Matamata Taudia Idia Henanadai . . .

Dahaka Dainai Egu Tama Sina be Lau Idia Laloa Bada Lasi?

Kekeni matamata ta ia gwau: “Lauegu sinana lau noia miniti ima sibona ia ida lau herevahereva totona, to ia gwau ia bisi bada.”

CHRISTINA ena mauri lagani be 16​—⁠ia headava lasi to ia rogorogo kava. Ena be ia sori bada unai hekwakwanai ia vara dainai, to ia badu danu. Ia taitai, ia gwau: “Lauegu sinana be idia vara diba gaudia be lau dekenai ia hadibaia lasi. Ia be nega lasi lau karaia gaudia ia tahua totona.”

Oi be nega haida unai bamona mamina oi abia​—⁠oi laloa emu tamana bona sinana be oi idia laloa bada lasi, a? Oiemu lalohisihisi dainai Christina bamona reana oi karaia lasi. Bona oi diba ena be emu tamana bona sinana be oi idia laloa momo lasi, to unai dainai oi kara kerere be namo lasi. To momokani, bema emu tamana bona sinana ese oi idia naria namonamo lasi neganai, oi lalohisihisi diba. Ena be oi be mero eiava kekeni badana ai oi lao, to emu tamana bona sinana edia lalokau bona heduru oi ura abia noho. Emu tamana bona sinana ese oi idia laloa momo lasi neganai emu mamina be hegeregere oi idia dadaraia bamona. Kekeni matamatana ta ia gwau: “Lauegu sinana lau noia miniti 5 sibona ia ida lau herevahereva totona, to ia gwau ia bisi bada.”

Unai dainai, matamata taudia idia henanadai henidia neganai, edia haere be hoa gauna lasi, idia 100 100 amo 25 25 “idia laloa edia tamana bona sinana dekenai edia nega ena bada be hegeregere lasi.” Matamata ta ia gwau: “Bema lauegu tamana bona sinana ida lau turana namo herea be namo, bona idia ida lau laloa gaudia iboudiai lau herevalaia diba be namo.” Ena be tamana bona sinana be edia natudia ida idia noho, to reana idia lalo-tamona lasi. Lalo-tamona ai idia herevahereva lasi.

Dahaka Dainai Oi Idia Dadaraia Bamona

Mani oi laloa: Oi be mai emu hekwakwanai ta bona oi naria ela bona adorahi emu sinana ida oi herevalaia totona. Emu sinana be gaukara amo ruma dekenai ia ginidae neganai, televisen vairanai ia helai bona nius ia raraia. Ia oi hereva henia neganai, oi ia dadaraia ia gwau, “Lau oi rakatania, lau ura lau sipele.”

Ia be lalokau lasi sinana, a? Lasi, oiemu tamana bona sinana be oi idia dadaraia kava lasi. To hari ita be “nega dokonai metau dikadia momo” idia vara negana lalonai ita noho. (2 Timoteo 3:​1-3) Bona oiemu tamana bona sinana be hekwarahi momo idia davaria. Reana idia lalohisihisi, idia hekwarahi bada dainai idia badu eiava idia hesiku, unai dainai nega namona ta idia henia diba lasi oi dekenai. Bema oi be tamana eiava sinana sibona ruma bese lalonai oi noho unai ia vara diba. Unai dainai bema oiemu lalohisihisi oi gwauraia hedinarai lasi do idia laloa oi moale sibona.

Tamana bona sinana be edia maduna momo idia laloa danu. Bema oiemu tamana be Keristen goada tauna, reana ia ese kongregesen ena maduna haida ia huaia. (2 Korinto 11:28, 29 itaia danu.) Bona oi ia hadibaia lasi, to reana emu sinana be mai ena gorere ta dainai ia lalohisihisi. Oi be mai emu taihudia bona tadidia, a? Vadaeni, reana oiemu tamana bona sinana be idia dainai idia hekwarahi danu.

Momokani, tamana bona sinana haida be inuinu kekero karana idia manadalaia ena hekwakwanai dainai, edia natudia edia ura gaudia idia karaia diba lasi. Haida be edia natudia lalokau henia dalana idia diba lasi. Natudia ese edia tamadia bona sinadia amo lalokau karana idia dibaia. (1 Ioane 4:19 itaia danu.) Bona reana, emu tamana bona sinana edia tamadia bona sinadia be idia dekenai lalokau idia hahedinaraia lasi.

Bena ma tano haida dekenai danu sene eiava kastom karadia dainai edia matamata taudia edia ura idia dadaraia momokani. Gabu haida Africa dekenai, edia kastom dainai, tamana, sinana, bona natudia be nega tamona idia aniani lasi. Unai kara ese dahaka ia havaraia? Africa merona Collin, ena mauri lagani be 14, ia gwau: “Lauegu tamana bona sinana lau lalokau henidia be auka. Egu mamina be hegeregere lau sibogu egu mauri totona do lau hekwarahi.”

Oi Dadaraia Kara Kerere Haida

Badina idauidau dainai emu tamana bona sinana be reana oi idia dadaraia bamona, to unai dainai oi lalohisihisi bona oi badu diba. Unai dainai natudia haida be edia tamana bona sinana idia durudia lasi eiava idia kamonai henidia lasi. Haida idia laloa idia gwau-edeede neganai edia tamana bona sinana ese nega bada do idia henia idia dekenai. To Christina bamona, idia gwau-edeede natudia ese sibodia idia hahisidia. Hereva Lada-isidia 1:32 ia gwau: “Aonega lasi taudia edia kamonai lasi karana ese do ia hamasedia.”

To, bema gau ta oi karaia lasi, emu lalohisihisi oi kokia totona, unai hekwakwanai do oi hanamoa diba lasi. Hereva Lada-isidia 24:10 ese inai henanadai ta ia gwauraia: “Hekwakwanai dinana dekenai oi lalo-manoka, a?” Bema oibe, “Oiemu goada do ia maragimaragi.” Lalohisihisi ena mamina be tauanina ena hisihisi mamina bamona. (Hereva Lada-isidia 18:14) Bema oi kokia haraga lasi, tau eiava hahine ai oi lao neganai unai lalohisihisi ia do noho. Mero ta ladana Johan ena sivarai mani oi laloa. Johan ia gwau, “Lau tubu daekau noho lalonai, egu tamana, ia be inuinu kekero muramura manadalaia tauna, be nega lasi lau ia durua totona.” Ma ia gwau: “Ia be sibona ena hekwakwanai ia lalodia momo dainai lau ia laloa lasi.” Johan be tau badana ai ia lao neganai, nega daudau lalonai ia lalo-metau bona ia laloa unai kerere be ia sibona ena.

Johan ena turana namodia haida ese idia durua ia lalo-goada totona. Iena haheitalai ese ia hahedinaraia ena be oiemu ruma bese lalonai hekwakwanai ia noho, to dala oi tahua diba oi hanamoa totona.

Oi Durudia Oi Idia Ura Henia Totona

Bema oiemu tamana bona sinana be oi danu hereva idia hamatamaia momo lasi be edena bamona? Namona be oi ese idia dekenai hereva ta oi hamatamaia. (Mataio 7:12; Filipi 2:⁠4) Bema idia lao kara ta idia karaia totona, oi hamaorodia oi ura idia oi bamoa. Oi hamaorodia oi ura oi durudia, hegeregere aniani oi nadua eiava aniani murinai mereki oi huria totona. Bena gabeai, oi lalo-hekwarahilaia gaudia, hegeregere sikuli dekenai idia vara gaudia oi herevalaidia diba.

To, nega haida, sedira mai emu hekwakwanai badana ta dainai oi ura oi hamaorodia. Bema oiemu tamana be gaukara amo ia mai bona ia hekure noho lalonai oi lao henia be namo lasi. Namona be “nega namona” oi tahua​—⁠ia lalo-hekwarahi lasi bona ia moale negana unai​—⁠do umui kiki hebou totona. (Hereva Lada-isidia 15:23) Reana unai neganai do ia ura oi ia durua emu hekwakwanai hanaia totona.

To, dahaka oi karaia diba bema oiemu tamana bona sinana ese oi idia ura henia totona oi hekwarahi bada, to gau ta ia vara lasi?a Hereva Lada-isidia 15:​22 ia gwau “bema palani ta idia herevalaia hebou lasi, do idia kwalimu lasi.” Oibe, reana oi ese emu tamana bona sinana do oi hamaorodia (mai hemataurai bona aonega dalanai) oi idia laloa bada lasi dainai, emu mamina be reana oi idia lalokau henia lasi bona unai dainai oi lalohisihisi. Reana oi ura nega ta ta oiemu gaukara idia hanamoa eiava oi idia durua emu sikuli gaukara oi karaia neganai.

Emu tamana bona sinana oi hadibadia emu mamina be unai bamona neganai reana do idia hoa. Reana haraga momokani do idia gwau oi idia lalokau henia bona do idia sori karaia oi dekenai badina edia kara ese unai bamona lalohadai ia havaraia dainai. Nega momo tamana bona sinana be hekwakwanai ta idia diba neganai edia kara idia haidaua haraga.

Bona danu, umui herevahereva lalonai, reana do oi davaria oi ese lalohadai kererena oi abia. Reana emu tamana bona sinana edia lalokau karadia haida oi laloa lasi. To vadaeni, gau badana be unai hekwakwanai umui herevalaia hebou, unai be mai anina bada ruma bese lalonai hekwakwanai hanamoa totona.

Heduru Ma Ta Oi Tahua

Edena bamona bema oiemu tamana bona sinana oi hereva henidia, to kara namona ta ia vara lasi? Oibe, unai neganai oi lalohisihisi bada. To vadaeni, dala haida oi gaukaralaidia diba.

Hegeregere, tadikaka eiava taihu ta oi tahua​—⁠ena lagani be bada be namo​—⁠bena emu tama sina idia henia lasi heduruna oi ia henia diba. Hereva Lada-isidia bukana ese ia herevalaia bamona turana korikorina ta ia noho, “ia be tadikaka ta dika ia vara neganai, ita ia durua totona ia vara.” (Hereva Lada-isidia 17:17) Unai bamona turana ta oi tahua. To namona be sisiba ia henia neganai oi laloa namonamo, bema unai sisiba ese oi ia durua diba bona ia be Dirava ena Hereva hegeregerena, oi abia dae diba.

Heduru oi abia gabuna ma ta be Iehova ena Witness taudia edia kongregesen dekenai. Unuseniai oi idia durua diba taudia, hegeregere tadikaka, taihu, tama bona sina do oi davaria bona idia ese oi be lauma dalanai bona tauanina dalanai do idia durua. (Mareko 10:30) Guna ita herevalaia Africa merona, Collin, be unai bamona turadia ia davaridia. Heduru ia tahua dainai Iehova ena Witness taudia edia hebouhebou dekenai ia lao. Unuseniai ia ese turadia namodia ia davaridia bona idia ese ia idia ura henia bona idia lalokau henia. Daudau lasi murinai, iena tamana bona sinana bona tadidia be Keristen hebouhebou dekenai idia lao danu.

Kahirakahira nega ibounai oiemu tamana bona sinana be oi idia lalokau henia, to reana oiemu ura gaudia idia laloa bada lasi. Namona be oi ese oi hereva henidia, oi hadibadia oiemu ura gaudia be dahaka dahaka! Bena reana do oi davaria idia be oi idia ura henia bada.

[Footnotes]

[Picture on page 21]

Hari inai negai, tama sina idia hekwarahi bada bona idia hesiku dainai nega momo edia natudia edia hekwakwanai gaudia idia durudia diba lasi