“Abidadama Taudia Ibounai Edia Tamana”

1, 2. Noa ena nega amo edena dala ai tanobada ia idau, bona Aberamo ena hemami be edena bamona?

ABERAMO be ena kwarana ia abia isi bona Uru hanua lalonai ia gini dubu ena kohoro latana ia raraia.a Ia itaia kwalahu ia daekau noho bona taunimanima idia boiboi badabada. Hua diravana ena hahelaga taudia be boubou gaudia idia gabua lou noho. Mani ita laloa Aberamo be ia moale lasi, ia giroa bona ena kwarana ia hamarerea. Hutuma huanai iena ruma dekenai ia raka giroa lou lalonai, ia laloa noho Uru hanua be kaivakuku tomadiho henia karana amo ia honu momokani. Noa ena nega amo unai bamona tomadiho koikoi be tanobada ibounai dekenai ia lao!

² Noa ia mase bena lagani rua murinai Aberamo ia vara. Noa bona ena ruma bese be Abata badana murinai bouti amo idia raka-lasi, bena Noa ese Iehova Dirava dekenai boubou ia henia bona Dirava ese kevau ia hahedinaraia. (Gen. 8:20; 9:12-14) Unai negai, tanobada ai tomadiho goevana sibona ia noho. To, Noa ena bese amo uru 10 idia vara murinai, tanobada be taunimanima amo ia honu, to Iehova idia tomadiho henia taudia be momo lasi. Gabu ibounai ai, taunimanima be dirava koikoi idia tomadiho henidia. Aberamo ena tamana, Tera danu be kaivakuku ia tomadiho henia, bona reana unai gaudia ia koroa danu.​—Ios. 24:2.

3. Lagani momo idia hanaia lalonai, Aberamo be dahaka kara ia hahedinaraia bona ia amo dahaka ita dibaia diba?

³ Aberamo be lagani momo idia hanaia lalonai, Dirava ia abidadama henia karana amo ia hahedinaraia ia be idau. Unai dainai gabeai, aposetolo Paulo ese Aberamo ia gwauraia “abidadama taudia ibounai edia tamana” (Roma 4:11 duahia.) Aberamo be abidadama tauna ai ia lao dalana mani ita herevalaia. Iena haheitalai amo iseda abidadama hagoadaia dalana do ita dibaia.

Abata Murinai Iehova Idia Hesiai Henia Dalana

4, 5. Aberamo be daika amo Iehova ena sivarai ia kamonai, bona dahaka dainai unai ita abia dae?

⁴ Edena dala ai Aberamo ese Iehova Dirava ia dibaia? Ita diba unai negai Iehova idia badinaia abidadama hesiai taudia idia noho. Sema be idia ta. Ena be Noa ena natudia amo Sema be roboana lasi, to nega momo ia idia herevalaia guna, badina ia be abidadama tauna.b Abata murinai, Noa ia gwau Iehova be “Sema ena Dirava.” (Gen. 9:26) Sema ese Iehova bona tomadiho goevana ia matauraia.

⁵ Aberamo be Sema ia diba, a? Toana be ia diba. Mani oi laloa Aberamo be mero maragina, bona reana ia hoa badina iena tubuna ta be lagani 400 lalonai idia vara gaudia ia itaia! Sema be inai gaudia ia itaia: Abata do lasi tanobada dikana, Abata ia mai bona tanobada ia hadikaia, taunimanima idia hutuma idia lao bona bese ginigunadia idia havaraia, bona Nimiroda ese Babela ena Kohoro ai ia havaraia gwau-edeede karana. To, abidadama tauna Sema be unai gwau-edeede karana lalonai ia vareai lasi. Unai dainai, Iehova ese unai kohoro idia haginia taudia edia gado ia haidaua neganai, Sema bona ena bese edia gado ia haidaua lasi, idia be taunimanima edia gado ginigunana, Noa ena gado unai, idia gaukaralaia noho. Aberamo be unai bese lalonai ia vara. Oibe, unai dainai Aberamo be Sema ia matauraia bada. Bona danu, Aberamo be Sema ia do mauri noho lalonai ia noho. Unai dainai, reana Aberamo be Sema amo Iehova ia dibaia.

6. (a) Edena dala ai Aberamo ia hahedinaraia Abata ena sivarai amo diba ia abia? (b) Aberamo bona Sarai edia mauri be edena bamona?

⁶ Aberamo ese Abata ena sivarai amo diba ia abia. Noa hegeregerena ia ura Iehova ia hamoalea. Unai dainai, Aberamo ese dirava koikoidia ia tomadiho henia lasi bona Uru hanua ai ia be idau, reana ena ruma bese taudia amo danu. To, Aberamo ese turana namona ta Sarai ia davaria bona ia adavaia. Ia be hairai hahine sibona lasi to Iehova ia abidadama henia bada.c Ena be natuna be lasi, to unai headava taudia ese Iehova hesiai henia karana idia moalelaia. Aberamo ena vavana Lota be tama sina lasi dainai idia ese Lota idia naria.

7. Edena dala ai Iesu murinai idia raka taudia ese Aberamo idia tohotohoa be namo?

⁷ Aberamo ese Iehova ia rakatania lasi, Uru hanua ena kaivakuku ia tomadiho henia totona. Ia bona Sarai be idia gaukara goada kaivakuku idia tomadiho henia taudia amo idia idau totona. Bema ita ura iseda abidadama ita hagoadaia, namona be ita danu be mai ura ida unai bamona ita karaia. Iesu ia gwau iena murinai idia raka taudia be inai “tanobada taudia bamona lasi,” bona unai dainai tanobada taudia ese do idia inai henidia. (Ioane 15:19 duahia.) Bema oi lalohisihisi badina Iehova oi hesiai henia dainai emu ruma bese eiava emu hanua taudia ese oi idia dadaraia, laloatao oi be sibona oi noho lasi. Oi be Aberamo bona Sarai edia haheitalai oi tohotohoa noho, idia be mai abidadama ida Dirava idia hesiai henia.

‘Emu Tano Oi Rakatania’

8, 9. (a) Aberamo be dahaka ia laloaboio lasi? (b) Iehova ena hereva Aberamo dekenai be dahaka?

⁸ Dina ta, Aberamo dekenai gau ta ia vara bona unai do ia laloaboio diba lasi. Iehova Dirava amo sivarai ta ia abia! Aberamo ese unai sivarai ia abia dalana dekenai Baibel ia gwau sibona “hairai Diravana” be unai abidadama tauna dekenai ia hedinarai. (Kara 7:2, 3 duahia.) Reana aneru ta amo Aberamo ese guba bona tanobada ia Lohiaia Tauna ena hairai ia itaia. Aberamo ia moale badina mauri Diravana bona taunimanima ese idia tomadiho henia mauri lasi kaivakuku edia idau ia itaia.

⁹ Iehova ena hereva Aberamo dekenai be dahaka? Iehova ia gwau: “Emu tano bona emu varavara oi rakatania bona oi dekenai do lau hahedinaraia tano dekenai do oi lao.” Iehova ese edena tano dekenai do idia lao ia gwauraia lasi—to Aberamo dekenai unai tano do ia hahedinaraia. To gau ginigunana be, Aberamo ese ena tano bona varavara do ia rakatania be namo. Idaunegai Middle East tanodia ai, famili be mai anina bada. Bema tau ta be ena varavara do ia rakatania bona gabu daudau ia lao, unai be kara dikana momokani!

10. Dahaka dainai Aberamo bona Sarai ese edia mauri Uru dekenai idia rakatania be auka?

¹⁰ Reana Aberamo ese Uru ena mauri namona ia rakatania be auka. Hamomokania gaudia ese idia hahedinaraia Uru be bisinesi momo bona taga hanuana. (Maua ladana “Aberamo Bona Sarai ese Idia Rakatania Siti” itaia.) Akioleji taudia idia davaria, idaunegai Uru hanua ai ruma namodia idia noho; ruma haida be mai edia daiutu momo ruma bese bona hesiai taudia totona, bona daiutu ese nadi amo idia karaia ariara ia hagegea. Ruma ta ta ibounai ai ranu ia noho, inuinu bona toileti totona idia gaukaralaia. Danu laloatao, Aberamo ena mauri lagani 70 bamona bona Sarai be 60 bamona. Aberamo ia ura Sarai do ia durua bona naria namonamo—tau namona be ia ura ena adavana dekenai unai do ia karaia. Edia asainmen totona idia laloa henanadai bona lalohadai idia herevalaia karana mani oi laloa. Sarai be unai asainmen badana ia abia dae neganai, Aberamo ia moale bada! Aberamo bona Sarai be mai ura ida edia mauri namona do idia rakatania.

11, 12. (a) Uru idia do rakatania lasi neganai dahaka disisen idia karaia bona dahaka gaudia idia hegaegaelaia? (b) Uru idia rakatania dinana mani oi herevalaia.

¹¹ Aberamo bona Sarai be unai disisen idia karaia dainai, hari idia be mai edia gaukara badana. Edia laolao totona kohu do idia haboua bona idia hegaegae. Dahaka gaudia do idia abia bona dahaka do idia rakatania? Mai anina bada gauna be edia ruma bese taudia. Aberamo ena tamana burukana Tera be edena bamona? Abia hidi idia karaia ia do idia abia lao bona idia naria. Baibel ia gwau Tera ese iena ruma bese be Uru amo ia abia lao dainai, toana be ia ura idia ida ia lao. Ita gwau diba ia be kaivakuku tomadiho henia karana ia rakatania. Aberamo ena vavana Lota be idia ida do ia lao.​—Gen. 11:31.

¹² Vadaeni, Uru do idia rakatania negana ia ginidae. Mani oi piksaia, daba ai Aberamo ena ruma bese be Uru siti ia hagegea ranu bona magu badinai idia haboua. Kamelo bona doniki latanai kohu idia atoa, animal idia haboudia, ruma bese bona hesiai taudia idia hegaegae, bona do idia raka dainai idia moale.d Reana idia ibounai be Aberamo idia raraia noho, idia raka totona iena hereva idia naria. Bena, nega ia ginidae, Uru hanua idia rakatania, bona do idia giroa lou lasi.

13. Edena dala ai hari Iehova ena hesiai taudia be Aberamo bona Sarai edia kara idia tohotohoa?

¹³ Hari, Iehova ena hesiai taudia momo be disisen idia karaia Basileia harorolaia taudia be momo lasi gabuna ai idia lao. Ma haida be edia haroro gaukara idia habadaia totona gado matamata idia dibaia. Eiava idia manada lasi haroro gaukara dalana ma ta idia tohoa. Oibe, unai bamona disisen idia karaia totona, mai edia ura ida edia mauri namona idia rakatania. Unai be kara namona, bona idia ese Aberamo bona Sarai idia tohotohoa! Bema unai bamona abidadama ita hahedinaraia, Iehova ese ita do ia hanamoa bada. Iseda abidadama ena davana do ia henia. (Heb. 6:10; 11:6) Iehova ese Aberamo ia hanamoa, a?

Euperate Sinavaina Idia Hanaia

14, 15. Uru amo idia lao Harana ena laolao be edena bamona, bona dahaka dainai Aberamo ia ura Harana dekenai nega sisina idia noho?

¹⁴ Dina ta ta ai unai laolao idia karaia dainai idia manada. Mani oi piksaia, Aberamo bona Sarai be nega haida kamelo ai idia guia bona nega haida idia raka, bona idia herevahereva bona kamelo edia aiona dekenai idia kwatua bel edia regena oi kamonai diba. Metairametaira, guna gabu daudau idia loaloa lasi taudia idia manada. Kamepa idia haginia bona idia kokia diba, bona tau buruka Tera idia durua kamelo o doniki ataiai ia helai totona. Notwest kahana ai idia raka lao, Euperate Sinavaina idia badinaia. Wiki momo lalonai idia raka noho, bona gabu momo idia itaia.

¹⁵ Aberamo bona ena ruma bese be kilomita 960 idia raka murinai, Harana siti dekenai idia ginidae. Unai be siti badana bona bisinesi karaia gabuna. Unuseniai nega sisina idia noho. Reana Tera be ia buruka momokani dainai ia hegeregere lasi gabu daudau ia lao totona.

16, 17. (a) Aberamo be dahaka gwauhamata dainai ia moale? (b) Aberamo be Harana ai ia noho lalonai, edena dala ai Iehova ese ia hanamoa?

¹⁶ Daudau lasi, Tera ia mase, ena mauri lagani be 205. (Gen. 11:32) Unai lalohisihisi negana lalonai Iehova ese Aberamo ia hereva henia lou neganai, goada ia abia. Uru ai ia henia hadibaia herevadia ia gwauraia lou bona ena gwauhamata ia herevalaia namonamo. Aberamo be “bese badana” ai do ia lao bona ia dainai tanobada besedia ibounai be hahenamo do idia abia. (Genese 12:2, 3 duahia.) Iehova ese ia bona Aberamo huanai ia karaia gwauhamatana dainai, Aberamo ia moale bona unai ese ia hagoadaia ena laolao do ia karaia noho.

¹⁷ Harana ai Iehova ese Aberamo ia hanamoa dainai, hari edia laolao idia hamatamaia lou totona gaudia momo do idia abia hegaegae. Baibel ia gwau: “Harana ai idia haboua kohu ibounai bona unuseniai ia ida idia noho hesiai taudia ia abidia.” (Gen. 12:5) Bese ta ai ia lao totona, Aberamo be kohu bona hesiai taudia momo do ia abia, unai be ruma bese badana. Iehova ese ena hesiai taudia be taga taudia ai ia halaodia lasi, to iena ura idia hagugurua totona edia dabu gaudia ia henidia. Iehova ese ia hagoadaia murinai, Aberamo ese iena ruma bese be ia diba lasi tanona dekenai ia hakaudia lao.

18. (a) Edena nega ai Aberamo dekenai mai anina bada gauna ta ia vara? (b) Lagani haida murinai dahaka mai anina bada gaudia haida be Nisan 14 dinana ai idia vara danu? (Maua ladana “Baibel Ena Histori Lalonai mai Anina Bada Deit” itaia.)

¹⁸ Harana amo dina haida lalonai idia raka ela bona Karakemisi dekenai idia ginidae, unuseniai laolao taudia momo be Euperate Sinavaina idia hanaia. Reana Karakemisi dekenai Dirava ese Iena taunimanima ia kara henia dalana dekenai mai anina bada gauna ta ia vara. Unai dina be Nisan 14, 1943 B.C.E., bona Aberamo bona iena ruma bese be sinavai idia hanaia. (Eso. 12:40-43) Saut kahana ai be Iehova ese Aberamo dekenai ia gwauhamatalaia tanona ia noho. Oibe, unai dina ai Dirava ese Aberamo ida ia karaia gwauhamata ia guguru matamaia.

19. Iehova ese Aberamo dekenai gwauhamata ia karaia neganai, dahaka ia gwauraia, bona Aberamo be reana dahaka ia laloatao?

¹⁹ Aberamo be saut kahana ai ia raka lao bona ena ruma bese be Sekema tanona ai, More ena au badadia badinai kamepa idia karaia. Unuseniai, Iehova ese Aberamo ia hereva henia lou. Inai negai Dirava ena gwauhamata lalonai Aberamo ena “natuna” eiava tubuna be tano do ia abia ia herevalaia. Aberamo be Eden umana ai Iehova ese ia gwauraia peroveta herevana ia laloatao, a? Unai peroveta herevana ia gwau dina ta “natuna” o tubuna ta ese taunimanima do ia hamauria. (Gen. 3:15; 12:7) Reana Aberamo be unai ia lalopararalaia sisina sibona, danu Iehova ena gwauhamata ena kahana ta be ia dekenai do ia vara karana be ia diba namonamo lasi.

20. Edena dala ai Aberamo ese ia hahedinaraia Iehova ese ia henia hahenamo ia laloa bada?

²⁰ Aberamo be Iehova ese ia henia hahenamo ia laloa bada. Unai tano dekenai ia laolao neganai, ia naria namonamo badina Kanana taudia idia do noho. To, Aberamo be kamepa ia karaia bona Iehova dekenai boubou patana ia haginia, ginigunana be More ena au badadia badinai, bena Betele kahirakahira dekenai. Iehova ena ladana ia hanamoa, bona nega vaira totona ena tubudia ia laloa neganai, mai kudouna ibounai ida Iehova ia tanikiu henia. Reana ia be Kanana taudia ia haroro henidia danu. (Genese 12:7, 8 duahia.) To gabeai, Aberamo ena abidadama idia tohoa gau badadia haida do idia vara. Aberamo be Uru dekenai ia rakatania ruma bona mauri namona ia laloa lasi. Unai be aonega karana. Ia be Iehova ena gwauhamata sibona ia laloa. Heberu 11:10 ia gwau, Aberamo “be siti mai ena badina aukana ia naria noho, unai siti ena palani karaia tauna bona haginia tauna be Dirava.”

21. Hari iseda diba Dirava ena Basileia dekenai be edena dala ai Aberamo ena diba amo ia idau, bona unai ese oi ia hagoadaia dahaka oi karaia totona?

²¹ Hari Iehova ita hesiai henia taudia be Aberamo bamona lasi, ita be unai siti, Dirava ena Basileia unai, ita diba namonamo. Ita diba Basileia be guba ai ia lohia noho bona kahirakahira inai nega oromana do ia haorea, bona Aberamo dekenai ia gwauhamatalaia natuna, Iesu Keriso, ese unai Basileia ia lohiaia noho. Ita moale badina Aberamo ia toreisi lou neganai do ita itaia, bona Dirava ena ura ia guguru dalana do ia lalopararalaia goevagoeva! Iehova ena gwauhamata iboudiai idia guguru karana oi ura itaia, a? Vadaeni, namona be Aberamo ena kara ita tohotohoa. Namona be Iehova ita hesiai henia totona gau haida ita rakatania, ia ita kamonai henia, bona iseda guriguri amo ita dekenai ia henia hahenamo dainai ia ita tanikiu henia. Aberamo, “abidadama taudia ibounai edia tamana” ena kara oi tohotohoa neganai, ia be emu tamana ai do ia lao danu!