Babalau Bona Meamea be Dika

Satani ia ura babalau karadia oi karaia. Momo ese edia sene taudia eiava lauma dekenai boubou idia karaia, hekwakwanai amo sibona idia naria totona. Unai bamona idia karaia, badina lauma taudia edia siahu idia gari henia. Idia ese mai edia babalau siahuna ringi bona ima gaudia idia karaia. Idia ese “muramura” idia inua o edia tauanina dekenai idia dahua, badina idia laloa unai gaudia be mai edia babalau siahuna. Taunimanima haida ese edia ruma eiava tano dekenai gau haida idia hunia bona idia laloa unai gaudia be mai edia siahu idia naridia totona. Ma haida ese babalau “muramura” idia gaukaralaia, badina idia laloa edia bisinesi, sikuli ena eksam, eiava hetura karana dekenai do idia kwalimu.

Satani amo oi ia naria gauna hereadaena be oiemu hetura karana Iehova ida. Iehova Dirava bona ena aneru edia siahu ese Satani bona ena demoni edia siahu ia hereaia. (Iamesi 2:​19; Apokalupo 12:9) Iehova ia ura ena siahu be ena turadia​​—ia idia badinaia momokani taudia​​—totona ia gaukaralaia.​​—2 Sivarai 16:9.

Dirava ena Hereva ia gwau: “Meamea karadia idauidau ibounai do umui karaia lasi.” Iehova ese babalau bona meamea karadia ia gwauraia dika, badina unai kara dainai ta be Satani ena siahu henunai ia noho diba.​​—Levitiko 19:26.