Ia Gimaia, Ia Ubua, Bona Ia Haheauka

1, 2. (a) Iosepa bona ena famili edia mauri be edena bamona ia idau? (b) Iosepa ese ena adavana dekenai dahaka sivarai dikana ia gwauraia?

IOSEPA be doniki latanai kohu ma haida ia atoa. Mani oi laloa, Iosepa be Betelehema hanua diburana ia itaia bona kohu ia huaia doniki ena doruna ia pataia. Aigupito dekenai do idia lao dalana ia laloa noho! Aigupito ai idia noho taudia, edia gado, bona edia kastom be idau dainai, ena famili maragina be unuseniai do idia noho be namo, eiava lasi?

² Iosepa ese ena lalokau adavana, Maria dekenai unai sivarai dikana ia gwauraia be auka, to ia lalogoada bona ia hadibaia. Ia hamaoroa nihi amo aneru ta ese ia dekenai Dirava ena hereva ia gwauraia: King Heroda ia ura edia natuna mero maragina ia hamasea! Unai dainai hanua idia rakatania haraga be gau badana. (Mataio 2:13, 14 duahia.) Maria ia laloa momo. Dahaka dainai ta ia ura ena natuna maragina ia hamasea? Maria bona Iosepa be unai ena badina idia diba lasi. To, Iehova idia abidadama henia dainai, idia hegaegae.

3. Iosepa bona ena famili be Betelehema idia rakatania ena sivarai gwauraia. (Laulau itaia danu.)

³ Betelehema taudia idia mahuta noho lalonai, Maria, Iosepa bona Iesu be hanuaboi ai hanua idia rakatania. Saut kahana idia lao henia bona ist kahana amo dina ia hedinarai matamaia neganai, Iosepa be dahaka do ia vara ia laloa noho. Ia be kapenta tauna sibona bona edena bamona siahu bada taudia amo ena famili do ia gimaia diba? Iehova Dirava ese ia dekenai asainmen badana ia henia, natuna hereadaena do ia naria bona ubua. To mai haheauka ida unai gaukara do ia hagugurua diba, a? Iosepa ese do ia davaria hekwakwanai ta ta ia hanaia dalana ita laloa neganai, unai ese hari inai negai idia noho tamadia bona ita ibounai danu, ia durua Iosepa ena abidadama ita tohotohoa totona.

Iosepa ese Ena Famili Ia Gimaia

4, 5. (a) Edena bamona Iosepa ena mauri dalana ia idau vaitani? (b) Edena bamona aneru ta ese Iosepa ia hagoadaia asainmen badana do ia huaia totona?

⁴ Hua haida gunanai, Iosepa be ena hanua Nasareta ai ia noho. Bona Heli ena natuna ida ia maoheni murinai, ena mauri ia idau. Iosepa ia diba Maria be abidadama kekeni namona. To gabeai ia kamonai Maria ia rogorogo! Ia ura lasi taunimanima vairanai Maria ia hahemaraia, unai dainai ia ura hunia dalanai Maria ida ia divos.a To, nihi amo aneru ta ese Iosepa ia hamaoroa, Maria be Iehova ena lauma helaga ena siahu amo ia rogorogo. Aneru ma ia gwau, Maria ena bogana ai ia noho merona ese “ena taunimanima be edia kara dika amo do ia hamauria.” Aneru ese Iosepa ia hagoadaia, ia gwau: “Oi laloa momo lasi, Maria emu adavana be emu ruma dekenai oi abia lao.”​—Mat. 1:18-21.

⁵ Iosepa be kara maoromaoro bona kamonai tauna dainai, aneru ena hereva hegeregerena ia kara. Ia ese unai asainmen badana ia abia dae: Ena be unai mero be Iosepa ena natuna lasi, to do ia ubua bona naria namonamo, badina Iehova dekenai unai beibi be mai anina bada. Gabeai, Roma ena taravatu hegeregerena, Iosepa bona iena rogorogo adavana be Betelehema dekenai idia lao edia ladana rejistaia totona. Unuseniai natuna ia vara.

6-8. (a) Dahaka gaudia ese Iosepa bona ena famili maragina edia mauri ia haidaua lou? (b) Dahaka dainai ita gwau diba ia hedinarai “hisiu” be Satani ese ia siaia? (Futnout itaia danu.)

⁶ Iosepa ese Nasareta dekenai ena famili ia abidia giroa lasi. To, Betelehema ai idia noho. Unai be Ierusalema amo kilomita 10 bamona. Idia be ogogami, to Iosepa ia gaukara goada Maria bona Iesu ia gimaia bona ubua totona. Daudau lasi murinai ruma ta ai idia noho. Bena Iesu ena mauri lagani be reana lagani ta mai kahana neganai, edia mauri dalana ia idau lou.

⁷ Babulonia ena Ist kahana amo hisiu stadilaia taudia haida idia vadivadi. Idia ese “hisiu” ta idia badinaia ela bona Iosepa bona Maria edia ruma dekenai idia ginidae, bona Iuda edia king ai do ia lao natuna idia tahua. Unai tatau be hemataurai karana idia hahedinaraia.

⁸ To, unai hisiu stadilaia taudia dainai mero maragina Iesu be dika bada do ia davaria diba. Idia itaia “hisiu” ese Betelehema dekenai idia ia hakaua lao lasi, to Ierusalema dekenai ia hakaudia lao guna.b Unuseniai idia ese king dikana Heroda idia hamaoroa Iuda edia king ai do ia lao natuna idia tahua. King be unai hereva ia kamonai neganai, ia badu dikadika.

9-11. (a) Edena dala ai Dirava ena siahu ese Heroda bona Satani edia siahu ia hereaia? (b) Iosepa bona ena famili be Aigupito dekenai idia lao ena sivarai be edena dala ai Apokrifa ena gori sivaraidia amo ia idau?

⁹ Siahu badana ta ia noho, unai ese Heroda bona Satani edia siahu ia hereaia. Edena dala ai unai ita diba? Unai vadivadi taudia ese Iesu ia noho rumana ai, sinana bona natuna idia itaia, bena idia ese harihari gaudia idia henia, to unai gaudia totona davana idia noia lasi. Iosepa bona Maria be unai davana bada “golo, frenkinsens, bona muro” idia abia dainai idia hoa! Unai hisiu stadilaia taudia idia ura giroa King Heroda dekenai bona Iesu ia noho gabuna idia ura hadibaia. To, Iehova ese idia ia koua. Nihi ta amo, ia ese idia ia hadibaia dala idauna amo edia hanua dekenai do idia giroa lou.​—Mataio 2:1-12 duahia.

¹⁰ Hisiu stadilaia taudia idia lao murinai, Iehova ena aneru ese Iosepa ia hadibaia, ia gwau: “Oi toreisi, natuna maragina bona ena sinana oi abia bona Aigupito dekenai oi heau lao. Bona unuseniai do oi noho ela bona oi lau hamaoroa unai gabu do oi rakatania, badina Heroda ia ura natuna maragina ia tahua ia hamasea totona.” (Mat. 2:13) Unai dainai, matamanai ita herevalaia bamona, Iosepa be maoromaoro unai hereva ia badinaia. Iena natuna ena namo ia laloa guna dainai ena famili be Aigupito dekenai ia abia lao. Unai hisiu stadilaia taudia ese dava bada kohudia idia henia dainai, Iosepa bona ena famili be idia hegeregere Aigupito ai idia noho bona sibona idia naria totona.

¹¹ Apokrifa ena gori sivaraidia ese Aigupito laolaona idia herevalaia neganai, idia gwau mero maragina Iesu be hoa dalanai idia ia durua, hegeregere edia laolao ia hakwadogia, raskol taudia ese dika ta idia havaraia lasi, bona deit huahua ena audia ia hadihoa ena sinana ese edia huahua ia abia totona.c To hereva momokani be inai, idia be laolao daudauna idia karaia bona idia diba lasi gabuna dekenai idia lao.

12. Inai tanobada dikana ai, natudia idia naria tama sina ese Iosepa ena kara amo dahaka idia dibaia?

¹² Tama sina be Iosepa amo gau momo idia dibaia diba. Iosepa be ena famili gimaia totona, ena gaukara ia rakatania bona sibona ena ura ia dadaraia. Ia dekenai ena famili be Iehova amo ia mai harihari gauna ta. Hari inai nega dikana lalonai, tama sina be edia natudia idia naria badina gau momo ese natudia idia hakaua kerere o edia lalona idia veria eiava edia mauri ia hadikaia diba. Ita moale bema tama sina be Iosepa bamona idia kara bona idia gaukara goada natudia be unai dika gaudia amo idia gimaia totona!

Iosepa ese Ena Famili Ia Ubua

13, 14. Edena bamona Iosepa bona Maria be edia famili ida Nasareta dekenai idia ginidae?

¹³ Toana be Iosepa bona ena famili be Aigupito dekenai idia noho daudau lasi, badina aneru ese Iosepa ia hadibaia Heroda ia mase. Bena Iosepa ese ena famili be edia hanua korikori dekenai ia abia lao. Idaunegai peroveta herevana ta ia gwau, Iehova ese ena Natuna be “Aigupito amo [ia] boiria mai.” (Mat. 2:15) Iosepa ia karaia gaudia ese unai peroveta hereva ia hagugurua, to hari ena famili be edeseniai do ia abia lao?

¹⁴ Iosepa ia laloa namonamo. Ia ese Heroda ena gabu ia abia tauna Akelao, dagedage bona ala-ala tauna ia gari henia. Dirava ese Iosepa ia hadibaia ena famili be not kahana dekenai do ia abia lao, unai be ena hanua korikori, Nasareta, Galilea dekenai, unai amo Ierusalema bona dika gaudia amo do idia noho daudau. Unuseniai, ia bona Maria ese edia natudia idia naria.​—Mataio 2:19-23 duahia.

15, 16. Iosepa be dahaka gaukara ia karaia bona edena tulu idauidau ia gaukaralaia?

¹⁵ Idia be kohu bona moni momo lasi taudia bona edia mauri be auka. Baibel ese Iosepa ia gwauraia kapenta tauna, unai hereva ese ia hahedinaraia ia be au amo ia karaia gaukaradia ia diba, hegeregere timba ia utua, ia veria lao bona muramura ia atoa, bona unai ia gaukaralaia ruma, bouti, nese hanai, treila, taea, kohu huaia audia bona uma karaia tulu idauidau ia karaia. (Mat. 13:55) Unai be gaukara aukana. Baibel negadiai, nega momo kapenta taudia be edia ruma o sitoa badinai idia gaukara.

¹⁶ Iosepa ese tulu idauidau ia gaukaralaia, reana haida be iena tamana amo ia abia, reana ia ese sikoea bona plummet, chalk line, ira, iri, adze, hama, mallet, sisolo, drill mai ena peva maragina ia veria lao veria mai, glu idauidau, bona ikoko haida ia gaukaralaia, ena be edia davana be bada.

17, 18. (a) Iesu be ena ubua tamana Iosepa amo dahaka ia dibaia? (b) Dahaka dainai Iosepa be ena kapenta gaukara ia karaia goadagoada?

¹⁷ Mani oi laloa, Iesu be mero maragi bona ena ubua tamana ia itaia ia gaukara noho. Oibe, ia ese Iosepa ia karaia gaudia ibounai ia itaia namonamo, bona Iosepa ena goada bona ena diba ia moalelaia. Reana Iosepa be ena natuna dekenai gaukara maragidia ia hadibaia, hegeregere gwarume kopina idia hakaukaua vadaeni gauna amo, au ia hamanadaia. Ia gaukaralaia audia, hegeregere fig, oak, eiava olive, edia idau be Iesu dekenai ia hadibaia.

¹⁸ Danu, Iesu ia diba unai tau goadana ese au ia utudia bona timba ia karaia sibona lasi, to ia, ena sinana bona ena tadidia ia naria danu. Oibe, edia famili ia bada ia lao bona Iesu murinai Iosepa bona Maria ese natudia ma siks idia havaraia. (Mat. 13:55, 56) Iosepa ia gaukara goada idia ia naria bona ubua totona.

19. Edena dala ai Iosepa ese ena famili dekenai Iehova bona Iena taravatu ia hadibaia?

¹⁹ To Iosepa ia diba iena famili ena hetura karana Iehova ida ia goada be mai anina bada. Unai dainai nega ia atoa iena natudia dekenai Iehova Dirava bona Iena taravatu ia hadibaia totona. Ia bona Maria be hanaihanai edia natudia idia abia lao sinagoga dekenai, unai be Taravatu duahia bona ena anina herevalaia gabuna. Reana Iesu be mai ena henanadai momo bona Iosepa ia hekwarahi haere ia henia totona. Danu, Iosepa ese ena famili be tomadiho ariadia totona Ierusalema dekenai ia abidia lao. Lagani ta ta ibounai idia karaia Pasova aria totona, Iosepa be wiki rua lalonai kilomita 120 bamona ia raka lao Ierusalema dekenai bena ia giroa lou.

20. Keristani ruma bese kwaradia ese edena bamona Iosepa ena kara idia tohotohoa diba?

²⁰ Hari inai negai, Keristani ruma bese kwaradia be Iosepa idia tohotohoa. Idia gaukara goada edia natudia idia durua bona Dirava tomadiho henia karadia idia hadibaia, unai gaukara idia atoa guna to gau ma haida be gabeai. Keristani hebou badadia bona maragidia dekenai edia natudia idia abia lao. Iosepa bamona, idia diba edia natudia durua totona unai idia karaia be mai anina bada.

“Lalohekwarahi Bada”

21. Iosepa ena famili totona Pasova be edena bamona negana? Bona edena nega ai idia diba Iesu be idia ida ia noho lasi?

²¹ Iesu ena mauri lagani be 12 neganai, Iosepa be vaia ia karaia bamona, ena famili be Ierusalema dekenai ia abia lao. Unai be Pasova aria negana, bona famili momo be gabu mai ena flaoaflaoa namodia edia huanai idia raka lao. Ierusalema ena ororo gabuna idia lao kahirakahira neganai, momo be salamo anedia idia abia. (Sal. 120-134) Ierusalema hanua ai, taunimanima tausen momo idia noho. Pasova aria murinai, famili ibounai be edia noho gabuna dekenai idia giroa lou. Reana Iosepa bona Maria be gau momo idia karaia dainai, idia laloa Iesu be ena varavara o ena turadia ida idia raka hebou. To, dina ta murinai, idia laloparara Iesu be idia ida ia noho lasi!​—Luka 2:41-44.

22, 23. Iosepa bona Maria idia itaia edia natuna mero ia noho lasi neganai, dahaka idia karaia? Bona ia idia davaria neganai Maria be dahaka ia gwau?

²² Ierusalema dekenai idia giroa lou, Iesu tahua totona. Dala dekenai idia raka lao bona edia natuna ena ladana idia boiboilaia. Mero be edeseniai? Dina ihatoina ai, Iosepa ia lalohekwarahi, ia laloa Iehova amo ia abia gaukarana ia karaia namonamo lasi. Gabeai dubu helaga dekenai idia lao. Unuseniai ia idia tahua ela bona Taravatu diba momo taudia idia haboua daiutuna ai idia davaria, Iesu be edia huanai ia helai noho! Iosepa bona Maria edia hemami mani oi laloa!​—Luka 2:45, 46.

²³ Iesu be Taravatu diba momo taudia edia hereva ia kamonai bona idia dekenai henanadai ia henia. Unai taudia be iena laloparara bona haere karana dainai idia hoa. Danu, Maria bona Iosepa be ia idia itaia neganai, idia hoa bada. Iosepa be hereva ta ia gwauraia lasi. To, Maria be idia ruaosi totona ia hereva, ia gwau: “Natugu e, dahaka dainai ai dekenai inai bamona oi karaia? Lau bona emu tamana be mai lalohekwarahi bada ida oi ai tahua noho.”​—Luka 2:47, 48.

24. Tama sina edia gaukara be Baibel ese edena bamona ia herevalaia?

²⁴ Baibel ese inai sivarai kwadogina amo tama sina edia gaukara badana ia hahedinaraia. Unai be mai ena hekwarahi, herevana natuna ia goevadae! Hari inai tanobada dikana lalonai, natudia naria gaukarana ese tama sina dekenai unai bamona “lalohekwarahi bada” ia havaraia, to Baibel ese edia hekwarahi ia gwauraia hedinarai dainai, idia lalogoada.

25, 26. Iesu ese ena tama sina be edena bamona ia haere henidia? Bona natuna ena haere dainai Iosepa ena hemami be edena bamona?

²⁵ Iesu be dubu helaga ai ia noho bona ia mamia unuseniai ia be ena guba Tamana, Iehova kahirakahira ia noho, bona ia ura dikadika gau momo ia dibaia. Unai dainai ena tama sina ia haere henidia, ia gwau: “Dahaka dainai lau umui tahua? Umui laloparara lasi lau be egu Tamana ena ruma dekenai lau noho be namo, a?”​—Luka 2:49.

²⁶ Iosepa be nega momo unai hereva ia laloa. Reana gabeai ia moale bada, badina ia gaukara goada iena ubua natuna ia durua Iehova Dirava dekenai unai lalohadai ia abia totona. Iesu ia mero maragina neganai, ena hetura karana Iosepa ida ese ia durua dainai, tama lalokauna ena kara ia dibaia.

27. Bema oi be tamana, oi abia hahenamo ta be dahaka? Bona dahaka dainai Iosepa ena kara oi tohotohoa be namo?

²⁷ Bema oi be tamana, oi diba oi abia hahenamo ta be emu natudia oi durua, tamana lalokauna ena kara idia dibaia totona, a? Unai hegeregerena, bema oi be mai emu ubua natudia, namona be Iosepa ena haheitalai oi laloatao, bona idia ta ta oi kara namo henia. Namona be idia oi durua edia guba Tamana, Iehova Dirava kahirakahira idia lao totona.​—Efeso 6:4 duahia.

Iosepa be Mai Abidadama Ida Ia Haheauka

28, 29. (a) Luka 2:51, 52 ena hereva be edena bamona Iosepa ena kara ia hahedinaraia? (b) Iosepa ese edena dala ai ena natuna ia durua ena aonega ia bada ia lao totona?

²⁸ Baibel ese Iosepa ena sivarai haida sibona ia herevalaia, to unai ita laloa dobu be namo. Baibel ia gwau, Iesu be ena tama sina “ia kamonai henia noho.” Danu, “Iesu ia tubu daekau noho lalonai, ena aonega ia bada ia lao bona Dirava bona taunimanima ese ia idia ura henia bada.” (Luka 2:51, 52 duahia.) Unai hereva amo Iosepa dekenai dahaka ita dibaia? Ita diba Iosepa be ena famili ia hakaua noho, badina iena goevadae natuna ese ena kwara dagina ia matauraia bona badinaia.

²⁹ Danu, ita diba Iesu ena aonega ia bada ia lao. Momokani, Iosepa ia gaukara goada ena natuna ia hadibaia totona. Unai negadia ai, Iuda taudia ese inai aonega herevana idia laloa bada; idia laga-ani momo taudia sibona be idia aonega, to gaukara diba momo taudia, hegeregere kapenta taudia, biru taudia, bona auri gaukara idia karaia taudia be “hahemaoro goeva karana idia herevalaia diba lasi; bona parabole gwauraia gabuna ai idia davaria diba lasi.” Gabeai, Iesu ia hahedinaraia unai aonega hereva be anina lasi. Ia be mero maragi neganai, nega momo ena ubua tamana, kapenta tauna unai, ese Iehova ena “hahemaoro goeva karana” ia hadibaia namonamo!

30. Hari inai negai, edena dala ai Iosepa be haheitalai namona ruma bese kwaradia dekenai?

³⁰ Ita diba momokani Iosepa be Iesu ia naria namonamo. Unai dainai Iesu ia bada ia lao neganai, ena tauanina ia goada. Ma danu, Iosepa ese ena natuna ia hadibaia namonamo dainai, gaukara idauidau ia karaia diba. Iesu be kapenta tauna ena natuna sibona idia gwauraia lasi, to “ia be kapenta tauna” danu. (Mar. 6:3) Unai dainai Iosepa ena hadibaia karana ese anina namona ia havaraia. Ruma bese kwaradia be Iosepa idia tohotohoa be namo, bona edia natudia idia durua, unai amo gabeai sibona idia naria diba.

31. (a) Dahaka gaudia ese Iosepa ena mase negana ia hamomokania? (Maua itaia danu.) (b) Iosepa be dahaka haheitalai namona ia hahedinaraia ita tohotohoa totona?

³¹ Baibel ai ita duahia sivarai amo ita itaia, Iesu be bapatiso ia abia neganai ena mauri lagani be 30, unai nega ai Iosepa ena sivarai ia noho lasi. Hamomokania gaudia ese idia hahedinaraia Iesu be ena hesiai gaukara ia hamatamaia neganai, Maria be vabu. (Maua ladana “Iosepa be Edena Nega ai Ia Mase?” itaia.) To Iosepa be haheitalai namona, ena famili ia gimaia, ia ubua, bona mai abidadama ida ia haheauka ela bona ia mase. Tamadia, eiava ruma bese kwaradia, o Keristani taudia ibounai ese Iosepa ena haheitalai idia tohotohoa be namo.