Karoa 17
Dirava Ena Orea Lalonai Do Oi Noho Namonamo
1, 2. Dahaka dainai taunimanima edia noho be lai gubana ese ia hadikaia gabuna idia noholaia taudia edia noho hegeregerena?
MANI inai oi laloa: Lai gubana ese emu hanua ia hadikaia. Emu ruma bona emu kohu ia hadikaia ore, bona aniani dekenai oi dabu dainai, emu darana ia doko. Bena aniani momo bona dabua momo idia mailaia, bona ruma matamatana ta idia haginia oiemu. Momokani, oi ura unai heduru gaudia ia siaia tauna do oi tanikiu henia, ani?
2 Hari inai negai, unai bamona gauna ia vara noho. Unai lai gubana hegeregerena, Adamu bona Heva edia gwau-edeede ese taunimanima ia hadikadia bada. Edia noho gabuna Paradaiso idia haboioa. Unai nega amo ema bona hari, taunimanima edia gavamani ese idia be tuari, raskol karadia, bona kara kereredia amo idia naridia lasi. Tomadiho dainai momo be lauma aniani namona hitolona idia hitolo bada. To, hari inai negai, lauma dalanai Iehova Dirava ese aniani, dabua, bona noho gabudia ia henia. Unai be edena bamona ia karaia noho?
“HESIAI TAUNA” NAMONA
3. Iehova ese taunimanima be heduru gaudia edena bamona ia henidia, bona edena negadiai unai bamona ia karaia?
3 Heduru gaudia be vaia orea ta amo idia siaia, bona Iehova ese ena taunimanima be lauma dalanai unai bamona ia durudia. Guna, lagani 1,500 lalodiai, Israela taudia be Iehova ena “orea taudia.” Idia haida edia amo Dirava ese ena Taravatu ia hadibalaidia. (1 Sivarai 28:8; 2 Sivarai 17:7-9) Aposetolo edia negai Iehova ese Keristani oreana ia havaraia. Kongregesen idia haginidia, bena hakaua oreana ta ese ia hakaudia, ia lalonai be aposetolo bona kwarana taudia. (Kara 15:22-31) Unai hegeregerena, hari inai negai Iehova ese ena taunimanima be orea ta amo ia kara henidia. Unai be edena bamona ita diba?
4. Hari inai negai, ‘hesiai tauna mai ena kamonai bona mai ena kara maoromaoro’ be daidia, bona Dirava ena lauma anianina be edena bamona idia hariharilaia?
4 Iesu ia gwau, mai ena Basileia siahuna ida do ia ginidae neganai, ia ese ‘hesiai tauna mai ena kamonai bona mai ena kara maoromaoro’ do ia davaria, Iena orea taudia edia aniani be nega korikori ai ia henidia noho. (Mataio 24:45-47) Vadaeni, 1914 lalonai Iesu Keriso be guba lalonai King ai ia lao neganai, hari “hesiai tauna” be daidia? Momokani, ia be Kerisendom ena haroro taudia lasi. Unai neganai idia momo ese edia orea taudia idia hagoadaia noho, edia gavamani be Tanobada Ibounai Tuarina Ginigunana lalonai do idia durudia totona. To unai neganai Keristani taudia momokanidia edia orea ese lauma aniani be nega korikori ai ia hariharilaia noho; Dirava ese ena lauma helaga amo ia horodia vadaeni, bona edia orea be Iesu ese ia gwauraia “orea maragi.” (Luka 12:32) Idia ese Dirava ena Basileia idia harorolaia, taunimanima edia gavamani lasi. Unai dainai, nega daudau lalonai “mamoe idaudia” milioni haida, lalo-maoromaoro taudia unai, ese horoa “hesiai tauna” idia bamoa matamaia, tomadiho momokanina idia badinaia karana lalonai. (Ioane 10:16) Dirava ese “hesiai tauna mai ena kamonai” bona ena Hakaua Oreana ia gaukaralaia noho; idia edia amo iena orea taudia ia hakaudia, idia ese lauma anianina, dabuadia, bona noho gabudia be ura taudia iboudiai do idia henidia totona.
ANIANI, NEGA KORIKORI AI
5. Hari inai negai, lauma dalanai tanobada taudia be edena bamona, bona unai dainai Iehova be dahaka ia karaia?
5 Iesu ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mataio 4:4) To, madi, taunimanima momo herea ese Dirava ena hereva idia laloa lasi. Iena peroveta tauna Amosa ena hereva hegeregerena, “idia hitolo bona ranu mase gauna be [Iehova] ena hereva totona.” (Amosa 8:11) Tomadiho goadalaia taudia danu be lauma dalanai idia hitolo. To, Iehova ia ura “taunimanima ibounai ese mauri do idia davaria, bona hereva momokani do idia diba.” (1 Timoteo 2:3, 4) Unai dainai lauma aniani momo ia hariharilaia noho. To edeseniai idia abia diba?
6. Gunaguna, Iehova ese ena orea taudia be lauma dalanai edena bamona ia ubudia?
6 Idaunega amo, Iehova ese lauma aniani be iena taunimanima edia orea lalonai ia henidia. (Isaia 65:13) Gunaguna, Israela ena hahelaga taudia ese tatau, hahine, bona edia natudia idia haboua, edia hebou lalodiai Dirava ena Taravatu do idia hadibalaidia totona. (Deuteronomi 31:9, 12) Aposetolo edia negai, hakaua oreana ena hakaua herevadia hegeregeredia Keristani taudia ese kongregesen idia haginidia bena hebou idia karadia, iboudiai hadibaia bona hagoadaia totona. (Roma 16:5; Filemona 1, 2) Iehova ena Witness taudia ese unai kara idia tohotohoa. Oi ai boiria inai, edia hebou iboudiai lalodiai do oi vareai.
7. Keristani heboudia lao henia loulou karana ese diba bona abidadama be edena bamona ia habadaia?
7 To, reana oi sibomu be Baibel oi stadilaia vadaeni dainai, diba momo oi abia vadaeni. Reana ta ese oi ia durua. (Kara 8:30-35) To emu abidadama be ava ta bamona; bema oi naria namonamo lasi, do ia marai bena do ia mase. Unai dainai, namona be lauma aniani namona do oi abia. (1 Timoteo 4:6) Keristani heboudia lalodiai oi do idia hadibaia loulou; lauma aniani amo oi do idia ubua, bona emu diba Dirava dekenai do oi habadaia noho lalonai, emu abidadama do ia tubu noho.—Kolose 1:9, 10.
8. Dahaka dainai Iehova ena Witness taudia edia hebou do ita lao henidia be namo?
8 Hebou be mai edia anina badana ma ta. Paulo ia gwau: “Umui ta ta dekenai durua henia daladia do umui laloa noho. . . . Iseda guriguri hebou kara do umui hadokoa lasi.” (Heberu 10:24, 25) Inai hereva “durua henia” be Greek gado herevana ta ida idia hahegeregerea; ena anina ma ta be “segea.” Baibel ia gwau: “Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.” (Aonega Herevadia 27:17) Ita ibounai do idia “segea” loulou be namo. Dina ta ta tanobada ena lalo-hekwarahi gaudia ese iseda abidadama ena matana idia hadikaia diba. Keristani heboudia lalodiai ita hagoadaia heheni. (Roma 1:11, 12) Paulo ena sisiba hegeregerena kongregesen taudia be ‘ta ta dekenai goada idia henia, bona durua idia henia’; unai kara ese iseda abidadama ia segea. (1 Tesalonika 5:11) Inai danu, Keristani heboudia bema ita lao henia loulou, unai amo ita hahedinaraia Dirava ita lalokau henia, bona unuseniai ia ita hanamoa diba.—Salamo 35:18.
“LALOKAU BE DABUA BAMONA DO UMUI ATOA”
9. Iehova ese lalokau be edena bamona ia hahedinaraia, do ita tohotohoa totona?
9 Paulo ia gwau: “Lalokau be dabua bamona do umui atoa, badina be ia be hatamonaia gauna hereadaena.” (Kolose 3:14, NW) Iehova Dirava ese inai dabua be ita ia henia mai ena hariharibada ida. Lalokau be iena lauma helaga ena huahua ta dainai, Keristani taudia ese idia hahedinaraia diba. (Galatia 5:22, 23) Iehova sibona ese lalokau bada herea ia hahedinaraia; ia sibona ia havaraia Natuna tamona be ia ese ia siaia, mauri hanaihanai do ita abia totona. (Ioane 3:16) Iena lalokau hahedinaraia karana hereadaena do ita tohotohoa be namo. Aposetolo Ioane ia gwau: “Dirava ese unai bamona ita ia lalokau henia dainai, namona be ita ta ta dekenai do ita lalokau henia, ani?”—1 Ioane 4:11.
10. “Keristani taudia ibounai” edia amo, namo be edena bamona ita davaria diba?
10 Kingdom Hall dekenai hebou do oi lao henia be nega namo hereana lalokau do oi hahedinaraia totona. Iehova ena hesiai taudia ida do umui hedavari, idia ta ta be mai edia kara idauidau. Idia haida be maoromaoro do oi ura henia. Reana guna taunimanima haida oi bamoa lasi, badina be edia ura bona edia kara be oiemu hegeregeredia lasi. To Aposetolo Petero ese Keristani taudia ia hagania, ‘Keristani taudia ibounai do idia lalokau henia.’ (1 Petero 2:17) Unai dainai, Kingdom Hall lalonai idia hebou taudia iboudiai do oi hebamo henidia toho be namo—herevana edia mauri laganidia, o edia kara, o edia bese, o edia edukeisini ena bada be oiemu hegeregeredia lasi. Reana do oi davaria idia ta ta iboudiai be kara namodia haida idia goadalaia.
11. Ena be Iehova ena orea taudia ta ta edia kara be idauidau, to dahaka dainai unai do oi laloa momo lasi be namo?
11 Kongregesen taudia ta ta edia kara be idauidau, to unai do oi laloa momo lasi be namo. Unai be motuka momo be dala dekenai idia heau hebou hegeregerena. Edia sipidi be idauidau bona edia toana be idauidau. Haida be kilomita momo idia heau vadaeni, bona haida be oi bamona idia heau matamaia mo. To ena be idia be unai bamona idia idauidau, to iboudiai be dala dekenai idia heau. Kongregesen taudia ta ta iboudiai be unai bamona. Keristani karadia be sipidi idauidau dekenai idia goadalaia. Haida edia tauanina bona edia lalona idia goada, ma haida be lasi. Haida be lagani momo Iehova idia tomadiho henia vadaeni, ma haida ese idia tomadiho henia matamaia mo. To, iboudiai be mauri hanaihanai lao henia dalana dekenai idia raka, “mai lalona tamona danu.” (1 Korinto 1:10) Unai dainai, kongregesen taudia edia goada do oi tahua be namo, edia manoka lasi. Unai bamona do oi karaia neganai, emu lalona do ia moale, badina be do oi diba Dirava be momokani idia bogaragidiai ia noho. Bona oi ura oi danu be idia bogaragidiai do oi noho, ani?—1 Korinto 14:25.
12, 13. (a) Bema kongregesen tauna ta ese emu badu ia havaraia, edena bamona do oi kara be namo? (b) Dahaka dainai emu badu do oi dogoatao lasi be mai anina bada?
12 Taunimanima iboudiai idia goevadae lasi dainai, reana nega haida kongregesen tauna ta ese ena hereva o ena kara amo oi do ia habadua. (Roma 3:23) Iamesi ena hereva momokanina ta be inai: “Ita ibounai ese nega momo kerere ita karaia. To bema tau ta ese iena hereva dekena amo kerere ta ia karaia lasi, ia be goeva bona namo momokani.” (Iamesi 3:2) Bema ta ese oi ia habadua, edena bamona do oi kara? Baibel ia gwau: “Tau ta ena aonega ese haheauka ia henia noho, vadaeni ia badu haraga lasi. Bema tau ta ese oi dekenai ia kara dika, do oi laloaboio be kara namona momokani.” (Aonega Herevadia 19:11) Aonega tauna ese kerere tauna ena hereva o ena kara edia badina ia lalo-pararalaia. Ita momo ese iseda aonega unai bamona ita gaukaralaia, siboda eda kerere laloa maragi totona. Vadaeni, namona be haida edia kerere be unai bamona do ita laloa maragi danu, ani?—Mataio 7:1-5; Kolose 3:13.
13 Mani inai oi laloaboio lasi: Taunimanima edia dika do ita gwauatao be namo, Iehova ese iseda dika do ia gwauatao totona. (Mataio 6:9, 12, 14, 15) Bema hereva momokani ita badinaia, do ita kara henidia mai eda lalokau ida. (1 Ioane 1:6, 7; 3:14-16; 4:20, 21) Unai dainai, bema hekwakwanai ta ia vara oi bona kongregesen tauna ta ihuanai, emu badu do oi negea toho be namo. Bema lalokau be dabua bamona oi atoa, unai hekwakwanai haorea dalana do oi tahua goadagoada, bona bema oi ese ta oi habadua, sori herevana do oi gwauraia haraga.—Mataio 5:23, 24; 18:15-17.
14. Dahaka kara be dabua bamona do ita atoa be namo?
14 Namona be lalokau bamona karadia ma haida be dabua bamona do ita atoa. Paulo ia gwau: “Inai bamona karadia, dabua bamona do umui atoa: Bogahisihisi, durua, manau, manada bona haheauka.” Unai kara be lalokau ese ia havaradia, bona idia be “mauri matamata” namona ena kahana. (Kolose 3:10, 12) Unai kara be dabua bamona do oi atoa toho, a? Lalokau, tadikaka edia bamona, bema oi atoa, Iesu ena hahediba taudia edia toana do oi abia, badina be ia gwau: “Taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioane 13:35.
NOHO NAMONAMO GABUNA
15. Dahaka dainai kongregesen be roho mauri gabuna ta bamona?
15 Kongregesen be roho mauri gabuna ta bamona, dika amo oi do idia naria gabuna; ia lalonai do oi noho namonamo diba. Ia lalonai lalo-momokani taudia do oi davaria, Dirava ia ura henia karadia idia karaia toho noho. Idia momo ese kara dikadia bona laloa daladia dikadia idia negea vadaeni; reana unai gau be hari oi halusidia toho mai emu hekwarahi ida. (Tito 3:3) Oi idia durua diba, badina be Baibel ese ita ia hagania, ‘ita ta ta dekenai do ita durua henia, iseda metau do ita huaia totona.’ (Galatia 6:2) Momokani, mauri hanaihanai dalana do oi rakalaia be oi sibomu emu maduna. (Galatia 6:5; Filipi 2:12) To, Iehova ese Keristani kongregesen ia atoa, ita do ia durua bada totona. Herevana emu hekwakwanai ena bada be edena bamona, to oi ia durua bada gauna ia noho—gauna be kongregesen mai lalokauna, hisihisi negadiai bona dabu negadiai oi do ia badinaia.—Luka 10:29-37; Kara 20:35 itaia.
16. Kongregesen ena elda taudia be edena bamona idia heduru?
16 Oi idia durua gwauraia taudia haida be “harihari gaudia”—kongregesen ena elda taudia unai; idia ese mamoe idia naridia mai edia ura bada ida. (Efeso 4:8, 11, 12; Kara 20:28; 1 Petero 5:2, 3) Isaia ese ia perovetalaidia, ia gwau: ‘Idia ta ta ibounai be lai koua gabuna hegeregerena do idia lao. Idia be guba bada ia toa neganai hunia gabudia namodia hegeregeredia. Idia be tano kaukau gabudia lalonai sinavai maragidia hegeregeredia. Idia be nadi badana ena ikerukeru bamona, tano kaukau dekenai.’—Isaia 32:2.
17. (a) Iesu ia ura bada taunimanima be edena bamona do ia durudia? (b) Dirava ia gwauhamata dahaka heduru be ena orea taudia do ia henidia?
17 Iesu be tanobada dekenai ia noho neganai, iena bese taudia edia tomadiho gunalaia taudia ese idia naridia lasi mai edia lalokau ida. Iesu ese ia hebogahisi henidia bona ia ura bada lauma dalanai do ia durudia, badina be “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Hari inai negai taunimanima momo be unai bamona; lalo-hekwarahi badadia idia hisihisilaia noho, bona lauma dalanai do ia durudia bona do ia hagoadadia tauna be lasi! To Iehova ena orea taudia be lauma dalana dekenai heduru idia abia, badina be ia gwauhamata, ia gwau: “Lau ese gunalaia taudia matamatadia do lau abia hidi, bona idia ese egu mamoe do idia naria namonamo. Lauegu bese be do idia gari lou lasi, bona idia ta be do ia boio lasi.”—Ieremia 23:4.
18. Bema lauma dalanai heduru do ita abia be namo, dahaka dainai elda ta do ita hereva henia be namo?
18 Kongregesen ena elda taudia do oi hebamo henidia be namo. Dirava ena amo ia mai dibana gaukaralaia dalana idia manadalaia momokani, badina be Baibel ena taravatu hegeregeredia idia hegeregere unai dagi do idia abia. (1 Timoteo 3:1-7; Tito 1:5-9) Bema oi ura lauma heduruna do oi abia emu kara kererena ta do oi halusia totona, namona be maoromaoro idia ta do oi hereva henia. Do oi davaria elda taudia ese Paulo ena sisiba idia badinaia; ia gwau: “Gari taudia do umui hagoadaia, bona manoka taudia do umui durua. Bona taunimanima ibounai dekenai do umui lalo namo henidia.”—1 Tesalonika 2:7, 8; 5:14.
DIRAVA ENA OREA TAUDIA IDA DO UMUI NOHO NAMONAMO
19. Iehova ena orea lalonai noho namo idia tahua taudia be ia ese dahaka hahenamo ia henidia?
19 Ena be ita be goevadae lasi tanobadana dekenai ita noho, to Iehova ese lauma anianina, dabuadia, bona noho gabudia be ita ia henia. Momokani, tanobada paradaisona ena hahenamo do ita abia lasi, ela bona Dirava ena tanobada matamatana do ia vara. To hari inai negai Iehova ena orea taudia be lauma paradaisona lalonai idia noho mai edia moale ida. Esekiela ese ia perovetalaidia, ia gwau: “Idia be do idia noho namonamo, bona tau ta ese idia do ia hagaria lasi.”—Esekiela 34:28; Salamo 4:8.
20. Iehova tomadiho henia totona ita haboioa gaudia edia davana be ia ese edena bamona ita do ia henia?
20 Iehova ese ena Hereva bona ena orea amo lauma dalanai ita ia durua mai ena lalokau ida dainai, ita tanikiu henia bada be namo, ani? Dirava ena orea taudia do oi bamoa momo be namo. Emu turana o emu varavara edia lalohadai, Dirava oi dibaia noho dainai oi idia laloa lalohadaina, be do oi garilaia lasi. Reana haida do idia badu, badina be Iehova ena Witness taudia oi bamoa bona Kingdom Hall dekenai hebou lalodiai oi vareai dainai. To Dirava tomadiho henia totona oi haboioa gaudia edia davana be ia ese oi do ia henia, ma do ia habadaia danu. (Malaki 3:10) Iesu ia gwau: “Bema tau ta ese iena ruma ia rakatania, o iena tadikakana, o taihuna, o sinana, o tamana, o natuna, o tano, bema lau dainai bona Sivarai Namona dainai inai gaudia ia rakatania, hari inai mauri neganai, iena gau do ia habadaia nega 100 bamona, ruma, tadikakana, taihuna, sinana, natuna, bona tano. Momokani taunimanima ese unai tau do idia hisihisi henia, to gabeai, vaira neganai, mauri hanaihanai do ia abia.” (Mareko 10:29, 30) Oibe, herevana dahaka oi rakatania vadaeni o dahaka do oi hisihisilaia, to Dirava ena orea taudia bogaragidiai hebamo mai moalena do oi davaria bona lauma dalanai do oi noho namonamo.
EMU DIBA OI TOHOA
‘Hesiai tauna mai ena kamonai bona mai ena kara maoromaoro’ be daika?
Iehova ese dahaka ia karaia, lauma aniani amo ita ia ubua totona?
Keristani kongregesen oreana taudia ese ita edena bamona idia durua diba?
[Full-page picture on page 165]