Iesu Ese Vabu Ena Natuna Ia Hatorea Isi lou

Iesu be ami ofesa ena hesiai tauna ia hanamoa murinai, Kaperanauma ia rakatania bona Naina dekenai ia lao, unai siti be sautwest kahanai bona ia be kilomita 32 bamona. Iena hahediba taudia bona hutuma be ia ida idia lao. Reana adorahi kahanai Naina hanua kahirakahira idia ginidae. Unuseniai, Iuda taudia momo idia itaia, mero ta ena mase tauanina idia huaia lao noho, siti murimurinai idia guria totona.

Unai mero ena sinana be ia lalohisihisi bada herea. Ia be vabu, bona hari iena natuna tamona ia mase. Iena adavana ia mase neganai, iena natuna lalokauna be ia ida ia noho. Mani oi laloa! Iena natuna ia lalokau henia bada, badina ia buruka neganai, iena natuna ese ia naria bona hagoadaia. To hari ia danu ia mase. Daika be ia ida do ia noho bona do ia durua?

Iesu ia itaia unai hahine ia taitai bona ia lalohisihisi bada dainai ia hebogahisi henia. Vadaeni vabu ia hagoadaia ia gwau: “Oi taitai lasi.” To unai sibona ia karaia lasi. Ia raka lao bona mase tauanina idia huaia patana ia dogoatao. (Luka 7:13, 14) Iesu ena hereva bona kara dainai, idia taitai taudia idia doko bona ia idia raraia. Reana momo idia laloa, ‘Ena hereva anina be dahaka, bona dahaka do ia karaia?’

Iesu idia bamoa taudia be ia karaia hoa karadia bona gorere idauidau taudia ia hanamoa karana idia itaia. To Iesu ese ta be mase amo ia hatorea isi lou karana idia do itaia lasi. Gunaguna haida ese mase taudia idia hatorea isi lou. Iesu be unai ia karaia diba, a? (1 King Taudia 17:17-23; 2 King Taudia 4:32-37) Iesu ese mase tauna ia oda henia: “Mero matamata e, oi lau hamaoroa, oi toreisi!” (Luka 7:14) Bona unai ia vara. Mase tauna ia helai bona ia hereva! Bena Iesu ese mero be ena sinana dekenai ia henia. Ena sinana be ia hoa bona moale bada, hari ena natuna be ia ida.

Taunimanima idia itaia unai mero ia mauri lou neganai, Mauri Henia Diravana, Iehova, idia hanamoa, idia gwau: “Peroveta tauna badana ta be iseda huanai ia mai vadaeni.” Ma haida ese Iesu ena hoa karana ena anina idia lalopararalaia, idia gwau: “Dirava ese ena bese taudia ia hebogahisi henia.” (Luka 7:16) Unai hoa karana ena sivarai be unai tano ibounai dekenai ia lao haraga, bona reana Iesu ena hanua, Nasareta, dekenai danu, ena daudau be kilomita 10 bamona. Saut kahanai idia noho Iudea taudia be unai sivarai idia kamonai danu.

Ioane Bapatiso be dibura ruma ai ia do noho, bona ia ura bada Iesu ese ia karaia gaukara edia sivarai ia kamonai. Ioane ena hahediba taudia ese unai hoa karadia edia sivarai be ia dekenai idia gwauraia. Ioane be dahaka ia karaia?