Hanuaboi ai Ai Hedavari Tanzania Dekenai
KENYA dekenai Iehova ena Witness taudia edia intenesenel hebouhebouna ia ore murinai, Tanzania dekenai ai loaloa matamaia mai emai ura bada ida.
Lake Manyara Nesenel-Pak dekenai ai ginidae guna. Animal idauidau ai hoalaidia—bulu maniki, impala, bafalo, sebra, bona ma haida. Gohu ta lalonai be hipopotamasi momo. Jiraf ta ai raraia, gohu unai kahanai ia aniani, bona reirei gabuna daudauna dekenai laiona ta, bona gabu daudau hereana dekenai wildibisi edia orea ta.
Ngorongoro Crater dekenai ai ginidae murinai, hakaua tauna ta bona lankrusa ta ai rentaia, dina ta lalonai unai gabu dekenai do ai loaloa totona; (gunaguna kwalahu ororona ta ia noho gabuna unai). Dala dikana amo ai diho mita 600 bamona ela bona taora. Ai hoa bada! Unai taora badana be animal idauidau amo ia honu. Wildibisi be edia orea dekenai idia raka hanai. Sebra, hatibisi, Grant-gasel, bona Thomson-gasel be momo herea. Lankrusa ai haginia gabuna ta ai, laiona ta mai huina latana be iena ikerukeruna dekenai ia laga-ani; ena be ai be ia ataiai, to unai ia laloa lasi. Gabeai, lankrusa ai haginia lou, raino koremadia be daudau gabunai ai itadia, bona elefante haida danu, ai kahirakahira ai au idia anidia noho. Taora amo ai dae lou neganai, unai animal momo, hoa gaudia, ai laloa lou. Ta ai reaia, a?
Oibe, gauna be Africa lepadina. To, ai ura ta do ai itaia be ura kavakavana ta bamona. Foto abia tauna, Erwin Bauer ia gwau: “Loaloa taudia ese lepadi idia tahudia mai edia ura bada ida, badina ta be unai animal davaridia bona edia laulau abidia be auka herea. Laolao taudia momo ese ta idia itaia sisina lasi. Egu loaloa negadia 15 lalodiai, lepadi 8 mo lau itaia, bona tamona mo be kahirakahira dainai ena foto lau abia diba.”—International Wildlife.
Dina ia diho neganai, gau idauna ta ai laloa momo. Emai ladana be hotel ta ena buka amo idia kokia dainai, mahuta gabuna ai tahua. Dibura masemase lalonai kahu dalana ta dekenai ai heau lao. Ai heau lalonai, vaira kahanai ai helai taudia ruaosi ai hoa. Gau laboralaborana ta be hedlaiti edia diari lalonai ia roho vareai. Motuka ai haginia haraga, bena ai hoa dainai ai hahodi!
Ai vairanai be lepadi badana ta! Bena murina kahanai idia helai taudia danu ese idia itaia diba, badina be dala ena idibana kahana dekenai ia heau—bena ia marere lasi. Toana be ia be ena lalona ai ia henanadai, ia gwau, ‘Edena bamona do lau kara—Egu inai taudia, lau diba lasi taudia, be do lau dagedage henidia, eiava do lau muri henidia bena uda lalonai do lau heau vareai, a?’
Adrian, emai bamona ta, be unai goada gauna mai hairaina kahirakahira momokani, edia padadia be mita tamona mo. Ena kamera ia abia, bona ia hereva maragi, ia gwau: “Karaharaga, laiti oi henigu.” Murina kahana amo gado ta ia gwau, “Regerege lasi.” Ena kamera ia hegaegaelaia haraga bena foto ia abia, to toana be ia hegeregere lasi, galasi ese diari ia haloua dainai. Adrian ese uindo ia hadihoa neganai, ena kamera ia hegaegae lou. Lepadi be do kahirakahira momokani, ena iuna ia davea noho, bona ena matana idia diaridiari.
Foto iharuana ai abia murinai, lepadi ese ena lalona ia hadaia. Uda lalonai ia roho vareai bena ia boio. Motuka lalonai ai moale bada! Ai dekenai ia vara gauna ai laloaboio diba lasi. Gabeai hakaua taudia ese ai idia hamaoroa, unai be nega ta ta mo ia vara gauna. Foto iharuana be namo herea, bona ia dainai ai ese Tanzania dekenai unai lepadi ida ai hedavari hanuaboina ai laloatao namonamo.