ZAJ KAWM 49
Yehauvas Puas Yuav Teb Kuv Cov Lus Thov?
“Thaum ntawd nej yuav hu kuv, los cuag kuv thiab thov kuv, kuv yuav teb nej.”—YELEMIS 29:12.
ZAJ NKAUJ 41 Tig Ntsej Mloog Kuv Yehauvas
ZAJ NO THAM TXOG DAB TSI?a
1-2. Vim li cas peb thiaj xav tias Yehauvas tsis teb peb tej lus thov?
YEHAUVAS tau cog lus tias: “Nrhiav kev kaj siab ntawm [Yehauvas], thiab nws yuav muab rau nej raws li nej lub siab xav yuav.” (Phau Ntawv Nkauj 37:4) Puas tsim nyog peb xav tias Yehauvas yuav muab txhua yam uas peb thov nws rau peb? Vim li cas ho tseem ceeb rau peb nug li no? Cia peb mus tham txog ob peb tug qauv. Ib tug muam hluas thov kom Yehauvas pab nws tau mus txoj Kev Kawm Rau Cov Qhia Lub Nceeg Vaj. Tiam sis twb tau ntau lub xyoos lawm los nws tseem tsis tau mus li. Muaj ib tug kwv tij hluas thov Yehauvas pab kom nws tus mob zoo es nws thiaj ua tau hauj lwm hauv lub koom txoos ntau ntxiv. Tiam sis nws tus mob tsis ploj li. Muaj ob niam txiv thov Yehauvas pab kom nkawd tus me nyuam txhob tso Yehauvas tseg. Tiam sis nkawd tus me nyuam cia li tso Yehauvas tseg lawm.
2 Tej zaum koj kuj tau thov Yehauvas txog ib yam dab tsi, tiam sis koj tseem tsis tau txais. Thaum kawg tej zaum koj yuav xav tias ua cas Yehauvas teb luag tej lus thov tiam sis ho tsis teb koj tej. Los sis tej thaud koj kuj xav tias ntshe koj tau ua txhaum li cas lawm. Ib tug muam npe hu ua Kab Noogb tau xav li ntawd. Nws thiab nws tus txiv tau thov Yehauvas tias nkawd xav mus ua hauj lwm hauv Npe-ee. Nws hais tias: “Kuv ntseeg tias wb yeej yuav tau mus Npe-ee sai sai.” Tiam sis twb tau ntev heev lawm los nkawd tseem tsis tau mus. Kab Noog hais tias: “Kuv tu siab heev thiab tsis paub xav li lawm. Kuv xav tias ntshe kuv tau ua dab tsi rau Yehauvas tu siab lawm. Kuv yeej siv zog thov kom wb tau mus Npe-ee. Yog vim li cas Yehauvas ho tsis teb kuv cov lus thov?”
3. Zaj no peb yuav kawm txog dab tsi?
3 Muaj tej thaud peb xav tias Yehauvas puas hnov peb cov lus thov. Txawm cov ntseeg thaum ub ib txhia los kuj xav li ntawd thiab. (Yauj 30:20; Phau Ntawv Nkauj 22:2; Hanpakus 1:2) Dab tsi pab tau koj ntseeg tias Yehauvas yuav teb koj tej lus thov? (Phau Ntawv Nkauj 65:2) Yuav kom teb tau lo lus nug ntawd, cia peb mus tham txog cov ntsiab lus no: (1) Yehauvas yuav ua dab tsi? (2) Yehauvas xav kom peb ua dab tsi? (3) Vim li cas peb yuav tau hloov tej peb thov?
YEHAUVAS YUAV UA DAB TSI?
4. Raws li Yelemis 29:12, Yehauvas cog lus tias nws yuav ua dab tsi?
4 Yehauvas cog lus tias nws yuav mloog peb tej lus thov. (Nyeem Yelemis 29:12.) Peb tus Vajtswv hlub peb heev vim peb muab siab teev tiam nws. Yog li ntawd, nws yeej yuav mloog peb tej lus thov. (Phau Ntawv Nkauj 10:17; 37:28) Txawm li ntawd los, peb tsis txhob xav yuam kev tias Yehauvas yuav ua raws li txhua yam peb thov. Tej zaum peb yuav tau tos txog lub qab ntuj tshiab es peb mam li tau qho yam uas peb thov ntawd.
5. Piav seb thaum peb thov Yehauvas, nws yuav mloog peb li cas.
5 Thaum peb thov Yehauvas, nws yuav mloog seb puas mus raws li nws lub ntsiab. (Yaxayas 55:8, 9) Ib yam uas Yehauvas xav tau yog kom txhua tus thoob ntiaj teb nyob zoo siab hlo hauv qab nws txoj kev kav. Tiam sis Xatas hais tias yog tib neeg kav tib neeg, lawv yuav zoo siab dua. (Chivkeeb 3:1-5) Yuav kom qhia tias Xatas hais dag xwb, Yehauvas thiaj cia tib neeg kav tib neeg. Vim tib neeg kav tib neeg, peb thiaj raug ntau yam teeb meem niaj hnub nim no. (Tej Lus Qhia 8:9) Peb paub tias Yehauvas yuav tsis tshem txhua qhov teeb meem uas peb raug tam sim no. Yog Yehauvas ua li ntawd, ces ib txhia yuav xav tias tib neeg yeej kav tau tib neeg tiag.
6. Vim li cas peb yuav tsum ntseeg tias Yehauvas yeej ib txwm ua qhov yog thiab qhov tseeb xwb?
6 Tej thaum ob tug thov txog tib yam tiam sis Yehauvas ho teb ib tug lawm ib yam. Xws li thaum Vaj Ntxwv Hexekiyas mob hnyav es nws thov kom Yehauvas pab kho nws. Ces Yehauvas txawm kho nws zoo lawm. (2 Vajntxwv 20:1-6) Tiam sis thaum Povlauj thov Yehauvas kom pab kho nws qhov mob Yehauvas tsis kho. (2 Kauleethaus 12:7-9) Cia peb mus saib ib qho piv txwv txog tus tub txib Yakaunpaus thiab tus tub txib Petus. Vaj Ntxwv Helauj xav muab nkawd tua. Lub koom txoos thov Vajtswv pab Petus ces tej zaum lawv kuj thov Vajtswv pab Yakaunpaus thiab. Tiam sis Yakaunpaus raug tua hos Petus ho raug cawm. (Tes Haujlwm 12:1-11) Tej thaud peb yuav xav tias, ‘Ua cas Yehauvas cawm Petus es ho tsis cawm Yakaunpaus?’ Phau Vajlugkub tsis qhia tias yog vim li cas.c Tiam sis peb yeej paub tias Yehauvas yeej “ua qhov yog thiab qhov tseeb xwb.” (2 Kevcai 32:4) Qhov uas peb paub yog Yehauvas yeej txaus siab rau Petus thiab Yakaunpaus nkawd. (Tshwmsim 21:14) Qhov no qhia rau peb tias qho lub sij hawm, Yehauvas yuav tsis teb peb cov lus thov raws li peb lub siab nyiam. Txawm li ntawd los cia peb tso siab tias txhua yam uas Yehauvas ua yeej yog qhov zoo qhov yog rau peb nkaus nkaus xwb es tsis txhob yws daws dom.—Yauj 33:13.
7. Peb yuav tsum zam txoj kev xav twg, thiab yog vim li cas?
7 Peb yuav tsum tsis txhob muab tej peb raug piv rau tej uas lwm tus raug. Xws li tej thaud peb thov Yehauvas pab peb txog ib yam twg, tiam sis nws tsis pab. Tiam sis thaum lwm tus thov txog yam uas peb thov, zoo li Yehauvas ho pab tus ntawd. Tau muaj li no rau ib tug muam uas hu ua Anas (Anna). Nws thov kom Yehauvas pab nws tus txiv uas mob kheeb xawm (cancer) zoo rov los. Tib lub sij hawm ntawd, muaj ob tug muam uas laus tshaj nws tus txiv kuj mob kheeb xawm tib yam nkaus. Anas rau siab ntso thov kom Yehauvas pab nws tus txiv thiab ob tug muam ntawd. Tom qab no ob tug muam kuj zoo tiam sis nws tus txiv ho tag sim neej lawm. Thaum thawj Anas xav tias yog tias Yehauvas pab es nkawd thiaj zoo, ua cas Yehauvas ho tsis pab nws tus txiv li nws tau thov thiab? Peb yeej tsis paub tias yog vim li cas ob tug muam thiaj zoo rov los. Qhov peb paub ces muaj ib hnub Yehauvas yeej yuav muab tej kev txom nyem nyuaj siab tshem tawm thiab Yehauvas yeej tos nrhw yuav tsa nws cov phooj ywg uas tau tag sim neej lawm ciaj sawv rov los.—Yauj 14:15
8. (1) Raws li Yaxayas 43:2, Yehauvas pab peb li cas? (2) Kev thov Vajtswv pab tau peb li cas thaum peb raug tej kev sim siab loj? (Saib zaj yeeb yaj kiab Kev Thov Vajtswv Pab Peb Thev Taus.)
8 Yehauvas yeej yuav pab peb mus li. Yehauvas yog peb Leej Txiv uas hlub peb, nws yeej tsis xav pom peb raug kev txom nyem nyuaj siab. (Yaxayas 63:9) Txawm li ntawd los nws yeej tsis thaiv kom tej kev sim siab uas zoo li dej thiab hluav taws tsis txhob los raug peb. (Nyeem Yaxayas 43:2.) Tiam sis nws cog lus tias nws yuav pab kom peb “hla” dhau tej ntawd. Nws yuav tsis cia tej kev sim siab ntawd ua rau peb teev tiam tsis tau nws. Yehauvas kuj muab nws lub hwj huam dawb huv los pab kom peb thev taus. (Lukas 11:13; Filipis 4:13) Thaum kawg peb yeej cia siab tias Yehauvas yuav pab kom peb thev taus tej kev sim siab thiab kom peb muab siab npuab nws.d
YEHAUVAS XAV KOM PEB UA DAB TSI?
9. Raws li Yakaunpaus 1:6, 7, vim li cas peb yuav tsum tso siab tias Yehauvas yuav pab peb?
9 Yehauvas xav kom peb tso siab rau nws. (Henplais 11:6) Tej thaud peb saib peb tej kev sim siab loj cuag roob ces peb yuav xav tias xyov Yehauvas puas yuav pab peb. Tsis txhob cia tej ntawd ua rau peb ua xyem xyav. Cia li thov Yehauvas es tso siab tias nws yuav teb peb tej lus thov. (Nyeem Yakaunpaus 1:6, 7) Phau Vajlugkub qhia tias Vajtswv lub hwj chim yuav pab kom peb “caws qia hla tau ntsa loog.”—Phau Ntawv Nkauj 18:29.
10. Piav seb peb yuav tau ua raws peb cov lus thov li cas.
10 Yehauvas xav kom peb ua raws li peb cov lus thov. Xws li, tej thaud ib tug kwv tij yuav thov kom Yehauvas pab nws thov tau sij hawm mus lub rooj sib txoos. Ua li Yehauvas yuav teb nws li cas? Tej zaum Yehauvas kuj pab kom tus kwv tij muaj lub siab tawv mus nrog nws tus los pav tham. Tiam sis tus kwv tij yuav tau ua nws feem es mus nrog nws tus los pav tham. Tej zaud nws yuav tau mus nrog nws tus los pav tham ntau zaus. Tej thaud nws yuav tau pauv sij hawm nrog ib tug uas nws nrog ua hauj lwm. Thiab tej thaud nws kuj yuav tau thov so hauj lwm es tsis them nyiaj.
11. Vim li cas peb thiaj yuav tsum thov Vajtswv tsis tseg txog peb tej kev txhawj xeeb?
11 Yehauvas xav kom peb thov nws tsis tseg txog peb tej kev txhawj xeeb. (1 Thexalaunikes 5:17) Yexus hais tias muaj tej yam uas peb thov, Yehauvas yuav tsis teb tam sid. (Lukas 11:9) Yog li ntawd, tsis txhob tag kev cia siab! Kav tsij rau siab ntso thov tsis tseg. (Lukas 18:1-7) Thaum peb thov txog ib yam twg tsis tseg ces peb qhia rau Yehauvas tias yam ntawd tseem ceeb heev rau peb. Thiab yog peb ua li ntawd ces kuj qhia rau Yehauvas tias peb yeej cia siab tias nws yuav pab peb xwb xwb li.
VIM LI CAS PEB YUAV TAU HLOOV TEJ PEB THOV?
12. (1) Thaum peb thov Vajtswv zoo rau peb nug li cas? (2) Peb yuav tau nco ntsoov li cas kom tej peb thov qhia tias peb hwm Vajtswv? (Saib lub ntsiab “Kuv Tej Lus Thov Puas Qhia Tias Kuv Hwm Yehauvas?”)
12 Yog Yehauvas tsis teb peb cov lus thov tej zaum yuav zoo rau peb nug peb los lus no. Thawj lo, ‘Yam uas kuv thov puas zoo rau kuv tiag?’ Ntau zaus peb xav tias peb paub yam twg zoo rau peb. Tiam sis tej uas peb thov tej zaum tsis yog tej uas yuav pab tau peb. Thiab tej thaum tej uas peb thov tej zaum twb tsis raws li Vajtswv lub siab nyiam. (1 Yauhas 5:14) Xws li leej niam thiab leej txi uas peb nyuam qhuav tham tag. Nkawd thov Yehauvas pab kom nkawd tus tub txhob tso Nws tseg. Nkawd thov li ntawd zoo li kuj yog ib qho zoo thiab, tiam sis Yehauvas tsis yuam peb ib tug twg teev tiam nws. Yehauvas xav kom peb txhua tus, tsis hais peb cov me nyuam, txiav txim siab los pe hawm nws. (2 Kevcai 10:12, 13; 30:19, 20) Yog li ntawd, zoo dua rau ob niam ntxiv ntawd thov kom Yehauvas pab nkawd qhia tau nkawd tus me nyuam muaj lub siab xib Yehuavas kom nws thiaj hlub Yehauvas thiab nrog Yehauvas sib raug zoo.—Pajlug 22:6; Efexus 6:4.
13. Piav seb raws li Henplais 4:16, Yehauvas teb peb tej lus thov rau lub sij hawm twg.
13 Los lus nug ob, ‘Puas yog Yehauvas lub sij hawm teb kuv cov lus thov?’ Tej zaum peb xav kom Yehauvas teb kiag peb tam sid. Qhov tseeb, Yehauvas yog tus paub tias lub sij hawm twg thiaj yog lub sij hawm zoo rau nws teb peb. (Nyeem Henplais 4:16.) Yog Yehauvas tsis teb peb tam sid ces tej zaum peb yuav xav tias Yehauvas tsis kam pab peb. Tiam sis tsis yog Yehauvas tsis kam pab peb, tej zaum tsuas yog Yehauvas tsis tau teb peb xwb. Xws li tus tub hluas thaum pib uas peb tham txog, nws thov kom Yehauvas pab nws tus mob zoo. Yog Yehauvas kho nws tus mob ces Xatas yuav nkaug tias tos nws teev tiam Yehauvas los twb yog vim Yehauvas kho nws zoo. (Yauj 1:9-11; 2:4) Txawm Yehauvas tsis tau kho tej kev mob kev nkeeg tam sim no los nws twb teem tseg ib lub sij hawm uas nws yuav kho txhua hom mob lawm. (Yaxayas 33:24; Tshwmsim 21:3, 4) Ua ntej lub sij hawm ntawd, peb yuav tau ua siab ntev tos Yehauvas. Yog li zoo dua rau tus kwv tij thov kom Yehauvas pub dag pub zog thiab pub lub siab kaj siab tus rau nws thev nws tus mob, thiab pab nws rau siab ntso teev tiam Yehauvas mus li.—Phau Ntawv Nkauj 29:11.
14. Kab Noog tus qauv pab tau koj li cas?
14 Cia peb rov tham txog Kab Noog tus uas thov kom Yehauvas pab nws tau mus ua hauj lwm hauv Npe-ee. Twb tau tsib lub xyoos, nws mam to taub tias vim li cas Yehauvas tsis ua raws li nws thov. Nws hais tias: “Yehauvas siv lub sij hawm ntawd los cob qhia kuv thiab los pab kom kuv haj yam paub teev tiam Nws, kom kuv yim huab tso siab rau Nws, thiab kom kuv haj yam paub kawm Vajlugkub. Kuv yuav tau xyaum muaj kev zoo siab xyiv fab txawm yuav teev tiam Yehauvas nyob rau qhov twg los xij.” Tom qab no Kab Noog thiab nws tus txiv kuj raug caw mus saib xyuas thaj tsam. Kab Noog hais ntxiv tias: “Thaum kuv ua tib zoo xav txog mas Yehauvas twb teb kuv cov lus thov lawm, tiam sis tsuas yog tsis raws li kuv siab xav xwb. Twb tau ntev loo lawm kuv mam pom tias qhov uas Yehavuas teb kuv no yog ib kho khoom pub uas zoo tshaj plaws. Kuv ua Yehauvas tsaug rau nws txoj kev hlub thiab nws lub siab dawb siab zoo.”
Yog koj pom tias Yehauvas tsis teb koj cov lus thov tej zaum yuav zoo rau koj hloov mus thov txog lwm yam (Saib nqe 15)f
15. Vim li cas tej thaud zoo rau peb txhob thov tsi ntsees txog ib yam twg? (Saib cov duab.)
15 Los lus nug peb yog, ‘Puas yog kuv yuav tsum hloov kuv tej lus thov?’ Tej thaud kuj zoo rau peb thov tsi ntsees rau ib yam twg. Hos tej thaud kuj zoo rau peb tsis txhob thov tsi ntsees rau ib yam twg tiam sis tos Yehauvas seb nws xav kom peb ua dab tsi. Cia peb rov mus tham txog tus muam hluas uas thov kom nws tau mus txoj Kev Kawm Rau Cov Qhia Lub Nceeg Vaj. Nws xav mus kawm kom tau mus tshaj tawm rau tej thaj chaw uas tsis muaj cov tshaj tawm coob. Thaum nws thov Vajtswv txog txoj kev kawm ntawd kuj zoo rau nws thov kom Yehauvas pab seb puas muaj lwm yam uas nws ua tau ntxiv rau Yehauvas. (Tes Haujlwm 16:9, 10) Thaum nws thov li no tas kuj zoo rau nws nug tus kwv tij saib xyuas thaj tsam seb puas muaj ib lub koom txoos nyob ze uas xav tau cov tho kev mus pab. Los sis nws kuj sau ntawv mus rau ib ceg Npe-ee mus nug seb puas muaj tej qho chaw uas xav tau cov tshaj tawm ntxiv.e
16. Vim li cas peb ntseeg tias Yehauvas yeej yuav teb peb cov lus thov?
16 Zoo li peb tau kawm, peb yeej ntseeg tias Yehauvas yuav teb peb cov lus thov vim nws muaj kev hlub thiab kev ncaj ncees. (Phau Ntawv Nkauj 4:3; Yaxayas 30:18) Tej thaum Yehauvas yuav tsis teb peb raws li peb xav. Tiam sis tsis muaj ib zaug uas Nws yuav tsis quav ntsej txog peb. Nws hlub peb heev. Nws yeej tsis muab peb tso tseg ib zaug li. (Phau Ntawv Nkauj 9:10) Yog li ntawd “cia siab rau Vajtswv txhua lub sijhawm,” rau siab ntso qhib siab hlo thov nws tsis tseg.—Phau Ntawv Nkauj 62:8.
ZAJ NKAUJ 43 Zaj Lus Thov Ua Vajtswv Tsaug
a Zaj no yuav piav tias vim li cas peb thiaj tso siab tias Yehauvas yeej yuav teb peb tej lus thov yeeb vim yog nws hlub peb thiab nws ncaj ncees.
b Tau muab cov npe hauv zaj no ib txhia hloov lawm.
c Mus saib Phau Tsom Faj lub 2 Hlis xyoo 2022, sab 3-6 ntawm lub ntsiab “Yehauvas Ua Li Cas Peb Puas Ua Li Ntawd?”
d Yog xav paub ntxiv seb Yehauvas pab peb thev tej kev sim siab li cas, mus saib zaj yeeb yaj kiab Kev Thov Vajtswv Pab Peb Thev Taus hauv lub vej xaij jw.org/hmn.
e Yog koj xav paub seb yuav mus tshaj tawm rau ib thaj tsam uas nyob rau lwm ceg Npe-ee li cas, mus saib phau Organized to Do Jehovah’s Will, tshooj 10, nqe 6-9 ua lus Askiv.
f DAIM DUAB: Ob tug muam thov Yehauvas ua ntej nkawd rau npe mus txoj Kev Kawm Rau Cov Qhia Lub Nceeg Vaj. Tom qab ntawd ib tug tau mus tiam sis ib tug tsis tau. Tus uas tsis tau mus tsis tu siab rau Yehauvas, tiam sis nws thov kom Yehauvas pab seb puas muaj lwm txoj kev twg rau nws ua Yehauvas tes hauj lwm ntxiv. Tom qab ntawd nws sau ib tsab ntawv mus rau Npe-ee mus qhia rau lawv tias nws xav mus ua Yehauvas tes hauj lwm rau ib thaj tsam uas tsis muaj cov tshaj tawm coob.