Revareva ta Hakaua Oreana Amo

Dirava Ena Hesiai Taudia E:

Ita ibounai be mai lalotamona ida Dirava momokanina Iehova, ita tomadiho henia be hahenamo badana! Iseda gaukara be Dirava ena Basileia ena sivarai namona ita harorolaia bona taunimanima ita hadibaia badina ita be iena “gaukara hebou taudia.” (1 Kor. 3:9; Mat. 28:19, 20) Tanobada hegegemadai inai gaukara ita hagugurua mai maino bona lalotamona ida, namona be gau ibounai ita karaia namonamo.​​—1 Kor. 14:40.

Inai buka ese oi do ia durua hari Keristani kongrigeisen ena heau dalana oi lalopararalaia totona. Oi be Iehova ena Witnes Tauna ta dainai, do oi abia hahenamo bona emu maduna Keristani kongrigeisen lalonai ia herevalaia. Bema oi abia hahenamo oi laloa bada bona emu maduna oi hagugurua, emu “abidadama ia goada” diba.​​—Kara 16:4, 5; Gal. 6:5.

Unai danai, oi ai hagoadaia inai buka oi stadilaia namonamo. Bena dala oi tahua mai anina gaudia oi dibaia bona badinaia emu mauri lalonai. Hegeregere, bema oi be hari sibona bapatiso lasi pablisa ta ai oi lao, dahaka do oi karaia oi bapatiso bona Iehova ena Witnes tauna ta ai oi lao diba? Danu, bema oi be oi bapatiso vadaeni, dahaka do oi karaia lauma dalanai oi goada bona emu hesiai gaukara Iehova totona oi habadaia diba? (1 Tim. 4:15) Edena dala ai Kongrigeisen do oi durua maino ai ia noho? (2 Kor. 13:11) Inai henanadai edia haere be inai buka lalonai oi tahua diba.

Bema oi be bapatiso tadikaka ta, dahaka do oi kararai oi hegeregere hesiai tauna ta ai oi lao bona gabeai elda ena maduna oi abia? Taunimanima tausen momo be idia vareai noho Dirvava ena orea lalonai, unai dainai namona be tadikaka idia gaukara goada Iehova ena taunimanima idia nari totona. Inai buka ese oi do ia durua dahaka do oi karaia unai “naria tauna ena maduna” oi abia totona.​​—1 Tim. 3:1.

Ai guriguri goadagoada, inai buka be oi do ia durua emu gabu Iehova ena orea lalonai oi dibaia bona do oi laloa bada. Umui ibounai ai lalokau henia bada bona umui totona ai guriguri noho mai moale bada ida iseda guba Tamana Iehova do umui tomadiho henia.​​—Sal. 37:10, 11; Isa. 65:21-25.