Karoa 16

Dirava Kahirakahira Oi Lao Diba Dalana

1. Tomadiho momo be edena bamona idia hegeregere?

ASIA ena tano ta dekenai Buddhist taudia be edia dubu lalonai idia karaia karadia be vadivadi loaloa hahinena ta ese ia hoalaia. Ena be edia kaivakuku be Maria o Keriso edia laulau lasi, to edia tomadiho karadia be iena dubu taudia edia hegeregeredia. Ia itadia, ageva idia gaukaralaia bona guriguri herevadia idia anelaia loulou. Taunimanima ma haida danu ese idia itaia, Ist kahanai eiava West kahanai, taunimanima ese Dirava eiava idia tomadiho henia gaudia idaudia dekenai idia raka kahirakahira lao daladia be hegeregere.

2. Buka ta lalonai guriguri be edena bamona idia gwauraia, bona badina be dahaka taunimanima momo idia guriguri?

² Dirava dekenai idia raka kahirakahira lao totona, momo ese idia guriguri henia. Buka ta lalonai idia gwau guriguri ena anina be, “taunimanima ese gau helagadia—Dirava, o dirava haida, o guba, o siahu hereadia, be idia hereva henia.” (The New Encyclopædia Britannica) To haida ese Dirava idia guriguri henia negadiai, do idia abia diba gaudia sibodia mo idia laloa. Unai hegeregerena, tau ta ese Iehova ena Witness taudia ia nanadaia, ia gwau; “Bema lau dainai umui guriguri, egu famili lalonai bona egu gaukara dekenai lau abia hekwakwanaidia bona egu gorere do idia ore, a?” Toana be unai tau ena lalohadai be unai, to momo ese idia davaria, ena be idia guriguri to edia hekwakwanai idia ore lasi. Unai dainai reana ita henanadai, ita gwau, ‘Dahaka dainai Dirava dekenai do ita raka kahirakahira lao be namo?’

DIRAVA KAHIRAKAHIRA ITA RAKA LAO KARANA ENA NAMO BE DAHAKA?

3. Daika do ita guriguri henia be maoro, bona dahaka dainai?

³ Guriguri be tomadiho ena anina lasi karana ta lasi, bona ia be gau abia dalana sibona mo lasi. Dirava dekenai ita lao kahirakahira ena badina badana be do ita badinaia namonamo totona. Unai dainai Iehova Dirava do ita guriguri henia be namo. Salamo torea tauna Davida ia gwau: “[Iehova] be ia dekenai idia boiboi taudia dekenai ia noho.” (Salamo 145:18) Iehova ese ita ia boiria, ia ida do ita maino karaia. (Isaia 1:18) Ena boiboi idia abia dae taudia ese salamo torea tauna ta ena hereva idia hamomokania; ia gwau: “Lau be Dirava badibadinai lau noho. Inai be namo herea momokani.” Badina be dahaka? Badina be Iehova dekenai idia lao kahirakahira taudia ese moale momokani bona lalo-maino do idia davaria.—Salamo 73:28.

4, 5. (a) Dahaka dainai Dirava do ita guriguri henia be gau badana? (b) Guriguri amo Dirava ena dahaka ai do ita lao diba?

⁴ ‘Ita ura gaudia be Dirava ia diba vadaeni, ita do noinoi henia lasi neganai’; vadaeni, dahaka dainai ena heduru ita noia be namo? (Mataio 6:8; Salamo 139:4) Iseda guriguri ese idia hahedinaraia Dirava ita abidadama henia bona ita laloa “gau namodia ibounai, bona harihari gaudia namodia momokani ibounai” be ia ena amo idia diho mai. (Iamesi 1:17; Heberu 11:6) Iehova ese iseda guriguri ia moalelaidia. (Aonega Herevadia 15:8) Iseda tanikiu herevadia bona iseda hanamoa herevadia, mai anina herevadia unai, be ia kamonaia mai ena moale ida, tama ta ese ena natuna maragina ena tanikiu hereva momokanidia ia kamonai neganai ia moale hegeregerena. (Salamo 119:108) Natu ta ese ena tamana ena lalokau ena mamina ia abia neganai, ia ura do ia hereva henia. Unai hegeregerena, Iehova dekenai ita dibaia gaudia bona ita dainai ia hahedinaraia lalokauna bema momokani ita laloa bada, do ita ura bada guriguri lalonai do ita hereva henia.—1 Ioane 4:16-18.

⁵ Atai Herea Diravana dekenai do ita lao kahirakahira neganai, namona be do ita hemataurai, to edena hereva do ita gwauraia be do ita lalo-hekwarahilaia lasi be namo. (Heberu 4:16) Iehova ese dala ia kehoa, nega ibounai do ita hereva henia diba. ‘Iseda kudouna edia ura gaudia’ be Dirava ita hamaorolaia be hahenamo badana ita dekenai! (Salamo 62:8) Iehova ena namo ita laloa bada dainai, kamonai tauna Aberahamo hegeregerena ita be iena turana ai do ita lao. (Iamesi 2:23) To guba bona tanobada edia Siahu Ibounai Lohiabadana do ita guriguri henia neganai, namona be iena taravatu, ia dekenai raka lao kahirakahira dalana taravatudia, be do ita badinaia.

DIRAVA KAHIRAKAHIRA LAO DALANA ENA TARAVATU

6, 7. Dirava ese moni ia gwauraia lasi iseda guriguri kamonaia davana, to ia ura guriguri negadiai edena bamona do ita kara?

⁶ Dirava dekenai do ita raka kahirakahira lao totona, moni be haroro taudia do ita henidia be namo, a? Taunimanima momo be unai bamona idia karaia, bona idia haida idia laloa edia boubou monina be bada neganai Dirava ese edia guriguri ia kamonaia haraga. To Baibel ia gwau lasi Iehova ia ura moni do ita henia, guriguri amo ia dekenai do ita raka lao kahirakahira totona. Iena lauma harihari gaudia ita abia diba bona guriguri amo ia ida ita hetura diba, davana lasi.—Isaia 55:1, 2.

⁷ Vadaeni, Dirava be dahaka ia ura? Ia ura iseda lalona do idia maoro. (2 Sivarai 6:29, 30; Aonega Herevadia 15:11) Namona be iseda lalona ai Iehova do ita abidadama henia, ia be ‘iseda guriguri ia kamonai,’ bona ‘idia tahua taudia ibounai, be davana namona ia ese do ia henidia.’ (Salamo 65:2; Heberu 11:6) Namona be do ita lalo-manau danu. (2 King Taudia 22:19; Salamo 51:17) Iena parabole ta lalonai, Iesu Keriso ese ia hahedinaraia, takisi gogoa tauna mai ena lalo-manau be Dirava kahirakahira ia lao neganai ia be maoro, to Farisea tauna hekokorokuna be maoro lasi. (Luka 18:10-14) Guriguri amo Dirava kahirakahira do ita lao neganai, namona be do ita laloa ‘hekokoroku taudia ibounai be Iehova ese ia badu henidia momokani.’—Aonega Herevadia 16:5.

8. Bema ita ura Dirava ese iseda guriguri do ia haerelaidia, dahaka amo do ita goeva be namo?

⁸ Bema ita ura Dirava ese iseda guriguri do ia kamonaidia, namona be iseda kara dika amo siboda do ita hagoevaia. Hahediba tauna Iamesi ese haida ia hagoadaia Dirava kahirakahira do idia lao; ia gwau: “Kara dika taudia e, emui imana do umui huria. . . . laloa rua dekena amo umui emui kudouna do umui hagoevaia.” (Iamesi 4:8) Kara dika taudia danu bema idia helalo-kerehai bona edia mauri dalana gunana idia rakatania, Iehova ida idia maino diba. (Aonega Herevadia 28:13) To, bema iseda dala ita hagoevaia koikoi mo, Dirava ese ita do ia abia dae lasi. Baibel ia gwau: “[Iehova] ese, kara maoromaoro taudia ia naridia noho, bona edia guriguri ia kamonai henia noho. To . . . kara dika taudia edia dala ia koua noho.”—1 Petero 3:12.

9. Daika ena amo Iehova dekenai ita lao henia be maoro, bona badina be dahaka?

⁹ Baibel ia gwau: “Tanobada dekenai . . . ibounai ese nega haida kara dika do idia karaia diba.” (Hadibaia Tauna 7:20) Unai dainai reana oi henanadai, oi gwau; ‘Iehova Dirava kahirakahira dekenai edena bamona ita lao diba?’ Baibel ena haere be inai: “Tau ta bema ia kara dika, ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna.” (1 Ioane 2:1) Ena be ita be kara dika taudia, to iseda mauri davana karaia totona ia mase tauna, Iesu Keriso, ena amo Dirava kahirakahira ita lao diba mai eda gari lasi. (Mataio 20:28) Iehova kahirakahira ita lao dalana tamona be ia. (Ioane 14:6) Namo lasi Iesu ena boubou karana ita laloa maragi, bena ita kara dika loulou mai eda ura ida. (Heberu 10:26) To, kara dika ita dadaraia goadagoada toho lalonai, bema nega ta ta ita kara kerere, ita helalo-kerehai diba, bona Dirava ita noia diba iseda dika do ia gwauatao. Mai eda lalo-manau ida ia kahirakahira do ita lao neganai, ita do ia kamonai henia.—Luka 11:4.

DIRAVA HEREVA HENIA NEGADIA NAMODIA

10. Iesu ena guriguri karadia be edena bamona ita tohotohoa diba, bona edena negadia ai ta be sibona ia guriguri be namo?

¹⁰ Iesu Keriso ese Iehova ena hebamo ia laloa bada dainai, nega ia atoa, ia sibona do ia guriguri henia loulou. (Mareko 1:35; Luka 22:40-46) Iesu ia karaia bamona, ita danu be Dirava do ita guriguri henia loulou be namo. (Roma 12:12) Namona be daba ai do ita noga neganai do ita guriguri, bona hanuaboi ai ita do mahuta lasi neganai, dina ena gaukara dainai Iehova do ita tanikiu henia be namo. Dina lalonai, “nega ibounai” Iehova kahirakahira do oi lao be namo. (Efeso 6:18) Iseda lalona ai ita guriguri hehuni diba danu, badina be ita diba Iehova ese ita ia kamonai henia diba. Bema dina iboudiai ita sibona be Dirava ita hereva henia, unai amo do ita tura henia goevagoeva, bona ia kahirakahira momokani do ita lao.

11. (a) Dahaka dainai famili taudia idia guriguri hebou be namo? (b) “Amen” be guriguri ena dokonai oi gwauraia, anina be dahaka?

¹¹ Iehova ese danu orea dainai idia gwauraia guriguridia ia kamonaia. (1 King Taudia 8:22-53) Tau be ena famili ena kwarana; guriguri lalonai ia hakaudia, unai amo iboudiai be Dirava kahirakahira idia lao diba. Unai ese edia lalona ia hatamonadia, bona tama sina be mai edia manau ida Dirava idia guriguri henia negadiai, edia natudia be idia kamonai dainai, idia diba Iehova be momokani ia noho. To bema ta be Iehova ena Witness taudia edia hebou ta lalonai hebou taudia dainai do ia guriguri, be edena bamona? Bema ita be unai hebou lalonai, namona be do ita kamonai namonamo, bena guriguri ena dokonai ita be mai eda lalona ibounai ida do ita gwau “amen,” anina be “Momokani.”—1 Korinto 14:16.

IEHOVA ESE IA KAMONAIA GURIGURIDIA

12. (a) Dahaka dainai Dirava ese guriguri haida ia haerelaia lasi? (b) Do ita guriguri negadiai, dahaka dainai siboda eda dabu gaudia mo do ita herevalaia be namo lasi?

¹² Haida idia laloa, ena be idia ese Keriso ena amo Dirava idia guriguri henia, to ia kamonai henidia lasi. To, Aposetolo Ioane ia gwau: “Bema gau ta [Dirava] ena ura hegeregerena ita noia neganai, ia ese ita dekenai do ia kamonai.” (1 Ioane 5:14) Unai dainai, iena ura hegeregerena do ita noia be namo. Ia ese iseda abidadama ia laloa, unai dainai iseda abidadama idia habadaia o idia hamaragia gaudia do ita gurigurilaia be maoro. Namo lasi iseda tauanina durudia gaudia mo do ita gurigurilaia momo. Namona be Iehova do ita noia, gorere do ita haheaukalaia totona, lalo-parara bona goada be ita do ia henia; to namo lasi iseda gorere ita laloa momo dainai lauma gaudia ita laloaboio. (Salamo 41:1-3) Keristani hahinena ta ena lalona ia parara ena gorere ia uarilaia momo be kerere; unai dainai Iehova ia noia, do ia durua ena gorere do ia laloa maoromaoro totona. Unai dainai, hari ena gorere ia laloa momo lasi, bona mamina ia abia, “siahu badana” be Dirava ena amo ia abia vadaeni. (2 Korinto 4:7) Iena ura, haida be lauma dalanai do ia durudia urana, be ia bada dainai, Basileia harorolaia hanaihanai hahinena ta ai ia lao.

13. Mataio 6:9-13 ena hereva hegeregerena, dahaka dahaka do ita gurigurilaia be maoro?

¹³ Dahaka dahaka do ita gurigurilaia be namo, Iehova ese iseda guriguri be mai ena moale ida do ia kamonaia totona? Iesu Keriso ese ena hahediba taudia be guriguri dalana ia hadibalaidia. Mataio 6:9-13 dekenai gau haida ia gwauraia, do ita gurigurilaidia be maoro. Iseda guriguri lalonai dahaka do ita laloa bada? Gaudia be Dirava ena ladana bona iena Basileia. Iseda tauanina durudia gaudia danu do ita noia be maoro. Gau badana ma ta be, do ita noia, iseda dika do ia gwauatao, bona hedibagani bona dika tauna, Satani Diabolo, edia amo ita do ia hamauria. Iesu ia ura lasi unai guriguri do ita gwauraia loulou kava bona ena anina do ita laloa lasi. (Mataio 6:7) Bema natu ta ese hereva tamona amo iena tamana ia hereva henia loulou, ruaosi idia hetura heheni momokani diba lasi, ani?

14. Noinoi sibodia mo lasi, to dahaka danu do ita gurigurilaia be namo?

¹⁴ Namona be Dirava do ita noinoi henia mai eda lalona ibounai ida, bona iseda guriguri lalonai ia do ita hanamoa bona do ita tanikiu henia danu be namo. (Salamo 34:1; 92:1; 1 Tesalonika 5:18) Haida dainai do ita guriguri diba danu. Lauma dalanai Keristani taudia be iseda tadikaka bona taihu; haida ese idia hahisidia neganai, iseda guriguri amo ita hahedinaraia ita lalodia, bona Iehova ese unai bamona guriguridia ia kamonai mai ena moale ida. (Luka 22:32; Ioane 17:20; 1 Tesalonika 5:25) Aposetolo Paulo ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese . . . emui laloa gaudia, bona emui kudouna idia mamia gaudia ibounai do ia gimaia namonamo.”—Filipi 4:6, 7.

GURIGURI DO OI GOADALAIA NOHO

15. Bema toana be Dirava ese iseda guriguri ia haerelaidia lasi, dahaka do ita laloa be namo?

¹⁵ Ena be Dirava oi dibaia noho, to reana nega haida oi laloa emu guriguri haida ia haerelaia lasi. Reana badina be unai be Dirava ese unai guriguri do ia haerelaia negana korikorina lasi. (Hadibaia Tauna 3:1-9) Reana Iehova ese gau ta do ia koua haraga lasi, to ia ese guriguri ia haerelaidia bona haere henidia negadia namo hereadia be ia diba.—2 Korinto 12:7-9.

16. Dahaka dainai guriguri do ita goadalaia noho be namo, bona unai dala amo ita ese Iehova edena bamona do ita kara henia?

¹⁶ Bema guriguri ita hesikulaia lasi to ita goadalaia noho, unai amo ita hahedinaraia Dirava dekenai ita gwauraia herevadia ita laloa bada. (Luka 18:1-8) Unai hegeregerena, bema ita noia ita do ia durua iseda manoka ta do ita hadarerea totona, namona be ita guriguri noho bona iseda noinoi hegeregeredia ita kara be namo; unai amo ita hahedinaraia ita be momokani. Namona be iseda ura gaudia do ita gwauraia goevagoeva mai eda momokani ida. Hedibagani ta do ita davaria neganai, do ita guriguri goadagoada be mai anina bada. (Mataio 6:13) Iseda ura dikadia do ita biagua toho lalonai, do ita guriguri noho, bena Iehova ese ita ia durua dalana do ita itaia. Unai ese iseda abidadama do ia habadaia, bona unai dainai Ia do ita badinaia namonamo.—1 Korinto 10:13; Filipi 4:13.

17. Dirava ena hesiai ita lao henia noho lalonai bema ita guriguri loulou, dahaka namo be unai amo do ita davaria?

¹⁷ Iehova Dirava ena hesiai ita lao henia noho lalonai bema ita guriguri henia loulou, eda lalona do idia parara, unai gaukara helagana ita karaia be siboda eda goada amo lasi. Iehova ena heduru dainai ita kwalimu. (1 Korinto 4:7) Bema inai hereva ita abia dae, do ita manau bona ia ese ita do ia lalo-namo henia. (1 Petero 5:5, 6) Oibe, guriguri do ita goadalaia noho be mai badina korikoridia. Iseda guriguri momokanidia dainai bona iseda Tamana lalokauna guba ai ia noho raka henia kahirakahira dalana ita diba dainai, do ita moale momokani.

IEHOVA ESE ITA IA HEREVA HENIA

18. Ita ese Dirava edena bamona ita kamonai henia diba?

¹⁸ Bema ita ura Iehova ese iseda guriguri do ia kamonaia, namona be iena hereva do ita kamonaia. (Sekaraia 7:13) Momokani, iena hereva be lauma idia nanadaidia taudia edia amo ia siaidia lasi, bona hari inai negai iena peroveta taudia edia amo ia siaidia lasi. (Deuteronomi 18:10-12) To Dirava ena Hereva, Baibel, ita stadilaia neganai, Ia ita kamonai henia diba. (Roma 15:4; 2 Timoteo 3:16, 17) Iseda tauanina ia hagoadaia diba anianina ita ura henia be namo; unai hegeregerena, namona be ‘lauma ena rata goevagoeva do ita ura henia.’ Lauma anianina ena mamina moalelaia lalohadaina habadaia totona, Dirava ena Hereva be dina iboudiai do oi duahia be namo.—1 Petero 2:2, 3; Kara 17:11.

19. Baibel lalonai oi duahia herevadia edia anina oi laloa lou karana ena namo be dahaka?

¹⁹ Baibel lalonai oi duahia herevadia do oi haeroa be namo. (Salamo 1:1-3; 77:11, 12) Anina be, do oi laloa loulou bona do oi laloa dobu. Unai be aniani ania karana hegeregerena. Lauma anianina ania dalana ta be, oi duahia noho herevadia be oi diba vadaeni herevadia ida oi hahegeregerea. Unai hereva edia anina emu mauri dekenai, o Dirava ena kara idia hahedinaraidia daladia, be oi laloa namonamo. Dirava ese ita ia henia lauma anianina be sibomu emu stadi karana amo do oi ania diba. Unai amo Dirava kahirakahira do oi lao, bona unai ese oi do ia durua, emu hekwakwanai momo do oi hanaidia totona.

20. Keristani heboudia lao henia karana ese ita edena bamona ia durua, Dirava dekenai do ita lao kahirakahira totona?

²⁰ Dirava kahirakahira do oi lao dalana ma ta be, iena Hereva be Keristani heboudia dekenai do idia herevalaia negadiai, do oi kamonaia. Unai be Israela taudia edia kara hegeregerena; edia hebou lalodiai edia hadibaia taudia ese Dirava ena Taravatu idia duahia hedinarai negadiai, idia hakala namonamo. Taravatu ena anina idia gwauraia hedinarai danu dainai, idia lalo-pararalaia bona idia ura do idia badinaia. Unai ese moale bada ia havaraia. (Nehemia 8:8, 12) Unai dainai Iehova ena Witness taudia edia hebou do oi lao henidia loulou be namo. (Heberu 10:24, 25) Unai amo Dirava do oi dibaia goevagoeva, bena emu diba hegeregerena do oi kara lalonai, moale do oi davaria. Keristani taudia edia orea, tanobada hegegemadai oreana, lalonai bema oi noho, Iehova kahirakahira do oi noho diba. Bona, karoa gabena ena hereva hegeregerena, edia orea lalonai do oi noho namonamo momokani diba.

EMU DIBA OI TOHOA

Dahaka dainai Iehova dekenai do oi raka kahirakahira lao be namo?

Iehova dekenai do ita raka lao kahirakahira totona, edena bamona do ita kara be namo?

Dahaka dahaka oi gurigurilaia diba?

Dahaka dainai guriguri do oi goadalaia noho be namo?

Hari inai negai Iehova be edena bamona oi kamonai henia diba?

[Full-page picture on page 157]