Karoa 22
Oi Rakatania Gaudia Oi Ura Henia Lou Lasi!
BIBLE ena peroveta herevadia edia anina ia vara dainai, ita diba momokani Dirava ena nega matamatana be ia kahirakahira momokani. Nega sisina murinai inai nega dikana do ia ore, mai ena lalohisihisi bona mai ena lalo-metau danu. Dirava momokani tomadiho henia taudia ese tanobada na Paradaiso ai do idia halaoa bona unuseniai mauri goevadaena do idia moalelaia ela bona hanaihanai. Inai gaudia ia gwauhamatalaia murinai, Iehova ese aposetolo Ioane ia hamaoroa, ia gwau: “Inai hereva do oi torea, badina ia be maoromaoro bona momokani.” (Apokalupo 21:1-5) To, hoa gauna be inai, inai hereva idia diba taudia haida be madi inai tanobada dikana dekenai idia giroa lou! Dahaka dainai unai bamona idia karaia?
2 Guna, Dirava ena Basileia ena sivarai namona idia kamonai matamata neganai, idia abia dae mai edia moale danu. To gau badana be unai murinai Keristen dalanai idia goada idia lao bona edia lalo-parara Bible dekenai idia habadaia noho bona edia mauri lalonai idia badinaia momokani toho. (Heberu 6:1, 11, 12) Bema ta ese inai kara ia laloa bada lasi dainai ia karaia lasi, Dirava ena hesiai gaukara hereadaena do ia laloa bada hanaihanai lasi. Unai bamona tauna be reana ia ura lasi do ia naria ela bona Dirava ese ia gwauhamatalaia gaudia namodia do ia abidia, to ia lalo-parara lasi namona be lauma dalanai ia tubu daekau bona Dirava ena hesiai gaukara ia karaia badabada be namo. Ia ese kohu bona moni bona moale karadia ia tahua guna, lauma gaudia be gabeai. Metairametaira ia be tanobada dekenai ia giroa lou.—1 Timoteo 6:9, 10.
3 Ta be reana ia gwau, ia ura do ia roho mauri bena “tanobada matamatana” do ia noholaia badina be unuseniai kara maoromaoro do ia noho dainai. To ena hebamo karana amo unai ia hamomokania eiava? Momokani, dina iboudiai ia be Iehova ena ura idia karaia lasi taudia danu idia hedavari—gaukara dekenai, sikuli dekenai, sitoa dekenai, bona reana ruma dekenai danu. To gaukara gabunai o sikuli dekenai ia laga-ani negadiai, o vadivadi negadiai, o gadara negadiai, ia ese edena taudia edia hebamo ia abia hidi? Bible ia gwau: “Umui laloa kerere lasi. Bema kara dika taudia danu umui turana karaia neganai idia ese emui kara namona do idia hadikaia.” (1 Korinto 15:33) To edena taudia be “kara dika taudia” ita gwauraidia? Bema haida ese Iehova idia tomadiho henia lasi bona sibodia edia ura idia badinaia, unai bamona ita gwauraidia be maoro, a? Ita diba vadaeni, unai bamona taudia be do idia roho mauri lasi bona “tanobada matamatana” do idia noholaia lasi. Haida be reana idia laloa tanobada idia rakatania, to edia tura idia abidia hidi neganai bema Dirava ena taravatu idia laloa lasi, tanobada dekenai do idia giroa lou haraga. To haida edia sivarai Bible lalonai bema ita laloa namonamo, unai ese ita do ia naria, bena unai bamona do ita karaia lasi.—1 Korinto 10:11.
“IDIA TOREA VADAENI, IDIA ESE ITA DO IDIA SISIBA HENIA TOTONA”
4 Iehova ese Israel na Egypt amo ia hamauridia neganai, idia moale bada! Badina be Iosef ia mase murinai Egypt taudia ese idia hahisidia bada neganai, unai be lahi badana ena siahu idia hisihisilaia bamona. (Esodo 1:13, 14; Deuteronomi 4:20) To Iehova ese hisihisi 10 amo Egypt ia hahisia. Unai amo ia hahedinaraia Dirava momokani ese Egypt ena dirava ia hereadia momokani. Unai dainai, “orea idau-idau taudia momo herea” be Israel danu Egypt idia rakatania. Unai hegeregerena, hari inai negai “hutuma bada herea” be tanobada amo idia siri bona lauma Israel orena idia bamoa. (Esodo 12:38) To unai idau negai taudia be Egypt idia rakatania bena hua haida mo murinai dahaka ia vara?
5 Keristen hahediba tauna Stefano ia gwau: “Aigupito idia ura henia lou.” (Kara 7:39, 40) Edia ura be edena bamona idia hahedinaraia? Golo amo kaivakuku ta, boromakau ena laulauna, idia karaia—Egypt dekenai idia manadalaia gauna unai—bena idia gwau “aria do idia karaia, Iehova ena.” To Egypt taudia edia kara idia tohotohoa unai. (Esodo 32:1-6) Iehova ia badu henidia dikadika, badina be edia kara amo iena Taravatu, Sinai Ororona dekenai ia henidia, be idia utua. Bena momo herea ia hamasedia. Badina be dahaka unai dika ia vara? Badina be, ena be Iehova ena hahegani idia diba to idia lalodia bada lasi, bona idia lalo-parara lasi Dirava momokani ese ia hakaudia noho.
6 Israel bona “orea idau-idau taudia” be Egypt idia rakatania neganai, idia diba unai bamona idia karaia be maoro. To lagani ta ia ore neganai Gwauhamata Tanona dekenai idia do ginidae lasi, “aniani namodia gabuna” idia do noholaia lasi. Tauanina dalanai bona lauma dalanai Iehova ese ia ubudia namo herea. Ori latana bona lahi latana amo Iehova ese ia hahedinaraia ia hakaudia noho. Davara Kakakakana dekenai bona Sinai Ororona dekenai Iehova ena siahu karadia idia itaia vadaeni. Taravatu gwauhamatana ese lauma dalanai ia ubudia bona ia hagoadadia. Taravatu ese danu ia hadibadia, edia lalohadai bona kara edena bamona do idia haidaua be namo, Iehova hamoalea totona. To Iehova ena heduru idia laloa bada lasi; Egypt dekenai idia rakatania gaudia idia ura henia lou. Unai dainai idia momo be dika idia davaria.—Numera 11:4-6, 31-34.
7 Bena nega sisina murinai Mose ese spai taudia ia siaidia, Gwauhamata Tanona idia itaia totona. Idia lou mai neganai, idia iboudiai idia gwau unai tano be momokani “aniani namodia gabuna.” To spai taudia 10 be unai tano taudia idia gari henidia bona edia hanua badadia edia magu aukadia idia garilaia. Iehova idia abidadama henia lasi mai edia kudou ibounai danu, bona edia hereva dainai ma haida idia gari bada. Egypt idia ura henia lou, bona lou henia dalana idia herevalaia hebou. Edia abidadama be lasi dainai, unai uru taudia, lagani 20 idia hanaia taudia iboudiai, be tano gagaena dekenai idia mase, Gwauhamata Tanona dekenai idia raka vareai lasi.—Numera 13:27-33; 14:1-4, 29.
8 Gunaguna, unai bamona haheitalai dikana be idau gabuna ta dekenai ia vara. Abraham ena varavarana Lot be Sodom dekenai ia noho, unai hanua taudia be matabodaga taudia, to idia be mai edia kohu momo. Edia kara be dika rohoroho dainai, Iehova ia gwau unai hanua mai ena taora danu do ia hadikaia ore. Aneru ia siaidia, Lot mai ena ruma taudia hamauridia totona. Lot ese ena natuna kekenidia edia maoheni tataudia ia hamaorodia neganai, “idia laloa ia hevaseha sibona.” To unai be hevaseha lasi. Daba rere ai, aneru ese Lot mai ena ruma taudia be hanua amo idia hakaudia lasi haraga, idia hamaorodia, do idia heau bona edia vairadia do idia giroa lasi murina dekenai. Idia mauri totona idia kamonai henidia be namo. Lot mai ena natuna kekenidia ruaosi be unai oda hegeregerena idia karaia dainai idia roho mauri. To Lot ena adavana be ia rakatania kohuna ia do ura henia. Ena vairana be murina kahanai ia giroa neganai, Iehova ese ia hamasea, damena nadina ai ia halaoa. Unai sivarai ena anina be ita laloa namonamo a? Ita reaia lasi totona, Iesu ese ia herevalaia, inai tanobada gunana heautania haraga karana ia sisibalaia neganai. Ita ia sisiba henia kohu do ita laloa momo lasi; ia gwau: “Lota ena adavana umui laloa.” (Genese 19:12-26; Luka 17:31, 32) Dahaka ese ita do ia naria bena tarapu lalonai do ita moru lasi, Israel taudia bona Lot ena adavana idia moru bamona?
“TANO NAMO HEREANA IDIA TAHUA”
9 Iseda vairana be murina kahanai ita giroa lasi totona, namona be vaira kahanai idia noho gaudia ita abidadama henia bada. Heberu 11:1 ia gwau: “Abidadama ena anina be inai bamona: ita daradara lasi, to ita diba Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani inai gauna do ita abia.” Ia be gwauhamata aukana bamona, pepa dekenai idia torea gauna, ia hamomokania Dirava ese ia gwauhamatalaia gaudia do ita abia. Ia be mai ena badina korikori, unai dainai ita abia dae iseda matana amo ita itaia diba lasi gaudia be idia noho. Abidadama korikori ita abia totona, namona be ena badina ita dibaia namonamo. Danu, namona be ita stadilaia gaudia edia anina sibona eda mauri lalonai ita laloa namonamo, bona ita laloa bada be namo.
10 Abraham be mai ena abidadama unai bamona. Unai dainai, Iehova ena oda hegeregerena Abraham ese kohu momo hanuana Uru ia rakatania bona Kanana dekenai ia lao, unai tano daudauna be guna ia itaia lasi. Unuseniai idau bese tauna bamona ia noho, unai tano ena hanua hanua lohiadia ia badinadia lasi. “Hanua badana ta [Dirava ena Mesia Basileiana] ia naria. . . . Unai hanua be Dirava ese iena palani hegeregerena ia karaia, bona ia haginia danu.” Bema ena mauri gunana Uru dekenai ia ura henia noho, momokani ia giroa lou. To ‘ia ura korikori tanona sibona ia laloa, inai be guba’ ena. (Heberu 11:8-16) Uru ia rakatania murinai, Abraham be nega daudau herea, lagani 100 bamona lalonai, ‘ia ura korikori tanona’ ia naria, ela bona ia mase. Ena hereva amo sibona lasi, to ena kara amo danu iena abidadama ia hahedinaraia. Iena davana namona be momokani do ia abia. Iesu ia diba momokani Abraham do ia toreisi lou, unai dainai ia gwau ‘Dirava ena matana ai, Abraham ia mauri noho.’—Luka 20:37, 38, NW; Iakobo 2:18.
11 To Abraham ena natuna Isako bona ena tubuna Iakobo be edena bamona? Uru hanuana taudia edia mauri dalana be nega ta idia mamia lasi, bona idia ura lasi idia mamia toho. Edia tamadia bona sinadia ese Dirava ena gwauhamata idia hadibadia neganai, unai gwauhamata idia abia dae momokani. Edia abidadama Abraham ena hegeregerena idia goadalaia. Idia danu ese “tano namo hereana idia tahua.” Dirava be idia dainai ia hemarai lasi.—Heberu 11:9, 16, 20, 21, NW; Genese 26:24, 25; 28:20-22.
12 To Iakobo ena kakana Esau be idau, lauma gaudia helagadia ia laloa bada lasi. Iehova idia tomadiho henia lasi hahinedia ia adavadia, bona ena vara guna ahuna be aniani tamona ia hoilaia. (Genese 25:29-34; 26:34, 35; Heberu 12:14-17) Ia haheauka diba lasi. Iakobo ena natuna kekenina, Daina, danu be ia hekwakwanai bada. Badina be dahaka? Badina be ia ura “unai tano hahinedia” ia bamodia.—Genese 34:1, 2, NW.
13 Bema oi be Abraham, Isako bona Iakobo hegeregeredia “tano namo hereana” Iehova ena Mesia ena Basileia henunai oi tahua, oi naria namonamo, tanobada dekenai oi do idia veria lou garina. Mani oi laloa, tanobada ena oromana do ia ore, to “Dirava ena ura ia karaia noho tauna be do ia noho ela bona hanaihanai.” Unai neganai mauri mai anina bada bona mai moalena do ita abia!—1 Ioane 2:17.
[Study Questions]
1. (a) Iehova ena hesiai taudia mai edia kamonai be kahirakahira dahaka hahenamo do idia abia? (b) To taunimanima haida be dahaka idia karaia?
2. (a) Ta be dahaka ia karaia be namo, unai bamona ia hekwakwanai lasi totona? (b) Bema unai bamona ia karaia lasi, dahaka do ia laloa bada reana, bena dahaka do ia vara?
3. (a) Dahaka dainai Iehova idia tomadiho henia lasi taudia tura henidia be aonega karana lasi? (b) Bema ta ia naria namonamo lasi, edena negai unai bamona taudia do ia tura henidia?
4. (a) Iosef ia mase murinai, Israel taudia edia mauri Egypt dekenai be edena bamona? (b) Dahaka dainai “orea idau-idau taudia momo herea” ese Israel taudia idia bamodia? (c) Unai sivarai ena anina be edena bamona ia vara, iseda nega lalonai?
5. (a) Edena bamona idia hahedinaraia idia be “Aigupito idia ura henia lou”? (b) Dahaka dainai idia hekwakwanai?
6. (a) Tano gagaena ai Iehova ese edena bamona ia durudia? (1 Korinto 10:3, 4) (b) Dahaka dainai haida idia ura Egypt dekenai idia abia gaudia be ma do idia abia lou?
7. (a) Spai taudia ese tano ena toana idia gwauraia neganai, dahaka dainai hebou taudia idia gwau Egypt do idia lou henia? (b) Unai dainai dahaka ia vara? (Heberu 3:17, 19)
8. (a) Lot mai ena ruma taudia be Sodom ena dokona amo idia roho mauri totona, dahaka idia karaia be namo? (b) Dahaka dainai Iehova ese Lot ena adavana na damena nadina ai ia halaoa? (c) Unai sivarai ena anina ita dekenai be dahaka?
9. Abidadama be dahaka, bona edena bamona ita abia diba?
10. (a) Abraham ese ena abidadama edena bamona ia hahedinaraia nega daudau lalonai? (b) Dahaka dainai ita diba iena kara be maoro?
11. Isako bona Iakobo be edena bamona idia hahedinaraia idia danu be mai edia abidadama?
12. Dahaka dainai Esau bona Daina idia hekwakwanai bada?
13. (a) Hari inai negai tanobada idia badinaia taudia be mai edia helaro momokanina a? (b) Dahaka ese ita do ia naria bena tanobada do ita ura henia lou lasi?
[Picture on page 173]
Lot ena adavana oi laloa!