Iehova Ena Ura Ia Karaia Orea

TANOBADA ibounai lalonai tomadiho, politikol, bisinesi bona orea ma haida be momo herea bona edia kara, tahua gaudia, lalohadai be idauidau. To idia huanai, orea ta be idau momokani. Baibel ese unai orea ia hahedinaraia goevagoeva, unai be Iehova ena Witnes Taudia.

² Iehova ena orea oi bamoa be moale gauna. Oi sibona ese Dirava ena ura oi hamomokania dainai, hari unai oi karaia noho. (Sal. 143:10; Roma 12:2) Oi be tanobada hegegemadai lalokau tadikaka oreana ida oi gaukara hebou noho. (2 Kor. 6:4; 1 Pet. 2:17; 5:9) Dirava ena Hereva ia gwauhamata bamona oi ese hahenamo momo bona moale bada do oi davaria. (Aon. 10:22; Mar. 10:30) Hari mai abidadama ida Iehova ena ura oi karaia noho ese ia hahedinaraia oi noho hegaegae vaira negana ai mauri hanaihanai oi abia totona.​​—1 Tim. 6:18, 19; 1 Ioa. 2:17.

³ Iseda Havaraia Tauna Badana be mai ena tanobada hegegemadai oreana bona unai orea be tiokratik dalanai ia gaukara. Anina be Iehova, gau ibounai edia Kwarana, ese unai orea ia biagua. Ia ita abidadama henia momokani. Ia be iseda Hahemaoro Tauna, Taravatu Henia Tauna, bona iseda King. (Isa. 33:22) Dirava be gau ibounai ia karaia namonamo tauna dainai, gaukara karaia daladia ia hadibaia, unai amo Ia ‘ida ita gaukara hebou’ ena ura hagugurua totona.​​—2 Kor. 6:1, 2.

⁴ Nega oromana ena dokona ia kahirakahira noho dainai, King, Keriso Iesu ena hakaua henunai ita gaukara noho be namo. (Isa. 55:4; Apok. 6:2; 11:15) Iesu ia peroveta, iena murinai idia raka taudia ese do idia karaia gaukaradia be ia karaia gaukaradia do idia hereaia. (Ioa. 14:12) Unai be momokani badina Iesu ena murinai idia raka taudia be do idia hutuma bona nega daudau lalonai teritori badana do idia karaia. Idia ese Basileia ena sivarai namona be tanobada ibounai dekenai do idia harorolaia.​​—Mat. 24:14; 28:19, 20; Kara 1:8.

⁵ Unai be ia vara momokani vadaeni. To, Iesu ese ia hahedinaraia goevagoeva, sivarai namona harorolaia gaukarana be Iehova ese ia makaia negana ai do ia doko. Dirava ena peroveta hereva ibounai ese idia hahedinaraia, Iehova ena dina badana mai garina be ia kahirakahira momokani.​​—Ioe. 2:31; Sef. 1:14-18; 2:2, 3; 1 Pet. 4:7.

⁶ Inai nega dokona ai Iehova ena ura ita dibaia noho lalonai, namona be ita gaukara goada Dirava ena ura ita karaia totona. Anina be Dirava ena orea ena heau dalana ita dibaia namonamo bona ia ida ita gaukara hebou. Unai orea ena hakaua herevadia, ena oda, taravatu, bona ena hadibaia herevadia be Dirava ena Hereva amo.​​—Sal. 19:7-9.

⁷ Bema Iehova ena taunimanima be Baibel amo idia mai hahediba herevana idia badinaia, mai maino bona lalotamona ida idia noho bona gaukara hebou. (Sal. 133:1; Isa. 60:17; Roma 14:19) Dahaka ese iseda tadikakadia gabu ibounai dekenai ia hatamonaia? Lalokau. Lalokau ese ita ia hagoadaia bona ia be dabua bamona ita atoa. (Ioa. 13:34, 35; Kol. 3:14) Dirava ese unai ia hanamoa dainai, ita be Iehova ena guba oreana ida ita gaukara hebou.

IEHOVA ENA GUBA OREANA

⁸ Peroveta taudia Isaia, Esekiela, bona Daniela be matahanai lalonai Iehova ena guba oreana idia itaia. (Isa., karoa 6; Ese., karoa 1; Dan. 7:9, 10) Aposetolo Ioane be unai guba oreana ia itaia danu, bona Apokalupo bukana ai ia torea ita duahia totona. Ia itaia Iehova be ena terona helagana latanai ia helai bona iena badinai idia gini anerudia idia gwau: “Iehova Dirava, Siahu Ibounai Diravana be helaga, helaga, helaga, gunaguna ia noho, harihari ia noho, bona do ia mai.” (Apok. 4:8) Danu Ioane ia itaia, “mamoe natuna ia gini noho . . . terona badinai,” unai be Dirava ena Mamoe Natuna, Iesu Keriso.​​—Apok. 5:6, 13, 14; Ioa. 1:29.

⁹ Unai matahanai lalonai Iehova be terona latanai ia helai ese ia hahedinaraia Ia be inai orea ena Biaguna. Sivarai Ginigunana 29:11, 12 ese Iehova bona ena dagi be inai bamona ia gwauraia: “Iehova e, emu siahu bona goada bona hairai be bada herea momokani, badina guba bona tanobada ai idia noho gaudia be oiemu. Iehova e, basileia be oiemu. Oi sibona be unai gaudia ibounai edia Biaguna. Taga bona hairai be oi amo, bona oi ese gau ibounai oi lohiaia, bona emu siahu be bada herea, bona oi ese taunimanima dekenai ladana bada oi henia bona goada oi henia diba.”

¹⁰ Iesu Keriso be Iehova danu ia gaukara hebou tauna dainai, guba ai dagi badana ia abia, bona Dirava ese siahu bada ia henia. Oibe, Dirava ese “gau ibounai be Keriso ena aena henunai ia atoa, bona kongrigeisen ai ia be gau ibounai ena kwarana ai ia halaoa.” (Efe. 1:22) Aposetolo Paulo ese Iesu be inai bamona ia gwauraia: “Dirava ese ia dekenai dagi hereadaena ia henia bona mai hariharibada ida, ia dekenai ladana ibounai ia hereaia ladana ta ia henia, unai amo guba, tanobada, bona tano henunai idia noho taudia ibounai be Iesu ena ladanai do idia tui diho. Bona namona be taunimanima ibounai ese do idia gwauraia hedinarai, Iesu Keriso be Lohiabada, unai amo Dirava iseda Tamana do idia hanamoa.” (Fili. 2:9-11) Iesu Keriso be kara maoromaoro ai ia lohia dainai, ita abidadama henia diba.

¹¹ Peroveta tauna Daniela be matahanai lalonai ia itaia Mauri Noho Hanaihanai Tauna be Iena guba terona latanai ia helai bona aneru “milioni momo be ia idia hesiai henia, bona aneru handred milioni be ia vairanai idia gini.” (Dan. 7:10) Baibel ese unai aneru oreana ia gwauraia, “lauma taudia bona hesiai gaukara helagana idia karaia. Dirava ese idia ia siaia do ia hamauria taudia idia hesiai henia totona.” (Heb. 1:14) Unai aneru ibounai be edia orea hegeregerena idia noho, idia be “king taudia, lohia taudia, gavamani taudia, eiava siahu taudia.”​​—Kol. 1:16.

¹² Bema nega ita atoa Iehova ena guba orea ena kahana idauidau ita lalohadailaia, Isaia ia itaia matahanai bona ia abia hemamina ita lalopararalaia diba, ia ese Iehova ia itaia, “ataiai terona hairaina ai ia helai” bona “serapi be ia idia hagegea.” Isaia ia gwau: “Madi, lau be dika momokani! Lau be lau mase vadaeni bamona, badina egu matana ese King, tuari oreadia edia Iehova, ia itaia vadaeni! To egu uduna amo idia mai herevadia be miro, bona lau be miro herevadia idia gwauraia taudia huanai lau noho.” Momokani, Isaia ese Iehova ena orea ia itaia neganai, ia hoa bona manau. Ia itaia gauna ese ena kudouna ia hamarerea dainai, Iehova ese ena kota herevana harorolaia totona ia boiria neganai, ia gwau: “Lau inai! Lau oi siaia!”​​—Isa. 6:1-5, 8.

¹³ Iehova ena taunimanima ese Iena orea idia dibaia bona abia dae neganai, unai hemami idia abia danu. Unai orea ia heau noho dainai, namona be ia ida ita heau hebou. Namona be hari ita hekwarahi Iehova ena orea ita abidadama henia momokani.

IEHOVA ENA OREA IA HEAU NOHO

¹⁴ Esekiela karoa 1 ena peroveta herevana ese ia hahedinaraia, Iehova be guba kariota badana ta latanai ia guia. Unai kariota mai hairaina ese Iehova ena guba oreana ia laulaulaia. Ia be unai kariota ia taria, anina be ena orea ia hakaua namonamo bona iena ura hegeregerena ia gaukaralaia.​​—Sal. 103:20.

¹⁵ Unai kariota ena uili ta ta lalonai be uili ma ta ia noho bona edia sais be tamona, idia be ta ta dekenai idia heau hanai (crosswise), anina be murimuri ai ia noho uili be vaira o muri ia lao henia diba bona lalonai ia noho uili be lauri o idiba kahana ia lao henia diba. Unai dainai, uili be “kahana ta ta dekenai idia lao diba.” (Ese. 1:17) Unai uili edia heau dalana be kara haraga ia idau diba. To, unai kariota be sibona ia heau kava lasi. Iehova ia ura lasi ena orea be sibona ena ura ia badinaia. Esekiela 1:20 ia gwau: “Idia be lauma helaga ia lao gabudia ibounai dekenai idia lao.” Unai dainai, Iehova ese ena orea be iena ura hegeregerena ena lauma amo ia hakaua. To sibona ita nanadaia, ‘Lau be inai orea lau badinaia namonamo, a?’

¹⁶ Iehova ena orea ita badinaia namonamo karana be hebou ita lao bona haroro gaukara ita karaia sibona lasi. To, hereva momokani dekenai ita goada ita lao be namo. ‘Mai anina bada gaudia do ita diba’ bona Dirava ena orea ese idia halasia diba matamatadia ita dibaia. (Fili. 1:10; 4:8, 9; Ioa. 17:3) Danu, namona be ita laloatao: Orea ta ia heau namonamo totona, gaukara hebou bona lalotamona karana be mai anina bada. Unai dainai, Iehova ese ita dekenai ia henia abidadama hagoadaia gaudia bona kohu edia gaukaralaia dalana edia badina ita lalopararalaia bona gaukaralaia namonamo Iehova ena gaukara hagugurua totona. Iehova ena guba kariota ita badinaia noho neganai, ita hahedinaraia ita harorolaia herevadia be iseda mauri dalana ida ia hegeregere.

¹⁷ Iehova ena orea ena heduru dainai Iena ura ita hagugurua goadagoada noho. Namona be ita laloatao inai guba kariota ia Taria Tauna be Iehova. Unai dainai, Iena kariota ita badinaia namonamo neganai, ita hahedinaraia Iehova, iseda Nadi Badana, ita matauraia bona abidadama henia. (Sal. 18:31) Baibel ia gwauhamata: “Iehova ese ena taunimanima dekenai goada do ia henia. Iehova ese ena taunimanima do ia hanamoa dainai, maino ai do idia noho.” (Sal. 29:11) Hari, Iehova ena orea ita badinaia dainai, ia amo goada ita abia bona ena orea dekenai ia henia maino ita moalelaia. Oibe, ita abia dae momokani Iehova ena ura ita karaia dainai, Ia amo hahenamo momo do ita abia ela bona hanaihanai.