Kofi Idia Daradaralaia

DINA tamona lalonai kapusi 1,500,000,000 bona ma haida! Vanegai unai kara idia tahua neganai idia davaria taunimanima be unai bamona bada hegeregerena kofi idia inua. Ena be idia hanai vadaeni lagani lalodiai, saiens taudia be nega momo idia sisiba, idia gwau kofi idia inua taudia be gorere momo idia davaria diba, hegeregere kudou gorere, diabetes bona kensa goreredia idauidau, to taunimanima be kofi bada idia do inua noho. Vadaeni, badina be dahaka kofi idia inua taudia momo be kofi inua karana idia rakatania lasi?

Idia hanai lagani 40 lalodiai, saiens taudia be ripoti 500 bona ma haida lalonai kofi inua karana ia havaraia gaudia idia torelaia. To ema bona hari, idia davaria gaudia be gau ta idia hamomokania lasi. Badina be dahaka? Gau ta be kofi lalonai idia noho gaudia be momo herea bona ita dibadia namonamo lasi. To, nega momo idia stadilaia gaudia be muramura tamona, tauanina ia hasiahua gauna caffeine unai.

Taunimanima haida dekenai caffeine ese edia mahuta dalana ia koua, ia habadudia, eiava idia be gau tamona idia laloa namonamo diba lasi. To kensa be edena bamona? Hoihoi gaudia ia herevalaia magasin Which? ia gwau: “Bema stadi ta lalonai idia hamomokania toho [caffeine bona kensa dekenai] gorere havaraia dalana ia noho, ma stadi ta dekenai unai hereva idia hanaia herevadia idia noho.” Unai dainai ita hoa lasi London dekenai kofi ia stadilaia tauna ta ia gwau taunimanima momo be “gorere idia abia garina kofi idia rakatania karana ia bada lasi.” Ma danu, momo idia diba ti, cocoa, bona cola inuinu gaudia lalonai danu caffeine ia noho.

To kofi ia inua tauna be reana inai sisiba haida ia ura ia laloa. London ena The Times magasin be inai hereva Dutch ripoti amo ia gwauraia, ia gwau: “Ranu siahuna bona kofi ena uhe ia haboua bona ia inua tauna ena cholesterol [rara lalonai ia noho muramura] be 10 pesen amo do ia bada kofi ena ranu sibona eiava kofi ia inua lasi tauna ena cholesterol amo.” Taunimanima momo idia diba cholesterol be nega momo kudou gorere ia havaraia. Ena kope idauna ta ai, The Times ese Britain dekenai aniani ena goada ia stadilaia tauna badana ta ena hereva ia gwauraia lou, ia gwau: ‘Kofi idia inua momo taudia be kapusi matamatana idia karaia be namo bona namo lasi gunana kofi gauna idia hasiahua lou eiava ena ranu idia nadua lou.’

Diba taudia edia hereva tamona be reana inai bamona: kofi momo inua lasi. Doketa taudia be nega momo idia gwau namona be taunimanima be dina tamona lalonai idia inua kofi ena kapusi 6 (eiava kapusi badadia 4) ena namba idia hanaia lasi. Kudou eiava nadinadi gorere taudia eiava rara ena goada ia bada taudia be unai kapusi ena momo idia inua be namo lasi. Bona idia rogorogo hahine eiava rata amo edia beibi idia ubua hahine be dina tamona lalonai kapusi tamona sibona idia inua be namo.