“Dirava Ena Lalokau Lalonai Do Umui Noho”
1. “Dirava Ena Lalokau Lalonai Do Umui Noho” bukana idia halasia ena badina be dahaka?
1 Ita ura bada inai buka matamatana, “Dirava Ena Lalokau Lalonai Do Umui Noho” be March 15 purana ai iseda Kongrigeisen Baibel Stadi dekenai do ita stadilaia matamaia! Unai buka ai Hakaua Oreana ese Iehova idia lalokau henia taudia ibounai totona idia torea herevana ena dokona kahana ia gwau: “Ai ura inai buka ese oi do ia durua hereva momokani be emu mauri lalonai oi badinaia totona, unai amo ‘Dirava ena lalokau lalonai do oi noho. Bona mauri hanaihanai oi dekenai do ia henia.’—Iuda 21.”
2. Iseda mauri lalonai edena dala ai inai buka matamatana ese ita do ia durua?
2 Dahaka Do Ita Herevalaia: Hebamo, moale karadia, siahu taudia matauraia, ta ena kara bona hereva, headava bona kastom karadia dekenai Baibel ena hakaua herevadia be dahaka? Inai buka ese iseda lalomamina do ia hadibaia Baibel ena kara maoromaoro taravatudia ita badinaia totona. (Sal. 19:7, 8) Iehova ena lalohadai ita abia neganai, do ita ura bada iseda mauri ibounai lalonai Ia ita badinaia bona hamoalea.—Aon. 27:11; 1 Ioa. 5:3.
3. Dahaka dainai wiki ta ta ena stadi lalonai ita haere be namo?
3 Emu Lalona Oi Hadaia Oi Haere Totona: Oi hegaegae neganai, namona be emu tahua gauna be Dirava ena taunimanima huanai ia do oi hanamoa. (Heb. 13:15) Kongrigeisen taudia ibounai ese inai stadi buka matamatana do idia stadilaia hebou. Wiki ta ta ai unai buka ena paragraf haida sibona do ita stadilaia dainai, ita hegaegae namonamo bona ita dibaia gaudia be mai lalogoada ida ita herevalaia. Ita hegaegae namonamo bona haere namodia ita henia neganai, ma haida ita durua lalokau bona kara namodia idia hahedinaraia totona bona stadi do ita moalelaia. (Heb. 10:24) Danu, eda haere karana amo eda abidadama ita herevalaia neganai, do ita moale.
4. Dahaka dainai Iehova ena taravatu ita badinadia be gau badana?
4 Iesu ena hanuaboi ginigabena ai, ia ese Iehova ena taravatu badinaia karana be Dirava ena lalokau lalonai do ita noho karana ida ia hahegeregerea. (Ioa. 15:10) “Dirava Ena Lalokau” bukana ese ita do ia durua eda mauri dinadia ta ta ai Baibel ena hakaua herevadia ita badinaia bona ‘Dirava ena lalokau lalonai ita noho’ totona.—Iuda 21.