Bapatiso​​—Tahua Gauna Namona!

Iesu ia gwau ta be Keristani tauna ai ia lao totona, bapatiso ia abia be namo. (Mataio 28:​19, 20 duahia.) To bapatiso ena anina be dahaka? Bona ta be dahaka do ia karaia unai tahua gauna namona ia hagugurua totona?

1. Bapatiso ena anina be dahaka?

Inai Grik gado hereva “bapatiso” ena anina be ranu lalonai “hadihoa.” Iesu be bapatiso totona Ioridane Sinavai lalonai ia diho, bena maoromaoro “ranu amo ia daekau.” (Mareko 1:​9, 10) Unai hegeregerena, Keristani korikoridia be bapatiso idia abia totona, ranu lalonai idia atoa diho.

2. Bapatiso ese dahaka ia hahedinaraia?

Bapatiso karana amo ta ia hahedinaraia Iehova Dirava dekenai ena mauri ia gwauhamatalaia. Edena dala ai ta be ena mauri ia gwauhamatalaia diba? Ta ia do bapatiso lasi neganai, guriguri amo Iehova do ia hamaoroa Ia do ia hesiai henia hanaihanai totona. Ia gwauhamata Iehova sibona do ia tomadiho henia, bona ena mauri lalonai do ia hahedinaraia Dirava ena ura ia karaia be gau badana. Abia hidi do ia karaia “sibona ena ura ia dadaraia” bona Iesu ena hahediba dalana bona haheitalai do ia badinaia noho. (Mataio 16:24) Iena gwauhamata bona bapatiso ese dala ia kehoa Iehova bona tadikaka taihu ia tura henidia totona.

3. Ta be dahaka do ia karaia ia bapatiso totona?

Iehova oi dibaia bona emu abidadama ia dekenai oi hagoadaia karana ese oi do ia durua oi bapatiso totona. (Heberu 11:6 duahia.) Emu diba ia bada bona abidadama ia goada neganai emu lalokau Iehova dekenai do ia bada danu. Unai dainai do oi ura ia oi harorolaia bona ena taravatu do oi badinaia. (2 Timoteo 4:2; 1 Ioane 5:3) Bema ta be ena mauri ai “Iehova ena dala hegeregerena ai” ia raka noho, abia hidi ia karaia diba Dirava dekenai ena mauri ia gwauhamatalaia bona bapatiso ia abia.​​—Kolose 1:​9, 10.a

DIBA MA HAIDA ABIA

4. Iesu ena bapatiso karana amo diba do ita abia

Mataio 3:​13-17 duahia Iesu ia bapatiso ena sivarai dibaia totona. Bena inai henanadai herevalaia:

• Iesu be ia beibi negana ai ia bapatiso, a?

• Edena dala ai bapatiso ia abia? Ranu sisina amo ena kwarana idia haparia, a?

Iesu ia bapatiso murinai, Dirava ese ia henia gaukarana ia karaia matamaia. Luka 3:​21-​23 bona Ioane 6:​38 duahia, bena inai henanadai herevalaia:

• Iesu ia bapatiso murinai, ena mauri lalonai dahaka gaukara ia atoa guna?

5. Bapatiso be oi hagugurua diba tahua gauna

Reana matamanai gwauhamata bona bapatiso dainai do oi lalohekwarahi. To, bema Iehova oi dibaia namonamo, do oi daradara lasi unai mai anina bada disisen oi karaia totona. Unai bamona idia karaia taudia haida itaia totona, VIDIO itaia.

VIDIO: Emu Hetura Karana Iehova ida Hagoadaia (1:​11)

Ioane 17:3 bona Iamesi 1:5 duahia, bena inai henanadai herevalaia:

• Dahaka ese ta do ia durua bapatiso ia abia totona?

1. Iseda gwauhamata ita karaia totona, guriguri amo Iehova do ita hamaoroa, ia do ita hesiai henia hanaihanai

2. Ita bapatiso negana ai, taunimanima vairanai Dirava dekenai ita karaia gwauhamata ita hamomokania

6. Ita bapatiso neganai ita be Iehova ena famili ai ita lao

Ita bapatiso neganai, ita be tanobada ibounai lalotamona famili ta lalonai ita vareai. Herevana iseda gabu bona mauri dalana be idauidau, to ita abia dae hahediba herevadia bona taravatu be tamona. Salamo 25:14 bona 1 Petero 2:​17 duahia, bena inai henanadai herevalaia:

• Edena dala ai bapatiso ese ta ena hetura karana Iehova bona Ia idia tomadiho henia taudia ida ia hagoadaia?

POINT BADANA

Iesu ia gwau Keristani taudia idia bapatiso be namo. Unai tahua gauna hagugurua totona, ta ese ena abidadama Iehova dekenai do ia hagoadaia, iena taravatu ia badinaia, bona Ia dekenai ena mauri ia gwauhamatalaia be namo.

Riviu

• Bapatiso ena anina be dahaka? Bona dahaka dainai ia be mai anina bada?

• Edena dala ai gwauhamata bona bapatiso idia gaukara hebou?

• Ta be dahaka gau haida do ia karaia guna unai amo ia gwauhamata bona bapatiso ia abia?

REFERENS ITAIA

Bapatiso ena anina oi dibaia.

“Bapatiso be Dahaka?” (Websait atikol)

Ta be bapatiso ia abia totona do ia karaia gaudia riviulaia.

“Iehova Ita Lalokau Henia Dainai Bapatiso Ita Abia” (Gima Kohorona, March 2020)

Tau ta ese ena lalona ia hadaia bapatiso ia abia ena sivarai oi duahia.

“Idia Ura Lau Sibona ese Hereva Momok ani Do Lau Abia Dae” (Gima Kohorona, February 1, 2013)

Bapatiso be tahua gauna namona ena badina bona unai totona oi hegaegae diba dalana oi laloa.

“Bapatiso Lau Abia be Namo, A?” (Memero Kekeni Edia Henanadai​​—Haere Maorodia, Volium 2, karoa 37)