Stefano be Nadi amo Idia Hodoa Mase

INISENIAI ia tui diho noho tauna be Stefano. Ia be Iesu ena hahediba tauna ta. To hari ia dekenai ia vara gauna oi itaia! Inai tatau ese nadi badadia be ia dekenai idia negea noho. Dahaka dainai Stefano idia inai henia dainai inai kara dikana idia karaia? Mani ita itaia.

Dirava ese Stefano ia durua hoa karadia ia karaia totona. Inai tatau ese unai idia ura henia lasi bona taunimanima dekenai hereva momokani ia hadibaia dainai ia danu idia hepapahuahu. To Dirava ese Stefano dekenai aonega ia henia bona ia hahedinaraia inai tatau idia hadibaia herevadia be koikoi. Unai ese idia ia habadua. Unai dainai Stefano idia abia bona haida idia hakaudia vareai koikoi herevadia ia dainai idia gwauraia totona.

Hahelaga tauna badana ese Stefano ia nanadaia: ‘Inai hereva be momokani, a?’ Stefano ia haere neganai, Baibel amo hereva namo hereana ta ia henia. Ena hereva dokonai, kara dika taudia ese Iehova ena idaunegai peroveta taudia idia inai henia dalana ia gwauraia. Bena ia gwau: ‘Umui be unai tatau bamona. Umui ese Dirava ena hesiai tauna Iesu umui hamasea, bona Dirava ena taravatu umui badinaia lasi!’

Unai ese tomadiho gunalaia taudia ia habadua! Idia badu dainai edia isena idia koria. Bena Stefano ese ena kwarana ia abia isi, ia gwau: ‘Itaia! Iesu lau itaia guba ai Dirava ena idiba kahanai ia gini.’ Unai idia kamonai neganai, edia imadia amo edia taiana idia koua bona Stefano dekenai idia lao haraga. Ia idia abia bona hanua murimuri ai idia laohaia.

Iniseniai edia kouti idia kokia bona Saulo dekenai idia henia. Saulo oi itaia, a? Bena tatau haida ese Stefano be nadi amo idia hodoa. Stefano ia tui diho, bona Dirava ia noia: ‘Iehova e, inai kara dika dainai edia davana oi henia lasi.’ Ia diba idia haida be tomadiho gunalaia taudia ese idia koidia. Unai murinai Stefano ia mase.

Bema ta be oi dekenai kara dika ta ia karaia, davana oi henia, eiava Dirava oi noia idia ia hahisia totona, a? Stefano eiava Iesu be unai bamona idia karaia lasi. Hebogahisi idia hahedinaraia lasi taudia idia hebogahisi henia. Namona be edia kara ita tohotohoa.