Hui Momo New Zealand Huahuana

Noga! toretore tauna ta New Zealand ai

WEST kahana amo idia mai taudia ese idia gwauraia Chinese gooseberry. To New Zealand dekenai idia hatubua hamatamaia neganai, hoihoilaia dalana idia habadaia totona unai bisinesi idia haginia taudia be inai gau ta idia gwauraia bada: unai hui momo huahuana ena toana be New Zealand ena kiwi manuna hegeregerena. Unai dainai, tanobada ibounai dekenai idia gwauraia kiwifruit.

Lagani momo lalodiai unai South Pacifiic tanona ena moni abia dalana be mamoe huina, vamu, bona boromakau amo idia abia gaudia idia hoihoilaidia. To hari New Zealand ena tubutubu gauna badana be kiwifruit, bona unai be moni abia dalana danu. Unai amo taunimanima milion momo be kiwifruit idia ania diba. Dala idauidau ai idia gaukaralaia diba, nadua tauna ena diba hegeregerena, bona ania daladia idauidau namo momo idia havaraia.

Kiwifruit (Actinidia chinensis) be berry ta bona uda varovaro bamona ia tubu. Keru momokani lasi bona siahu momokani lasi gabuna ai ia tubu namo herea dainai, kiwifruit be guna China ena diho kahanai ena Yangtze Kourana dekenai idia hatubua. To, lagani 1934 ai, New Zealand ena Te Puke hanuana ai, bisinesi karaia totona idia hatubua; unai hanua taudia be 5,500 bona North Island ena mairiveina konena ai idia noho. Unai nega sisina murinai, unai tano ena gabu ma haida dekenai kiwifruit idia hatubua danu. To unai hanua ena keru bona siahu negadia be namo dainai, idia gwauraia “tanobada ena kiwifruit hanua badana.”

Kiwifruit hatubua gaukara be mai hekwarahina. Idia hadoa murinai lagani toi eiava lagani ima dekenai idia naria huahua idia davaria totona. Ma danu, ena rigi idia utua momo, diari be huahua ia abia totona. Au haida idia haginia unai tubutubu gauna abia isi totona. Bona huahua haboua negana ia ginidae neganai, diba momo gaukara taudia handred momo be imana amo unai huahua milion momo idia gogodia, unai huahua ena bada be siporo ta eiava orange maragina ta bamona. Kiwifruit badadia 9 edia metau be kilogram tamona bamona, bona lagani ta ta iboudiai huahua edia ton tausen momo idia gogodia.

Sedira oi laloa unai huahua hatubua totona idia hekwarahi bada; The Wall Street Journal niuspepa be nega ta unai huahua ena toana ia gwauraia “tennis bol gunana ta” bamona. To namo lasi ena toana be namo lasi dainai oi ia koia. Unai Journal be ma ia gwau, “Kiwifruit oi kehoa neganai ena lalona ena toana be ia namo. Ena kala be green momokani bona ena bonana be namo herea, ia bogaraginai ena kala be purple bona ielo.” Bona ania totona sipunu amo oi kakasia! Ena mamina be suga bamona. Ma danu, tauanina ia durua bada. Ia dekenai vitamin C bona E be bada, to unai sibona lasi, kiwifruit huahua badana ta ena fiber be idia utua maragimaragi bona kapusi dekenai idia atoa celery ena fiber be nega hani amo ia hanaia. Inai kiwifruit huahua tamona be biku tamona ena potassium ia hanaia, bona chromium 20 ia lao 70 pesen ia henia, dina ta ta ibounai tauanina be unai ia abia be namo.

Nadunadu gabuna ai, kiwifruit be dala idauidau ai idia gaukaralaia diba bona aniani daladia idauidau ai idia gaukaralaia diba. Bema oiemu gabu dekenai oi abia diba, sedira inai sivarai ida ai torea aniani karaia dalana oi tohoa diba. Sedira oi danu be hui momo New Zealand huahuana maragina do oi ura henia bada!

[Picture Credit Line on page 23]

New Zealand Kiwifruit Marketing Board

[Box/Picture on page 24]

Kiwifruit Aisi Anianina:

1 tin litchi huahua (500 gram) eiava ma huahua ta

4 kiwifruit, kopina kokia

1 kapusi suga

1 tin mandarin huahua (250 gram)

1 tablespoon orange liqueur

1 tablespoon sipora ranu

2 kapusi ranu

1. Ranu bona suga be nadunadu urona lalonai oi bubua. Lahi maragina latanai suga bona ranu oi buloa hebou. Miniti toi lalonai ranu dekenai oi nadua. Oi kokia bona ia keru.

2. Kiwifruit rua be makohia masini dekenai oi hamakohia maragimaragi.

3. Ia makohi vadaeni kiwifruit, mandarin ranuna, siporo ranuna, liqueur bona suga oi haboua. Oi buloa namonamo. Ia dobu lasi mereki palakapalakana dekenai freezer lalonai oi atoa. Ia auka neganai, foka amo oi kakasia aisi karaia totona.

4. Kiwifruit huahua orena oi hakerua bona oi utua maragimaragi.

5. Litchi lalodiai mandarin kahadia oi atoa, bona oi utua maragimaragi kiwifruit haida ida oi atoa hebou, bena brandy inua galasi badadia momokani lasi lalodiai eiava mereki dekenai oi atoa.

6. Ia do noho litchi bona mandarin ranuna be huahua dekenai oi bubua.

7. Oi ania gwauraia neganai, huahua latanai oi hegaegaelaia aisi oi atoa.

Ena bada ia hegeregere taunimanima 4 eiava 6 idia ania totona.