Estrogen Muramurana—Oi Inua Be Namo Eiava?

OI BE hahine, bona emu nega ia hanaia vadaeni dainai hari oi be rara oi karaia lasi a? Oi laloa momo badina doketa ia gwau estrogen muramurana do oi inua be namo, a? Oi sibona lasi, to hahine momo bona doketa danu ese unai idia laloa momo. Idia diba lasi hahine ese unai muramura idia inua be namo eiava lasi. Reana sivarai oi kamonai, unai muramura ese kudou gorerena ia koua diba bona turia ia ha-aukadia, do idia kwaidu garina. To danu, reana oi kamonai ia ese kensa gorerena, beibi pusena ai bona rata ai ia havaraia diba.

Reana ta ese oi ia hamaoroa, bema muramura ma ta, progesterone o progestin, bona estrogen ruaosi be nega tamona oi inua, kensa gorerena be estrogen amo do oi abia lasi. To reana oi kamonai danu progesterone ese hahine ena hua gorerena ia havaraia lou, bona estrogen ena siahu ia koua dainai kudou ia durua lasi.

Hahine momo be unai muramura dekenai idia lalo-rua, badina be doketa haida idia gwau ia namo, ma haida idia gwau ia dika. Doketa ta ia gwau: “Hari, ai laloa estrogen ena namo ese ena dika ia hanaia. Hahine [kahirakahira iboudiai] ese estrogen muramurana idia inua be namo, edia hua rara ena nega ia ore gwauraia negana amo ela.”​—⁠American Journal of Obstetrics and Gynecology.

Britain dekenai, doketa ma ta mai ena diba bada, lagani 50 lalodiai kensa gorerena ia tahua tauna, ena lalohadai be idau; ia gwau: “Unai bamona muramurana ese taunimanima edia tauanina ia hadikaia diba. Estrogen ese hidio tauanina lalonai ia hatubua, bona unai ia karaia neganai kensa gorerena be unai hidio ai ia vara haraga diba. Hahine ese estrogen bema idia inua, unai ese dala ia kehoa kensa gorerena do idia abia, unai dainai idia inua lasi be namo.”

Rara Karana ena Dokona bona Estrogen Muramurana

Kekeni edia mauri laganidia be 11 bamona neganai, edia gatoi edia vara gabuna (ovaries) ese estrogen muramurana ia havaraia matamaia. Unai muramura dainai hahine dagina idia abia matamaia; edia rata idia bada idia lao bona hua ta ta amo rara idia karaia. Bena lagani ma 40 bamona murinai, unai muramura ena siahu ia maragi dainai, hahine idia rogorogo diba lasi bona edia hua rara ena nega ia ore. Gabeai, edia gatoi edia vara gabuna ese estrogen ia havaraia diba lasi momokani.

Unai neganai, estrogen be lasi dainai, gau haida idia dika diba, nega kwadogina lalonai eiava nega daudauna lalonai. Unai dika koua totona, lagani 1940 murinai doketa haida ese estrogen muramurana, saiens taudia ese idia karaia gauna, be hahine idia henidia matamaia. Lagani 1975 ai hahine milion 6 ese unai muramura idia inua. Bena doketa haida ese inai sivarai idia halasia: Estrogen inua hahinedia momo ese edia beibi pusedia ai kensa gorerena (endometrial cancer) idia abia, to idia inua lasi hahinedia haida sibodia ese idia abia. Haida idia gwau estrogen ese rata ai kensa gorerena ia havaraia. Unai dainai momo ese estrogen idia dadaraia. To saiens taudia idia hekwarahi unai muramura ena dika hamaragia totona, bena lagani 1980 murinai idia davaria, bema hahine ese muramura ma ta, progestin, bona estrogen ruaosi nega tamona idia inua, estrogen ese kensa gorerena do ia havaraia lasi. Unai murinai hahine momo ese estrogen idia inua lou.

Dahaka dainai hahine momo idia ura idia inua? Badina be inai: Idia siahu haraga karana ia koua; ia dainai headava karana idia karaia noho diba, kudou gorerena idia abia haraga lasi, bona edia turiadia idia auka noho.

Siahu Haraga, bona Ma Hisi Haida

Hahine ena hua rara ena nega be ia ore gwauraia neganai, nega momo ia siahu haraga, estrogen be ena tauanina ai ia ore dainai. Unai ia vara negadiai, ena vairana, ena aiona, bona ena kemena idia kakakaka idia lao, ena tauanina ia siahu herea, bona nega haida unai murinai ena varahu ia lasi badabada. Unai bamona hahinedia momo ese unai idia davaria. Haida ese unai mamina idia abia sisina mo, to ma haida idia abia badabada. Unai ese ia hahekwarahidia bada​—⁠edia varahu ia lasi negadiai edia dabua bona edia hetaru idia paripari bada, taunimanima vairadiai idia hemarai, bona hanuaboi ai idia mahuta namonamo diba lasi.

Estrogen be hahine ena tauanina lalonai ia maragi ia lao neganai, ena kiona matuna ena hidio ia severa-severa ia lao bona ia kaukau ia lao, ela bona headava karana ia hisihisilaia eiava ia karaia diba lasi. Hahine haida idia laloa idia buruka idia lao dainai headava karana do idia karaia lou diba lasi. To, estrogen muramurana ese unai dika ia koua diba eiava ia hadokoa diba.

Hahine idia buruka idia lao neganai, idia momo edia turiadia idia severa-severa bona idia manoka idia lao bona idia hekwaidu haraga diba, badina be kalsiam bona protin be edia tauanidia ai idia maragi idia lao dainai. Unai gorere ia bada ia lao neganai, hahine ese sosipani mai anina do ia abia isi neganai iena imana do ia hekwaidu reana. Eiava do ia asimana neganai ena ruduna turiana do ia hekwaidu reana! Hahine edia hua rara ena nega ia ore vadaeni neganai, unai ia vara haraga idia dekenai, badina be edia tauanidia lalodiai estrogen ia maragi ia lao. Unai ese kuku idia ania hahinedia bona kekero muramurana idia inua loulou hahinedia momo ia hadikadia.

Inai turia gorerena ia vara matamaia toana be lasi, unai dainai taunimanima idia diba lasi unai gorere idia abia vadaeni ela bona edia turia ta ia hekwaidu, bena unai gorere hanamoa dalana be lasi. Bema kalsiam momo idia inua, unai ese do ia durudia a? Bema estrogen be lasi, kalsiam ese turia ia ha-aukadia lasi. Unai dainai doketa idia gwau namona be hahine ese kalsiam bona estrogen be nega tamona idia inua. Estrogen ese tauanina ia durua, kalsiam ia abia dae totona.

Kudou Gorerena

Europe bona United States ai, hahine burukadia momo be kudou gorerena dainai idia mase. Bema estrogen muramurana idia inua, unai ese kudou gorerena do ia koua a? Idia vara gaudia ese unai idia hamomokania. Estrogen ese gau namona, kolesterol HDL, be rara ai ia habadaia, bona gau dikana, kolesterol LDL, ia hamaragia. Lagani 1976 ia lao 1982 ai, orea ta ladana Nurses’ Health Study, ese hahine 121,700 edia goada idia tahua, bona idia davaria estrogen idia inua lasi hahinedia momo ese kudou gorerena idia abia to idia inua hahinedia be unai bamona lasi.

Vadaeni, unai sivarai ese idia hahedinaraia estrogen be heduru namona, to ai ese ena namo sibona ai herevalaia vadaeni. Unai dainai oi kara haraga lasi emu doketa oi noilaia totona, to mani ena dika oi laloa guna.

Kensa bona Progesterone

Bema hahine ta ese estrogen sibona ia inua, unai ese ena beibi pusena ena hidiona ai sel momo ia havaradia, bena gabeai kensa do ia vara reana. Lagani ta ta iboudiai, hahine 1,000 1,000 amo tamona tamona ese kensa gorerena na edia beibi pusedia ai idia abia. Estrogen idia inua hahinedia 1,000 1,000 amo 4-8 ese idia abia. Estrogen be nega daudau ai idia inua hahinedia 1,000 1,000 amo 10 10 ese idia abia. Doketa haida idia laloa estrogen ese gorere ma haida hahine edia bogadia ai ia havaradia.

Unai dika koua totona, doketa ese hahine idia hamaorodia progestin bona estrogen ruaosi nega tamona do idia inua, badina be estrogen ena anina dikana ena vara dalana be progesterone ese ia koua. Doketa Lila Nachtigall bona Joan Heilman ese edia buka lalonai estrogen idia sisibalai henidia, idia gwau: “Bema emu beibi pusena be ia do noho, estrogen sibona oi inua lasi to progesterone ida oi inua hebou, badina progesterone ese estrogen ena dika ia koua.”

To progesterone danu be mai ena dika. Hahine momo ese idia maumauraia, badina be ia dainai hua gorerena idia itaia lou. Estrogen ese kudou ia hanamoa, to progestine ese unai namo ia koua. Namona be inai danu oi laloa namonamo: Bema unai muramura ruaosi oi inua, reana unai dainai kensa gorerena be emu rata ai do ia vara.

Lagani 1974 amo ema bona hari, inai muramura inua karana ena anina be nega 30 bamona idia tohoa loulou, kensa be hahine edia rata ai ia havaraia eiava lasi. Idia davaria, nega kwadogina ai idia inua hahinedia be unai dainai kensa idia abia lasi, to nega daudau ai idia inua hahinedia be idau. United States bona Europe ai idia davaria, estrogen be lagani 15 o ma haida lalodiai idia inua hahinedia momo ese unai gorere idia davaria diba. To unai idia tahua namonamo taudia ma haida ese unai lalohadai idia hamomokania lasi.

Do Oi Inua Eiava Lasi?

Doketa Isaac Schiff, Harvard Medical School tauna ta, ia gwau: “Namona be hahine ese sibodia edia doketa ida unai do idia herevalaia namonamo bona do idia lalohadailaia namonamo, bena unai murinai idia ta ta sibona ena lalona sibona ena lalona do idia hadaia, do idia inua eiava lasi.”

Hahine haida idia ura muramura idaudia idia inua. Haida ese vitamin E idia inua. Idia gwau unai idia inua dainai, nega momo idia siahu haraga lasi, guna bamona. Herevana estrogen oi inua eiava lasi, to bema aniani namona oi ania bona nega momo oi eksasais, unai ese oi do ia durua, kudou gorerena bona turia gorerena koua totona.

Momokani, estrogen eiava muramura ma ta ese hahine matamatana ai oi do ia halaoa lasi, eiava oi buruka oi lao dalana do ia koua lasi. Dirava ena Basileia sibona ese unai do ia karaia diba. (Mataio 6:10) Unai ita naria noho lalonai, estrogen ese hahine haida ia durudia noho, edia hua rara ena nega ia ore murinai.

[Picture on page 15]

Estrogen oi do abia dae lasi neganai, namona be ena dika oi henanadailaia guna