Tanobada Hegegemadai Famili Idia Naridia—Mai Lalokau, Matahakani, Haheitalai, bona Abidadama Ida

TAMA SINA tano idauidau ai ese edia natudia naridia karana idia kwalimulaia sivaraidia idia siaidia mai. Idia iboudiai be Iehova ena Witness taudia dainai, ataiai ai toredia karadia haniosi idia herevalaidia momo. Iniseniai ai toredia herevadia ese edia naria karadia haida mo sibodia idia hahedinaraidia.

Hawaii Amo

“Baibel ena hereva hegeregerena, lalokau be kara hereadaena. Namona be lalokau ena anina namodia be ruma bona famili lalodiai idia hedinarai. Lau bona Carol be ai lalokau heheni, aiemai headava lalonai. Ai hebamo heheni momo mai emai moale ida. Lau laloa natu naridia karana kwalimulaia dalana badana ta be, tau be ena adavana ida idia moale heheni, idia edia headava lalonai.

“Inai lau laloatao noho ema bona hari: Aiemai natuna roboana ia vara murinai, pura haida lalodiai mamina idauidau be egu lalona ai lau abia. Mauri gauna matamatana ena matamana lau hoalaia. Carol lau itaia, emai beibi Rachel na rata ia henia negadiai ia moale herea. Ia dainai lau moale, to lau mama henia sisina danu, badina be unai ese Carol bona Rachel ia guidia hebou, to lau be edeseni? Mamina lau abia, emai famili ena ihuana amo lau idia doria oho bamona. Iehova ena heduru amo lauegu lalo-hekwarahi be Carol lau hamaorolaia, bena ia ese lau ia bogaia hisi bona ia durua bada.

“Unai murinai emai beibi matamatana lau hebamo henia diba, badina be naria gaukaradia iboudiai lalodiai lau heduru dainai​—⁠ena napi idia miro negadiai lau huridia danu​—⁠unai be kara idau hereana lau dekenai! Rachel murinai emai natudia 5 ai abidia, dokona be Rebecca, hari iena lagani be 8. Ai ese idia ta ta sibona sibona Baibel amo ai hadibadia.

“Idia do maragi neganai idia dekediai ai karaia karana ma ta be inai: Idia vara negana amo lau bona Carol ese ai hereva henidia mai emai moale ida. Gau idauidau ai herevalaidia. Nega haida ai ese Iehova bona ia karadia gaudia mai hairaidia ai herevalaidia. Nega haida ai ese fani gaudia ai herevalaidia. Momokani, unai dala amo gau haida ai hadibalaidia toho, to unai kara ena anina badana be, ai be idia ida ai moale hebou mai emai lalo-namo ida. Lau laloa unai herevahereva dainai ai be idia ida ai lalokau heheni, bona emai lalohadai ai gwauraia hedinarai heheni diba.

“Iehova ese lauma gaudia edia anina badana be ai ia hadibalaia vadaeni. Lau bona Carol be mai emai kohu momo lasi, to ai be nega ta ai tahudia lasi, bona ai lalohisihisi lasi ai abidia lasi dainai. Bema emai nega ena kahana badana be moni bona kohu tahua karadia ai ai haorea, emai nega orena be hegeregere lasi, Iehova bona emai famili totodia do ai gaukara. Ai ese dala maorona ai abia hidi.” (Carol ena hereva be inai murinai.)

“Lau laloa hahine ese rata iena beibi ia henia negadiai unai kara ese ruaosi ia guidia hebou, badina be nega daudau lalonai beibi ia rosia loulou bona ia huaia loulou. Hahine be dala lasi, ena beibi do ia rakatania bena do ia lou henia lasi ela bona hora rua o hani idia ore. Nega ibounai lau bona Ed ese emai natudia na idau taudia dekediai ai rakatanidia lasi do idia naridia totona. Nega ibounai lau ura egu beibi lau hadibadia bona lau itadia namonamo, idia tubu daekau noho lalonai. Unai dainai, idia maragi neganai moni gaukarana be idau gabu ai lau karaia lasi. Lau laloa idia be unai dainai idia diba ai ese ai lalodia bada. Oi be emu natudia ida do umui hetura heheni dalana badana be oi be idia dekediai do oi noho. Kohu ese emu hebamo do ia hereaia lasi.

“Egu natudia edia mauri laganidia ese 12 idia hanaia neganai, lauegu lalona ia hekwarahi, badina be unai neganai lau dekenai idia tabekau lasi, guna idia karaia bamona. Unai be hetoho negana, emai natudia ai hadibadia, ai matahakani henidia, bona ai hakaudia karadia ia tohodia, anina namona idia havaraia noho eiava. Namona be ta ia naria lasi ela bona idia bada bena kara maoromaoro, taunimanima lalokau henidia karana bona Iehova lalokau henia karana ia hadibalaidia matamaia, to idia vara negana amo ia hadibalaidia be namo.

“Unai hekwarahi laganidia idia do ginidae lasi neganai, emu gaukara be lagani 12 lalodiai oi karaia diba. To bema Baibel ena sisiba oi badinaia vadaeni mai emu goada ida, moale bona maino do oi davaria, edia lalodia do idia hadaia Iehova do idia hesiai henia mai edia lalona ida neganai.”​—⁠Edward bona Carol Owens.

Zimbabwe Amo

“Memero kekeni be ‘harihari gaudia Iehova ena amo.’ (Salamo 127:⁠3) Lau bona egu adavana ese unai ai laloa noho dainai, inai harihari gaudia ai naridia namonamo. Dala ai tahua, emai famili lalonai do ai guriguri hebou, Baibel do ai stadilaia hebou, do ai tomadiho hebou, do ai gaukara hebou, emai turadia do ai vadivadi henidia hebou, bona do ai gadara hebou totona.

“Nega haida matahakani ai henidia. Nega ta, aiemai natuna merona ena lagani be 14 bamona neganai, ruma dekenai ia ginidae leiti. Ai laloa kerere ta ia vara vadaeni, to ia ura lasi ia gwauraia hedinarai, unai dainai ai laloa do ai naria ela bona daba. Hanuaboi momokani ai, aiemai mahuta daiutuna ena iduara ai ia pidipidi. Ena matana be mai ranuna.

“ ‘Tamagu, Sinagu e, lau mahuta diba lasi, badina be kara dika taudia edia hebamo be Baibel amo lau umui sisibalai henia neganai, umui lau kamonai henia lasi. Hari dina, sikuli murinai memero haida ese lau idia doria, lau be idia ida do ai nahu hebou, bena idia ta ese lau ia veria diho ranu ena kopina henunai. Bema mero ta ese lau ia durua lasi, lau maloa mase. Lau idia kirikirilaia, ma idia gwau lau be gari tauna. Lau be maoromaoro lau mai ruma dekenai, to murimuri ai lau naria noho, badina be egu kerere lau hemarailaia dainai. Lau sori, badina be Baibel ena sisiba lau kamonai henia lasi dainai.’​—⁠1 Korinto 15:33.

“Ia tai bona ai danu ai tai. Ai moale badina be ena lalona ia parara vadaeni, to ai panisia danu, ena lalona hamaoromaoroa momokani totona. Esodo 34:​6, 7 ese ia hahedinaraia Iehova be mai ena hebogahisi bona kara dika ia gwauatao, to ‘dika davana danu ia henia.’ ”​—⁠David bona Betty Mupfururirwa.

Brazil Amo

“Lau be vabu bona lau sibona ese egu natuna merona lau naria. Lau be tisa danu. Memero kekeni hadibadia bona biagudia be auka. Namona be edia tamadia sinadia ese idia hadibadia goevagoeva, idia biagudia namonamo, bona kara namo idia haheitalaidia. Egu natuna lau biagua bona lau hebogahisi henia danu be auka. Dala lau tahua, egu lalona amo do lau kamonai. Gau badana be lau hereva henia sibona lasi to ena lalona lau ania danu. Lau ura do ia laloa ia be mai ena dagi aiemai famili lalonai; unai dainai lau be emai moni naria dalana lau herevalaia ia dekenai. Paua ena bili o ranu ena bili lau abia negadiai, eiava dabua o tamaka edia davana idia daekau negadiai, unai ai herevalaia hebou.

“Ia karaia namo karadia dainai lau hanamoa mai egu momokani ida be gau badana. Nega ta ta lau ese Dirava ena taravatu badinadia karana ena namo lau hahedinarai henia. Nega ta, lau sisiba henia loulou murinai, au amo lau kwadia. Unai be auka lau dekenai, to anina namona ia havaraia! Ia bada daekau noho lalonai ai ese namo bona dika ai davaria, to hahediba bona matahakani edia namo be ai diba. Ia ese sibona ena lalo-hekwarahi bona ena lalona ena mamina lau ia hamaorolaia.

“Lau naria namonamo, gau ta ese emai hereva heheni namonamo dalana do ia koua garina. Unai dainai egu moni gaukarana dekenai lau naria namonamo, egu natuna do lau bamoa diba totona. Hekwakwanai ai davaridia negadiai, lau kamonai namonamo toho, bona Iehova ena heduru amo ai hadareredia. Lau hamaoroa lau danu be mai egu kerere. Nega ta lau badu dikadika, bona lau haduaia ‘ena uduna do ia koua.’ Ia gwau unai bamona lau hereva henia be lalokau karana lasi. Iena hereva be maoro. Unai adorahi ai ai herevahereva daudau.”​—⁠Yolanda Moraes.

Korea Amo

“Baibel ena sisiba herevadia lau badinadia goadagoada. Deuteronomi 6:​6-9 lau laloa bada. Unai dainai dala lau tahua, nega momo lauegu natudia dekediai do lau noho bona Dirava ena Hereva do lau hadibalaidia namonamo totona. Lau ese danu misinari taudia bona Betele taudia lau boiridia emai ruma dekenai do idia mai, bena lauegu natudia ese unai taudia edia noho dalana ena mamina idia abia.

“Iseda natudia ese hekwakwanai idia havaradia neganai, namona be ita tama sina ese lauma ena huahua ita hahedinaraia guna. Ita badu henidia bena iseda lalona ita negea be haraga, to namona be ita haheauka bona kara namo ita haheitalaidia. Namona be ita matauraidia, bona dala ita kehoa, idia edia kara edia anina do idia gwauraia hedinarai totona. Bema kerere hamomokania gauna be lasi, namona be ita abidadama henidia bona nega ibounai ita hagoadadia. Emu natuna oi matahakani henia neganai, ena kerere oi gwauraia hedinarai henia guna, oi hadibaia ena kara ese Iehova bona ena tamana sinana ia habadudia. Nega momo, egu natudia lau matahakani henidia murinai, idia gwau: ‘Tamagu, lauegu gwau-edeede ena badina lau lalo-pararalaia lasi. Lau kava mase.’ Ai matahakani henidia badina be edia namo ai tahua; unai idia diba dainai ai idia laloa bada.

“Ta ia kara dika matamaia neganai, namona be ena tamana sinana be unai idia diba haraga be namo. Egu natuna roboana be haisikuli ai ia sikuli noho lalonai, nega ta lau ese rok miusik mai regeregena bada lau kamonai, iena daiutu amo ia lasi. Lau davaria ia be sikuli oreana ta lalonai ia vareai vadaeni, bona tanobada ena lalo-ani ese ia dibagania vadaeni. Ena orea taudia ese ena lalona idia ania loulou dainai kuku ia ania vadaeni. Kuku ania karana ena dika ia ida ai herevalaia, bena ia be sibona ena lalona ia hadaia unai orea amo do ia doko, bena ia doko. Ai ese dala ai karaia, unai sikuli karadia kereredia edia gabu ai moale karadia namodia iena ruma bese taudia ida bona kongregesen taudia ida do ia karaia totona.

“Tama sina ese edia natudia na kara namo idia haheitalaidia be gau badana. Nega ibounai lau ese egu natudia memerodia ruaosi lau hamaorodia lau ura pioneer gaukarana lalonai sivarai namona be nega ibounai do lau harorolaia. Egu natuna iharuana be sikuli amo ia doko neganai, egu moni gaukarana amo lau ritaea bona pioneer tauna ai lau lao. Egu natudia ruaosi ese egu lalo-goada idia itaia bena idia danu be unai bamona idia karaia. Ami lalonai idia vareai lasi dainai idia dibura, bena unai murinai pioneer gaukarana idia karaia noho ema bona hari.”​—⁠Shim Yoo Ki.

Sweden Amo

“Aiemai natudia 7, memero ima bona kekeni rua, be idia bada vadaeni bona Dirava ena Basileia ena sivarai namona harorolaia gaukarana idia goadalaia noho. Idia maragi negana amo kongregesen heboudia idia lao henidia bona ai ida idia haroro danu. Haroro gaukarana be taina taina amo idia dibalaia​—⁠iduara ai idia pidipidi, ruma tauna idia hanamoa, edia ladadia idia gwauraia, pepapepa eiava magasin idia henia. Idia do maragi neganai, Haroro School lalonai hereva idia karaia.

“Hekwakwanai badadia idia vara negadiai, lalokau bona haheauka ai hahedinaraia be mai anina bada​—⁠ai boiboi lasi bona ai heai lasi. Iehova ena lalohadai idia ida ai herevalaia hebou bena unai hekwakwanai ai haoredia. Moni naria namonamo dalana ai hadibalaidia. Idia bada neganai, niuspepa idia hoihoilaidia bona biru gaukarana idia karaia. Edia tubudia idia vadivadi henidia loulou dainai, burukadia edia hekwakwanai idia lalo-pararalaidia bona idia hebogahisi henidia.

“Emai headava laloatao dinana namba 30 ai, ai idia tore henia, idia gwau:

“ ‘Tamamai Sinamai, Emai Lalokau e:

“ ‘TANIKIU, GAU IBOUDIAI DAINAI! Ai umui lalokau henia bada, abidadama momokani be ai lalonai umui havaraia, helaro namona ai umui henia​—⁠unai ena davana ai gwauraia diba lasi. To ai ura inai harihari gauna maragina dainai do umui diba ai ese umui ruaosi ai lalokau henia bada. [Idia sainia] Emui natudia.’

“Emai natudia ta ta be lagani 20 bamona lalodiai ai naridia. Unai kara ai laloa lou neganai, Iehova, iseda Tamana guba dekenai be ai tanikiu henia bada, badina be ai ia bogaia hisi bada.”​—⁠Bertil bona Britta Östberg.

Tama Sina Edia Hereva Haida

“Iehova ena dala hegeregerena, beibi ena sinana ese rata ia henia negadiai ia rosia loulou. To tamana danu ese ia rosia bona ia poua diba ela bona ia mahuta. Hanuaboi momo lau ese emai natudia unai bamona lau kara henidia mai egu moale ida.”

“Lau be edia tamana dainai emai natudia be rata lau henidia diba lasi, to hanuaboi ai lau hadigudia negadiai lau dogodia tao. Lau bona idia ese unai kara ai moalelaia!”

“Lagani ta ta ai edia ura-kwalimu bona edia maduna be taina taina ai habadaia noho. Bema ta ese spring ta be ena imana lalonai ia kapua tao, namona be ia kahua nege metairametaira, do ia roho oho garina.”

“Lalokau momo oi hahedinaraia. Bema emu natuna ta oi rosia loulou bona oi kisi henia loulou, ia be unai dainai do ia mase lasi​—⁠to bema unai bamona oi kara henia lasi, reana ena lalona do ia mase.”

“Namona be oi haheauka henidia. Oi maumau henidia hanaihanai lasi, hemarai taudia ai do idia lao garina. Edia kara namodia dainai oi hanamodia!”

“Oi durudia mai emu goada ibounai ida, kara namo taudia ai do idia lao totona.”

[Picture on page 9]

Emui natudia umui lalokau henidia momokani be namo

[Picture on page 10]

Famili taudia bema idia kara hebou, unai ese ia guidia hebou momokani