Karoa 2
Inai Dainai Do Ita Mauri o Do Ita Mase
VANEGAI hepapahuahu idauidau idia vara haraga, idia dainai namo o dika be vaira neganai do ita davaria diba. Hari inai nega be nega dikana dainai, taunimanima tanobada ibounai lalonai idia ura bada heduru idia abia. Reana Dirava idia abidadama henia, to reana idia laloa tanobada hanamoa dalana tamona be taunimanima ese do idia hanamoa. Haida ese edia gavamani amo idia hanamoa toho, haida ese gavamani gwau-edeede henia karadia amo idia hanamoa toho. Ma haida idia laloa hanamoa dalana tamona be gavamani idia hamorudia. Idia laloa bema taravatu idia haidaua, bona bema lohia taudia matamatadia o gavamani matamatadia idia haginidia, unai ese noho namo do ia mailaia. To idia vara vadaeni gaudia ese dahaka idia hahedinaraia? Ena be nega daudau herea lalonai idia hekwarahi bada, to taunimanima ese gavamani namona ta, hahemaoro maoromaoro, noho namo momokani bona noho hanaihanai moalena edia bese taudia dekenai ia mailaia gauna, be idia havaraia lasi. Badina be dahaka?
2 Herevana siahu taudia edia palani be namo herea, to unai taudia idia hanaidia lauma goada hereadia ese taunimanima edia gavamani idia biagudia. Unai lauma be Satana Diabolo bona ena demoni. Momokani, taunimanima momo idia abia dae lasi unai bamona laumadia idia noho. To Iesu Keriso ia diba idia noho. Ia be Satana ena sivarai ia diba, “inai tanobada ena lohia” ia gwauraia. (Ioane 12:31) Bible ia gwau tanobada ena gavamani iboudiai be dagedage gauna ta bamona, ma ia hahedinaraia “huala [Satana] ese sibona ena siahu inai dagedage gauna dekenai ia henia . . . bona ena goada bada herea danu ia henia.” (Apokalupo 13:1, 2; Daniel 7:2-8, 12, 23-26 danu itaia.) Bona Bible ese iseda nega ia gwauraia, ia gwau “tanobada . . . madi o . . . Badina be Satani ese umui dekenai ia lao vadaeni.” (Apokalupo 12:12) Heiriheiri bada herea be hari ia vara ena badina tamona be unai. To edena bamona ia vara? Heduru be edena bamona ita abia?
LOHIA SIAHUNA IDIA HEPAPAHUAHULAIA
3 Bible ena karoa ginigunadia idia hahedinaraia, Iehova Dirava ese taunimanima ginigunadia, Adam bona Eva, ia havaradia bona Eden lalonai ia atodia neganai, ia hadibadia ia be edia Tamana, edia gau iboudiai Henia Tauna, bona ia be guba bona tanobada edia King danu. Namona be inai dekenai idia lalo-parara: Idia mauri noho totona, Dirava idia kamonai henia be namo.—Genese 2:16, 17; Kara 17:24, 25 itaia.
4 Unai neganai gau iboudiai idia goevadae, bona aneru bona taunimanima be edia raka dalana idia abia hidi diba. To, Dirava ese taunimanima ia havaradia bena nega sisina murinai aneru ta ese Iehova ena lohia siahuna ia dadaraia. Ena inai tauna ai ia lao, ena ladana “Satana” ena anina unai. (Iakobo 1:14, 15; Apokalupo 12:9 itaia.) Sibona ia abia isi totona, ia ese Adam bona Eva edia lalona ia ania, Iehova do idia rakatania bena ia sibona ena siahu henunai do idia noho totona. Ena lalohadai be, taunimanima do idia hutuma bona tanobada do idia hahonua neganai, iboudiai ese ia do idia tomadiho henia. (Isaia 14:12-14; Luka 4:5-7 itaia.) Eden dekenai idia vara gaudia edia sivarai be gori lasi. Iesu ese ia hahedinaraia unai be sivarai momokanina.—Mataio 19:4, 5.
5 Iesu ese Diabolo ia gwauraia, ia gwau: “Hereva momokani be ia badinaia lasi . . . ia be koikoi ibounai edia tamana.” (Ioane 8:44) Diabolo ese ena hereva koikoi ginigunana ia gwauraia, Eva dekenai Dirava ia samania neganai. Ia gwau namona be Dirava ena taravatu ia dadaraia bona sibona ena taravatu ia atoa. (Genese 3:1-5; Ieremia 10:23 itaia.) Iehova ena lohia siahuna ia heailaia unai. Unai amo aneru bona taunimanima danu ia samanidia, ia gwau Dirava idia tomadiho henia to unai be idia lalokau henia momokani dainai lasi; ma ia gwau Dirava dekena amo do ia veridia oho diba. (Iobu 1:7-12; 2:3-5; Luka 22:31) Inai hepapahuahu herevadia be mai anina, guba taudia bona tanobada taudia iboudiai dekenai. Vadaeni, guba bona tanobada ia lohiaia Pavapavana be dahaka ia karaia?
6 Iehova ese unai gwau-edeede taudia ia hamasedia haraga lasi, to mai ena aonega danu nega ia atoa, unai nega ena dokonai unai hepapahuahu herevadia do ia hadokoa momokani. Unai amo aneru bona taunimanima do idia lalo-parara, iena lohia siahuna idia dadaraia taudia ese dika idia havaraia, bona danu, idia ta ta be dala do idia davaria, Dirava ena kahai eiava Satana ena kahai do idia gini totona. Inai hepapahuahu do ia doko murinai, ta ese maino do ia hadikaia lou diba lasi.
7 Iehova ese taunimanima ia havaradia dainai, ia be edia Lohia ai ia lao be maoro. (Apokalupo 4:11) To gabeai Satana bona ena demoni ese taunimanima idia veridia, sibodia edia taravatu idia atoa totona sibona lasi, to taunimanima ma haida idia lohiadia totona danu. Sibona be king ai ia halaoa tauna ginigunana be Nimrod, Mesopotamia dekenai ia lohia. Ia be “labana tauna mai goadana, Iehova gwau-edeede henia tauna,” animal bona taunimanima ia labana henidia. (Genese 10:8-12, NW) Nimrod ena nega amo ema bona harihari, taunimanima ese gavamani idauidau momo herea idia haginia vadaeni. To edia sivarai ese idia hahedinaraia, kerere momo idia karaia bona rara bada herea idia bubua.—Kohelete 8:9.
8 Iesu Keriso be tanobada dekenai ia noho neganai, Satana ese ena lalona ia ania toho. Ia gwau, bema Iesu be nega tamona ia tomadiho henia, “tanobada ena basileia ibounai” do ia henia. Iesu ia ura lasi. (Luka 4:1-13) Gabeai taunimanima idia ura Iesu be king ai do idia halaoa, to ia raka oho. (Ioane 6:15) Tanobada ena gavamani iboudiai edia oromana ia diba, bona ia diba Dirava ia ura lasi do ia hanamodia toho.
9 Iesu ese ena Tamana bona ena Dirava, Iehova, ia badinaia momokani. Ena Tamana ena dala ia ura henia bona ia idia hamoalea karadia ia karaia nega ibounai. (Ioane 8:29) Ia diba Dirava ena Basileia ese taunimanima edia hekwakwanai do ia kokidia; unai gavamani be gavamani korikorina, guba amo do ia lohia, bona taunimanima do ia hakaudia mai maoromaoro bona mai lalokau danu. Unai Basileia sibona ia goada Satana bona ena demoni edia siahu do ia kokia. Ia sibona ese tanobada besedia iboudiai na bese tamona ai do ia halaodia bena maino dekenai do idia noho. Ia sibona ese taunimanima na kara dika bona mase amo ia ruhadia diba. Ia mo sibona ese noho hanaihanai moalena ia mailaia diba taunimanima dekenai. Hari Basileia be politikol taudia ese idia haginia bona dubu oreadia gunalaia taudia ese idia hanamoa gauna lasi. Keristen korikoridia be tanobada ena tuari gaudia idia tuarilaia lasi, ena siahu idia habadaia totona. Ia be Dirava sibona ena gavamani; iena King be Dirava sibona ese ia atoa, guba dekenai. Inai Basileia be Iesu ese ia harorolaia, bona ena hahediba taudia ia hamaorodia do idia gurigurilaia.—Daniel 2:44; Apokalupo 20:1, 2; 21:3, 4.
EDENA KAHA DO OI ABIA HIDI?
10 Namona be inai henanadai oi lalohadailaia namonamo: Oi abia dae Iehova Dirava, guba bona tanobada ia karaia Diravana, be edia Lohia, bona ia lohiaia be maoro, a? Iena palani bona ena taravatu, Bible lalonai idia torea, be oi dibaia vadaeni, a? Iena dagi oi matauraia bona iena dala oi laloa bada dainai, ia oi kamonai henia noho mai emu lalokau danu, a?—Salamo 24:1, 10; Ioane 17:3; 1 Ioane 5:3.
11 Dala idauna idia abia hidi taudia idia moale bada, a? Satana ia gwau, bema taunimanima ese Dirava ena lohia siahuna idia dadaraia, namo do idia davaria; to unai hereva dainai dahaka ia vara? Dirava be tanobada ena biaguna, bona ia ura taunimanima iboudiai, Adam bona Eva amo idia vara taudia, be tadikaka bamona do idia noho, to iena lohia siahuna idia dadaraia dainai, taunimanima 99 milion be hanaia lagani 85 lalodiai idia aladia mase. Bible ena taravatu idia badinaia lasi dainai, ruma bese momo idia parara, taunimanima momo be VD gorere idia abia, drag idia ania dainai idia gorere, bona dagedage karadia bona ala-ala be bada herea. Ala-ala amo idia roho mauri taudia idia mase, Adam ena amo idia abia kara dika dainai. Inai ibounai ese ia hahedinaraia, taunimanima ese Dirava ena taravatu namodia idia dadaraia neganai, idia be sibodia idia hadikaia bona ma taunimanima haida idia hadikadia danu. (Roma 5:12; Isaia 48:17, 18 itaia.) Unai bamona mauri oi ura henia lasi ani? Unai ia hereaia momokani gauna oi abia hidi diba.
12 Bible ese ita ia noia, ia gwau: “Umui mamia toho, bena do umui diba, Iehova be namo; ia abidadama henia tauna danu ia moale.” (Salamo 34:8) Unai oi karaia totona, Iehova oi diba bena ena sisiba oi badinaia be namo. Bena emu mauri ena anina do ia bada. Idia noho daudau lasi moaledia do oi tahua kava lasi, to mauri ena hekwarahi idauidau haheaukalaia dalana bona noho hanaihanai moalena abia dalana do oi diba. (Hereva Lada-isidia 3:5, 6; 4:10-13; 1:30-33) Dirava ena Basileia ena hahenamo badadia abia negana do oi naria. Bema oi ura bada inai bamona mauri oi abia, namona be harihari oi kara haraga. Badina be dahaka?
BESE IBOUDIAI BE ARAMAGEDONO IDIA LAO HENIA
13 Taunimanima mai edia orea danu, mai edia lalo-parara danu o mai edia lalo-duhu danu Satana idia badinaia taudia unai, be Iehova ese do ia haheauka henidia lasi ela bona hanaihanai. Dirava ena taravatu idia laloa lasi, tanobada idia gaukaralaia kerere bona taunimanima idia hadikadia, to do ia koudia bena unai bamona do idia karaia lou lasi. “Iehova ena dina badana” dekenai edia davana do ia henidia.—Sefania 1:2, 3, 14-18.
14 Dahaka dahaka be inai nega ena dokonai do idia vara be Iesu Keriso ese ia hahedinaraia, ia gwau “lauma dikadia” be “tanobada edia king ibounai dekenai idia lao. Vadaeni unai king ibounai do idia haboua, Siahu Ibounai Diravana ena Dina Badana” ena tuari totona. Ma ia hahedinaraia, “idia haboua gabu ta dekenai. Inai gabu ena ladana Heberu gado dekenai be Aramagedono.” Hari unai bamona idia haboudia noho!—Apokalupo 16:14, 16.
15 Hari Aramagedono, Bible ese ia gwauraia tuarina, be tanobada besedia ese idia koua diba lasi. Ena be niuklia tuari kohu haboua karana idia hadokoa o idia hereva heboulaia, to do idia koua diba lasi. Ena ladana be hanua gunana ta, Megido amo ia mai, to ena anina ese Middle East ena gabu ta ena anina ia hanaia momokani. “Tanobada edia king ibounai” mai edia orea taudia, bese iboudiai mai edia politikol daladia idauidau unai, be “tanobada ena lohia,” Satana ese ia doridia noho bona ia haboudia noho, Iehova Dirava idia inai henia totona. Aramagedono ia vara gwauraia neganai, Dirava ena Basileia do idia inai henia bada bona idia harorolaia taudia do idia inai henidia bada danu. Herevana Satana ia noho herevana idia hamomokania eiava lasi, to Bible ena hereva hegeregerena, “Satani ese tanobada taudia ibounai ia gunalaia noho.” Inai tanobada dikana ibounai bona idia abidadama henia bona ena kara idia tohotohoa taudia danu, do idia ore.—1 Ioane 5:19; 2:15-17.
16 Inai tanobada ibounai be kara gagevadia amo ia honu. Raskol taudia dika rohorohodia sibodia lasi, to ma taunimanima momo danu ese taravatu idia utua bona edia dekena taudia edia mauri bona kohu idia laloa momo lasi. Edia kerere badana be, Dirava ena Hereva Bible lalonai idia ura lasi idia badinaia. Dirava ena lohia siahuna idia matauraia lasi. Dirava ena ladana idia hadikaia, unai dainai kara ta do ia karaia, unai dika be ena ladana amo ia kokia totona, bona tanobada be Paradaiso ai do ia lao dalana ia lailaia totona; unai Paradaiso lalonai kara maoromaoro ura henia taudia be maino momokani bona noho namo momokani do idia abia.
17 Unai ala-ala badana do ia vara neganai, ta do ia daradara lasi, unai be Iehova ena amo eiava lasi. Tanobada hegegemadai do ia vara. Iehova ena tuari oreadia do idia tuari matamaia neganai, bese iboudiai do idia diba Iehova ese kara ta ia karaia noho. Gavamani edia siahu do ia ore neganai, taunimanima iboudiai do idia heatu heheni. Dirava ena Natuna ese guba amo do ia halusidia.—Apokalupo 6:16, 17; 19:11-13; Sekaria 14:13.
18 Bema taunimanima be niuklia tuari idia karaia, kara namo taudia bona kara dika taudia be nega tamona do idia hamasedia, to inai tuari be unai bamona lasi. To daidia do idia roho mauri? Tomadiho taudia iboudiai ese a? Eiava sibodia be Keristen idia gwauraia taudia iboudiai ese a? Lasi, badina be Iesu ia gwau unai bamona taudia “momo” be “kara dika karaia taudia.” (Mataio 7:21-23) Iehova bona ena Natuna, King Iesu Keriso idia badinaia momokani taudia sibodia do idia roho mauri, bena “tanobada matamatana” do idia noholaia. Edia mauri dalana amo bona Basileia idia harorolaia dainai, idia hahedinaraia vadaeni “Dirava idia diba” bona “iseda Lohiabada Iesu ena sivarai namona idia abia dae.” Vadaeni, oi hamomokania noho oi be unai bamona tauna ta, a?—2 Tesalonika 1:8, NW; Ioane 17:3; Sefania 2:2, 3.
[Study Questions]
1. (a) Hari inai negai taunimanima momo ese dahaka idia lalo-hekwarahilaia, bona heduru be edeseniai idia tahua? (b) Nega momo idia be dahaka idia laloaboio?
2. Dahaka dainai tanobada ia dika rohoroho?
3. Genese 2:16, 17 hegeregerena, taunimanima ese Dirava edena bamona idia laloa bona idia kara henia be namo?
4. (a) Satana be edeseni amo ia mai? (b) Dahaka ura dikana be ena lalona dekenai ia koua lasi?
5. (a) Satana ese dahaka ia hepapahuahulaia Eden lalonai? (b) Ena hereva amo daidia ia hadikadia?
6. Dahaka dainai Iehova ese unai gwau-edeede taudia ia hamasedia haraga lasi?
7. (a) Taunimanima edia gavamani be edena bamona idia matamaia? (b) Edia sivarai be edena bamona?
8. Dahaka dainai Iesu ia ura lasi tanobada ena politik lalonai ia vareai?
9. (a) Dirava ena Basileia mo sibona be dahaka ia karaia diba, taunimanima edia hekwakwanai kokidia totona? (b) Unai Basileia be dahaka?
10. (a) Dahaka henanadai badana ita ta ta ibounai ita haerelaia be namo? (b) Unai hegeregerena, dahaka ita karaia be namo?
11. Dahaka dainai dala idauna abia hidi ese moale ia mailaia lasi?
12. (a) Bible ena noinoi ita dekenai be dahaka? (b) Dirava ena Hereva be iseda mauri lalonai ita badinaia noho lalonai, dahaka do ita davaria?
13. Dahaka dainai Iehova ena kaha dekenai hari ita gini auka be mai anina bada?
14. Bese iboudiai be dahaka totona hari idia haboudia noho?
15, 16. (a) Aramagedono be dahaka? (b) Ena badina be dahaka?
17. (a) Ala-ala ena bada be edena bamona? (b) Daika ese unai kara do ia gunalaia?
18. Daidia do idia roho mauri?