“Umui Idia Hakaua Taudia Do Umui Laloatao”

APOSETOLO PAULO ena hereva Heberu 13:7 ai ita hahanaia diba “Umui idia gunalaia taudia do umui laloatao.” Pentekoste 33 C.E amo, Lohiabada Iesu Keriso ena abidadama aposetolo taudia be governing body eiava hakaua oreana ai idia lao bona Keristani kongrigeisen matamata dekenai hadibaia hereva idia henia bona idia gunalaia. (Kara 6:2-4; Heb. 13:7) Lagani 49 C.E bamona ai, Iesu ena aposetolo taudia ma haida be unai hakaua orea lalonai idia vareai. Kopina utua ena hepapahuahu hamaoromaoroa totona, unai hakaua oreana lalonai “Ierusalema ai idia noho aposetolo bona tau badadia” danu idia noho. (Kara 15:1, 2) Edia maduna be Keristani taudia ibounai ese idia davaria hekwakwanai idia hamaoromaoroa totona. Idia ese revareva bona hadibaia herevadia idia halasia, unai amo kongrigeisen ia hagoadaia bona hahediba taudia ia durua edia lalohadai o kara dekenai idia lalotamona totona. Kongrigeisen ibounai be unai hakaua oreana ena hereva idia kamonai bona badinaia dainai, Iehova ese ia hanamodia bona idia tubu namonamo.​​—Kara 8:1, 14, 15; 15:22-31; 16:4, 5; Heb. 13:17.

² Aposetolo taudia idia mase murinai, aposteit karana ia matamaia. (2 Tes. 2:3-12) Iesu ese ia gwauraia witi bona ava dikadia edia parabole herevana hegeregerena, witi (horoa Keristani taudia) be ava dikadia (Keristani koikoidia) danu idia tubu. Lagani momo lalodiai, unai orea rua idia tubu hebou ela bona utua negana, unai be “nega oromana ena dokona.” (Mat. 13:24-30, 36-43) Unai nega ai idia noho horoa Keristani taudia ta ta be Iesu amo hahenamo idia abia, to unai nega ai hakaua oreana be lasi dainai Iesu ese ia murinai idia raka taudia durua namonamo oreana be lasi. (Mat. 28:20) To, Iesu ia gwau hapararaia gaukarana lalonai, unai be do ia idau.

³ “Hesiai tauna mai ena kamonai, bona mai ena aonega be daika?” Unai henanadai dainai Iesu Keriso ese “nega oromana ena dokona” ena “toana” hahedinaraia totona, parabole ta o laulau herevana ta ia gwauraia. (Mat. 24:3, 42-47) Iesu ese ia hahedinaraia, unai hesiai tauna be do ia bisi bada “nega korikori ai” Dirava ena taunimanima ia ubua totona. Aposetolo edia negai, Iesu ese tatau edia orea ta ia gaukaralaia hegeregerena, hari inai nega dokonai Iesu ese hesiai tauna mai ena kamonai be tau tamona lasi to orea ta bamona ia gaukaralaia.

“HESIAI TAUNA MAI ENA KAMONAI, BONA MAI ENA AONEGA” DIBAIA DALANA

⁴ Iesu ese daika ia abia hidi ena murinai idia raka taudia ubua totona? Ia ese tanobada ai idia noho horoa Keristani taudia ia gaukaralaia be maoro. Baibel ese idia ia gwauraia ‘king gaukara idia karaia hahelaga taudia,’ idia edia gaukara be “‘Dirava ena kara hereadaedia be gabu ibounai dekenai idia gwauraia hedinarai be namo,’ ia ese [idia] be dibura amo ena diari namo herea dekenai ia boiria mai.” (Mal. 2:7; 1 Pet. 2:9; Apok. 12:17) Tanobada ai idia noho horoa taudia ibounai be hesiai tauna mai ena kamonai oreana lalonai idia noho, a? Lasi. Iesu ese tatau 5,000 bamona, hahine bona natudia danu be hoa dalanai ia ubua neganai, ia ese ena hahediba taudia dekenai aniani ia henia bena idia ese hutuma dekenai idia henia. (Mat. 14:19) Iesu ese tatau haida sibona ia gaukaralaia taunimanima hutuma ia ubua totona. Hari, ia be unai bamona dala ia gaukaralaia Baibel ena hadibaia herevadia ia halasia totona.

⁵ Unai dainai, “ruma ia naria tauna mai ena kamonai, aonega tauna unai,” be horoa tadikaka haida sibona, bona idia be Keriso ena lohia negana lalonai, Dirava ena hereva idia hegaegaelaia bona halasia noho. (Luka 12:42) Nega dokona ai, unai horoa tadikakadia idia gwauraia, “hesiai tauna mai ena kamonai, bona mai ena aonega” be hedikwota ai idia gaukara hebou noho. Hari, unai horoa tadikakadia be, Iehova ena Witnes taudia edia Hakaua Oreana.

⁶ Keriso ese unai orea ia gaukaralaia Baibel ena peroveta herevadia edia guguru daladia idia hahedinaraia bona nega korikori ai ita badinaia diba Baibel ena Hakaua herevadia idia henia. Unai be Iehova ena Witnes taudia edia kongrigeisen momo amo idia halasia. (Isa. 43:10; Gal. 6:16) Baibel negadia ai, hesiai tauna namona ese ena biaguna ena ruma ia naria. Unai hegeregerena, Iesu ese hesiai tauna mai ena kamonai bona mai ena aonega dekenai maduna ia henia abidadama taudia ia naria namonamo totona. Danu hesiai tauna mai ena kamonai ese ena biaguna ena kohu, haroro gaukara, hebouhebou maragidia bona badadia edia program idia naria, maduna idauidau huaia taudia idia abia hidi bona Baibel pablikeisen idia halasia, unai amo “hesiai taudia” ma haida ese namo idia davaria.​​—Mat. 24:45.

⁷ Vadaeni, Biaguna ena “hesiai taudia” ma haida be daidia? Ita gwau diba hesiai tauna mai ena kamonai ese do ia ubua taudia. Matamanai, Biaguna ena hesiai taudia ma haida be horoa taudia sibona. To gabeai, “mamoe ma haida” o hutuma bada takudia be Biaguna ena hesiai taudia ma haida ai idia lao danu. (Ioa. 10:16) Unai orea rua be hesiai tauna mai ena kamonai ese Baibel ena hereva ia halasia amo ia ubudia.

⁸ Hisihisi badana lalonai, Iesu be inai nega oromana dikana hahemaoro henia totona do ia mai neganai, hesiai tauna mai ena kamonai do ia abia hidi “iena kohu ibounai ia naria totona.” (Mat. 24:46, 47) Unai hesiai tauna mai ena kamonai oreana be edia guba ahuna do idia abia. Idia bona 144,000 taudia oredia be Keriso ida guba ai do idia lohia hebou. Ena be hesiai tauna mai ena kamonai bona mai ena aonega oreana be tanobada ai do ia noho lasi, to Iehova bona Iesu ese do idia abia hidi “lohia taudia,” ese Mesia ena Basileia henunai do idia noho taudia dekenai hadibaia herevadia do idia henia.​​—Sal. 45:16.

DAHAKA DAINAI ‘ITA IDIA HAKAUA TAUDIA DO ITA LALOATAO’?

⁹ Badina momo dainai ‘hakaua taudia do ita laloatao’ bona idia ita abidadama henia. Dahaka dainai unai ita karaia neganai namo do ita davaria? Aposetolo Paulo ia gwau: “Badina idia ese umui idia naria noho, gabeai Dirava ena vairanai edia gaukara ena anina do idia gwauraia hedinarai. Idia henunai umui noho neganai, mai moale ida edia gaukara do idia karaia, bona do idia lalohisihisi lasi, badina bema mai lalohisihisi ida idia karaia, namo ta do umui davaria lasi.” (Heb. 13:17) Ita idia hakaua taudia edia hereva ita kamonai henia bona badinaia be mai anina bada, badina iseda hetura karana Iehova ida bona iseda namo idia laloa bada.

¹⁰ Korinto Ginigunana 16:14 dekenai, Paulo ia gwau: “Namona be umui karaia gaudia ibounai be mai lalokau ida umui karaia.” Mai lalokau ida Dirava ena taunimanima totona disisen idia karaia. Korinto Ginigunana 13:4-8 ese lalokau ia herevalaia neganai, ia gwau: “Lalokau be ia haheauka bona ia hebogahisi. Lalokau be ia mama lasi. Ia heagi lasi, bona ia hekokoroku lasi. Lalokau be dala kererena ai ia kara lasi, ia be sibona ena namo ia tahua lasi, bona ia badu haraga lasi. Bona ia be ta ena kerere ia laloatao noho lasi. Lalokau be kara maoromaoro lasi karana ia moalelaia lasi, to hereva momokani ia moalelaia. Lalokau be gau ibounai dekenai ia gini goada, gau ibounai ia abidadama henia, gau ibounai lalonai ia be mai ena helaro, bona gau ibounai ia haheaukalaia. Lalokau be ia ore diba lasi.” Iehova ena taunimanima edia namo totona idia karaia disisen ibounai be mai lalokau ida idia karaia dainai, ita diba momokani edia hakaua dalana henunai do ita noho namonamo. Unai ese Iehova ena lalokau ia hahedinaraia.

¹¹ Aposetolo edia negai hegeregerena, hari Iehova ia gaukaralaia hakaua taudia danu be goevadae lasi taudia. To, Iehova ese guna goevadae lasi taudia ia gaukaralaia ena ura hagugurua totona. Noa ese bouti ia haginia bona iena negai ia vara dika badana ia harorolaia. (Gen. 6:13, 14, 22; 2 Pet. 2:5) Mose be Iehova ese ia abia hidi ena taunimanima be Aigupito amo ia hakaua raka-lasi totona. (Eso. 3:10) Goevadae lasi taudia be lauma helaga ena heduru amo Baibel idia torea. (2 Tim. 3:16; 2 Pet. 1:21) Hari, Iehova ese goevadae lasi taudia ia gaukaralaia haroro gaukara bona hahediba taudia halaoa gaukarana idia gunalaia karana ese iseda abidadama Iehova ena orea dekenai ia hamanokaia lasi be namo. To ita ia hagoadaia, badina ita diba bema Iehova ena heduru be lasi, iena orea ese gau ta do idia hagugurua lasi. Hesiai tauna mai ena kamonai oreana ese metau idauidau idia davaria bona idia haheaukalaia karana ese ia hahedinaraia, Dirava ena lauma ese idia ia gunalaia. Hari inai negai, Iehova ese ena tanobada oreana dekenai hahenamo momo ia henia. Unai dainai, mai kudouna ibounai ida ita durua bona ita abidadama henia.

ISEDA ABIDADAMA ITA HAHEDINARAIA DALANA

¹² Kongrigeisen lalonai idia abia hidi taudia be mai moale ida edia maduna idia abia dae bona unai maduna idia huaia namonamo neganai, edia abidadama Iehova ena orea dekenai idia hahedinaraia. (Kara 20:28) Ita be Basileia harorolaia taudia dainai, mai ura bada ida ruma-ta-ruma-ta gaukara, lou henia, bona Baibel stadi ita karaia. (Mat. 24:14; 28:19, 20) Hesiai tauna mai ena kamonai ese Baibel ena hereva idia halasia amo namo ita abia totona, namona be Kongrigeisen heboudia, bona hebou badadia bona maragidia totona ita hegaegae bona ita lao. Unai Keristani heboudia dekenai iseda tadikakadia ida ita hebamo bona hagoadaia heheni neganai, namo bada ita abia.​​—Heb. 10:24, 25.

¹³ Danu, iseda kohu eiava moni amo unai orea ita durua karana ese iseda abidadama unai orea dekenai ia hahedinaraia. (Aon. 3:9, 10) Bema ita diba iseda tadikakadia be tauanina dalanai idia dabu, kara haraga ita durudia. (Gal. 6:10; 1 Tim. 6:18) Unai ita karaia badina iseda tadikaka ita lalokau henidia, ita noho hegaegae Iehova bona ena orea amo hahenamo ita abia dainai, iseda tanikiu karana ita hahedinaraia totona.​​—Ioa. 13:35.

¹⁴ Danu, unai orea ese idia karaia disisen ita badinaia karana amo iseda abidadama unai orea dekenai ita hahedinaraia. Unai ita karaia totona, namona be mai manau ida ita idia gunalaia taudia hegeregere, sekit naria taudia bona kongrigeisen elda taudia edia hakaua daladia ita badinaia. Unai tadikakadia danu be ita idia “hakaua taudia,” unai dainai idia ita kamonai henia bona badinadia. (Heb. 13:7, 17) Ena be edia disisen haida ita lalopararalaia namonamo lasi to ita diba bema ita badinaia, namo do ita abia. Danu, Iehova ena Hereva bona ena orea ita kamonai henia neganai, ita do Ia hanamoa. Unai dainai, iseda Biaguna, Iesu Keriso, ita kamonai henia be namo.

¹⁵ Oibe, badina momo dainai hesiai tauna mai ena kamonai bona mai ena aonega ita abidadama henia diba. Satani, inai nega oromana ena dirava, ia hekwarahi bada Iehova ena ladana bona ena orea ia hadikaia totona. (2 Kor. 4:4) Satani ena koikoi karadia dekenai oi moru lasi! (2 Kor. 2:11) Satani ia diba “iena nega be ia kwadogi” bona kahirakahira guri dobu masemase lalonai do idia negea vareai, unai dainai ia gaukara goada Iehova ena taunimanima momo ia hamorua totona. (Apok. 12:12) To, Satani ese ena gaukara ia habadaia lalonai, namona be Iehova kahirakahira ita lao. Namona be Iehova bona ia gaukaralaia hesiai tauna mai ena kamonai bona mai ena aonega ita abidadama henia. Unai ita karaia neganai tadikaka oreana lalonai lalotamona do ia noho.