Revareva ta Hakaua Oreana Amo

Iehova Lalokau Henia Tauna E:

Iesu ia gwau: “Hereva momokani be do umui diba, bona hereva momokani ese umui do ia ruhaia.” (Ioane 8:32) Unai be hagoadaia herevana! Oibe, ena be “nega ena dokona” ai koikoi karadia be bada herea, to hereva momokani ita dibaia diba. (2 Timoteo 3:1) Baibel lalonai ia noho hereva momokani oi dibaia negana ginigunana oi laloatao, a? Unai be moale bada negana, ani!

To, ena be hereva momokani ita dibaia bona ma haida dekenai ita harorolaia be mai anina bada, iseda mauri lalonai hereva momokani do ita badinaia danu be gau badana. Unai ita karaia totona, Dirava ena lalokau lalonai ita noho be namo. Unai ena anina be dahaka? Iesu ia do mase lasi neganai, ia gwauraia herevana ese unai henanadai ia haerelaia. Iena aposetolo taudia ia hamaoroa: “Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho.”​—Ioane 15:10.

Unai siri ese ia hahedinaraia Iesu be iena Tamana ena taravatu ia badinaia dainai, Dirava ena lalokau lalonai ia noho. Ita danu be unai bamona do ita karaia. Dirava ena lalokau lalonai ita noho totona, dina ta ta lalonai hereva momokani do ita badinaia be namo. Unai hanuaboi ai, Iesu ia gwau: “Inai bema umui diba, bona bema umui karaia, be do umui namo.”​—Ioane 13:17.

Ai ura inai buka ese oi do ia durua hereva momokani be emu mauri lalonai oi badinaia totona, unai amo ‘Dirava ena lalokau lalonai do oi noho. Bona mauri hanaihanai oi dekenai do ia henia.’​—Iuda 21.