Yog Yehauvas xav tswj txhua yam los yeej tau. Xws li thaum cov neeg tawm tsam hais tias: “Yog Vajtswv txaus siab rau nws, Vajtswv mam li cawm nws.” (Mathais 27:42, 43) Yog lub sij hawm ntawd Yehauvas cuam tshuam ces yuav tsis muaj tus nqi txhiv thiab peb yuav tsis muaj kev vam kev cia siab dab tsi li. Yog li ntawd, Yehauvas thiaj li ua tiag thev saib nws tus Tub nqus pa ua zaum kawg nkaus.
8. Piav seb puas mob Yehauvas siab thaum nws pom nws tus Tub tuag txom nyem ntsuav. (Saib daim duab.)
8 Peb tsis txhob xav tias Vajtswv tsis muaj siab muaj ntsws vim nws muaj hwj chim heev. Yehauvas tsim kom peb muaj yam ntxwv ib yam li nws ces nws yeej txawj xav ib yam li peb thiab. Nyob hauv phau Vajlugkub qhia tias nws yeej txawj “tu siab.” (Phau Ntawv Nkauj 78:40, 41) Cia peb ua tib zoo xav txog Anplahas thiab Ixaj nkawd. Yehauvas hais tias kom Anplahas muab nws tib leeg tub tua fij rau Yehauvas. (Chivkeeb 22:9-12; Henplais 11:17-19) Thaum Anplahas tsa riam yuav tua nws tus tub mas ntshe mob nws siab ib daig ib daig. Zoo ib yam li ntawd, thaum Yehauvas ntsia ntsoov tej neeg phem muab nws tus Tub tua mas yeej ua rau nws lub siab dua rhe!—Mus saib zaj yeeb yaj kiab hauv lub vej xaij jw.org/hmn hu ua Xyaum Lawv Txoj Kev Ntseeg—Anplahas, Ntu 2.
Thaum Yehauvas pom nws tus Tub, nws lub siab dua rhe (Saib nqe 8)
9. Nyob hauv Loos 8:32, 38, 39 qhia rau koj li cas txog Yehauvas txoj kev hlub?
9 Tus nqi txhiv qhia rau peb tias tsis muaj leej twg hlub peb npaum li Yehauvas hlub peb, tsis hais tej nruab ze los sis tej phooj ywg kwv luag. (Nyeem Loos 8:32, 38, 39.) Yehauvas yeej hlub peb tshaj li peb hlub peb tus kheej. Yog koj muaj lub siab xib xav nyob mus ib txhis ces Yehauvas yim huab xav kom koj nyob tau mus ib txhis. Yog koj muaj lub siab xav kom Yehauvas zam koj lub txim ces Yehauvas yim huab xav zam koj lub txim huv tib si. Qhov uas Yehauvas xav kom peb ua rau nws yog ris txiaj ntsig rau tus nqi txhiv, muaj kev ntseeg, thiab mloog nws lus. Tus nqi txhiv yog Vajtswv qhia tias nws hlub peb tshaj plaws li. Thaum nyob rau hauv lub qab ntuj tshiab, peb yuav kawm ntau yam uas nws tau ua rau peb vim nws hlub peb heev.—Tej Lus Qhia 3:11.
TUS NQI TXHIV QHIA PEB LI CAS TXOG YEXUS?
10. (1) Vim li cas Yexus ho ntxhov siab txog qhov uas nws tuag? (2) Yexus ua tau rau Yehauvas lub npe dawb huv li cas? (Saib lub ntsiab “Yexus Ua Tau Rau Yehauvas Lub Npe Dawb Huv.”)
10 Yexus tsis xav kom nws Txiv puas koob puas npe ib qho li. (Yauhas 14:31) Yexus ntxhov siab txoog tsam nws Txiv puas koob puas npe vim lub txim lawv liam nws ntawd zoo tam li ib tug neeg hais lus tuam mom Vajtswv thiab yog ib tug neeg raug txim. Yog li ntawd, Yexus thiaj thov hais tias: “Kuv Txiv, yog koj pom zoo thov tshem lub khob no mus.” (Mathais 26:39) Vim Yexus npuab siab nraim Yehauvas mus txog thaum nws tuag kiag, nws qhia tau tias tej uas Xatas dag txog nws Txiv tsis muaj tseeb.
11. Yexus qhia tias nws hlub tshua txog tib neeg li cas? (Yauhas 13:1)
11 Tus nqi txhiv qhia tias Yexus hlub tshua txog tib neeg heev. Cov nws hlub tshua tshaj yog nws cov thwj tim. (Pajlug 8:31; nyeem Yauhas 13:1.) Yexus paub tias tej yam nws yuav ua hauv ntiaj teb no yuav nyuaj heev, xws li nws yuav raug tuag txom nyem ntsuav. Txawm li ntawd los nws tuaj yeem ua, tsis yog lam ua kom tag kev tag cai xwb. Nws muab tag nrho nws lub siab lub ntsws mus tshaj tawm, cob qhia, thiab pab lwm tus. Tsis hais hnub uas nws yuav raug tuag ntawd los nws haj tseem ntxuav nws cov tub txib ko taw, hais lus txhawb thiab nplig lawv siab. (Yauhas 13:12-15) Thaum Yexus ntsia rau ntawm tus ncej ntoo lawm los nws haj tseem siv me ntsis sij hawm los qhia rau tus neeg raug txim uas dai rau ntawm nws ib sab kom tus ntawd muaj kev vam kev cia siab. Tsis tas li ntawd, nws haj tseem hais kom Yauhas pab saib xyuas nws niam. (Lukas 23:42, 43; Yauhas 19:26, 27) Yexus tsis yog qhia tias nws hlub tib neeg es nws thiaj tuag xwb tiam sis tag nrho nws lub neej hauv ntiaj teb nws yeej ua zoo thiab hlub tib neeg heev.
12. Yexus ua dab tsi los pab peb niaj hnub nim no?
12 Yexus haj tseem ua ntau yam rau peb, tsis yog nws “tuag tib zaug xwb los daws lub txim txhaum.” (Loos 6:10) Nws txoj kev tuag qhib tau ntau txoj hau kev rau nws los ua ntau yam zoo ntxiv zuj zus pub rau peb. Xws li nws rais los ua ib tug Vaj Ntxwv, ib tug Pov Thawj Hlob, thiab tus uas coj lub koom txoos. (1 Kauleethaus 15:25; Efexus 5:23; Henplais 2:17) Yexus yog tus sau cov xaiv tseg thiab pab neeg coob coob ua ntej txoj kev txom nyem loj kawg nkaus xaus.a (Mathais 25:32; Malakaus 13:27) Nws saib xyuas kom peb muaj ub muaj no los tsav peb txoj kev ntseeg rau Yehauvas nyob rau tiam kawg no. (Mathais 24:45) Thaum nws kav 1,000 xyoo, nws tseem yuav ua ntau yam ntxiv pub rau peb. Yehauvas yeej pub nws tus Tub los pab peb tiag tiag li!
RAU SIAB NTSO KAWM TEJ YAM TSHIAB
13. Yuav ua li cas koj thiaj paub tias Vajtswv thiab Khetos nkawd hlub koj?
13 Yog koj rau siab ntso xav ntsoov txog tej uas Vajtswv Yehauvas thiab Yexus Khetos nkawd tau ua ces koj yuav pom nkawd txoj kev hlub. Tej zaum thaum txog lub caij ua kev cai nco txog Yexus, koj kuj ua tib zoo nyeem phau Mathais, Malakaus, Lukas los sis Yauhas. Tsis txhob ho muab nyeem ntau tshooj dhau rau ib lub sij hawm. Tiam sis maj mam nyeem thiab ua zoo tshawb nrhiav seb vim li cas Yehauvas thiab Yexus nkawd ho hlub peb. Tsis tas li ntawd, muab tej uas koj kawm coj mus qhia rau lwm tus paub thiab.
14. Vim li cas txoj kev tshawb nrhiav ho pab tau peb nkag siab tus nqi txhiv thiab lwm yam? (Phau Ntawv Nkauj 119:97) (Saib daim duab.)
14 Yog koj ntseeg Yehauvas tau ntau ntau xyoo lawm, tej zaum koj yuav xav tias puas muaj ib yam tshiab uas koj kawm tau txog Vajtswv txoj kev ncaj ncees, nws txoj kev hlub, thiab tus nqi txhiv. Yog hais txog kawm mas peb yeej kawm tsis txhij tsis txhua thiab tseem tshuav ntau yam peb kawm tsis tag. Yog li ntawd, koj yuav tau nyeem thiab kawm tej ntaub ntawv uas Yehauvas lub koom haum luam tawm. Yog muaj ib yam twg koj nyeem tau es tsis nkag siab, tsis txhob ua siab deb, kav tsij mus tshawb nrhiav. Thaum nrhiav tau, muab coj los xav mus xav los seb ho qhia li cas txog Yehauvas, nws tus Tub, thiab nkawd txoj kev hlub uas muab rau koj.—Nyeem Phau Ntawv Nkauj 119:97.
Txawm peb twb ntseeg Yehauvas tau ntev loo lawm los tseem tshuav ntau yam uas peb tseem kawm tau txog tus nqi txhiv (Saib nqe 14)
15. Vim li cas zoo rau peb pheej tshawb nrhiav tej yam tshiab hauv phau Vajlugkub?
15 Tsis txhob poob siab yog koj ho tshawb tsis tau ib yam tshiab thaum koj nyeem phau Vajlugkub los sis tshawb nrhiav. Muab piv txwv tias zoo yam li ib tug neeg khawb kub. Tus neeg khawb kub yeej lauj sij hawm ntau heev ua ntej nws yuav nrhiav tau kub. Txawm nws nrhiav tsis tau los nws yeej tsis tso tseg vim thaum nws nrhiav tau ib nyuag qhov me me xwb los yeej muaj nuj nqis rau nws. Txhua txhua yam peb tshawb nrhiav tau hauv phau Vajlugkub yeej zoo tshaj li peb nrhiav tau kub. (Phau Ntawv Nkauj 119:127; Pajlug 8:10) Yog li ntawd, koj yuav tau ua siab ntev thiab rau siab nyeem koj phau Vajlugkub.—Phau Ntawv Nkauj 1:2.
16. Peb yuav xyaum Yehauvas thiab Yexus nkawd li cas?
16 Thaum koj kawm Vajlugkub, ua zoo xav seb koj yuav muab qhov twg rau qhov twg coj los siv rau hauv koj lub neej. Xws li tej zaud koj yuav xav xyaum Yehauvas txoj kev ncaj ncees es saib taus txhua tus, tsis xaiv ntsej xaiv muag. Hos tej zaud koj yuav xav xyaum Yexus txoj kev hlub rau nws Txiv thiab tib neeg los ntawm qhov uas koj txaus siab hlo ua li Yehauvas hais thiab yeem muab koj tus kheej mus pab cov kwv tij nkauj muam Khixatias. Tsis tas li ntawd, tej zaud koj yuav xyaum Yexus es mus tshaj tawm rau lwm tus kom lawv thiaj paub txog tus nqi txhiv uas Yehauvas tau muab.
17. Nyob rau zaj txuas ntxiv tom ntej no yuav tham txog dab tsi?
17 Yog peb ua tib zoo kawm kom paub zoo zoo txog tus nqi txhiv ces peb txoj kev hlub rau Yehauvas thiab nws tus Tub yuav hlob zuj zus ntxiv. Tsis tas li ntawd, nkawd yuav hlub peb heev rov qab. (Yauhas 14:21; Yakaunpaus 4:8) Cia peb rau siab ntso siv txhua yam uas Yehauvas pub los kawm ntxiv txog tus nqi txhiv. Nyob rau zaj txuas ntxiv tom ntej, yuav pab kom peb to taub tias tus nqi txhiv pab tau peb li cas thiab yuav ua li cas peb thiaj paub ris Yehauvas txiaj ntsig.
ZAJ NKAUJ 107 Taug Nraim Vajtswv Txojkev Hlub
a Qhov uas Povlauj hais txog hauv Efexus 1:10 tias yuav coj “tej uas nyob saum nruab ntug . . . los nyob ua ke” txawv qhov uas “qaws cov uas Vajtswv xaiv tseg” uas Yexus hais txog nyob rau ntawm Mathais 24:31 thiab Malakaus 13:27. Povlauj hais txog lub sij hawm uas Yehauvas xaiv ib co tib neeg mus nrog Yexus kav thiab pub nws lub hwj huam dawb huv rau lawv. Hos Yexus hais txog lub sij hawm uas qaws cov xaiv tseg uas tseem seem nyob hauv ntiaj teb no mus saum ntuj thaum muaj txoj kev txom nyem loj kawg nkaus.