“Dirava Momokanina ida Ia Raka”

1, 2. Noa bona ena ruma bese be dahaka projek idia karaia, bona dahaka hekwakwanai haida idia davaria?

NOA ia gini ena doruna ia hamaoromaoroa badina ena tauanina ia hisihisi. Mani oi piksaia, ia be timba latanai ia helai, ena gaukara amo ia laga-ani sisina bona idia haginia bouti ia itaia noho. Pisi siahuna ena bonana aukana oi bonaia; bona idia gaukaralaia tulu idauidau edia regena oi kamonai diba. Noa be ia helai gabuna amo ia itaia, ena natudia be bouti ena kahana ta ta dekenai idia gaukara noho. Lagani momo lalonai, ena adavana lalokauna, edia natudia mai adavadia be unai projek dekenai ia ida idia gaukara. Nega daudau lalonai unai idia karaia, to gaukara badana ia do noho!

² Unuseniai idia noho taudia idia laloa Noa bona ena ruma bese be idia kavakava. Noa bona ena natudia be bouti idia karaia noho lalonai, taunimanima ese idia kirikirilaia badina idia abia dae lasi abata ese tanobada ibounai do ia koua. Unai dainai idia laloa Noa ese ia harorolaia gaudia be do idia vara lasi! Idia laloa Noa, ena adavana, bona ena natudia mai edia adavadia edia mauri be unai bouti haginia gaukarana dekenai idia haorea kava. To, Noa ena Dirava, Iehova, be unai bamona ia laloa lasi.

3. Edena dala ai Noa be Dirava ida ia raka?

³ Baibel ia gwau: “Noa be Dirava momokanina ida ia raka.” (Genese 6:9 duahia.) Unai ena anina be dahaka? Dirava be tanobada ai Noa ida ia raka lasi bona Noa be guba dekenai ia daekau lao lasi. To Noa be Dirava ia badinaia namonamo bona ia lalokau henia bada dainai, unai be hegeregere ia bona Iehova be turadia bamona idia raka hebou. Lagani tausen momo murinai, Baibel ese Noa be inai bamona ia gwauraia: “Iena abidadama amo ia ese tanobada ia hahemaoro henia.” (Heb. 11:7) Edena dala ai unai ia karaia? Iena abidadama amo dahaka ita dibaia diba?

Kerere Lasi Tauna Dagedage Tanobadana Ai

4, 5. Noa ena nega ai, taunimanima edia kara be edena dala ai ia dika ia lao?

⁴ Noa ena nega ai taunimanima edia kara be ia dika ia lao haraga. Noa ena tubuna Enoka ena nega danu be ia dika momokani. Enoka danu be kara maoromaoro tauna bona Dirava ida ia raka. Enoka ia peroveta, Dirava ena hahemaoro dinana be kara dika taudia dekenai do ia mai. Noa ena nega ai, kara dika be bada herea. Dirava momokani vairanai, tanobada be ia dika momokani bona dagedage karadia amo ia honu. (Gen. 5:22; 6:11; Iuda 14, 15) Dahaka ia vara dainai, kara dika ia bada herea?

⁵ Dirava ena aneru huanai dika badana ta ia vara matamaia. Idia ta be Iehova ia gwau-edeede henia vadaeni, bona Satani Diabolo ai ia lao, badina Dirava ena ladana ia hadikaia bona Adamu bona Heva ia koia, kara dika idia karaia totona. Noa ena nega ai, aneru ma haida ese Iehova ena kara maoromaoro lohia dalana idia gwau-edeede henia matamaia. Guba dekenai edia gaukara idia rakatania bona tanobada dekenai idia diho, taunimanima bamona ai idia lao, bona kekeni hairaidia idia adavaia. Unai gwau-edeede anerudia be idia hekokoroku, sibona idia laloa bada bona taunimanima idia hakaua kerere.​—Gen. 6:1, 2; Iuda 6, 7.

6. Edena dala ai Nefilim ese tanobada idia hadikaia, bona Iehova be ena lalona ia hadaia dahaka do ia karaia?

⁶ Danu unai sibona lasi, gwau-edeede anerudia bona tanobada hahinedia ese idia havaraia natudia be tatau badadia bona edia goada be bada. Baibel ese ia gwauraidia Nefilim, ena anina be “Hamorua Taudia,” badina ma haida idia hamorua. Unai dagedage Nefilim taudia ese tanobada ai kara dika bona dagedage karadia idia habadaia. Unai dainai Havaraia Tauna ia itaia “tanobada ai taunimanima edia kara dika be bada herea, bona edia kudouna ena ura be nega ibounai ia dika sibona.” Iehova be ena lalona ia hadaia, kara dika taudia be lagani 120 sibona do idia noho bena do ia hadikaia ore.​—Genese 6:3-5 duahia.

7. Noa bona ena adavana be kara dikadia amo edia natudia memero idia gimaia lalonai dahaka hekwakwanai idia davaria?

⁷ Mani oi laloa, unai bamona nega ai emu ruma bese oi naria be mai ena hekwarahi bada! To, Noa be unai ia karaia. Adavana namona ia davaria. Noa ena mauri lagani be 500 neganai, iena adavana ese natudia memero toi, Sema, Hamo, bona Iapeta ia havaraia.a Noa bona ena adavana ese idia vara dika amo edia natudia memero do idia gimaia. Vaia, memero maragidia be “tatau goadadia, bona ladana bada taudia” idia ura henidia, unai dainai natudia maragidia ese Nefilim idia ura henidia. Nefilim edia kara dika sivaraidia be bada herea dainai, Noa bona ena adavana ese edia natudia memero be unai gaudia amo idia gimaia be auka, to kara dika ibounai ia inai henia Diravana Iehova ena hereva momokani be edia natudia dekenai idia hadibaia diba. Edia natudia memero idia hadibaia, Iehova be tanobada ai idia vara dagedage bona gwau-edeede karadia dainai ia lalohisihisi.​—Gen. 6:6.

8. Edena dala ai aonega tama sina ese Noa bona ena adavana edia haheitalai idia tohotohoa diba?

⁸ Hari inai negai, tama sina be Noa bona ena adavana edia hemami idia lalopararalaia. Iseda tanobada be dagedage bona gwau-edeede karana amo ia honu. Nega momo gwau-edeede matamata taudia ese siti idia biagua. Danu natu maragidia edia moale karadia lalonai dagedage karadia be momo. Unai bamona karadia dadaraia totona, aonega tama sina idia gaukara goada edia natudia idia hadibaia, maino Diravana Iehova ese nega ta dagedage karadia ibounai do ia haorea. (Sal. 11:5; 37:10, 11) Unai dainai dala ia noho natudia ese kara maorona idia dibaia totona! Noa bona ena adavana be unai idia karaia. Bona edia natudia memero be tatau namodia ai idia lao, bona idia adavaia hahinedia danu ese Dirava momokanina Iehova be edia mauri lalonai idia atoa guna.

“Bouti ta Do Oi Karaia”

9, 10. (a) Iehova be dahaka hahegani ia gwauraia Noa dekenai, unai ese ena mauri ia haidaua? (b) Iehova be edena dala ai Noa dekenai bouti karaia ena palani bona unai ia karaia ena badina ia hahedinaraia?

⁹ Dina ta, Noa ena mauri ia idau. Iehova ese ena lalokau hesiai tauna Noa ia hamaoroa, Iena ura be unai nega ai idia noho kara dika taudia do ia haorea. Dirava be Noa ia hagania: “Oi ese au namodia amo bouti ta do oi karaia.”​—Gen. 6:14.

¹⁰ Unai bouti ena toana be maua o boksi badana ta bamona bona davara latanai ia hure diba. Iehova ese Noa dekenai bouti ena bada, do ia karaia ena palani ma haida bona ena lalona bona murina kahana be pisi amo do ia koua ia gwauraia. Bona Noa dekenai ena badina ia gwauraia: “Lau ese tanobada ai abata ranu do lau mailaia . . . Tanobada ai idia noho gaudia ibounai do idia boio.” To, Iehova be Noa ida gwauhamata ia karaia: “Namona be bouti lalonai do oi vareai, oi, emu natudia memero, emu adavana, bona emu natudia memero edia adavadia.” Danu Noa be animal oreadia idauidau amo haida ia abia vareai. Bouti lalonai idia noho animal sibona be abata badana amo do idia roho mauri!​—Gen. 6:17-20.

11, 12. Noa be dahaka gaukara badana do ia karaia, bona ia be edena bamona ia kara?

¹¹ Noa dekenai unai be gaukara badana. Inai be bouti badana—ena lata be mita 133, ena lababa be mita 22, bona ataiai be mita 13. Hari inai negai au amo idia karaia bouti badadia ia hereaia. Noa be unai asainmen ia dadaraia, a? Unai gaukara badana dainai ia maumau eiava bouti karaia ena palani ia haidaua, a? Baibel ia gwau: “Noa be Dirava ena oda hereva ibounai ia badinaia. Oibe, unai hegeregerena ia kara.”​—Gen. 6:22.

¹² Reana unai gaukara be lagani 40 o 50 lalodiai idia karaia. Au idia utudia, idia veria mai, timba badadia idia utua, bona idia atoa hebou. Do idia karaia bouti be mai ena sitori toi, daiutu haida, bona kahana ta ai iduara do idia atoa. Ataiai be mai ena windo, bona guhi ena huana kahana be ia daekau sisina unai amo ranu ia heau diho diba.​—Gen. 6:14-16.

13. Noa ese dahaka gaukara ma ta ia karaia, bona taunimanima edia kara be edena bamona?

¹³ Lagani idia hanaia noho bona bouti ena toana ia hedinarai matamaia neganai, Noa be iena famili edia heduru dainai ia moale bada herea! Bona gaukara ma ta danu ia karaia, unai gaukara be bouti haginia gaukarana amo ia idau bona mai ena hekwarahi bada. Baibel ia gwau Noa be “kara maoromaoro ia harorolaia tauna.” (2 Petero 2:5 duahia.) Unai dainai mai gari lasi ida ia ese Dirava idia badinaia lasi kara dika taudia dekenai ia mai noho dika badana ia harorolaia. Taunimanima be dahaka idia karaia? Gabeai, Iesu Keriso ese unai nega ia herevalaia neganai, ia gwau taunimanima be “unai idia laloa bada lasi.” Ia gwau idia be dina ta ta maurina ai idia karaia gaudia dekenai idia bisi bada, idia aniani, idia inuinu, idia headava noho, unai dainai Noa ena hadibaia herevana idia laloa bada lasi. (Mat. 24:37-39) Toana be momo ese Noa, bona ena famili idia kirikirilaia; reana ma haida ese idia hagaria bona dagedage henia. Reana idia ura bouti haginia gaukarana idia hadikaia danu.

14. Hari Keristani ruma bese ese Noa bona ena ruma bese amo dahaka idia dibaia diba?

¹⁴ To, Noa bona ena ruma bese be unai gaukara idia rakatania lasi. Ena be edia dekena taudia idia laloa unai be anina bada lasi gaukarana. Hari Keristani ruma bese be Noa bona ena ruma bese amo gau momo idia dibaia diba. Baibel ia gwau, ita be inai nega oromana ena “dina gabedia ai” ita noho. (2 Tim. 3:1) Iesu ia gwau iseda nega be Noa ese bouti ia haginia negana bamona. Bema tanobada taudia ese Dirava ena Basileia ena sivarai idia ura lasi kamonai, idia kirikirilaia eiava idia dagedage, namona be Keristani taudia ese Noa ena nega do idia laloa. Unai dagedage karadia be idia sibona dekenai ia vara lasi.

“Umui Lao, Bouti Lalonai Umui Vareai”

15. Noa ena mauri lagani be kahirakahira 600 neganai, daidia idia mase?

¹⁵ Lagani idia hanaia bona metairametaira bouti ena toana ia hedinarai. Noa ena mauri lagani be kahirakahira 600 neganai, iena lalokau taudia haida idia mase. Iena tamana Lameka ia mase.b Bena lagani 5 murinai, Lameka ena tamana Metusela, Noa ena tubuna unai, ena mauri lagani be 969 neganai ia mase. Baibel lalonai idia noho taudia ibounai amo ena mauri lagani sibona be bada. (Gen. 5:27) Metusela bona Lameka be Adamu ia mauri noho negana ai idia noho taudia.

16, 17. (a) Noa ena mauri lagani be 600 neganai, Dirava amo dahaka hadibaia hereva matamata ia abia? (b) Noa bona ena ruma bese idia itaia hoa gauna mani oi herevalaia.

¹⁶ Noa ena mauri lagani be 600 neganai, Iehova Dirava amo hadibaia hereva matamata ia abia, ia gwau: “Oi bona emu ruma bese taudia ibounai umui lao, Bouti lalonai umui vareai.” Unai negai danu, Dirava ese Noa ia hamaoroa animal idauidau be bouti lalonai do ia abia vareai. Boubou totona do idia gaukaralaia animal goevadia idauidau be 7, bona animal ma haida be rua rua.​—Gen. 7:1-3.

¹⁷ Daudau amo animal tausen idia mai noho, idia raka, idia roho, bona idia rau mai, haida be badadia, haida be maragi bona edia toana be idauidau. Noa bona ena famili be unai idia laloaboio lasi. Noa be ia hekwarahi lasi unai dagedage animal ia haboua, bona bouti lalonai ia hakaudia vareai totona. Baibel ia gwau, unai animal be “Noa dekenai idia lao bouti lalonai.”​—Gen. 7:9.

18, 19. (a) Noa ena sivarai idia abia dae lasi taudia edia henanadai be edena bamona ita haerelaia diba? (b) Iehova ese iena animal ia hamauria dalana ese edena dala ai iena aonega ia hahedinaraia?

¹⁸ Reana Baibel idia abia dae lasi taudia haida idia henanadai: ‘Edena bamona unai ia vara diba? Bona edena dala ai unai animal ibounai be gabu maragina lalonai maino ai do idia noho?’ Mani inai oi laloa: Guba bona tanobada ia havaraia Diravana be mai ena siahu, animal ia biagua totona, unai dainai idia heai lasi to maino ai idia noho hebou diba, ani? Laloatao, Iehova ese animal ibounai ia karaia. Gabeai, ia ese hoa dalanai Davara Kakakakana ia hapararaia bona dina ia biagua gabu tamona ai ia noho totona. Unai dainai, ia be mai ena siahu Noa totona unai gaudia ibounai ia karaia diba, ani?

¹⁹ Oibe, Dirava ese dala ma ta ai iena animal ia hamauridia diba. To ia be aonega dalanai unai ia abia hidi, unai amo ita ia hadibaia, matamanai ia ese mauri gaudia ibounai naria gaukarana be taunimanima dekenai ia henia. (Gen. 1:28) Tama sina momo ese Noa ena sivarai amo edia natudia idia hadibaia Iehova ese animal bona taunimanima ia laloa bada.

20. Abata do ia vara wiki lalonai Noa bona ena ruma bese be dahaka idia karaia?

²⁰ Iehova ese Noa ia hamaoroa Abata be wiki tamona murinai do ia vara. Toana be unai nega ai idia bisi bada. Mani oi laloa, animal bona edia aniani be bouti lalonai idia abia vareai. Noa bona ena ruma bese danu be edia aniani bona kohu idia huaia vareai bona atodia namonamo. Noa ena adavana bona Sema, Hamo, bona Iapeta edia adavadia be bouti lalonai edia daiutu idia hegaegaelaia namonamo.

21, 22. (a) Dahaka dainai Noa ena nega ai idia noho taudia edia kara dekenai ita hoa lasi? (b) Edena nega ai Noa bona ena ruma bese kirikirilaia karana ia ore?

²¹ Taunimanima be dahaka idia karaia? Ena be idia itaia Iehova ese Noa bona ena gaukara ibounai ia hanamoa, to “unai idia laloa bada lasi.” Idia itaia animal momo herea be bouti lalonai idia vareai noho. To edia kara dekenai ita hoa lasi be namo. Badina unai hegeregerena, hari taunimanima be idia vara kara dika momo idia itaia, to idia laloa lasi ita be inai tanobada ena dokona negana ai ita noho. Bona aposetolo Petero ia gwau bamona, hevaseha taudia do idia mai bona Dirava ena hadibaia hereva idia badinaia taudia do idia kirikirilaia. (2 Petero 3:3-6 duahia.) Unai hegeregerena, taunimanima ese Noa bona ena ruma bese idia kirikirilaia.

²² Edena nega ai edia hevaseha karana ia ore? Baibel ia gwau Noa be iena ruma bese bona animal ida bouti lalonai idia vareai, bena unai murinai “Iehova ese iduara ia koua.” Bema hevaseha taudia ese unai idia itaia, reana edia hevaseha karana idia hadokoa. Oibe, medu be ia diho! Bona ia doko lasi ela bona tanobada ibounai be abata ese ia koua, Iehova ena hereva hegeregerena.​—Gen. 7:16-21.

23. (a) Edena bamona ita diba Noa ena nega ai Iehova be kara dika taudia edia mase ia moalelaia lasi? (b) Dahaka dainai Noa ena abidadama oi tohotohoa be aonega karana?

²³ Iehova be unai kara dika taudia edia mase ia moalelaia, a? Lasi! (Ese. 33:11) Iehova be idia dekenai nega bada ia henia edia kara idia haidaua bona kara maorona idia karaia totona. Edia kara idia haidaua, a? Noa ena mauri dalana ese unai ia haerelaia. Ia be Iehova ida ia raka, bona gau ibounai dekenai ena Dirava ia badinaia karana amo, ia hahedinaraia unai taudia danu idia roho mauri diba. Unai be hegeregere, iena abidadama karana ese iena negai idia noho kara dika taudia ibounai ia kota henia bamona. Oibe, Noa ia hahedinaraia Dirava hamoalea maurina idia abia hidi diba. Noa be iena abidadama karana dainai ia bona iena ruma bese ia gimaia. Bema Noa ena abidadama oi tohotohoa, oi bona emu lalokau taudia oi hamauria diba. Noa hegeregerena, Iehova Dirava be emu Turana bamona, ia ida oi raka diba. Bona emui hetura karana be do ia noho hanaihanai!