Ia be “Ena Kudouna ai [Hereva] Edia Anina Ia Laloa Dobu”

1, 2. Maria ena laolao bona iena hekwarahi oi herevalaia.

MARIA be mai ena metau dainai ia hekwarahi doniki latanai ia helai totona. Edia laolao be hora momo ia abia. Iosepa be vaira ai ia raka bona Betelehema dekenai idia lao noho. Maria ia mamia ena bogana ai beibi ia marere.

² Maria ia rogorogo hua momo vadaeni; Baibel ia gwau unai nega ai ia be kahirakahira do ia mara. (Luka 2:5) Idia ese uma ta ta idia raka hanaia neganai, reana biru taudia haida be idia geigei bona hadohado gaukara idia karaia lalonai, idia ruaosi idia itaia bona idia daradara dahaka dainai hahine be unai bamona negana lalonai laolao idia karaia. Dahaka dainai Maria be ena noho gabuna Nasareta amo gabu daudau dekenai do ia lao?

3. Maria be dahaka asainmen ia abia, bona ia amo dahaka ita ura dibaia?

³ Hua ginigunadia ai unai Iuda hahine matamata be asainmen badana ta ia abia. Unai be mai anina bada taunimanima ibounai dekenai. Maria ese Mesia ai do ia lao natuna do ia havaraia, ia be Dirava ena Natuna! (Luka 1:35) Ena mara negana ia kahirakahira neganai, unai laolao idia karaia. Idia lao noho lalonai, Maria dekenai abidadama tohoa gaudia momo idia vara. Iena abidadama ia goada totona ia karaia gaudia haida mani ita itaia.

Betelehema Dekenai Idia Lao

4, 5. (a) Dahaka dainai Iosepa bona Maria be Betelehema dekenai idia lao? (b) Kaisara ena oda ese dahaka peroveta hereva ia hagugurua?

⁴ Iosepa bona Maria sibona ese unai laolao idia karaia lasi. Kaisara Augusto ese oda hereva ta ia halasia unai tano ai idia noho taudia ibounai ese edia ladana do idia rejistaia, unai dainai taunimanima be edia taoni korikorina dekenai idia giroa. Iosepa be dahaka ia karaia? Baibel ia gwau: “Iosepa be Davida ena bese tauna ta dainai, Galilea ena siti Nasareta ia rakatania bona Davida ena siti, ena ladana ma ta be Betelehema dekenai ia daekau lao, unai be Iudea provinsi dekenai.”​—Luka 2:1-4.

⁵ Kaisara ena oda herevana be mai ena anina. Lagani 700 gunanai idia peroveta Mesia be Betelehema ai do ia vara. Unai nega ai taoni ta ia noho ladana be Betelehema, Nasareta amo ena daudau be kilomita 11 sibona. To, peroveta hereva ese gabu ena ladana ia gwauraia “Betelehema Eparata,” unuseni ai Mesia do ia vara. (Mika 5:2 duahia.) Nasareta amo unai hanua maragina dekenai lao ena daudau be kilomita 130, laolao taudia be Samaria bona ororo gabudia do idia hanaia danu. Iosepa be Betelehema Eparata dekenai ia giroa lou be namo, badina King Davida ena bese be unai gabu amo bona Iosepa bona iena maoheni hahine danu be unai bese amo.

6, 7. (a) Dahaka dainai Maria dekenai Betelehema lao be mai ena hekwarahi? (b) Maria be Iosepa ena adavana dainai, hari edena dala ai ena abia hidi do ia karaia? (Futnout itaia danu.)

⁶ Maria be Iosepa ena abia hidi do ia badinaia, a? Maria dekenai unai laolao be mai ena hekwarahi. Unai be reana October hua ena matamana dainai, reana unai nega ai medu sisina ia diho bona siahu negana ia ore. Danu inai hereva “Galilea amo ia daekau lao” be maoro, badina Betelehema be mita 760 bamona ororo ataiai. Dina haida lalonai unai ororo daekau totona be mai ena hekwarahi. Toana be nega bada do idia halusia badina Maria be ia rogorogo bona do ia laga-ani loulou. Unai bamona nega ai, hahine matamata be do ia ura iena ruma ai ia noho, unuseni ai ena famili bona turadia idia noho hegaegae mara ena hisihisi ia mamia neganai do idia durua diba. Oibe, lalogoada ia abia be namo unai laolao ia karaia totona.

⁷ Luka ia gwau: “[Iosepa] bona Maria idia lao edia ladana idia rejista totona.” Danu ia gwau, “Iosepa be Maria ia adavaia vadaeni.” (Luka 2:4, 5) Maria be Iosepa ena adavana dainai, Iosepa ia durua totona abia hidi do ia karaia. Maria dekenai Iosepa be ruma bese ena kwarana, bona Maria be iena durua tauna dainai Dirava ese ia henia maduna hegeregerena ena adavana do ia durua.a Maria be mai ura ida ena adavana ia kamonai henia, bona unai dala amo abidadama karana ia hahedinaraia.

8. (a) Dahaka badina ma ta dainai Maria be Iosepa ida Betelehema dekenai ia lao? (b) Edena dala ai Maria ena haheitalai ese abidadama taudia ia hagoadaia?

⁸ Danu, dahaka ese Maria ia hagoadaia dainai kamonai karana ia hahedinaraia? Maria be Betelehema ai Mesia do ia vara ena peroveta hereva ia diba, a? Baibel ese unai ia gwauraia lasi. To reana Maria ia diba badina tomadiho gunalaia taudia bona taunimanima momo be unai peroveta hereva idia diba. (Mat. 2:1-7; Ioa. 7:40-42) Maria be Toretore Helagadia ia diba namonamo. (Luka 1:46-55) Danu, Maria be ena adavana ena hereva, gavamani ena oda, eiava Iehova ena peroveta herevana, o unai badina ta dainai ia lao—ia ese haheitalai namona ia hahedinaraia. Iehova ese tatau bona hahine edia manau bona badinaia karana ia laloa bada. Hari iseda negai, taunimanima momo be badinaia karana idia hahedinaraia lasi, Maria ena haheitalai ese ita abidadama taudia ibounai ia hagoadaia.

Keriso Ena Vara

9, 10. (a) Maria bona Iosepa be Betelehema kahirakahira idia lao neganai dahaka idia laloa? (b) Iosepa bona Maria be edeseni idia noho bona dahaka dainai?

⁹ Maria be daudau amo Betelehema ia itaia neganai ia moale. Maria bona Iosepa be ororo gabudia idia daekau, olive audia mai edia huahua huanai idia raka hanaia neganai, unai hanua ena sivarai idia laloa lou. Iuda ena siti ibounai amo, ia be taoni maragina sibona, peroveta tauna Mika ia peroveta hegeregerena; to, lagani momo gunanai unai be Boasi, Naomi, bona Davida edia vara gabuna.

¹⁰ Maria bona Iosepa idia itaia unai hanua ai taunimanima be momo. Haida be edia ladana idia rejistaia totona idia ginidae guna bona noho gabudia ibounai idia honu.b Unai dainai unai hanuaboi ai hosi edia ruma dekenai idia noho. Iosepa ena lalohekwarahi mani ita laloa, ia itaia ena adavana be hisihisi ia mamia bona unai hisihisi ia bada noho. Bona hosi idia noho rumana be gabu namona lasi ia mara totona.

11. (a) Dahaka dainai hahine taudia be Maria dekenai ia vara gauna idia lalopararalaia diba? (b) Edena dala ma haida ai Iesu be “vara guna natuna”?

¹¹ Hahine taudia be Maria dekenai ia vara gauna idia lalopararalaia diba. Lagani 4,000 bamona gunanai, Iehova ia peroveta hahine taudia be vaia mara ena hisihisi do idia mamia badina idia be mai edia kara dika. (Gen. 3:16) Maria danu be unai hisihisi ia mamia. Luka be Maria ia mamia hisihisi ia herevalaia lasi, to ia gwau sibona: “Iena vara guna natuna mero ia havaraia.” (Luka 2:7) Oibe, unai be iena “vara guna natuna.” Maria ena natudia 7 amo, ia be natuna ginigunana. (Mar. 6:3) To, ia sibona be idau. Badina ia be Maria ena vara guna natuna sibona lasi, to Iehova ese ia “havaraia gaudia ibounai amo ia be ginigunana,” Dirava ena natuna tamona sibona.​—Kol. 1:15.

12. Maria be edeseniai beibi ia atoa, bona edena dala ai taunimanima ese idia karaia drama, idia penia laulau, bona muvi be Baibel ena sivarai hegeregerena lasi?

¹² Baibel ia gwau: “Dabua amo ia kumia, bona animal edia aniani mauana ai ia atoa.” (Luka 2:7) To taunimanima ese idia karaia drama, idia penia laulau, bona muvi ai idia hahedinaraia gaudia be Baibel ena sivarai hegeregerena lasi. To, sivarai momokanina be inai: Maria ese animal edia aniani mauana ai ena beibi ia atoa. Laloatao, unai famili be animal edia ruma ai idia noho, unai nega ai eiava hari danu unai bamona gabu ai hodahoda namona ia noho lasi bona gabu namona lasi. Momokani, tama sina ese unai bamona gabu do idia abia hidi lasi bema gabu namodia haida idia noho, ani? Tama sina momo be edia natudia edia namo idia laloa bada. Maria bona Iosepa danu idia ura bada gabu namona ta do idia tahua Dirava ena Natuna totona!

13. (a) Edena dala ai Maria bona Iosepa be idia dekenai idia noho gaudia idia gaukaralaia namonamo? (b) Edena dala ai hari aonega tama sina ese Maria bona Iosepa idia tohotohoa diba?

¹³ Iosepa bona Maria be idia dekenai ia noho lasi gaudia dainai idia lalohisihisi lasi, to idia dekenai idia noho gaudia idia gaukaralaia namonamo. Hegeregere, Maria ese gau ibounai ia karaia beibi ia naria totona, beibi be dabua amo ia kumia namonamo, bena animal edia aniani mauana ai ia atoa ia mahuta totona. Danu Maria be ena noho gabuna dainai ia lalohekwarahi momo lasi, bona ia ura gau ibounai ia karaia ena natuna ia naria totona. Danu ia bona Iosepa idia diba, gau badana be edia natuna do idia hadibaia Iehova ia lalokau henia totona. (Deuteronomi 6:6-8 duahia.) Hari inai negai, momo ese Dirava hesiai henia karana idia laloa bada lasi. To aonega tama sina ese edia natudia idia durua Iehova idia lalokau henia totona, Maria bona Iosepa idia karaia hegeregerena.

Mamoe Naria Taudia ese Idia Hagoadaia

14, 15. (a) Dahaka dainai mamoe naria taudia idia ura bada unai natuna idia itaia? (b) Mamoe naria taudia be animal idia noho rumana ai idia itaia gaudia dainai dahaka idia karaia?

¹⁴ Mamoe naria taudia be animal edia ruma lalonai idia vareai haraga, idia ura tama sina bona beibi idia itaia. Unai tatau idia moale bada. Idia be ororo badinai mamoe idia naria noho gabuna amo idia mai haraga.c Idia ese Maria bona Iosepa dekenai idia itaia gaudia idia herevalaia. Hanuaboi ai, ororo badinai aneru ta be idia dekenai ia hedinarai. Iehova ena hairai be gabu ibounai ia hadiaria, bona aneru ese idia ia hamaoroa Keriso, eiava Mesia be hari sibona Betelehema ai ia vara. Idia ese natuna ta do idia davaria animal edia aniani maua ai ia noho, dabua amo idia kumia. Bena gau namo hereana ta ia vara, aneru orea badana idia hedinarai bona Dirava idia hanamoa!​—Luka 2:8-14.

¹⁵ Unai dainai unai manau tatau be karaharaga Betelehema hanua dekenai idia lao! Aneru ena hereva hegeregerena ia mahuta noho beibi idia itaia neganai, idia moale bada. Unai sivarai namona be ma haida dekenai idia herevalaia danu. “Aneru ese . . . ia gwauraia herevadia idia gwauraia. Bona mamoe naria taudia edia hereva idia kamonai taudia ibounai idia hoa.” (Luka 2:17, 18) Unai nega ai tomadiho gunalaia taudia ese mamoe naria taudia idia laloa bada lasi. To Iehova ese unai manau, abidadama tatau ia lalodia bada. Edena dala ai unai vadivadi ese Maria ia hagoadaia?

16. Edena dala ai Maria be laloa namonamo hahinena, bona dahaka dainai ena abidadama ia goada noho?

¹⁶ Maria be natuna ia havaraia dainai ia hesiku bada, to edia hereva ibounai ia kamonai namonamo. Bona unai sibona lasi: “Maria be unai hereva ibounai ia laloa noho, bona ena kudouna ai edia anina ia laloa dobu.” (Luka 2:19) Momokani Maria be laloa namonamo hahinena. Ia diba aneru ese ia gwauraia sivaraina be mai anina bada. Iena Dirava Iehova ia ura ena natuna ena ladana bona dahaka dainai unai be mai anina bada do ia diba. Unai dainai ia kamonai sibona lasi. Unai hereva ibounai be ena kudouna ai ia atoa, unai amo hua bona lagani haida idia hanaia lalonai do ia lalodia dobu loulou. Unai dainai Maria be ena mauri ibounai lalonai abidadama goadana ia hahedinaraia.​—Heberu 11:1 duahia.

17. Edena dala ai Baibel ena hereva momokani laloatao karana dekenai Maria ena haheitalai ita tohotohoa diba?

¹⁷ Maria ena haheitalai do oi badinaia, a? Iehova ese iena mai anina bada hereva momokanidia be Baibel ai ia atoa vadaeni. To, bema unai hereva ita laloa namonamo lasi ita do ia durua lasi. Namona be hanaihanai Baibel ita duahia neganai, buka ma haida bamona lasi to Dirava ena Hereva bamona ita laloa. (2 Tim. 3:16) Maria bamona, namona be ita danu ese hereva momokani be iseda kudouna ai ita atoa, unai amo ita laloatao noho. Bema Baibel ai ita duahia gauna ita laloa dobu, bona Iehova ena sisiba badinaia daladia ita lalodia namonamo, iseda abidadama be do ia goada ia lao.

Hereva Ma Haida Laloatao

18. (a) Iesu ia maragi neganai, edena dala ai Maria bona Iosepa ese Mose ena Taravatu idia badinaia? (b) Iosepa bona Maria ese dubu helaga ai idia henia boubou gaudia ese dahaka ia hahedinaraia?

¹⁸ Beibi be dina 8 sibona neganai, Maria bona Iosepa ese Mose ena Taravatu hegeregerena edia natuna ena kopina idia utua bona aneru ena hereva hegeregerena ena ladana idia hatoa, Iesu. (Luka 1:31) Bena dina 40 murinai, Betelehema amo Iesu idia abia lao Ierusalema dekenai. Unai laolao ena daudau be kilomita 10 bona unuseniai edia boubou gaudia idia henia. Idia henia gaudia be ogogami taudia ese idia henia diba, Taravatu hegeregerena—kerea manu rua eiava pune manu rua. Ena be edia boubou gaudia be mamoe tau bona pune manu lasi, to idia hemarai lasi, bona taravatu idia badinaia. Bona dubu helaga ai idia noho neganai, goada idia abia.​—Luka 2:21-24.

19. (a) Simeona ese dahaka hereva ma haida ia gwauraia, bona unai hereva be Maria ese ia laloatao noho? (b) Ana ese Iesu ia itaia neganai dahaka ia karaia?

¹⁹ Tau ta ladana Simeona ia raka mai bona Maria dekenai hereva ma haida ia gwauraia, unai hereva be Maria ese ia laloatao. Ia abia gwauhamata be, ia do mase lasi lalonai, Mesia do ia itaia bona Iehova ena lauma helaga ese ia hadibaia mero maragina Iesu be idia perovetalaia Hahemauri Tauna. Simeona ese Maria ia hadibaia nega ta lalohisihisi do ia haheaukalaia. Ia gwau, Maria ese do ia mamia hisihisi be hegeregere tuari kaia ta ese ia gwadaia bamona. (Luka 2:25-35) Ena be unai hereva ese do ia vara dika ia herevalaia to lagani 33 murinai, unai ese Maria ia durua unai nega aukana ai ia haheauka totona. Simeona murinai, peroveta hahine ta ladana Ana ese mero maragina Iesu ia itaia bona Ierusalema ena hamauria negana idia naria taudia ibounai dekenai Iesu ia herevalaia matamaia.​—Luka 2:36-38 duahia.

20. Edena dala ai Ierusalema ena dubu helaga ai Iesu idia abia mai karana be abia hidi namona?

²⁰ Iosepa bona Maria ese Iehova ena dubu helaga Ierusalema dekenai Iesu idia abia mai karana be abia hidi namona! Unai amo edia natuna be ena mauri ibounai lalonai Iehova ena dubu helaga dekenai do ia lao hanaihanai. Unuseniai idia noho neganai, idia karaia diba gaudia hegeregerena Iehova idia hesiai henia bona hagoadaia bona hakaua hereva idia abia. Oibe, Maria be unai dina ai mai abidadama goadana ida dubu helaga ia rakatania, bona ena kudouna be mai anina bada hereva momokanidia amo ia honu, unai amo ia laloa dobu diba bona ma haida dekenai ia herevalaia.

21. Edena dala ai do ita diba iseda abidadama ia goada ia lao noho, Maria hegeregerena?

²¹ Hari inai negai, ita itaia tama sina be unai haheitalai namona idia tohotohoa noho. Iehova ena Witnes tama sina ese hanaihanai edia natudia be Keristani heboudia dekenai idia abia lao. Unai bamona tama sina be idia dekenai ia noho gaudia idia henia, edia tadikaka taihu dekenai hagoadaia herevadia idia gwauraia. Unai dainai Keristani hebou idia rakatania neganai, idia goada, idia moale bona idia dibaia gaudia amo haida idia durua diba. Idia ida ita hedavari be moale gauna! Unai bamona ita karaia neganai, do ita itaia iseda abidadama be Maria ena hegeregerena, ia goada ia lao noho.