Peb Ris Txiaj Ntsig Tias Yehauvas Zam Peb Lub Txim

1-2. Noob neej zoo thooj li tus tub hluas li cas?

MUAB ua piv txwv tias muaj ib tug tub hluas los ntawm ib tse tib neeg nplua nuj heev. Muaj ib hnub nws niam thiab nws txiv cia li tag sim neej lawm. Qhov no ua rau nws puas siab puas ntsws tag. Tsis tas li ntawd, nws niam thiab nws txiv muab tej nyiaj txiag phob phum lam ntsuav tag thiab haj tseem tiv nuj tiv nqi rau nws ris. Nws tsis tau ib qho qub txeeg qub teg dab tsi li. Tej neeg uas nws niam nws txiv tiv nqi los haj tseem tuaj rob nyiaj ntawm nws thiab tseev kom nws them tam sim ntawd rau lawv. Tej nuj nqis no yeej tsis muaj ib hnub nws yuav them taus li.

² Tus tub hluas no lub neej muaj ntsis zoo thooj tib yam nkaus li peb lub. Adas thiab Evas nkawd tsis muaj kev txaug kev txaug thiab nyob kaj siab lug tso siab plhuav hauv lub vaj kaj siab. (Chivkeeb 1:27; 2:7-9) Nkawd yeej muaj rab peev xwm nyob tau mus ib txhis. Tiam sis txhua yam hloov tag nrho thaum nkawd ua txhaum. Yehauvas thiaj muab nkawd tshem tawm hauv lub vaj Edees thiab tsis pub nkawd nyob mus ib txhis. Nkawd tej xeeb leej xeeb ntxwv thiaj li saws tau dab tsi? Nyob rau hauv phau Vajlugkub qhia hais tias: “Vim ib tug neeg ua txhaum, txhua tus hauv ntiaj teb thiaj muaj txim. Lub txim ntawd ua rau neeg raug kev ploj kev tuag. Txoj kev tuag thiaj kis mus rau txhua tus rau qhov lawv puav leej yog neeg txhaum.” (Loos 5:12) Peb thiaj li saws tau txoj kev txhaum ntawm Adas uas coj peb mus rau txoj kev tuag. Txoj kev txhaum no yeej tsis muaj ib hnub peb yuav them taus.​—Phau Ntawv Nkauj 49:8.

3. Vim li cas peb tej kev txhaum ho zoo tam li tiv nuj tiv nqi?

³ Nyob rau hauv phau Vajlugkub muab txoj kev txhaum piv rau kev tiv nuj tiv nqi. (Mathais 18:32-35) Thaum peb poob kev txhaum, Yehauvas saib tam li peb tiv nws nuj tiv nws nqi. Lub txim rau txoj kev txhaum yog kev tuag. Yog Yehauvas tsis nrhiav kev los mus daws peb txoj kev txhaum ces peb yuav tau tuag los mus txhaws xwb thiaj tag. Tsis tas li ntawd, peb yuav tsis muaj kev vam kev cia siab ua neej nyob ib zaug ntxiv.​—Loos 6:7, 23.

4. (1) Yuav muaj li cas rau noob txaug neeg txhaum yog tsis muaj kev pab? (Phau Ntawv Nkauj 49:7-9) (2) Nyob hauv phau Vajlugkub, kev “txhaum” yog hais txog dab tsi? (Saib lub ntsiab “Txhaum.”)

⁴ Yog nyob ntawm peb xwb ces yeej yuav tsis tau txhua yam uas Adas thiab Evas nkawd muab ua poob lawm rov qab. (Nyeem Phau Ntawv Nkauj 49:7-9.) Peb yeej tsis muaj kev vam kev cia siab nyob mus ib txhis thiab yuav tuag ib yam li tej tsiaj txhu tag lawm xwb.​—Tej Lus Qhia 3:19; 2 Petus 2:12.

5. Peb Leej Txiv Yehauvas tau ua dab tsi los them peb tej kev txhaum? (Saib daim duab ntawm lub khaum.)

⁵ Xav txog tus tub hluas uas hais tas los no, yog tias muaj ib tug txiv neej muaj txiag nplua nuj cia li lam los them nws tej nuj nqis kom tag nrho mas ntshe nws yuav ris txiaj ntsig kawg nkaus li. Zoo ib yam li ntawd, peb Leej Txiv Yehauvas kuj muab tau ib qho los them peb txoj kev txhaum uas peb saws tau los ntawm Adas. Yexus piav li no tias: “Vajtswv hlub lub qab ntuj neeg kawg li, nws thiaj pub nws tib leeg Tub, kom txhua tus uas ntseeg tus Tub ntawd thiaj tsis raug puas tsuaj tiam sis tau txoj sia ntev dhawv mus ib txhis.” (Yauhas 3:16) Qhov uas Yehauvas ua li no pab tau kom peb muaj kev sib raug zoo nrog nws.

6. Nyob rau hauv zaj kawm no peb yuav tham txog dab tsi, thiab yog vim li cas?

⁶ Yuav ua li cas qhov uas Yehauvas muab ntawd thiaj li pab tau peb? Yuav kom pab tau peb, cia peb mus ua tib zoo kawm txog tej lo lus hauv phau Vajlugkub thiab yog txhais li cas. Yog peb zaum tsaws xav txog tej yam uas Yehauvas tau ua rau peb ces peb yuav ris nws txiaj ntsig heev.

VAJTSWV XAV KOM PEB NROG NWS SIB RAUG ZOO

7. (1) Adas thiab Evas nkawd poob dab tsi ntxiv? (2) Peb uas yog cov xeeb leej xeeb ntxwv tos nrhw kev pab li cas? (Loos 5:10, 11)

⁷ Ua ntej thaum Adas thiab Evas nkawd tsis tau poob kev txhaum, nkawd yog Yehauvas tsev tib neeg. (Lukas 3:38) Tiam sis thaum nkawd poob kev txhaum, thiaj ua rau nkawd nyob tsis tau mus ib txhis, nkawd txoj kev sib raug zoo nrog Yehauvas los tu lawm, thiab nkawd tsis muaj feem nrog Yehauvas tsev neeg ntxiv. Tej no twb muaj ua ntej nkawd muaj tub muaj ki. (Chivkeeb 3:23, 24; 4:1) Peb uas yog nkawd tej xeeb ntxwv yuav tau rov qab los nrog Yehauvas sib raug zoo. (Nyeem Loos 5:10, 11.) Txawm yav nram ntej peb yog Vajtswv cov yeeb ncuab los peb yuav tau los ua nws cov phooj ywg. Yehauvas twb yog tus ntaus thawj hlo pab peb. Ua li nws ho pab peb li cas?

VAJTSWV TAU NPAJ KOM PEB UA NWS COV PHOOJ YWG

8. Txoj kev cai ntxuav yog dab tsi?

⁸ Yehauvas tau npaj txoj kev cai ntxuav kom tib neeg thiaj muaj rab peev xwm tau rov qab los nrog nws sib raug zoo. Yehauvas npaj li no kom thiaj sib npaug zog nrog qhov uas Adas muab ua poob lawm. Nyob rau hauv Cov Nqe Vajlugkub Kilis kuj hais txog txoj kev uas Yehauvas pab tau ib tug kom rov qab nrog nws sib raug zoo.​—Loos 3:25.

9. Yehauvas tau qhib txoj hau kev twg kom thiaj zam tau cov Ixayees tej kev txhaum?

⁹ Yehauvas qhib tau ib txoj hau kev los mus pab cov Ixayees kom thiaj zam tau lawv lub txim thiab lawv thiaj muaj tau kev sib raug zoo nrog nws. Cov Ixayees yuav tau ua ib lub koob tsheej uas yog Hnub Ua Kev Cai Ntxuav ib xyoos ib zaug. Nyob rau hnub ntawd, tus pov thawj hlob yuav tau tua tsiaj fij ua cov tib neeg ntiag tug. Tsiaj txhu yeej daws tsis tau txhua tus tej kev txhaum vim tsiaj txhu tsis sib txig sib luag yam li tib neeg. Tiam sis yog cov Ixayees hloov dua siab tshiab thiab tua tsiaj raws li Yehauvas sam hwm ces nws kuj zam lawv lub txim. (Henplais 10:1-4) Txhua zaus cov Ixayees tua tsiaj fij rau Yehauvas, pab tau kom lawv nco ntsoov tias lawv yog noob txaug neeg txhaum thiab lawv yuav tau muaj ib yam muaj nuj nqis dua los mus theej lawv tej kev txhaum.

10. Yehauvas tau ua li cas thiaj zam tau noob neej tej kev txhaum?

¹⁰ Yuav kom zam tau noob neej tej kev txhaum, Vajtswv thiaj li tau txib Nws tus Tub los “muab nws lub cev pub rau Vajtswv tib zaug xwb ris tau ntau leej lub txim.” (Henplais 9:28) Yexus “muab nws txoj sia txhiv coob leej.” (Mathais 20:28) Ua li tus nqi txhiv yog li cas tiag?

TUS NQI TXHIV

11. (1) Raws li nyob hauv phau Vajlugkub, tus nqi txhiv yog dab tsi? (2) Tus twg thiaj yuav them tau tus nqi txhiv?

¹¹ Raws li nyob hauv phau Vajlukgub, Yehauvas txiav txim siab tias yuav tau muaj ib tug nqi txhiv los mus them kom peb thiaj li dim tau ntawm txoj kev txaug kev txhaum thiab kom peb thiaj muaj tau kev sib raug zoo nrog Yehauvas. Yuav them tus nqi txhiv ntawd li cas xwv noob neej thiaj li dim plaws tej uas Adas tau ua? Yav thaum ub Adas thiab Evas nkawd tau lub neej uas nyob tau mus ib txhis thiab tsis muaj kev txaug kev txhaum. Yog li ntawd, yuav tsum muaj tus nqi txhiv uas sib npaug zos thiaj pab tau tej uas nkawd muab ua poob lawm. (1 Timautes 2:6) Yuav tsum muaj ib tug txiv neej uas (1) tsis muaj kev txaug kev txhaum, (2) muaj rab peev xwm nyob tau mus ib txhis hauv ntiaj teb no, thiab (3) txaus siab hlo muab nws txoj sia los this peb txoj sia. Tus neeg zoo li hais tas los no thiaj li pauv tau txoj sia uas muab ua poob lawm.

12. Vim li cas Yexus thiaj them tau tus nqi txhiv?

¹² Cia peb mus tham txog peb yam uas qhia tias Yexus yeej them tau tus nqi txhiv. (1) Yexus yug los tsis muaj kev txaug kev txhaum thiab nws “tsis tau ua ib qho txhaum.” (1 Petus 2:22) (2) Vim li hais no nws thiaj muaj peev xwm nyob tau mus ib txhis. (3) Nws txaus siab hlo los tuag thiab muab nws txoj sia this peb txoj. (Henplais 10:9, 10) Yexus tsis muaj kev txaug kev txhaum ib yam li Adas uas ntej Adas ua txhaum. (1 Kauleethaus 15:45) Yog li ntawd, nws thiaj li them tau tej uas Adas muab ua poob lawm. (Loos 5:19) Yexus thiaj yog “tus Adas uas los thaum kawg.” Tsis tas yuav dua ib tug txiv neej uas tsis muaj kev txaug kev txhaum los them ntxiv. Yexus “theej txhoj tib zaug xwb nws theej tau mus ibtxhis.”​—Henplais 7:27; 10:12.

13. Yuav ua li cas ib tug twg thiaj li muaj taus kev sib raug zoo nrog Yehauvas?

¹³ Yuav ua li cas peb thiaj li muaj taus kev sib raug zoo nrog Yehauvas? Yehauvas twb npaj tau ib txoj hau kev los daws peb tej kev txhaum. Yexus tau muab nws txoj sia uas tsis muaj ib qho txhaum li coj los ua tus nqi txhiv peb lub txim.​—Efexus 1:7; Henplais 9:14.

YEHAUVAS TSO PEB DIM KEV TXHAUM KEV TUAG THIAB SUAV PEB NCAJ NCEES

14. Peb yuav tham txog dab tsi, thiab yog vim li cas?

¹⁴ Tej uas Yehauvas tau ua rau peb ho pab tau peb li cas? Yuav kom peb paub tau li ntawd, peb yuav mus tham txog ob yam uas phau Vajlugkub siv los mus pab kom peb nkag siab tias Yehauvas txoj kev zam txim pab tau peb li cas rau li cas. Thaum peb ua tib zoo tshuaj ntsuas txog ob yam no, peb yuav pom tias pab tau peb ib leeg rau ib leeg li cas.

15-16. (1) Kev cawm dim yog li cas tiag uas hais nyob rau hauv phau Vajlugkub? (2) Peb zoo siab npaum li cas thaum dim plaws txoj kev txhaum thiab kev tuag?

¹⁵ Nyob rau hauv phau Vajlugkub tau hais tias vim muaj tus nqi txhiv thiaj tso tau peb dim. Tus tub txib Petus hais li no tias: “Nej yeej paub lawm hais tias Vajtswv twb txhiv nej dim ntawm txoj qub kevcai uas nej cov yawgkoob qhia rau nej lawm. Yam uas Vajtswv muab txhiv nej yam ntawd tsis poob nqi li tej nyiaj tej kub, yam ntawd yog Yexus Khetos cov ntshav uas muaj nqis heev, Yexus Khetos zoo li tus menyuam yaj uas tsis muaj ib qho phem lossis dub doog li.”​—1 Petus 1:18, 19.

¹⁶ Vim muaj tus nqi txhiv thiaj tso tau peb dim plaws ntawm txoj kev txhaum thiab kev tuag uas niaj hnub tsub kev nyuaj siab ntxhov plawv rau peb tas zaj tas zog. (Loos 5:21) Peb ris Yehauvas thiab Yexus nkawd tus txiaj tus ntsig kawg li uas Yexus tau muab nws tej roj ntsha los txhiv peb dim.​—1 Kauleethaus 15:22.

17-18. (1) Qhov uas suav hais tias ncaj ncees yog li cas tiag? (2) Vim Yehauvas suav tias peb ncaj ncees ho pab tau peb li cas?

¹⁷ Nyob rau hauv phau Vajlugkub, Yehauvas suav tias nws cov tib neeg ncaj ncees. Qhov no pab tau peb pom tias peb tsis tas yuav them peb tej kev txhaum lawm. Txawm nws ua li no los nws haj tseem coj ncaj ncees. Nws tsis cia peb ua kev txhaum ywj siab. Tiam sis Yehauvas txaus siab hlo zam peb lub txim vim peb muaj kev ntseeg rau tej nws thiab Yexus tau ua los them tus nqi txhiv. (Loos 3:24; Kalatias 2:16) Tsis tsim nyog peb tau tej no los Yehauvas haj tseem suav tias peb ncaj ncees.

¹⁸ Thaum Yehauvas suav hais tias peb ncaj ncees, ho pab tau peb li cas? Qhov no kuj pab tau ib txhia muaj feem mus kav nrog Yexus saum ntuj ceeb tsheej thiab tau rais mus ua Vajtswv cov me nyuam. (Titus 3:7; 1 Yauhas 3:1) Nws zam lawv lub txim ib yam nkaus li lawv twb tsis muaj kev txhaum, lawv thiaj muaj feem mus kav lub Nceeg Vaj. (Loos 8:1, 2, 30) Hos ib txhia uas nws suav hais tias ncaj ncees yuav tau nyob mus ib txhis hauv lub ntiaj teb. Yehauvas twb zam lawv lub txim thiab lawv tau los nrog nws sib raug zoo. (Yakaunpaus 2:21-23) Pab neeg coob coob uas dim Amankedoos muaj peev xwm nyob tau mus ib txhis. (Yauhas 11:26) “Cov ncaj ncees thiab cov tsis ncaj” uas tau nruam sim lawm yuav sawv rov qab los muaj sia dua. (Tes Hauj Lwm 24:15; Yauhas 5:28, 29) Tsis ntev tom ntej no, txhua tus uas mloog Yehauvas lus “yuav tau nyob ywj pheej ua Vajtswv cov me nyuam.” (Loos 8:21) Peb tos tsis hnyu rau lub sij hawm ntawd!

19. Tej uas Yehauvas thiab Yexus nkawd tau ua rau peb pab tau peb lub neej li cas? (Saib lub ntsiab “Yehauvas Txoj Kev Zam Txim.”)

¹⁹ Peb lub neej zoo thooj nkaus li tus tub hluas uas poob ib puas tsav yam thiab tiv nuj tiv nqi them tsis taus. Tiam sis Yehauvas cev tes hlo los pab peb. Nws nrhiav tau ib txoj hau kev los zam peb tej kev txhaum thiab tso Yexus los mus tuag txhiv peb. Yog peb muaj kev ntseeg rau Yexus Khetos ces yuav cawm tau peb dim ntawm txoj kev txhaum thiab kev tuag. Thaum Yehauvas zam peb tej kev txhaum ces yeej cuag li ib txwm tsis muaj kev txhaum. Tsis tas li ntawd, tam sim no peb kuj muaj rab peev xwm los nrog peb Leej Txiv Yehauvas sib raug zoo.

20. Zaj txuas ntxiv tom ntej no yuav tham txog dab tsi?

²⁰ Thaum peb xav txog tej uas Yehauvas thiab Yexus nkawd tau ua mas peb ris nkawd tus txiaj tus ntsig kawg nkaus li. (2 Kauleethaus 5:15) Yog nkawd tsis cev tes pab ces peb yeej tsis muaj kev vam kev cia siab li! Nyob rau zaj kawm txuas ntxiv tom ntej no yuav tham seb Yehauvas txoj kev zam txim pab tau peb ib tug zuj zus li cas.