Samuela Ginigunana

16 Vadaeni Iehova be Samuela dekenai ia gwau: “Do oi lalohisihisi ela bona edena negai?+ Lau ese Saulo lau dadaraia vadaeni, Israela ia lohiaia totona.+ Oiemu dehoro kavabu* oi hahonua+ bona oi lao. Lau ese oi do lau siaia lao Betelehema tauna Iese dekenai,+ badina iena natudia memero huana amo king ta be lau sibona totona lau abia hidi vadaeni.”+ 2 To Samuela ia gwau: “Edena bamona do lau lao? Saulo be unai ia kamonai neganai, lau do ia hamasea.”+ Iehova ia gwau: “Boromakau natuna ta be oi ida oi abia lao bona oi gwau, ‘Lau be Iehova dekenai boubou gauna henia totona lau mai.’ 3 Iese oi boiria boubou oi henia gabuna dekenai ia mai totona. Bena do oi karaia gauna be oi do lau hamaoroa. Namona be oi dekenai lau hahedinaraia tauna be lau totona do oi horoa.”+

4 Samuela be Iehova ena hereva hegeregerena ia kara. Betelehema dekenai ia lao neganai,+ siti ena tau badadia be mai gari ida ia idia hedavari henia, bona idia gwau: “Gau ibounai be namo, a?” 5 Bena ia gwau: “Oibe, gau ibounai be namo. Iehova dekenai boubou gauna henia totona lau mai. Umui sibona umui hahelagaia, bona boubou gabuna dekenai lau ida umui mai.” Bena ia ese Iese bona ena natudia memero ia hahelagadia, unai murinai boubou gabuna dekenai ia boiridia lao. 6 Idia ginidae bona Eliaba+ ia itaia neganai, ia gwau: “Momokani, inai be Iehova ena horoa tauna.” 7 To Iehova be Samuela dekenai ia gwau: “Iena toana bona ena lata oi itaia lasi,+ badina lau ese ia lau abia hidi lasi. Dirava be taunimanima ese idia itaia hegeregerena ia itaia lasi, badina taunimanima ese ta ena toana sibona idia itaia, to Iehova ese kudouna ia itaia.”+ 8 Vadaeni Iese ese Abinadaba+ ia boiria bona Samuela vairanai ia mailaia, to ia gwau: “Iehova ese ia danu ia abia hidi lasi.” 9 Gabeai Iese ese Samaha+ ia mailaia, to ia gwau: “Iehova ese ia danu ia abia hidi lasi.” 10 Vadaeni Iese ese ena natudia memero 7 be Samuela vairanai ia mailaidia, to Samuela be Iese dekenai ia gwau: “Iehova ese idia ta ia abia hidi lasi.”

11 Dokonai, Samuela be Iese dekenai ia gwau: “Inai be emu natudia memero ibounai, a?” Unai neganai ia gwau: “Mero dokona+ ia noho lasi, ia be mamoe ia naridia noho.”+ Bena Samuela be Iese dekenai ia gwau: “Ia totona hereva oi siaia, badina ita be aniani totona do ita helai diho lasi ela bona ia be iniseniai do ia mai.” 12 Bena ia totona hereva ia siaia bona idia mailaia. Iena tauanina ena toana be namo bona ena matana be namo herea bona ia be mai ena hairai.+ Bena Iehova ia gwau: “Tauna be inai, oi toreisi bona ia oi horoa.”+ 13 Vadaeni Samuela ese dehoro kavabu* ia abia+ bona Davida ena tadikaka edia vairadiai Davida ia horoa. Bona Iehova ena lauma ese unai dina amo Davida ia hasiahua matamaia.+ Gabeai Samuela ia toreisi bona Rama dekenai ia lao.+

14 Vadaeni Iehova ese ena lauma be Saulo amo ia kokia,+ bona Saulo be lalohadai kererena ese ia hadikaia neganai, Iehova ese ia koua lasi.*+ 15 Saulo ena hesiai taudia be ia dekenai idia gwau: “Oi itaia, lalohadai kererena ese oi ia hadikaia neganai, Dirava ese ia koua lasi.* 16 Emai lohia e, mani emu hesiai taudia, oi vairanai idia gini taudia unai, oi oda henia, hap* gadaralaia namonamo tauna ta idia tahua totona.+ Bena Dirava ese oi ia rakatania bona lalohadai kererena ese oi ia hadikaia* negadia ai, unai tauna ese hap do ia gadaralaia, bona emu lalona do ia namo.” 17 Bena Saulo be ena hesiai taudia dekenai ia gwau: “Mani hap ia gadaralaia namonamo tauna ta umui tahua, bona lau dekenai umui mailaia.”

18 Hesiai tauna ta ia gwau: “Lau ese Betelehema tauna Iese ena natuna lau itaia, ia be hap gadaralaia namonamo dalana ia diba, bona ia be gari lasi tauna bona tuari tauna goadana.+ Ia hereva namonamo diba, bona ia be mai hairaina,+ bona Iehova be ia danu.”+ 19 Vadaeni Saulo ese hesiai taudia be Iese dekenai ia siaidia bona ia gwau: “Emu natuna Davida, mamoe serina ia naria merona unai, be lau dekenai oi siaia mai.”+ 20 Bena Iese ese paraoa bona wain pusena be doniki latanai ia atodia, bona unai gaudia bona nanigosi natuna ta be ena natuna Davida ida Saulo dekenai ia siaidia lao. 21 Vadaeni Davida be Saulo dekenai ia mai bona ia ia hesiai henia matamaia.+ Saulo ese ia lalokau henia bada matamaia, bona ia be ena tuari kohu huaia tauna ai ia lao. 22 Saulo ese Iese dekenai hereva ia siaia: “Mani Davida be egu hesiai gaukara do ia karaia noho, badina ia lau lalonamo henia.” 23 Vadaeni Dirava ese ia rakatania bona Saulo be lalohadai kereredia ia abia negadia ai,* Davida ese hap ia abia bona ia gadaralaia, bona Saulo ena hemami dikana ia namo, bona unai laloa dikadia ia lalodia lasi.+