Iesu ena Mauri bona Gaukara

Sabati Dinana ai Dahaka be Taravatu Lasi?

IA BE Sabati dinana. Iesu be Galilea Gohuna kahirakahira dekenai ia noho dubuna dekenai ia lao. Tau ta unuseniai ena imana be ia dika. Toretore taudia bona Farisea taudia ese Iesu idia raraia, unai tau do ia hanamoa eiava. Bena idia nanadaia, idia gwau: “Sabati dinana dekenai gorere hanamoa be ia maoro?”

Iuda tomadiho gunalaia taudia idia laloa, Sabati dinana ai bema gorere tauna ia mase gwauraia, ta ese ia hanamoa be taravatu lasi. To edia hereva ma ta be inai: Sabati dinana ai, bema ta ena turia ta ia kwaidu, idia kwatua be taravatu. Unai dainai toretore taudia bona Farisea taudia ese Iesu idia henanadai henia, badina dala idia tahua kerere be ia dekenai do idia doria.

Iesu be edia lalohadai ia diba. Danu, ia diba Bible ese ia gwauraia lasi taravatudia Sabati dekenai be idia abia dae. Vadaeni, Iesu ese imana ia dika tauna ia hamaoroa, ia gwau: “Oi toreisi, edia huanai oi gini.”

Bena Iesu ese toretore taudia bona Farisea taudia ia hereva henidia, ia gwau: “Umui daika ena mamoe bema tamona sibona, vadaeni bema Sabati dinana dekenai guri lalonai ia moru diho, do umui veria daekau lasi, a?” Mamoe amo bisinesi idia karaia, unai dainai bema guri lalonai ta ia moru, unuseniai do idia rakatania lasi ela bona kerukeru, do ia gorere bena ena davana do ia maragi garina. Danu, Bible ia gwau: “Kara maoromaoro tauna ese ia ubua animalana ia bogaia hisi.”

Vadaeni, Iesu ese taunimanima bona mamoe ia hahegeregeredia; ia gwau: “Be, taunimanima ese mamoe idia hanaia lasi, a? Unai dainai, Sabati dinana dekenai kara namo karaia be ia maoro.” Tomadiho gunalaia taudia ese Iesu ena hereva idia hakoikoia diba lasi dainai, idia hereva lasi.

Mai badu bona lalohisihisi ida Iesu ese ia itadia, badina edia lalona be auka. Bena imana dika tauna dekenai ia gwau: “Oiemu imana oi atoa maoromaoro.” Ia atoa maoromaoro, vadaeni ena imana ia namo lou.

Hari tau ena imana ia namo lou dainai idia moale lasi, to idau, maoromaoro idia lao Herod ena politikol orea taudia ida idia herevahereva hebou Iesu ena mase dalana karaia totona. Sadukea tomadiho oreana taudia haida danu be unai politikol oreana lalonai idia noho. Inai politikol orea bona Farisea taudia idia inai heheni, to hari mai edia lalo-tamona ida Iesu idia inai henia. Mataio 12:​9-14; Mareko 3:​1-6; Luka 6:​6-11; Hereva Lada-isidia 12:10; Esodo 20:​8-10.

◆ Dahaka ia vara dainai Iesu bona Iuda tomadiho gunalaia taudia idia hepapahuahu?

◆ Iuda taudia edia lalohadai be dahaka, Sabati dinana ai gorere taudia hanamodia karana dekenai?

◆ Edia lalohadai kererena hakoikoia totona, Iesu ese edena haheitalai ia gwauraia?