Tanobada Amo Sivarai Idauidau

Drag Ania Karana Ia Bada Asia Dekenai

Asia ena gabu momo lalodiai, heroin ania karana be ia bada daekau momokani. Hegeregere, lagani 1980 lalonai Sri Lanka dekenai taunimanima 50 sibona be heroin idia ania. To hari taunimanima 40,000 bamona be heroin idia ania. Unai nega lalonai, Pakistan dekenai drag ania taudia edia namba be tausen momo lasi amo ia bada ia lao bona ia daekau 1.8 milion dekenai. Asiaweek magasin ia gwau, “ena panisia karana aukana idia atoa, to idia hegeregere lasi drag hoihoilaia karana hadokoa totona. Sri Lanka be drag bada ia noho gabuna: idia ese heroin eiava cocaine 2 gram idia dogoatao taudia idia hamasedia eiava dibura ruma dekenai idia atodia ela bona idia mase.” Biru taudia be heroin tubutubu gaudia amo moni bada idia davaria diba, unai dainai idia momo be aniani idia hadoa lasi to palaoapalaoa amo idia abia heroin gaudia idia hadoa. Doketa Ravi Pereira, ia be Colombo ena National Dangerous Drugs Control Board tauna ta, ia gwau: “Bema kerukeru suga be lasi neganai​—⁠unai be gau ta lasi. To bema heroin be lasi neganai, taunimanima be gabu idauidau dekenai heroin do idia tahua. Idia ese moni bada eiava edia kohu idauidau amo drag do idia hoia.”

Kekero Muramurana bona Gaukara

Süddeutsche Zeitung niuspepa dekenai ia gwau Germany ena gaukara taudia naria oreana badana ta ia gwau “gaukara taudia 7 7 amo ta ta be mai edia hekwakwanai inuinu karana dekenai.” Germany taudia edia moni be lagani ta ta lalonai 50 tausen milion bona 120 tausen milion huanai idia halusia, inuinu karana dekenai. Lagani 1990 lalonai Germany taudia be edia inuinu karana lagani 1950 lalonai nega 4 amo idia habadaia. Gaukara taudia naria oreana ena memba tauna ta ia gwau, kekero muramura be hegeregere drag ai ia lao bona “taunimanima ese idia inua badina idia laloa idia ia durua edia gaukara do idia haheaukalaia edia gaukara gabuna dekenai.”

Balloon Karaia Kampani Idauidau Idia Koua

Balloon edia kala idauidau tausen momo metairametaira guba dekenai idia daekau bona gabeai idia boio oi itaia neganai, unai bamona ekspiriens be reana taunimanima ese idia mamia vadaeni, to United States dekenai unai kara be ia vara momo lasi. Lagani 1985 lalonai, New Jersey dekenai, ia mase vadaeni kwalaha badana be kone dekenai idia davaria bona ena bogana dekenai balloon idia davaria, bona ia mase vadaeni davara matabudi ena bogana lalonai balloon idia davaria danu, unai gabu dekenai idia noho natu maragidia iboudiai be idia boiboi idia ura balloon karaia karana do idia koua, idia laloa animal tausen momo be unai idia boio balloon idia ania dainai idia mase. Taravatu naria taudia ese unai natu edia boiboi idia kamonaia bona gabu badadia haida dekenai bona siti haida dekenai balloon idia negea bona ia daekau lao guba karana be idia taravatulaia. Ena be balloon karaia taudia be animal idia mase herevana idia heailaia, to haida idia gwau, balloon idia hoihoilaia taudia be U.S. dola 6 milion bamona idia halusia lagani ta ta ibounai lalonai.

Kidurui Edia Mase

International Institute for Environment and Development orea taudia be edia pepa Perspectives lalonai idia gwau, stadi ta idia karaia neganai, idia hahedinaraia “tanobada ibounai lalonai gwarume badadia idauidau 65, hegeregere kwalaha badadia, bona kidurui be kahirakahira do idia ore.” Tahua taudia ese idia hahedinaraia lagani ta ta lalonai kidurui 500,000 bona ma haida be idia hamasedia. Environmental Investigation Agency orea taudia ese unai stadi idia karaia neganai, idia hahedinaraia unai ala-ala karana be ia bada Japan, Mexico, Peru, South Korea, Sri Lanka, bona Taiwan dekenai, bona “Japan dekenai lagani ta ta lalonai, gwarume badadia idauidau 100,000 mai kahana idia hamasedia.” Unai gwarume badadia idauidau edia mase dalana badana ta be reke amo idia hamasedia. To, nega momo kidurui be “ipidi amo idia pididia, kaia amo idia gwadaia, auri mai matana amo idia gwanudia, laini amo idia veridia, idia hamalodia mase, kone dekenai idia veridia dae bona metairametaira idia mase, paua amo idia hamasedia, bomu be idia dekenai idia hapoua bona idia mase, bona edia tauanina kahana ta ta idia utua oho.”

Kuku Hoihoilaia Herevadia Koua

France dekenai kuku kampani haida ese edia kuku idauidau idia hoihoilaia totona idia ese kuku ania haheitalai taravatudia idia makohidia bona kuku lasi gaudia idia haheitalaia o herevalaia, taunimanima ese do idia hoia totona. Unai kuku idia haheitalaia o herevalaia taunimanima ese do idia hoia totona neganai, idia ese dala haida dekenai idia haheitalaia, hegeregere spot gadara dekenai bona moale karadia idauidau dekenai. France ena gavamani ese taravatu matamata ta idia atoa, bona unai taravatu ese kuku idauidau hahedinaraia o herevalaia taunimanima ese do idia hoia karana totona be ia koua, bona unai taravatu be lagani 1993, January 1 amo do ia hamatamaia. Unai taravatu matamatana ese magasin, niuspepa bona buka idauidau amo kuku idauidau hahedinaraia karana idia koua, bona kuku kampani idauidau ese spot gadara idauidau idia durua karana danu idia taravatulaia. Gavamani taudia ese ripoti amo idia hahedinaraia, France dekenai kuku ania karana amo taunimanima 60,000 idia mase lagani tamona lalonai. Tanobada hegegemadai dekenai lagani tamona lalonai, taunimanima 3 milion bamona be kuku ania karana amo idia mase.

AIDS Gorere Argentina Dekenai

Argentine ena niuspepa Clarín ia hereva bamona, Buenos Aires dekenai, taunimanima 500 500 amo ta ta be AIDS gorere ia abia. First Argentine Immunogenetics Center oreana ena presiden, Doketa Emilio Hass, ia gwau, “lagani vaira dekenai unai namba do ia bada daekau, taunimanima 1,000 1,000 amo 4 4 be unai gorere do idia abia.” Doketa tauna ta ese ia gwau momo be edia rara idia henia rara gogoa taudia dekenai, unai amo idia ese test idia karaia davana lasi bona idia ura diba idia be AIDS gorere idia abia eiava lasi. Doketa Hass ma ia gwau, Buenos Aires ena hospital badana ta dekenai rara pusedia 36,000 idia tohoa neganai, rara pusedia 1,000 1,000 amo rua rua be AIDS gorerena idia davaria. Hass ia gwau, Buenos Aires dekenai “hua 13 13 iboudiai dekenai AIDS gorere idia abia taudia edia namba be nega rua dekenai ia bada daekau.”

Ipidi be Siahu Lasi

Nega hanaihanai kara dika ia bada daekau noho dainai, Rome dekenai taunimanima momo be dala idauidau idia tahua sibona do idia naria totona. La Repubblica niuspepa ia hereva bamona, taunimanima be idia hadibaia taunimanima do idia hadikadia sisiadia idia abia, martial arts, muramura dikadia amo idia karaia sprei, kaia, peva bona io bona tuari kaia amo idia ia ura hadikaia tauna ena tauanina ena kahana ta idia hadikaia totona. Tatau bona hahine 15,000 bona ma haida be polisi dekenai gwaumaoro idia abia ipidi do idia huaia loaloa totona. La Repubblica ia gwau, Gianfranco Rodolico, Italian Union of Marksmen hebouna dekenai idia siaia Roma tauna unai, ia gwau, namo lasi taunimanima ta ese ipidi idia abia loaloa. Ia gwau: “Nega hanaihanai ipidi be imana dekenai umui abia loaloa diba lasi. Bema ta ese lau ia hadikaia gwauraia neganai, lau be nega lasi ipidi do lau gaukaralaia totona.”

Genese be Dahaka?

Dubu orea ta ese henanadai ia henia Italy sikuli taudia dekenai. Bona edia haere be “namo momokani lasi,” Italy niuspepa La Repubblica ia gwau. Unai tahua karana ese ia hahedinaraia sikuli natudia 100 100 amo 56 56 be dubu idia lao hamatamaia dinana amo ema bona hari siri ta eiava karoa ta Bible amo idia duahia lasi. Bona sikuli natudia amo 83.4 pesen be “taravatu matamata bona taravatu gunana edia idau idia gwauraia diba lasi,” bona 75 pesen idia hahedinaraia edia ruma dekenai Bible ia noho lasi. La Repubblica niuspepa ese ia hahedinaraia sikuli taudia 100 100 amo 36 36 be idia diba unai hereva “Genese” be English ena rok grup ta ladana, to idia diba lasi unai be Bible ena buka ginigunana.

“Taunimanima Edia Baragi”

Intenesenel orea matamatana ta ladana Parlamento Amazónico (Amazon Palamen) be daudau lasi gunanai South America dekenai idia haginia. Unai orea ena memba taudia be gavamani taudia bona saiens taudia, bona Bolivia, Brazil, Colombia, Ecuador, Guyana, Peru, Suriname, bona Venezuela amo idia mai. Unai orea idia haginia ena badina be idia ura gaukara tubu namonamo dalana idia hagoadaia bona Amazon ena gabu dekenai gaukara tubu namonamo karana idia habadaia. Unai gabu ena bada be 7,000,000 sikoea kilomita bona unuseniai taunimanima 150 milion mai kahana idia noho bona idia be tano idauidau 8 amo idia mai. Argentine ena niuspepa La Nación ia gwau, Amazon Palamen ese Amazon ena gabu ia gwauraia “hegeregere taunimanima edia baragi bamona.” Lagani 4 idia lao vadaeni, unai gabu ena uda 390,000 sikoea kilomita be idia hadikaia vadaeni. Unai orea ena hereva henia tauna ia gwau “ena be unai ese bisinesi ia durua, to moni be anina lasi bema tanobada be ta ese do ia noholaia diba lasi neganai, bona unai kara be kahirakahira do ia vara bema unai gabu hadikaia karana idia hadokoa lasi neganai.”