Kongrigeisen Ena Heau Bona Hakaua Dalana

APOSETOLO PAULO ese ena revareva ginigunana ai Korinto taudia ia tore henidia neganai, ia ese Dirava ena kara badana ta ia herevalaia, ia gwau: “Dirava be maino Diravana, bona gau ibounai ia karaia namonamo.” Bona kongrigeisen heboudia ia herevalaia neganai, ia gwau: “Namona be gau ibounai do umui karaia namonamo bona dala maorona ai umui karaia.”​​—1 Kor. 14:33, 40.

² Unai revareva ena matamana kahanai, Paulo ese Korinto kongrigeisen lalonai ia vara hepapahuahu karana dainai sisiba ia henia. Paulo ese unuseni idia noho tadikaka ia hagoadaia, ‘mai lalotamona ida idia hereva,’ idia “lalotamona momokani” bona edia “ura danu ia tamona be namo.” (1 Kor. 1:10, 11) Unai murinai, kongrigeisen ena lalotamona ia hadikaia gaudia dainai idia ia sisiba henia. Paulo ese taunimanima edia tauanina ena gaukara dalana amo lalotamona bona gaukara hebou karana ia hahedinaraia. Ia ese Keristani kongrigeisen lalonai idia noho taudia ibounai ia hagoadaia, herevana edia maduna be dahaka, to namona be mai lalokau ida ta ta idia kara henia. (1 Kor. 12:12-26) Kongrigeisen lalonai unai bamona idia gaukara hebou ese ia hahedinaraia edia gaukara idia haria namonamo.

³ To Keristani kongrigeisen be edena bamona ia gaukara? Daika ese unai gaukara ia naria? Edena dala idia gaukaralaia ia heau namonamo totona? Daika idia abia hidi gaukara karaia totona? Baibel ese ita ia durua diba unai henanadai edia haere maorodia ita davaria totona.​​—1 Kor. 4:6.

TIOKRATIK DALANAI IA GAUKARA

⁴ Pentekoste 33 C.E. ai, Keristani kongrigeisen ia matamaia. Unai negai ia noho kongrigeisen dekenai dahaka ita dibaia? Unai kongrigeisen be tiokratik dalanai ia gaukara bona idia naria, anina be, Dirava (the·osʹ, Grik gado) ena lohia (kraʹtos) henunai idia gaukara. Petero Ginigunana 5:10, 11 lalonai unai hereva rua idia hahanaia be “Dirava” bona “goada.” Lagani 2,000 gunanai, Ierusalema ai idia vara gaudia ese idia hamomokania, Dirava ese horoa Keristani taudia edia kongrigeisen ia haginia. (Kara 2:1-47) Unai be iena ruma bona iena bese. (1 Kor. 3:9; Efe. 2:19) Aposetolo edia negai kongrigeisen ia gaukara bona heau dalana be Dirava ena Keristani kongrigeisen ese hari idia badinaia noho.

⁵ Kongrigeisen ginigunana idia hamatamaia neganai, hahediba taudia 120 bamona idia noho. Lauma helaga be idia latanai ia bubua neganai, Ioela 2:28, 29 ena hereva ia guguru. (Kara 2:16-18) To unai dina tamona ai, taunimanima 3,000 bamona be ranu bapatiso idia abia bona Dirava ena lauma amo ia horoa natudia edia kongrigeisen lalonai idia vareai. Idia ese Keriso ena sivarai idia abia dae bona “aposetolo taudia edia hahediba herevadia idia kamonai namonamo noho.” Unai murinai, “dina ta ta ai Iehova ese taunimanima ia hamauria bona idia be hahediba taudia ai idia lao.”​​—Kara 2:41, 42, 47.

⁶ Ierusalema dekenai kongrigeisen taudia edia namba ia tubu daekau dainai, Iuda taudia edia hahelaga tauna badana be ia maumau, ia gwau Iesu murinai idia raka taudia edia hahediba herevadia ese Ierusalema ia hahonua. Ierusalema ai, kongrigeisen lalonai idia vareai hahediba taudia matamatadia momo be Iuda edia hahelaga taudia.​​—Kara 5:27, 28; 6:7.

⁷ Iesu ia gwau: “Ierusalema, Iudea ibounai, Samaria bona tanobada ena daudau momokani gabudia dekenai lau do umui gwauraia hedinarai.” (Kara 1:8) Stefano ia mase murinai Ierusalema dekenai dagedage bada ia vara neganai, unuseniai idia noho hahediba taudia be Iudea bona Samaria ena gabu idauidau dekenai idia lao. To, idia lao gabudia dekenai sivarai namona idia harorolaia bona momo be hahediba taudia ai idia halaoa, Samaria taudia haida danu. (Kara 8:1-13) Gabeai, sivarai namona be kopina utua lasi taudia, o Idau bese taudia dekenai idia harorolaia bona anina namona ia vara. (Kara 10:1-48) Unai haroro gaukara amo momo be hahediba taudia ai idia lao dainai, Ierusalema ena murimuri ai idia noho hanuadia dekenai kongrigeisen matamatadia idia haginia.​​—Kara 11:19-21; 14:21-23.

⁸ Unai kongrigeisen matamatadia ta ta edia gaukara idia karaia namonamo bona Dirava ena tiokratik dalana idia badinaia totona, dahaka idia karaia? Dirava ena lauma helaga amo tatau haida idia abia hidi mamoe oreana idia naria totona. Paulo bona Banaba edia misinari loaloa ginigunana ai, tatau haida idia abia hidi, elda taudia ai idia lao totona. (Kara 14:23) Baibel torea tauna Luka ese aposetolo Paulo be Efeso kongrigeisen ena elda taudia danu ia hebou karana ia herevalaia. Paulo be idia dekenai ia gwau: “Do umui naria namonamo, umui sibona bona mamoe oreana ibounai danu. Lauma helaga ese umui ia abia hidi Dirava ena kongrigeisen umui naria bona hakaua totona. Unai kongrigeisen be ia sibona ena Natuna ena rara amo ia hoia.” (Kara 20:17, 28) Baibel ena hahegani elda taudia totona idia badinaia dainai, idia hegeregere elda ena maduna idia huaia. (1 Tim. 3:1-7) Tito, Paulo danu ia gaukara hebou tauna, be gwaumaoro idia henia Kerete kongrigeisen lalonai elda taudia ia abia hidi totona.​​—Tito 1:5.

⁹ Kongrigeisen matamatadia momo idia haginia dainai, Ierusalema ai idia noho aposetolo bona elda taudia be gabu ibounai dekenai idia noho Keristani kongrigeisen idia naria. Idia be hakaua oreana ai idia lao.

¹⁰ Aposetolo Paulo ese Efeso kongrigeisen ia tore henia neganai ia gwau, bema Dirava ena lauma ena hakaua hegeregerena idia gaukara, Keristani kongrigeisen be Iesu Keriso ena kwara dagina henunai mai lalotamona ida do idia gaukara noho. Danu ia ese unuseniai idia noho Keristani taudia ia hagoadaia do idia manau, “lauma helaga ese ia henia lalotamona karana” idia badinaia bona maino ai idia noho totona. (Efe. 4:1-6) Bena Paulo ese Salamo 68:18 ena hereva ia gwauraia bona badinaia, ia ese Iehova ena lauma amo, tatau haida ia abia hidi kongrigeisen lalonai aposetolo taudia, peroveta taudia, haroro taudia, mamoe naria taudia, bona hahediba taudia ai do idia lao totona. Unai tatau be Iehova ena harihari gaudia, kongrigeisen ibounai do idia durua unai amo idia ese Dirava do idia hamoalea diba.​​—Efe. 4:7-16.

HARI KONGRIGEISEN ESE APOSETOLO EDIA DALA IDIA TOHOTOHOA

¹¹ Hari, Iehova ena Witnes taudia be aposetolo taudia ese kongrigeisen idia hakaua dalana idia badinaia. Unai dala amo lauma helaga ese ia horoa taudia be tanobada hegegemadai kongrigeisen ibounai idia naria. (Sek. 8:23) Iesu Keriso dainai unai ia vara. Ena gwauhamata hegeregerena, ena horoa hahediba taudia ida do ia noho “ela bona inai nega oromana ena dokona.” Ia tubu noho kongrigeisen dekenai idia mai taudia ese Dirava ena sivarai namona idia abia dae, Iehova dekenai edia mauri idia gwauhamatalaia, bona Iesu ena hahediba taudia bamona bapatiso idia abia. (Mat. 28:19, 20; Mar. 1:14; Kara 2:41) Idia laloparara Iesu Keriso be “mamoe naria tauna namona,” bona ia be horoa Keristani taudia bona “mamoe ma haida” edia Kwarana. (Ioa. 10:14, 16; Efe. 1:22, 23) Unai “mamoe orea tamona” idia lalotamona noho totona idia ese Keriso ena kwara dagina idia abia dae bona ia ese ia abia hidi “hesiai tauna mai ena kamonai, bona mai ena aonega,” oreana ese kongrigeisen idia naria dalana idia badinaia. Namona be hari unai orea ita abidadama henia noho.​​—Mat. 24:45.

OREA NARIA TOTONA KOPOREISEN ENA GAUKARA

¹² Nega korikori ai Dirava ena hereva halasia, bona dokona ia do ginidae lasi lalonai Basileia ena sivarai namona idia harorolaia totona, koporeisen orea haida idia haginia be namo. Unai koporeisen oreadia be idia noho tanodia ta ta ena taravatu hegeregerena idia rejista bona idia gaukara hebou. Unai koporeisen ese tanobada hegegemadai sivarai namona harorolaia gaukarana idia durua.

BRENS ENA GAUKARA DALANA

¹³ Brens ofesi ta idia haginia neganai, elda toi eiava ma haida idia abia hidi Brens Komiti gaukara idia karaia totona, bona idia ese edia tano eiava edia brens henunai idia noho tanodia edia gaukara idauidau idia naria. Unai komiti ena memba taudia amo, Tamona be Brens Komiti kodineita ena gaukara ia karaia.

¹⁴ Unai brens ta ta edia henunai idia noho kongrigeisen ibounai be sekit ta ta dekenai idia hapararaia. Unai sekit ta ta edia gabu bona idia gaukaralaia gado ena bada bona kongrigeisen edia namba hegeregerena. Sekit naria tauna ta idia abia hidi, sekit ta ta lalonai idia noho kongrigeisen ia vadivadi henia totona. Sekit naria taudia be brens ofesi amo hakaua herevadia idia abia edena dala ai edia maduna idauidau idia huaia namonamo totona.

¹⁵ Kongrigeisen ese orea ena gaukara dalana idia badinaia, badina unai ese idia ibounai do ia durua. Danu idia ese brens, sekit bona kongrigeisen ai idia noho elda taudia idia abia dae. Idia be nega korikori ai Dirava ena hereva be hesiai tauna mai ena kamonai, bona mai ena aonega amo idia abia. Hari, hesiai tauna mai ena kamonai ese Keriso ena kwara dagina, Baibel ena hakaua herevadia, bona lauma helaga ena hakaua dalana ia badinaia. Ita ibounai be mai lalotamona ida ita gaukara hebou neganai, ita abia hahenamo be Keristani ginigunadia idia abia hahenamo hegeregerena: “Kongrigeisen taudia edia abidadama ia goada ia lao bona dina ta ta ai edia namba ia bada daekau.”​​—Kara 16:5.