Matamata Taudia Idia Henanadai . . .

Dirava Ena Turana ai Lau Lao Momokani Diba, A?

DIRAVA ena turana ai lau lao diba, a? Lagani 20 kekenina ladana Doris ia laloa dala be lasi. Mai ena lalohisihisi ida ia gwau: ‘Lau laloa lau be anina lasi bona lau be hegeregere lasi ta ese lau do ia ura henia. Dirava lau guriguri henia lasi danu, badina lau laloa lau be hegeregere lasi ia vairanai lau hedinaraia.’ Matamata taudia haida edia lalona ena mamina be idia hegeregere lasi Dirava ena turana ai idia lao. Ena be idia laloa ta be Dirava ena turana ai ia lao be gau namona, to idia laloa idia be hegeregere lasi ena turana ai do idia lao. Nega ta oi be unai bamona oi laloa, a?

Nega haida, reana mero ta be ena manoka dainai ia laloa ia be hegeregere lasi Dirava kahirakahira do ia lao. Mero ta ladana Michael mani oi laloa. Ia gwau Dirava ena dala ia do diba lasi neganai, ia be “kahirakahira kara dikadia iboudiai bona lalohadai dikadia iboudiai amo ia honu.” To, Baibel stadilaia karana amo ia lalo-parara, ia karaia karadia ese lalohisihisi bona lalo-metau ia henia Dirava dekenai. Ia gwau: “Kongregesen ena hebou ta ta ese egu manoka ta o ma haida idia hedinarai lau dekenai. . . . Lau be sibogu egu dika lau gwauatao diba lasi, unai dainai lau laloa Iehova ese egu kara dikadia momo ia gwauatao diba lasi.”

Nega haida, haida ese mero ta idia kara henia dalana dainai, reana ia laloa ia be hegeregere lasi Iehova ena turana ai do ia lao. Hegeregere, Doris, guna ita herevalaia kekenina be ia maragi neganai ena sinana ese ia rakatania. Ia gwau: “Lau laloa ta ese lau ia lalokau henia lasi. Bema egu sinana bona egu famili ese lau idia rakatania, taunimanima ma ta ese lau do ia lalokau henia diba, a?” Bema ta ia maragi negana amo idia hahemaraia bona idia kara dika henia, reana do ia laloa Dirava ia ura lasi ia be ena turana ai do ia lao.

Eiava, reana matamata tauna ta be Dirava ia tura henia, to manoka dainai kerere bada hereana ta ia karaia. Unai bamona ia vara Tracy dekenai. Unai lagani 21 kekenina ia gwau: “Lau hemarai bada; egu hisihisi bona egu kerere ena mamina lau haheaukalaia diba lasi. Lauegu Tamana, Iehova, ena lalona lau hahisia bada.”

Sedira oiemu mauri be ita herevalaia vadaeni taudia ta edia hegeregerena. To helaro ia noho: Iehova be emu turana ai ia lao diba!

Dirava Ena Turana ai Oi Lao Diba Ena Badina

Momokani, bema ta ia kara dika, unai ese Dirava tura henia dalana ia koua diba. To gau namona be, iseda lalokau Tamana ese kara ta ia karaia vadaeni ita do ia durua totona. Aposetolo Paulo ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:8) Iena mase amo, Iesu ese davana ia karaia, Dirava idia ura henia taudia be kara dika ena igui amo ia hamauridia totona. (Mataio 20:28) Unai dainai, aposetolo Paulo ma ia gwau: “Guna ita maino lasi Dirava dekenai, to iena Natuna ia mase dekena amo maino ia karaia, vadaeni Dirava bona ita be turana vadaeni.”—Roma 5:10.

Iehova ena taravatu idia do diba lasi neganai, memero kekeni haida, ita herevalaia vadaeni merona Michael hegeregerena, be idia kara dika rohoroho vadaeni. To Iesu ena boubou dainai, Dirava ese ena kara dikadia gunadia ia gwauatao diba, herevana idia be dika momokani. Baibel ena gwauhamata namona be inai: “Bema iseda kara dika Dirava dekenai ita gwauraia hedinarai, . . . ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria ore momokani.” (1 Ioane 1:​9) Namona be ta ese kara haida ia karaia, unai amo Dirava dekenai ia hahedinarai unai hagoevaia karana ia laloa bada. Aposetolo Paulo ese ia gwauraia sisibana ita badinaia diba; Iehova ena sisiba ia gwauraia: “Miro gaudia ibounai dekena amo do umui raka siri, vadaeni umui do lau abia dae. Lau be umui emui Tamana do lau noho.” (2 Korinto 6:17, 18) Bema ta be ena kara dika ia rakatania bona mai ena momokani ida ia helalo-kerehai, Dirava ena lalona be hegeregere do ia lalo-namo henia bona ena turana ai do ia lao. Unai ese ita ia hamoalea, ani?

Idia tubu daekau lalonai haida ese idia hadikaia memerodia bona kekenidia be edena bamona? Inai oi diba be namo; bema idia ura lasi neganai haida ese idia hadikadia, Dirava ia laloa lasi idia be mai edia kerere. Unai bamona taudia be dika abia taudia, kara dika karaia taudia lasi. Inai danu oi laloa be namo; oi be taunimanima namona ta eiava lasi—unai be ma ta ena lalohadai hegeregerena oi laloa lasi. Iehova be emu turana ai ia lao diba, herevana emu noho be edena bamona. Maureen ena Keristani sinana ese ia naria, ena tamana be inuinu momo tauna dainai, nega momo ruma lalonai dagedage ia vara. To ia gwau: “Unai noho aukana lalonai dala lau davaria, Iehova ida lau turana karaia totona. Ia lau diba neganai, lau diba ia ese lau do ia rakatania lasi.”

Edena Bamona Bema Kara Dika Rohorohona Oi Karaia?

Doug ena tamana bona sinana be Dirava badinaia taudia. Ena lagani be 18 neganai ia sihari kava. Unai ia vara badina memero kekeni dikadia ia bamoa dainai. Ia gwau: “Lau diba unai be kerere, to lau karaia loulou badina lau ura moale lau davaria.” Gabeai, Doug ia lalo-parara ena mauri dalana be anina lasi. Ia gwau: “Lau lalo-parara, lauegu tura koikoidia ese lau idia gaukaralaia, moni eiava moale do idia abia totona.” Bena kara haida ia karaia matamaia, Iehova do ia tura henia lou totona. To gau badana ta ese ena dala ia koua.

Doug ia gwau: “Dirava dekenai lau giroa lou dalana ia koua gauna badana be, lau laloa lau be hegeregere lasi iena matana ai. Lau laloa lau karaia karadia ibounai be dika Iehova ena matana ai. Lau diba ia be namo momokani bona lau ia haheauka henia badabada vadaeni, unai dainai lau laloa egu dika do ia gwauatao dalana be lasi, badina lau be dika rohoroho.” To, kongregesen ena elda ta ena heduru amo, bona Baibel lalonai Manase ena sivarai tahua namonamo karana amo, Doug ese unai hekwakwanai ia hanaia.

Manase be daika? Ia be idaunegai Iuda taudia edia king ta. Baibel ese ia hahedinaraia iena tamana Hesekaia, Dirava badinaia tauna, ese ia hadibaia Iehova do ia lalokau henia. To ena tamana ia mase murinai bona ena lagani be 12 neganai, king ai ia lao, bena ia laloa sibona ena ura do ia karaia diba. Iehova ia dadaraia bona Bala diravana ia tomadiho henia. Unai tomadiho lalonai kara dika rohorohodia bona lebulebu karadia idia karaia badabada. Manase “ese [Iehova] ena vairanai ia kara dika bada, bona ia ese [Iehova] ia habadua.” Gwaukau taudia mai edia kamonai edia amo Iehova “ese Manase bona iena basileia taudia ia sisiba henidia, to idia kamonai lasi.” Bena, Iehova ena hahemaoro dainai, Manase be auri seini amo idia guia dibura tauna hegeregerena Babulonia ai idia laohaia. 2 Sivarai 31:20, 21; 33:1-6, 10, 11.

Manase ese ena kara gunadia ia laloa lou, bona Iehova ena taravatu ida ia hahegeregerea neganai, ena kerere dainai ia lalohisihisi bada bona ia noia ena dika do ia gwauatao. Dirava vairanai ia manau bona ‘ia dekenai ia noinoi henia’ loulou. Bena “Dirava ese Manase ena guriguri ia kamonai henia, bona iena basileia Ierusalema dekenai ia hakaua lao lou.” Oibe, ‘Tamana hebogahisina’ ena lalona be hegeregere hari kara dika tauna, ia helalo-kerehai vadaeni tauna, be ia dekenai do ia raka kahirakahira lao lou. Unai bamona hebogahisina ia abia murinai, Manase be ia dekenai ia vara gauna dainai ia diba “[Iehova] be Dirava [momokanina].”—2 Sivarai 33:12, 13; 2 Korinto 1:3.

Bema Iehova ese Manase ia abia dae lou, momokani, bema hari inai negai mero ta ia kara kerere bema ia hahedinaraia ia helalo-kerehai vadaeni, unai mero do ia abia dae lou iena turana. Doug ese ena kongregesen be lauma dalanai idia naria taudia edia heduru ia abia dae. Edia heduru amo ia diba goevagoeva Dirava “ese ita do ia gwau henia hanaihanai lasi. Iena badu be hanaihanai do ia noho lasi.”—Salamo 103:9.

Dirava Oi Tura Henia Noho

Dirava be emu Turana ai ia lao neganai, namona be unai oi laloa bada, do oi tura henia totona. Lagani 18 kekenina ta, bapatiso ia abia vadaeni kekenina, be ia sihari kava bena beibi ia abia. Ena be unai bamona ia karaia, to heduru ia abia ena kerere Iehova vairanai do ia hamaoromaoroa totona. (Isaia 1:18 itaia.) Dahaka ia vara dainai ia kara namo lou? Ia gwau: “Lau dibaia Iehova be lalokau Tamana, panisi dalana tahua tauna lasi. Lau lalo-parara lau karaia karana ese ena lalona ia hahisia bada. Gau badana be lau laloa Dirava be egu Turana bona ia be mai ena hemami. Ia be Lauma siahuna sibona lasi, taunimanima ese idia tomadiho henia to idia lalokau henia momokani lasi siahuna. Lasi. Unai ia diba neganai, Manase bamona, hari kekenina be mai ena lalona ibounai ida Iehova ia tomadiho henia. (2 Sivarai 33:14-16) Unai ese ia ia naria. Matamata taudia ia sisiba henidia, ena be hekwarahi umui davaria, to ia gwau: “Iehova hanamoa dalana umui tahua goada noho. Iehova be mai ena lalokau ida emui raka dalana ia hamaoromaoroa lou.”

Inai danu be mai anina bada: Iehova tura henia taudia ida oi tura. To, Dirava ena taravatu idia matauraia lasi taudia edia hebamo oi dadaraia momokani. (Aonega Herevadia 13:20) Kekeni ta ladana Linda be mero ta ida idia mahuta hebou. Ia laloa mero ena hetura karana ese “gau iboudia ia hereaia.” Lauma dalanai ia goada lou murinai, Linda ia gwau: “Bema oi bona Iehova umui hetura heheni lasi oiemu mauri ibounai oi hadikaia diba.”

Oi bona Iehova be umui hetura heheni, eiava? Bema lasi, tura henia dalana oi tahua. Linda ese Dirava tura henia karana ena namo be inai bamona ia gwauraia: “Mai anina bada gauna tanobada ibounai lalonai be emu hetura karana namona Iehova ida. Mero ta eiava kekeni ta eiava ma gau ta inai tanobada ai ese unai ia hereaia lasi. Bema Iehova oi tura henia lasi, gau ibounai be anina lasi.”

[Picture on page 27]

Memero kekeni haida be reana idia laloa idia be hegeregere lasi Dirava ena turana ai do idia lao