Aniani Idauidau ese Mexico Taudia Edia Mauri Ia Hanamoa

Noga! toretore tauna ta Mexico ai

OI URA Mexico taudia edia aniani oi mamia, a? Mani oi helai diho inai pata dekenai. Pata latanai be kala idauidau dabua mai hairai ladana zarape idia atoa bona aniani ena idauidau mani oi itaia, bona edia bonana namona mani oi bonaia!

Momokani, tano idauidau be mai edia aniani karaia daladia idauidau, to Mexico taudia edia aniani toana idauidau be dokona lasi bamona. Mole idauidau be momo herea; sauce danu be idauidau momo bona aniani latanai idia atoa; aniani ladadia haida be tostadas, enchiladas, sopes, quesadillas bona tlacoyos. Danu, mamina namo tacos idia karaia. Bona tamales idia karaia danu, edia idauidau momo be Mexico hanua idauidau momo hegeregeredia. Bona aniani momo be davara amo idia abia gaudia idauidau amo idia karaia.

Oiemu uduna ranu ia diho, a? Vadaeni, ai ese Mexico taudia edia aniani haida do ai hadibamu.

Mole​—⁠Mexico Taudia Edia Aniani

Unai hereva mole (idia hereva moʹlay) be Aztec Nahuatl gado ena hereva mulli amo idia abia bona unai hereva ena anina be “sauce.” Unai mole eiava sauce be kokoroku eiava manu badadia eiava raisi latanai idia atoa, bona unai ese aniani mamina namona ia havaraia, dina badadiai idia karaia. Ena buka ladana Mexico’s Feasts of Life lalonai, Patricia Quintana ia gwau “mole idauidau idia karaia, taoni ta ta ai, hanua ta ta ai, bona nadunadu taudia hanua lalonai be dala idauidau amo idia karaia.”

Unai sauce be idia hakaukaudia chili pepper, tomato kakakakana, onion, almond bona prune, biku, paraoa, clove bona cinnamon, oela, damena bona pepper. Chocolate idia atoa danu ena mamina be ia swit sisina totona. Emu kokoroku bona raisi latanai taina ai atoa diba, a? Oi naria namonamo! Haida edia uduna bona bogana be idia hegeregere lasi unai aniani idia ania totona.

Pepper Siahudia Lalonai Aniani Idia Atoa

Pepper siahudia lalonai aniani idia atoa be idia ania momo gauna. Chili pepper badana ladana poblanos idia gaukaralaidia, oela dekenai idia fraia sisina edia kopina idia kokia bona idia manoka totona. Atai kahana idia utua bona edia lalona bona uhena idia kokia. Bena idia utua maragimaragi vamu bona okari be prune bona aniani reidia danu idia fraia; bena unai be pepper lalonai idia atoa. Bena toothpick amo pepper ena atai kahana idia koua. Nega haida sisi idia atoa danu. Vadaeni, pepper be paraoa amo idia karaia batter amo idia koua bona idia fraia. Unai murinai tomato kakakaka ena vasiahu idia bubua ia latanai, bena ia hegaegae oi ania totona. Edia mamina be ia namo herea momokani dainai oi naria namonamo toothpick oi anidia garina!

Ma dala ta amo pepper idia karaia, ena ladana be chiles en nogada. Pepper lalonai idia atoa gaudia be okari bona idia utua maragimaragi vamu idauidau, hegeregere boromakau, veal, bona boroma. Nega haida idia ese au huahua idauidau bona bisnaga [kabesi] idia udaia. Vadaeni chili idia hahonua bona idia nadua, unai murinai idia kokia bona ia keruma neganai suga cream amo idia koua bona pomegranate ena nadinadi be ia latanai idia atoa.

Mexican Aniani Namona

Mexico taudia idia ura bada anianina be tortillas bona chili siahudia amo idia karaia sauce idauidau. Tanobada ibounai lalonai tortillas aniani idia diba. Idia be severasevera, koni amo idia karaia bona comal (mai siahuna auri palakana) latanai idia fraia. Nega momo sauce be green pepper, hegeregere jalapeños (ena lata be sentimita ima bamona bona ia bada sisina), eiava serranos (maragi gaudia) amo idia karaia. Unai pepper siahudia be tanobada ibounai dekenai idia gaukaralaidia badina vinegar lalonai idia atoa bona gabu ibounai dekenai idia siaia lao.

Taunimanima idia ura henia bada sauce karaia dalana be auka lasi. Green pepper, tomato kakakakadia, bona onion oi gaukaralaia​—⁠oi nadudia lasi. Unai gaudia ibounai oi utudia maragimaragi bena damena oi atoa emu ura hegeregerena. Bema unai sauce oi hapatakaia avocado ida oi buloa, oi ese sauce namo herea ladana guacamole oi karaia, unai sauce oi ania kava diba eiava taco (tortilla be aniani amo idia hahonua bona idia lokua gauna) bamona oi ania diba. Danu, green sauce ta oi karaia diba green pepper bona green tomatillos amo, idia ruaosi be lahi amo oi gabua sisina bena oi hapatakaia. Sauce kakakaka be pepper kakakaka bona tomato kakakaka amo idia karaia. Sauce haida be chili pepper sibona amo idia karaia, to ena siahu mamina be bada herea.

Tostada be tortilla aukana bona idia fraia bona ia latanai idia fraia bini, kokoroku eiava vamu, onion bona sauce be latanai idia atoa. Sopes be tostadas bamona, to tortilla be ia severasevera lasi, ia maragi bona ia manoka. Tlacoyos be tortilla badana bona idia fraia bini be ia lalonai idia atoa. Onion bona vasiahu be ia latanai idia atoa. Enchiladas be idia lokua taco bamona, bona ia lalonai kokoroku vamu idia atoa. Mole amo idia koua, bena sisi bona onion be ia latanai idia atoa. Bema oi ura cream oi atoa diba unai aniani idauidau lalonai.

Taunimanima momo be quesadillas idia ura henia! Unai ladana idia henia badina queso eiava sisi amo idia karaia, to gau idauidau amo idia karaia diba: idia gabua boroma ena kopina, huitlacoche (koni ena fungus), mausini ena falaoafalaoa, tinga (idia utua maragimaragi boromakau vamu siahuna) bona boroma amo idia karaia sosisi. Dala idauidau amo unai aniani idia karaia diba, to mamina namo gaudia be tortilla danu idia karaia gaudia. Tortilla idia karaia bona sisi idia atoa kahana ta dekenai, bena idia lokua bona comal latanai mai ena oela sisina danu idia fraia. Nega tamona idia giroa ia fraia namonamo totona. Idia do ania lasi neganai, sauce be ia lalonai idia atoa bona ia siahu noho lalonai oi ania! Hmmm, ena mamina be namo herea!

Idia Gari Lasi Taudia Totona

To Mexico taudia edia aniani haida be gari lasi taudia sibona totona! Oi ura mai digara bada ariha oi ania toho​—⁠io, ariha​—⁠mole ida oi ania, a? Disi lalonai ena toana be namo, bona reana oi laloa ai koikoi to ena mamina be namo herea momokani. Oi ura taco lalonai idia fraia dimairi kakakakadia oi ania, a? Idia ania taudia momo idia gwau bema kakakaka sauce eiava green sauce danu oi ania, ena mamina be namo herea. Aniani ta be dimairi edia gatoi taco lalonai, to idia davaria momo lasi​—⁠unai be Mexico taudia edia caviar! Eiava idia fraia kwadi kakakakadia oi ura ania, a? Kwadi edia bada be idauidau, to bema nega ginigunana oi ania toho, maragidia oi ania be namo. Unai aniani be Mexico taudia bona idia manada taudia sibodia idia ura bada.

Ai ese aniani haida sibona ai gwauraidia. To namona be nega oi atoa aniani idauidau ma haida oi mamia toho totona, hegeregere tamales (koni amo idia karaia, idia lalodiai vamu idia atoa bona koni ena kopina lalonai idia nadua), mixiotes (vamu bona aniani reidia be maguey tubutubu gauna ena kopina lalonai metairametaira idia nadua), ceviches (kasiri gwarume bona davara aniani idauidau be siporo ena ranu lalonai idia atodia), sauce idauidau, bona bini idauidau danu mai edia kala idauidau oi tohodia be namo.

Oi mai! Pata dekenai oi helai diho! Unai siahu gaudia oi laloa lasi. Aniani momo lalonai pepper idia atoa lasi, oiemu ura hegeregere sauce siahudia oi atoa diba. Mexico taudia edia ura be idauidau, bona haida be sauce siahudia idia ania lasi. To mani emai noinoi oi abia dae bona oiemu vairana dekenai ia noho aniani oi ania toho, badina aniani idauidau ese Mexico taudia edia mauri ia hanamoa!

[Picture Credit Line on page 25]

The Codex Nuttall/Zelia Nuttall/Dover Publications

[Pictures on page 25]

Atai laurina: tacos

Atai idibana: chile rellenos

Henunai: tostadas

[Pictures on page 26]

Guacamole

Tlacoyos

Enchilada de mole