Meamea Dekenai Dahaka Oi Diba?

MEAMEA! Unai hereva dainai dahaka oi laloa?

Taunimanima momo dekenai, ia be gari kava gauna bona gadara gauna, idia laloa bada lasi. Idia dekenai, meamea karana be taunimanima ese idia lalohadailaia gauna sibona​—⁠buruka meamea hahinedia be dabua mai ena kwarana koua gauna idia karaia ese mariboi edia apena be ia siahu sosipani dekenai idia atoa, taunimanima be paroparo ai idia halaoa, bona mai kiri ida daroa audia amo hanuaboi ai guba dekenai idia roho loaloa.

Haida dekenai, meamea be kiri gauna lasi. Tahua taudia haida idia gwau tanobada taudia edia kahana badana ese idia abia dae meamea hahine be taunimanima korikoridia bona ma haida edia mauri idia haidaua diba. Milioni momo idia abia dae meamea be dika, dika ia havaraia diba, bona namona be do idia gari henia bada. Hegeregere, Africa tomadihona ia herevalaia bukana ta ia gwau: “Africa taudia idia abia dae momokani meamea bona babalau karadia idia vara bona taunimanima idia hadikaia diba . . . Meamea bona babalau taudia be idia noho gabuna ai taunimanima ese idia inai henidia bada. Ema bona hari, gabu bona nega idauidau ai taunimanima oredia ese idia dadabaia ela bona idia mase.”

To, West tanodia ai, meamea be koikoi dalanai toana matamatana namona ia hahedinaraia. Buka, televisen, bona muvini piksa ese meamea gari henia karana idia hamaragia momokani. Moale karadia stadilaia tauna David Davis ia gwau: “Karaharaga, meamea hahinedia idia matamata bona idia hairai, idia hairai momokani. Hollywood be dala matamatadia ia badinaia haraga. . . . Idia hahedinaraia meamea hahinedia idia hairai bona idia ura henidia diba dainai, taunimanima momo edia lalona idia veria diba, hahine bona natuna maragidia danu.” Hollywood taudia idia diba edena dala ai kara ta idia haidaua moni momo idia abia totona.

Haida idia gwau meamea be United States ai ia tubu haraga noho tomadiho dalana ta ai ia lao. Taga tanodia ibounai lalonai, hahine edia maoro idia tahua oreadia ese idia hagoadadia dainai bona tomadiho badadia idia dadaraia dainai taunimanima momo herea ese meamea karadia idauidau amo lauma dalanai moale idia tahua. Momokani, meamea karadia idauidau be momo dainai taunimanima ese inai hereva “meamea hahine” ena anina idia hepapahuahulaia danu. To, sibodia idia gwauraia meamea hahine be nega momo idia gwau idia be Wicca oreana taudia​—⁠diksenari ta ia gwau ia be “Tanobada ena gaudia ia tomadiho henia oreana, Keristani tomadihona idia do diba lasi neganai Europe ena west kahanai ia matamaia bona hari inai negai idia badinaia lou.”a Danu, idia momo be sibodia idia gwauraia pagan o neopagan taudia.

Gunaguna amo ema bona hari, meamea hahinedia idia inai henia, dagedage henia, hahisia, bona hamasea danu. Unai dainai ita hoa lasi hari inai negai meamea karadia idia karaia taudia idia ura dikadika taunimanima edia lalohadai idia dekenai idia haidaua. Tahua karana ta lalonai, meamea taudia momo idia nanadaia edena hereva idia ura idia gwauraia taunimanima dekenai. Edia haere, tahua gaukara ia karaia hahinena Margot Adler ese edia hereva badadia ia gwauraia inai bamona: “Ai be dika lasi. Diabolo ai tomadiho henia lasi. Taunimanima ai hadikaia eiava koia lasi. Ai be dika ai havaraia lasi. Ai be taunimanima sibona umui hegeregerena. Ai be mai emai ruma bese, moni gaukara, helaro, bona ura gaudia. Ai be hadikaia oreana ta lasi. Ai be idau lasi. . . . Namo lasi ai dekenai umui gari. . . . Ai be dala momo ai umui danu ai hegeregere, umui laloa bamona lasi.”

Taunimanima momo ese unai hereva idia abia dae. To unai ena anina be badina ta ia noho lasi meamea karana ita lalo-hekwarahilaia totona, a? Mani hereva gabena lalonai unai henanadai ita laloa.

[Footnote]