Meamea Dekenai Inai Oi Diba be Namo

HARI inai negai meamea ena anina ita gwauraia be auka. Unai ena badina be unai kara idia karaia taudia be idauidau. Biagua tauna o hahediba herevana o buka helagana ta idia badinaia lasi idia abia dae gaudia idia hatamonaia totona. Idia badinaia daladia, orea haheaua daladia, edia kastom, bona edia lalohadai edena dirava do idia matauraidia dekenai be idauidau. Toretore tauna ta ia gwau: “Meamea amo ia honu tanobadana ese taunimanima dekenai lalohadai idauidau ia ‘hoihoilaia.’ ” Ma ta ia gwau: “Kahirakahira gau ibounai dekenai Neo-Pagan taudia momo idia lalo-tamona lasi.”

Taunimanima momo dekenai, unai be hekwakwanai lasi. Meamea hahinedia ai idia ura lao taudia durua bukana ta ia gwau: “Toana be idia lalo-tamona lasi herevadia oi davaria neganai, unai hereva oi tahua namonamo bona emu lalona oi hadaia edena do oi badinaia. Emu hemami oi kamonai henia. Eiava ita gwau diba, meamea karadia idia hadibaia bukadia amo oiemu hemami hegeregerena ta do oi abia hidi.”

Hereva momokani ena anina idia lalo-pararalaia taudia dekenai, unai bamona lalo-tamona lasi herevadia be hekwakwanai gauna. Hereva momokani be momokani, ia be gau korikorina. Ta ena hemami o ura o abidadama dainai gau ta be momokani gauna ai ia lao lasi. Hegeregere, nega ta doketa taudia idia gwau nimonia idia hanamoa diba bema ia mauri kokoroku ta be kahana rua dekenai idia utua bona gorere tauna ena kemena dekenai idia atoa. Momokani, gorere taudia momo idia abia dae unai kara ese edia gorere do ia hanamoa diba. To, idia abia dae gaudia bona edia helaro be hereva momokani lasi​—⁠unai kara ese nimonia ia hanamoa lasi. Taunimanima ese hereva momokani idia havaraia lasi; idia hekwarahi idia lalo-pararalaia totona.

Baibel ia gwau ia lalonai be lauma gaudia idia herevalaia hereva momokanidia idia noho. Iesu Keriso be tanobada ai ia noho neganai ena Tamana ia guriguri henia, ia gwau: “Oiemu hereva be hereva momokani.” (Ioane 17:17) Aposetolo Paulo ia gwau: “Buka Helaga ena hereva ibounai be Dirava ena Lauma ese ia havaraia.” (2 Timoteo 3:16) Meamea karadia idia karaia taudia momo ese unai idia abia dae lasi. To, idia be gori, idaunegai tomadiho idauidau, bona haida idia laloa kava saiens herevadia amo lalo-parara bona heduru idia tahua. To, badina ia noho ita ese Baibel ena hereva ita itaia totona, a? Kahirakahira taunimanima ibounai ese idia abia dae ia be buka helagana ta. Danu, ia be idia do noho tomadiho toretore gunadia ta. Baibel be lagani 1,600 bamona lalonai idia torea, to ena hahediba herevadia ibounai idia durua heheni. Baibel ena hahediba herevadia be taunimanima momo ese idia abia dae gaudia, hari inai negai meamea idia goadalaia taudia ese idia gwauraia gaudia ida, mani ita hahegeregerea.

Daidia be Lauma Gabuna Dekenai Idia Noho?

Henanadai badana ta lauma gaudia ita lalo-pararalaia totona be inai, Daidia be lauma gabuna ai idia noho? Hari inai negai meamea hahinedia momo be tanobada ena gaudia idia tomadiho henia bona edia dirava be momo, to haida be dirava hahinena badana idia tomadiho henia, ena kahana be toi, rami-hebou kekeni, sinana, bona hahine buruka, idia ese mauri negana ena kahana badadia idia laulaulaia. Ia be dirava mai ena doana ia lalokau henia. Meamea hahinedia ma haida be dirava tauna bona dirava hahinena idia tomadiho henia hebou. Toretore tauna ta ia gwau: “Idia laloa unai Dirava Hahine bona Dirava Tau be tanobada ena gaudia lalonai idia hedinarai hahine bamona siahuna bona tatau bamona siahuna. Idia ta ta be [mai edia] kara idauidau bena idia haboua neganai gau ibounai idia lalo-tamona.” Toretore hahine ta ia gwau: “Oi abia hidi gauna badana ta Meamea lalonai be oi danu do idia gaukara hebou diravadia (Dirava tatau/Dirava hahinedia) abia hidi karana. . . . Meamea lalonai oi be sibona emu ura hegeregerena sibona emu dirava idauidau oi abia hidi bona matauraia diba.”

Baibel ese unai lalohadai ta ia durua lasi. Iesu Keriso ese ena hesiai gaukara ibounai lalonai ma haida dekenai Iehova, “Dirava momokani tamona,” ia harorolaia. (Ioane 17:⁠3) Baibel ia gwau: “Lohiabada be mai ena ladana badana, inai ladana badana do ita abia isi noho be namo. Ita ese taunimanima edia dirava idauidau, be do ita gari henia lasi. Lohiabada sibona do ita gari henia, bona matauraia. Badina be tanobada bese idauidau edia dirava, be dirava koikoi gaudia sibona.”​—⁠1 Sivarai 16:​25, 26.

Diabolo be edena bamona? Webster’s Ninth New Collegiate Dictionary ese meamea ia gwauraia “diabolo ida herevahereva karana.” Hari inai negai unai hereva ia abia dae meamea hahinena ta ita davaria be auka, badina idia momo idia abia dae lasi Satani Diabolo ia noho. Hahine matamata ta, The Irish Times lalonai idia gwau ia be “siahu bada meamea hahinena bona Ireland taudia edia meamea orea badana ta ia gunalaia hahinena,” be inai bamona ia hereva: “Diabolo abia dae karana ese Keristani tomadiho abia dae karana ia hahedinaraia . . . [Diabolo] be Dirava ia noho lasi gabuna dekenai ia noho diba lasi.”

Baibel ese ia hamomokania Diabolo ia noho bona ia gwau ia ese tanobada ai hisihisi bona metau ia havaraia. (Apokalupo 12:12) Iesu ese Satani ia noho ia hahedinaraia sibona lasi, to danu, ia hahedinaraia ta ese Diabolo ena ura ia karaia diba ena be unai ia diba lasi. Hegeregere, aposetolo edia negai idia noho sibona edia maoromaoro idia laloa bada tomadiho gunalaia taudia idia gwau idia be, dala ta ai, Dirava ena natudia bona Dirava ena ura idia karaia noho. Iesu, edia kudouna ia diba tauna, ena lalohadai be idau. Maoromaoro ia hamaorodia: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.” (Ioane 8:44) Danu, Baibel bukana Apokalupo ia gwau Diabolo ese “tanobada taudia ibounai ia koia noho.”​—⁠Apokalupo 12:⁠9.

Meamea Karadia Haida Idia Namo, A?

Momokani, meamea be hanaihanai hunia karana ida idia hakapua. Taunimanima momo idaunegai bona hari inai negai danu be idia abia dae meamea hahinedia edia kara be ma haida idia hadikaia totona idia karaia. Taunimanima idia laloa meamea hahinedia dekenai siahu ia noho meamea karadia amo hisihisi bona mase danu idia havaraia totona. Vaia, idia vara noho dika idauidau, anina be gorere, mase, bona aniani idia tubu lasi be meamea hahinedia edia kerere idia gwauraia.

Hari inai negai meamea hahinedia be mai edia goada ida unai hereva idia dadaraia. Ena be idia abia dae dika idia karaia meamea hahinedia haida idia noho danu, to idia momo idia gwau edia meamea karana idia gaukaralaia dika lasi to namo idia havaraia totona. Wicca taudia idia gwau meamea amo idia havaraia gaudia be idia havaraia taudia dekenai idia vara danu to edia siahu be nega toi ia habadaia bona idia gwau unai be hadikaia gaudia havaraia karana ia koua karana badana ta. Idia gwauraia meamea karadia namodia haida be dika amo sibona gimaia, ruma be guna idia noholaia taudia ese idia rakatania hadikaia siahudia amo hagoevaia, ta ese oi do ia lalokau henia, gorere lasi bona gorere hanamoa, gaukara haboioa lasi, bona moni abia totona idia karaia. Idia gwau meamea hahinedia ese unai bamona siahu bada karadia momo idia karaia diba dainai, taunimanima momo ese idia ura henidia be ita hoalaia lasi.

To, Baibel ia gwau lasi meamea karadia haida be namo bona haida be dika. Mose ia henia Taravatuna lalonai, Dirava ese ena lalohadai ia hahedinaraia goevagoeva. Ia gwau: “Meamea karadia idauidau ibounai do umui karaia lasi.” (Levitiko 19:26) Ita duahia danu: “Meamea kara do umui karaia lasi, puripuri bona vada danu do umui karaia lasi. Puripuri gaudia danu do umui gaukaralaia lasi.”​—⁠Deuteronomi 18:​10, 11.

Dahaka dainai Dirava ese unai ia gwauraia? Gau namodia be ita amo ia koua totona lasi. Iehova ese ena taunimanima dekenai unai taravatu ia henia badina ia lalokau henidia bona ia ura lasi gari kava ese idia ia guia. To, ena hesiai taudia ia boiria idia dabu gaudia totona ia do idia noia. Ia be “gau namodia ibounai, bona harihari gaudia namodia momokani ibounai” ia Henia Tauna. (Iamesi 1:17) Aposetolo Ioane ese abidadama tamona taudia ia hagoadaia: “Ita noia gaudia ibounai be [Dirava] ese ita dekenai do ia henia. Badina be iena taravatu ita badinaia noho, bona ia do ita hamoalea karadia ita karaia noho dainai.”​—⁠1 Ioane 3:⁠22.

Lauma Dikadia be Edena Bamona?

Meamea hahinedia momo be Baibel danu idia lalo-tamona inai hereva dekenai: Lauma dikadia idia noho. Hereva ta lalonai meamea ia goadalaia tauna ta ia gwau: “Lauma idia noho: Idia noho, ita itaia diba lasi gabuna ai iseda tanobadana kahirakahira dekenai, idia be mauri gaudia. . . . Inai hereva ‘Demoni Maragidia,’‘Lauma Dikadia,’ bona ‘Demoni’ be maoro. Idia goada momokani. . . . Idia huanai aonega momokani laumadia . . . idia hegeregere (bema ta ia durua bona idia totona iduara ia kehoa) iseda tanobada ai idia vareai totona. . . . Oiemu tauanina dekenai idia vareai diba . . . , bona mai siahu ida oi do idia biagua. Oibe, unai be Demoni edia biagua karana ena sivarai gunadia ida ia hegeregere momokani.”

Baibel negadia ai, demoni be dala idauidau ai taunimanima idia biagua. Idia biagua taudia haida be idia hereva diba lasi, haida be matakepulu, haida be kavakava karadia idia karaia, bona haida be taunimanima edia goada ia hereaia goadana idia abia. (Mataio 9:32; 12:22; 17:​15, 18; Mareko 5:​2-5; Luka 8:29; 9:42; 11:14; Kara 19:16) Nega haida hisihisi idia habadaia bema demoni momo be nega tamona tau ta idia biagua. (Luka 8:​2, 30) Momokani, badina namona dainai Iehova ese ena taunimanima ia sisiba henidia meamea bona hehuni karadia ma haida amo do idia gini siri totona.

Hereva Momokani Dekenai Idia Haginia Tomadihona

Hari inai negai taunimanima momo ese meamea idia ura henia badina ena toana be dika ia havaraia lasi bona ia namo, bona ia lalonai tanobada ena gaudia tomadiho henia tomadihona. Gabu haida ai idia abia dae vadaeni. Idia gari henia lasi. To, nega momo ia be anina maragi gauna ai idia halaoa. Tomadiho idauidau haheaukalaia karana dainai momo ese gau idauna idia ura henia gabudia ai, meamea karana idia matauraia bada.

Momokani, tomadiho idauidau be maketi ta ai idia noho kohu bamona idia lao bona taunimanima be edia ura hegeregerena ta idia abia hidi diba, ta ese tamaka ia hoia bamona. To, Iesu ese abia hidi gaudia rua sibona ia herevalaia. Ia gwau: “Iduara maragina dekenai do umui raka vareai. Badina be [mase] gabuna ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.” (Mataio 7:​13, 14) Oibe, ita raka dalana be ita sibona ita abia hidi diba. To namo ita davaria hanaihanai totona, unai abia hidi karana be mai anina bada. Lauma diarina ita abia totona, namona be hereva momokani ena dala ita badinaia​—⁠Dirava ena Hereva, Baibel, lalonai sibona ita davaria dalana unai.

[Picture on page 5]

Hari inai negai momo idia laloa meamea be tanobada ena gaudia tomadiho henia bona ita ia hadikaia lasi tomadihona

[Picture on page 6]

Meamea be hanaihanai hehuni karadia danu idia hakapua

[Picture on page 6]

Meamea taudia ese Diabolo ena ura idia karaia noho ena be unai idia diba lasi, a?

[Pictures on page 7]

Baibel ese hereva momokani ena dala ia hahedinaraia