Karoa 24
Dokona be Ia Kahirakahira Momokani!
GUNA, lagani 1947 lalonai, saiens taudia ese hora gauna idauna idia karaia bena ena laulau be edia magasin ta ena vairana dekenai idia hahedinaraia loulou. Unai “hora gauna” ena imana idia atoa gabuna ese ia hahedinaraia idia laloa tanobada be niuklia tuari amo do idia hadikaia ore negana be ia kahirakahira eiava lasi. Bese badadia idia badu heheni neganai, ena imana idia giroa lao ela bona 12 okoloka hanuaboi kahirakahira, bona edia badu ia ore neganai idia giroa lou sisina. Bema idia giroa lao ela bona 12 okoloka, anina be niuklia tuari idia hamatamaia vadaeni.
2 To lagani 6,000 idia lao vadaeni, Iehova Dirava ese nega ta ena hora bona miniti ia duahia matamaia negana amo ema bona hari, ia ese ia haidaua lasi. Unai nega ena dokonai, Dirava ese ena lohia siahuna do ia hamomokania, guba taudia bona tanobada taudia edia maino bona noho namo haginia totona. Iena palani ia gwauraia hedinarai vadaeni, bona nega ena maka haida ia atoa, unai maka ita itaia neganai, ita diba nega orena ena lata be hida. Gwau-edeede be Eden dekenai ia vara neganai, Iehova be maoromaoro ia gwauhamata, iena “hahine,” iena aneru mai edia kamonai edia orea, amo “garana” ta do ia havaraia, hari garana ese “idaunegai gaigaina,” Satana ena kwarana do ia moia bena do ia haorea vaitani. (Genese 3:15; Apokalupo 12:9; Roma 16:20) Kara maoromaoro ura henia taudia ese unai nega idia naria noho mai edia ura bada danu!
3 Dirava ese gunaguna ia gwauraia negana ai, gwauhamata “garana,” Mesia, Dirava sibona ena Natuna unai, be tanobada dekenai ia hedinarai. Iesu ese Dirava ia badinaia goevagoeva ela bona ia mase, unai amo Satana ena samani herevana ia hakoikoia vaitani. Bona ena mase amo dala ia kehoa, Adam ena bese taudia be kara dika bona mase amo do ia hamauridia, bona “Satani ena kara dika do ia haorea momokani” totona.—1 Ioane 3:8; Daniel 9:25; Galatia 4:4, 5.
4 Iesu be tanobada dekenai ia noho neganai, tatau bona hahine ia haboudia matamaia, ia danu do idia lohia iena guba Basileiana lalonai. Kamonai taudia 144,000 mo sibodia ia haboudia gwauraia. Idia ginigabedia haboudia negana ia ginidae neganai, guba dekenai Dirava ese Iesu na “lohia siahuna ia henia, bona hairai bona basileia danu.” (Daniel 7:13, 14) Bena nega korikori ai, lagani 1914 lalonai, Iesu ese ena king dagina ia gaukaralaia matamaia. Satana mai ena demoni danu be guba amo ia negedia diho, unai amo ena gavamani ena biagu gabuna ia hagoevaia. (Apokalupo 12:7-12) Inai nega ena dina gabedia idia matamaia unai.
5 Lagani 6,000 bamona lalodiai Dirava ese inai nega ia duahia noho, bona ena dokona be ia kahirakahira. Lagani 1914 lalonai idia mauri noho taudia be hari idia buruka, to idia do mase ore lasi neganai, hoa karadia badadia do idia vara, do idia hahedinaraia Iehova ena lohia siahuna hamomokania negana be ia ginidae vadaeni.—Mareko 13:30.
6 Dirava ena kamonai hesiai taudia ma haida be unai dina badana do idia itaia. Lagani 1935 lalonai idia lalo-parara “hutuma bada herea” be daidia, bena unai nega amo unai taudia momo herea idia hedinarai, ema bona hari idia be milion toi mai kahana, tanobada ibounai lalonai. Bible ia gwau inai orea taudia be “hisihisi badana amo idia mai,” anina be idia mase lasi, to unai hisihisi amo idia roho mauri bena Dirava ena Nega Matamatana idia noholaia. (Apokalupo 7:9, 10, 14, NW; Ioane 11:26) Inai orea taudia ginigunadia idia buruka vadaeni. Iehova ese inai orea haboua karana ia koua ema bona nega korikori ia ginidae. Inai “hutuma bada herea” bogaragidiai idia noho taudia burukadia momo danu do idia roho mauri bena “tanobada matamatana” do idia noholaia.
7 “Hutuma bada herea” edia helaro namona be niuklia tuarina badana ta ese do ia koua lasi. Nega vairai idia naria mai edia lalo-goada danu be mai ena badina korikori. Gau idauidau be “nega dokonai” idia vara noho lalonai, idia itaia mai edia boga-auka danu, badina be Iesu ena hereva idia laloa, ia gwau: “Emui kwarana do umui abia isi. Badina be umui emui hahemauri be ia kahirakahira vadaeni.” (Luka 21:28) To hoa gaudia ma haida do idia vara guna bena edia hahemauri be gabeai do ia vara.
DO IDIA VARA GAUDIA
8 Aposetolo Paulo ese unai gau ta ia gwauraia, ia gwau: “Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae!” (1 Tesalonika 5:3) Unai hereva do idia halasia dalana be ia do hedinarai lasi. To gau badana be inai: Inai nega ena dina gabedia idia matamaia bena nega sisina murinai, lagani 1919 lalonai, orea ta ladana League of Nations idia haginia, “maino bona noho namo” havaraia totona. Bena lagani 1945 lalonai orea ma ta ladana United Nations idia haginia, bese iboudiai ese “maino bona noho namo” idia abia totona. To vanegai laganidia lalodiai taunimanima idauidau momo herea be nega haida idia hebou, idia hereva goadagoada, idia gwau namona be tanobada gunalaia taudia ese niuklia tuari kohu karaia bona atoa hegaegae karadia do idia hadokoa. Idia ura bada tanobada ibounai do ia maino, badina idia laloa bema maino be lasi dika bada herea do ia vara.
9 Unai dainai eiava ma gau ta dainai, nega daudau lasi murinai tanobada gunalaia taudia be “Maino bona noho namo” do idia harorolaia badabada. To do idia koikoi sibona. Unai hereva idia halasia taudia do idia gwau, idia tahua gauna be sibodia edia diba amo idia davaria vadaeni. Iehova ena lohia siahuna be unai bamona do idia dadaraia neganai, “karaharaga hisihisi dika momokani bona mase do ia ginidae.”
10 Babulono Badana, tanobada ibounai ena tomadiho koikoi basileiana be guna idia ura henia gavamanidia ese karaharaga do idia hadikaia ore. Gavamani gunalaia taudia momo idia diba vadaeni, tomadiho ese badu bona ala-ala bona tuari ia havaraia vadaeni, tanobada ibounai dekenai. Politikol taudia be dubu biagudia edia doria karadia idia hesikulaia vadaeni. Gabu momo dekenai taunimanima be edia tomadiho idia manokalaia bona idia hereva hegeregere idia laloa Dirava be lasi bamona. Danu, United Nations ena bese momo ese edia taravatu amo tomadiho idia koua toho. Iehova ese ia gwauraia horana do ia ginidae neganai, ia ese gavamani gunalaia taudia do ia gwaumaoro henidia, idia iboudiai ese Babulono Badana do idia tuari henia bona do idia hadikaia ore totona.—Apokalupo 17:15, 16; 19:1, 2.
11 Bena, edia kwalimu do idia moalelaia bada dainai, bona ia gunalaidia laumana, Satana Diabolo ese do ia doridia dainai, tanobada besedia ese Iehova ena witness taudia mai edia kamonai do idia tuari henidia. (Esekiel 38:14-16) Ena be inai taudia be maino taudia bona politik lalonai idia vareai lasi, to bese iboudiai ese do idia oda henidia, edia gavamani do idia badinaia momokani, hegeregere do idia tomadiho henidia bamona. To Iehova ena orea do idia hadikaia ore gwauraia neganai, Dirava ese ena hesiai taudia do ia hamauridia. Guba ena tuari oreadia ese Satana ena orea ibounai tanobada dekenai do idia hadikaia ore, bona unai orea idia badinaia taudia danu. Bena aneru ta ese Satana do ia dogoatao, bona do ia koua ela bona lagani 1,000 do idia ore. Unai nega lalonai iena siahu dikana do ia boio vaitani bona tanobada be Paradaiso ai do idia halaoa. Unai murinai do idia ruhaia lou nega sisina sibona, taunimanima tohodia totona. Bena ia idia badinaia taudia iboudiai do idia haoredia, mai Satana bona ena demoni danu.—Apokalupo 19:19-21; 20:1-3, 7-10.
“TANOBADA MATAMATANA” AI IDIA VAREAI
12 Inai nega ena dokona ena hagaria gaudia do idia ore murinai, bona Keriso ena lohia laganidia 1,000 do idia matamaia neganai, roho mauri taudia ese Dirava do idia tanikiu henia bada. “Hutuma bada herea” do idia boiboi badabada mai edia lalona ibounai danu, do idia gwau: “Hahemauri be iseda Dirava [Iehova], terona ai ia helai Diravana, bona Mamoe ena Natuna [Iesu Keriso], edia.” Bena Dirava ena guba oreana taudia be unai do idia moalelaia bada dainai, idia ida do idia tomadiho, do idia gwau: “Momokani, hahenamo bona hairai bona aonega bona heimodai bona hemataurai bona siahu bona goada be iseda Dirava ese do ia abia, harihari ela bona hanaihanai. Amen.”—Apokalupo 7:10-12, NW.
13 Unai neganai taunimanima iboudiai ese Dirava momokani do idia hanamoa mai edia lalo-tamona danu; “tanobada matamatana” ai do idia lao, “guba matamatana” henunai. Unai nega lalonai hahenamo momo be taunimanima dekenai do idia aru mai sinavai ta bamona. Apokalupo bukana ese “mauri ranuna ena sinavai” ia gwauraia, ia gwau: “Ia be galasi bamona ia diari, bona iena ranu be Dirava bona Mamoe ena Natuna edia helai gabuna badana dekena amo” ia lasi, guba Ierusalem Matamatana ena ariara ena huanai ia aru lao. Sinavai ena kahana kahana be ‘mauri audia’ idia gini, edia huahua ese ania taudia idia hagoadaia, bona edia raurau ese bese idauidau edia gorere idia hanamoa. Inai matahanai gaudia amo Dirava ese ena heduru ibounai ia laulaulaia, unai heduru amo kamonai taudia do ia hanamodia, do ia ubudia, bona dala do ia kehoa edia, Keriso ena amo mauri hanaihanai do idia abia totona.—Apokalupo 21:1, 2; 22:1, 2.
14 Unai neganai taunimanima edia mauri tanobada dekenai do ia idau vaitani, tanobada gunana hegeregerena lasi. Keriso ese ena boubou gauna ena siahu amo kamonai taudia iboudiai do ia hanamodia, anina be mase amo do idia toreisi lou taudia danu. Kara dika ena siahu amo do ia ruhadia vaitani, bona do ia hanamodia lao ela bona edia tauanina bona lalona idia goevadae bona lauma dalanai idia goevadae danu. Iboudiai ese “tauanina ena kara” do idia karaia lasi, to Dirava ena lauma huahuana do idia havaraia badabada; gaudia be: lalokau, moale, maino, haheauka, hebogahisi, kara namo, abidadama, manau bona boga-auka. (Galatia 5:19-23) Unai bamona kara namodia dainai, tano ena anina be taunimanima iboudiai do idia ubulaidia. Edia mauri ena anina do ia bada, badina be taunimanima iboudiai do idia gaukara hebou, Dirava ena palani tanobada bona noholaia taudia totona idia hagugurua totona.
15 Unai dainai Dirava ena lauma bona Keriso ena adavana ese gabu iboudiai taunimanima idia boiridia, idia gwau: “ ‘Oi mai.’ Bona inai hereva idia kamonai taudia danu, namona be idia gwau, ‘Oi mai.’ Ranu mase taudia, umui mai. Bona ranu umui ura henia taudia, mauri ranuna do umui abia dae, ia be davana lasi.” (Apokalupo 22:17) Vadaeni, namona be ita naria sibona lasi ela bona dokona do ia ginidae. Inai hereva, “mauri ranuna do umui abia dae,” be oi abia dae vadaeni dainai, hari oi ese ma haida oi boiridia diba. Idia ura bada do idia roho mauri bena Dirava ena “tanobada matamatana” do idia noholaia taudia iboudiai be hari idia gaukara goadagoada be namo.
[Study Questions]
1. Saiens taudia idia laloa dokona be ia kahirakahira a?
2. Edena negai Iehova ese nega ta ia duahia matamaia, bona unai nega ena dokonai dahaka do ia vara?
3. (a) Edena bamona ita diba Dirava ese Mesia ena mai negana ia laloa namonamo guna? (b) Dahaka dala ia kehoa unai?
4. (a) Iesu ese edena taudia ia haboudia matamaia? (b) Dirava ena palani hegeregerena, Keriso be edena negai ia pavapava matamaia? (c) King siahuna ia abia neganai, dahaka ia karaia guna?
5. Daidia do idia mauri noho ela bona Iehova ese ena lohia siahuna do ia hamomokania?
6, 7. (a) “Hutuma bada herea” ita lalodia neganai, dahaka dainai ita diba hisihisi badana be ia kahirakahira? (b) Dahaka dainai vaira negana idia naria mai edia ura bada danu?
8. (a) Dahaka gau badana be 1 Tesalonika 5:3 hegeregerena do ia vara? (b) Dahaka be gunaguna idia karaia dainai inai gau do ia vara? (c) Vanegai laganidia lalodiai, edena bamona idia doridia, tanobada ibounai idia hamainoa totona?
9. Dahaka dainai “Maino bona noho namo” herevana do idia halasia taudia be karaharaga do idia mase?
10. Hari inai negai, dahaka ese Babulono Badana hadikaia ore dalana ia hegaegaelaia?
11. (a) Bena bese idauidau ese daidia do idia tuari henidia? (b) Unai dainai dahaka do ia vara?
12. (a) “Hutuma bada herea” ese daidia do idia hanamodia idia hamauridia dainai? (b) Daidia be idia danu Dirava do idia hanamoa?
13. Taunimanima ubudia bona edia gorere hanamodia karadia be Bible ese edena bamona ia laulaulaia?
14. “Tanobada matamatana” be edena bamona do ia idau, hari inai negai hegeregerena lasi?
15. (a) Taunimanima be edena bamona idia boiridia noho? (b) Unai dainai ita ta ta ibounai be dahaka ita karaia be namo?