Bema Oi Gwau: “Kopina Do Oi Hasiahua, bona Do Oi Boga Kunu” Unai Sibona be Hegeregere Lasi
“Sedira tadikaka ta o taihuna ta be dabua lasi bona ia be aniani lasi. Vadaeni umui ita … ia gwau: ‘Dirava ese oi do ia hanamoa, oiemu kopina do oi hasiahua, bona do oi boga kunu.’ Bema unai bamona umui hamaoroa, to dabua ta o aniani ta umui henia lasi, emui hereva be anina lasi. … Bema abidadama sibona ia noho, to kara be lasi, unai abidadama be anina lasi.”—IAKOBO 2:15-17.
1. Dahaka dainai tadikaka ta Nigeria dekenai ia dabu?
INAI tau, Lebechi Ukwaraocha be reana lagani 1880 vairanai ia vara, unai dainai ena mauri laganidia be 100 ia hanaia vadaeni. Ena tamana bona sinana idia mase neganai edia juju (o kaivakuku ) ia abia bona ia tomadiho henia. Vadaeni, ena mauri lagani idia 80 neganai Bible ia stadilaia Iehova ena Witness taudia ida. Ia dibaia gaudia ia badinadia bona murinai bapatiso ia abia. Lagani 30 lalodiai ia be Iehova ena Witness tauna ta. Vanegai iena kongregesen ena elda taudia ese ia bona ena lagani 72 adavana, ia be Anglican tomadiho hahinena, idia vadivadi henidia badina medu bada herea ia diho dainai. Idia raruosi idia lalohisihisi badina edia biri rumana ena reirei be ranu henunai ia noho, edia varavara ta lasi dainai edia noho rumana ma ta be lasi, bona heduru taudia be lasi edia ruma hanamoa totona. Bema unai gabu dekenai oi noho Dahaka oi karaia Bible ena sisiba haida ita lalodia guna bena murinai unai sivarai do ita kikilaia.
2. Dahaka dainai “kara namodia” ita lalodia bada be namo?
2 Iesu “Keriso ese iena mauri ia henia ita dainai, … Badina be ia ura orea tamona ita do ia halaoa, ia sibona ena orea, do ita goevagoeva, bona iena kara namodia do ita karaia totona.” (Tito 2:14) Inai kara namodia be mauri ia havaraia Basileia haroro gaukarana. (Mareko 13:10; Apokalupo 7:9, 10) To, Keristen ena “kara namodia” be mai anina bada haroro gaukarana sibona lasi, badina Iesu ena tadina Iakobo ia gwau: “Iseda Tamana bona Dirava vairanai tomadiho dalana goevana bona maorona be inai: tamana lasi natudia bona vabu ita naridia edia hisihisi lalonai, bona sibona ita naria tanobada ena miro ese ita ia hamiroa garina.”—Iakobo 1:27, NW.
3, 4. Timoteo Ginigunana karoa 3-5 ese ita dahaka ia hadibaia “kara namodia” dekenai, bona henanadai haida be dahaka?
3. Keristen ginigunadia edia kongregesen lalodiai “kara namodia” edia gaukara rua idia karaia. 1 Timoteo karoa 3 lalonai elda bona hesiai taudia ese dagi idia abia totona dahaka do idia karaia ia gwauraia murinai, aposetolo Paulo ia gwau: “Mauri Diravana ena ekalesia be … hereva momokani ena du bona iena badina korikori.” (1 Timoteo 3:1-15) Ia hahedinaraia bema Keristen taudia ese hahediba hereva momokanidia idia badinadia do idia mauri diba bona edia hereva idia kamonai henia taudia danu do idia mauri diba. (1 Timoteo 4:16) Unai ia herevalaia murinai Paulo be ma ‘gaukara namona’ ta ia herevalaia, unai be tauanina dalanai Dirava idia abidadama henia vabu korikoridia durua gaukarana.—1 Timoteo 5:3-5.
4 Unai dainai, haroro gaukara ita karaia sibona lasi, to “kara namodia” ma haida ita karaia danu, hegeregere “tamana lasi natudia bona vabu ita naridia edia hisihisi lalonai.” Elda bona hesiai taudia be “hakaua taudia” dainai dahaka do idia karaia idia durudia totona? (Heberu 13:17) Edena bamona ita durudia diba unai gaukara dekenai? Ita sibona be inai “kara namodia” edena bamona ita karaia diba?
Hakaua Namonamo Karana Idia Karaia Elda Taudia
5. Dika ta ia vara neganai Paulo be dahaka ia karaia, bona hari inai negai dahaka idia karaia danu?
5 Iudea lalonai taunimanima ese dika idia davaria neganai, elda tauna Paulo be gaukara ia gunalaia ia durudia totona. Gaukara ia gunalaia dainai daradara ia vara lasi; heduru gaudia idia haridia namonamo diba iboudiai ta ta idia durudia totona. (1 Korinto 16:1-3; Kara 6:1, 2) Hari inai negai danu dika ia vara neganai, hegeregere abata ia mai, ororo kahana ia moru kopukopu dainai, davara hurehure badadia be tano dekenai idia mai, lai dikana ia toa, eiava tano ia mareremarere, elda taudia ese durudia gaukarana idia gunalaia, idia ese ‘haida edia namo idia tahua’ unai.—Filipi 2:3, 4.
6. California, U.S.A. dekenai dika ta ia vara neganai, elda taudia be dahaka idia karaia?
6 October 8, 1986 ena Awake! lalonai Keristen ena kara namona ena sivarai idia torea. California, U.S.A. dekenai ranu ia dogoatao maguna ia makohi bena abata ia havaraia. Haraga herea, lauma dalanai mamoe idia naria taudia ese edia orea taudia idia tahudia, idia ura diba orea taudia haida idia boio eiava lasi, bona idia ura dika idia davaria taudia dekenai muramura, aniani, bona noho rumadia idia henidia. Unai gabu elda taudia bona Iehova ena Witness edia hedikwota ena opesi taudia idia gaukara hebou taunimanima idia durudia totona. Komiti ta idia haginia bona edia Witness tadikakadia idia mai neganai heduru totona, komiti taudia idia haboudia bona idia siaidia lao abata ia hadikaia rumadia idia hagoevaia bona idia hanamodia totona. Elda taudia ese idia hoidia bona idia hariharilaidia gaudia ena gaukara idia gunalaia danu. Inai sivarai ese ia hahedinaraia bema dika ta ia vara neganai namona be “ta ta ena kohu ia hegeregere [neganai], edia harihari gauna do idia siaia lao.” Bema unai bamona oi ura karaia namona be unai gabu ena elda taudia oi hamaorodia guna.—mani Kara 11:27-30 itaia.
7. Dahaka idia vara dainai ita heduru be namo?
7 Dika badana be nega ta ta sibona ia vara bona herevana oi be elda ta eiava lasi, heduru diba, to emu kongregesen lalonai nega momo gau haida idia vara dainai oi heduru be gau badana. Reana idia vara gaudia be dika badana momokani lasi, to bema ita laloaboio bona ita heduru lasi to unai be namo lasi. Iakobo 2:15-17 lalonai idia vara karadia haida ia herevalaidia. Oibe, oiemu kongregesen lalonai haida oi durudia diba bena do ia hedinaraia oiemu ‘abidadama sibona ia noho, eiava kara danu ia noho.’
8. Aonega dalanai kongregesen taudia idia durua totona elda taudia ese dahaka idia karaia?
8 Elda taudia ese gaukara idia gunalaia neganai, namona be “mai ena aonega bona mai ena diba” ida do idia karaia. (Iakobo 3:13) Mai edia aonega danu idia gaukara neganai kongregesen taudia idia naridia diba, badina nega haida tadikaka koikoidia idia lao tadikaka ta ta dekenai (o kongregesen ta ta dekenai) idia dekena amo moni idia abia torehai totona eiava hereva koikoi idia gwauraia “heduru” idia abia totona. Aonega elda taudia ese lahedo taudia idia bogahisihisi henidia lasi, badina Bible ena taravatu be inai: “Bema tau ta gaukara ia ura lasi neganai aniani ta umui henia lasi.” (2 Tesalonika 3:10-15) To, bema ta ia dabu momokani bona idia “bogahisihisi henia lasi” bona tadikaka ese unai bamona idia karaia danu, unai be namo lasi. (1 Ioane 3:17) Aonega do idia gaukaralaia badina Bible ese taravatu maragimaragidia momo amo ita ia hadibaia lasi edena dala amo idia dabu bona dika idia davaria taudia ita durudia totona. Nega idauidau bona gabu idauidau durudia dalana be idauidau.
9. (a) Idau negai Keristen vabudia be edena bamona idia durudia? (b) Hari inai negai heduru haida be edena gabu amo idia abia diba?
9 Haheitalai ta be inai, 1 Timoteo 5:3-10 lalonai Paulo ese vabu korikoridia durudia dalana ia herevalaia, idia dabu dainai. Ia gwau orea lalonai vabu edia tauani varavara korikoridia ese do idia durudia be namo; bema unai maduna idia huaia lasi, Dirava vairanai idia kerere diba. To, bema vabu ese heduru ia abia diba lasi unai varavara amo, vadaeni elda taudia ese dala do idia tahua kongregesen ia durua tauanina dalanai. Hari inai nega lalonai danu, kongregesen haida ese idia dabu taudia haida idia durudia. Tano momo lalodiai takisi idia henia dainai gavamani ese dala ia kehoa buruka taudia eiava gorere taudia eiava gaukara idia davaria diba lasi taudia idia durudia totona. To namona be Keristen elda taudia be ma dala ta amo idia durudia danu. Taunimanima haida idia dabu momokani, bona idia be mai edia dala gavamani amo heduru idia abia totona, to unai heduru tahua dalana idia diba lasi, eiava idia hemarai dainai idia tahua lasi. Bema unai bamona, elda taudia ese welfe opesi dekenai do idia lao diba, eiava unai heduru abia dalana ia diba Witness tauna ta idia nanadaia. Bena murinai idia ese dala idia hegaegaelaia tadikaka o taihu goadana ta ia durua totona, bona unai heduru welfe amo do ia abia diba.—Roma 13:1-4.
Hegaegae Heduru Henia Totona
10. Elda taudia ese kongregesen taudia idia gunalaia neganai, dahaka do idia laloa bada?
10 Idia laloa namonamo elda taudia ese dala idia kehoa mai edia lalokau tadikaka bona taihu ese idia dabu o idia gorere taudia durudia totona. Elda taudia ese kongregesen taudia iboudiai edia namo idia tahua, lauma dalanai bona tauanina dalanai danu. Elda taudia ese “guriguri bona haroro [idia] goada karaia noho” be gau badana. (Kara 6:4) Unai dainai, dala idia hegaegaelaia mahuta gedana eiava hospital dekenai idia gorere taudia ese lauma aniani idia abia totona. Reana elda taudia ese hebou iboudiai edia hereva do idia atoa kaset dekenai. Elda bona hesiai taudia ta ta ese unai kaset idia laohaidia neganai, idia be mai edia dala unai taudia idia hagoadadia ma lauma gaudia haida amo. (Roma 1:11, 12) Idia lao itadia neganai unai gorere tadikaka o taihu idia dabu gaudia do idia diba danu.
11. Dahaka idia karaia taihu ta idia durua totona?
11 Reana do idia itaia kongregesen taihuna ta ia buruka eiava aena idia dika dainai Kingdom Hall dekenai ia mai lasi, to bema taihu ta be ia durua ia digu bona ena dabua ia atoa namonamo totona, reana do ia hebou diba bona haroro gaukara sisina ia karaia diba danu. (Salamo 23:1, 2, 5 itaia.) Elda taudia ese elda ta idia abia hidi unai gaukara ia karaia totona. Reana kongregesen taudia idia nanadaidia ta ese unai bamona taihu ia hakaua hebou dekenai o edia motuka dekenai ia guia totona. Bema sediual idia karaia tadikaka o taihu idauidau wiki ta ta ai idia heduru totona, unai be namo.
12. Gorere eiava buruka taudia durudia gaukarana lalonai edena bamona elda taudia ita durudia diba?
12 Elda taudia ese lalokau daladia ma haida amo unai bamona tadikaka o taihu idia durudia diba. Hegeregere, bema buruka o gorere taihuna ta ese ena ruma ia naria namonamo diba lasi, guna ia karaia bamona, reana hesiai tauna bona ma haida ese idia durua diba, ani? Do idia lao bona rei idia utua maragi bona gabu idia hagoevaia, bema unai bamona idia karaia do ia moale, badina ia kahirakahira taudia do idia maumauraia diba lasi. Reana haida ese rei dikana idia kokia diba o ranu do idia atoa palaoapalaoa dekenai, ani? Reana taihu ta be sitoa dekenai ia lao aniani hoia totona, namona be gorere taihuna dekenai ia lao bona ia nanadaia ena ura gaudia danu ia hoidia totona, ani? Laloaboio lasi, aposetolo taudia ese taunimanima idia durudia inai dala amo, bona edia kongregesen lalodiai taunimanima idia hegaegaelaidia idia heduru totona.—Kara 6:1-6.
13. Elda taudia ese unai Nigeria tadikakana idia durua neganai, dahaka ia vara?
13 Paragraf ginigunana dekenai ita kikilaia sivaraina lalonai Keristen elda taudia ese kara namona idia hahedinaraia. Idia ese Lebechi Okwaraocha bona ena adavana idia vadivadi henidia neganai edia hekwakwanai idia itaia. Unai dainai haraga herea elda orea taudia ese durudia dalana idia herevalaia bona kongregesen taudia idia hadibadia namona be unai tau ena ruma do idia hanamoa lou. Tadikaka bona taihu idauidau ese ruma haginia kohudia idia mailaia bona idia heduru unai gaukara dekenai. Wiki tamona lalonai idia ese ruma mai goadana idia haginia, ena guhi be tini amo idia koua. Nigeria amo inai bamona sivarai idia torea: “Hanua taudia idia hoa badina tadikaka bona taihu be hora momo idia gaukara, idia ese aniani bona inua gaudia idia mailaia bona idia henidia. Tadikaka idia ura ruma idia haorea medu do ia diho lou garina. Hanua taudia momo ese ma tomadiho orea taudia idia maumauraidia, idia gwau taunimanima idia durudia lasi, to edia kohu idia dadihaia. Inai gabu ena taudia iboudiai ese inai kara namona idia kikilaia momo. Harihari unai hanuadia be aiemai hereva idia ura kamonai henia, bona Bible stadi momo ai hamatamaia.”
Inai “Kara Namodia” Oi Karaia Diba
14. Tadikaka totona “kara namodia” ita karaia ena badina be dahaka?
14 Nega haida buruka o gorere tauna o hospital dekenai ia noho tauna, o dika idauna ta ia davaria tauna ena hekwakwanai ita diba. Bema dala ia noho ita ese Keristen ena kara ita hahedinaraia totona, namona be kara haraga ita lao durua totona, ani? (Kara 9:36-39) Ita ese haida ita durudia ta ese ita ia doria dainai lasi, to ita durudia Keristen lalokauna dainai. Taunimanima durua ena badina badana be inai: Unai tau do ita bogahisihisi henia bona ita ura durua. Ita ese buruka taudia ita hamatamatadia lou diba lasi, o hoa dalana amo gorere taudia ita hanamodia diba lasi, eiava kongregesen taudia iboudiai edia mauri dalana ita hanamoa diba lasi. To, taunimanima ita bogahisihisi henidia bona ita ura durudia be gau badana. Bema unai bamona ita laloa bona karana ita karaia, ita bona ita durua taudia padadiai lalokau karana do ia hagoadaia. Unai bamona kara ia vara Paulo bona Onesimo padadiai, ia be Keristen matamatana ta, bona ‘Paulo ia durua dibura ai ia noho neganai.’—Filemona 10-13; Kolose 3:12-14; 4:10,11.
15. Edena dala amo idia dabu momokani taudia ita durudia diba?
15 Nega haida ta ia dabu neganai harihari gauna ita henia hehuni eiava sibona ia noho neganai ita henia diba, ita durua totona. Reana tadikaka ta ese ena moni gaukara amo idia hadokoa, bona ma gaukara ta ia do tahua noho, ani? Reana taihu ta ia gorere dainai do ia henia monina doketa dekenai be ia bada; reana aksiden ia abia eiava raskol ese ena kohu idia dadihaia, ani? Nega haida inai bamona hekwakwanai idia vara diba. Ita ese “harihari gauna” ita henia neganai iseda guba Tamana ia itaia bona ia moale. ( Mataio 6:1-4) Bema moni ita henia lasi, namona be Iobu ia karaia hegeregerena, ogogami taudia dekenai dabua bona aniani ita henidia, eiava vabu o tamana lasi merona totona aniani ita nadua bona ita henidia.—Iobu 6:14; 29:12-16; 31:16-22.
16. Edena dala ma haida amo haida ita durudia diba? Haheitalai ta oi gwauraia?
16 Iseda aonega o diba ta dainai taunimanima ita durua diba. Tadikaka ta ese Tadikaka W— ia noia ia ena amo moni ia abia torehai totona. Tadikaka W— ia haere henia manau dalanai, ia gwau: Dahaka dainai oi laloa lau be mai egu moni oi lau henia totona?’ Unai tau ia gwau: ‘Lau diba oiemu moni oi naria namonamo.’ Tadikaka W— ese guna moni ia henia torehai haida idia dabu neganai, to ia laloa namonamo bona unai tau dekenai ia gwau: ‘Sedira, oiemu moni naria namonamo dalana dekenai oi kerere, bema oi ura, moni naria dalana oi do lau hadibaia diba.’ Bema kara ta ia vara dainai tadikaka ta ena moni ia bada lasi, guna ia abia bamona, bona dagi lasi gaukarana ta ia abia, bema ia hekwarahi bada unai gaukara ia karaia namonamo totona, vadaeni ena moni naria dalana ia dibaia bona do ia moale. To, bema tadikaka ia dabu momokani, bona moni ia ura abia torehai, gau badana be moni hida ia abia torehai ia torea pepa ta dekenai, bena ia sainia gabeai hekwakwanai do ia vara garina. Tadikaka momo idia ura lasi moni idia abia torehai, to, idia moale bema tadikaka ese idia durudia edia aonega o diba amo. (Roma 13:8) Emmanuel ena ekspiriens West Africa dekenai ese inai hereva ia hamomokania: Emmanuel be taunimanima huina pakosi gaukarana ia diba, to taunimanima momo idia mai lasi edia huina ia pakosi totona, bona ia lalohisihisi ena mauri durua monina ia hegeregere lasi dainai. Elda ta ese ena lalohisihisi ia itaia bona Emmanuel dekenai ia gwau: ‘Oi ura ma gaukara idauna ta oi karaia, a?’ Emmanuel ia gwau: ‘Oibe, lau ura.’ Ia hekokoroku lasi, ia ura ma gaukara ta ia karaia toho. Unai elda tauna ese taunimanima haida dekenai ia henanadai bona Emmanuel totona gaukara ta ia davaria hospital dekenai. Inai gaukara ia karaia namonamo bona ia be ma haida kongregesen lalonai ia durudia diba.
17. Bema tadikaka ta be hospital dekenai ia noho edena bamona oi durua diba? (Salamo 41:1-3)
17 Bema gorere dainai emu Keristen tadikaka o taihu ta be hospital dekenai ia noho, gau momo oi karaia diba oi durua totona. To gau badana be oi bogahisihisi henia bona oi ura momokani oi durua. Namona be idia dekenai Keristen bukana ena sivarai oi duahia eiava ekspiriens namodia oi kikilaia ena abidadama hagoadaia totona. Tauanina dalanai oi durua diba eiava? Hospital haida dekenai sisita be momo lasi, unai dainai bema doketa idia ura gorere tauna oi durua ia digu totona bona aniani oi henia, unai be namo. Reana aniani namona oi nadua bona oi laohaia, o ena huina oi huria o oi durua hadigua totona. Reana rami ta oi henia diba, ani? (2 Timoteo 4:13) Reana gau ta totona ia lalo-hekwarahi, unai gau oi naria diba oi durua totona, a? Reana ia laloa daika ese ena pei do ia abia, daika ese ena paua davana do ia laohaia. Bema oi durua ena lalo-hekwarahi do ia ore, hegeregere post opesi dekenai ena Leta oi abia, bona ena uma dekenai ranu oi henia.
18. Tadikaka idia dabu neganai, emu lalona oi hadaia dahaka oi karaia totona?
18 Ita ta ta iboudiai ita goada karaia iseda heduru karana ita habadaia totona be namo, dika ita gwau, “Kopina do oi hasiahua, bona do oi boga kunu,” to ita durua lasi. (Iakobo 2:16) Oiemu kongregesen dekenai idia noho tadikaka bona taihu oi lalodia. Idia haida be edena bamona? Idia haida be idia dabu momokani, idia gorere, edia tauanina kahana ta idia dika, eiava gorere dainai mahuta gedana dekenai idia hekure, a? Keriso ia mase kongregesen taudia ia lalokau henidia dainai, to oi be dahaka oi karaia oi durudia totona? Bema hanaihanai oi hegaegae heduru karadia oi karaia totona, hekwakwanai idia vara neganai kara haraga tadikaka do oi durua.
19. (a) Dahaka dainai tadikaka durua dalana ita lalo-hadailaia namonamo be namo? (b) Edena dala amo taunimanima ita durudia bada, bona dahaka dainai unai be momokani? (Salamo 72:4, 16)
19 Bema ita goada karaia tadikaka bona taihu durudia totona, unai ese ia hahedinaraia iseda abidadama be ia mase lasi. Iseda abidadama karana ese ita ia doria Keristen haroro gaukara ita goadalaia totona. Namona be inai ita laloa namonamo, tauanina dalanai taunimanima ita durudia, to hanaihanai Keristen haroro gaukarana ita karaia danu, namo lasi inai gaudia amo ta ita reaia. (Mataio 15:3-9; 23:23 itaia.) Iesu ena sisiba Mareta bona Maria dekenai ese ia hahedinaraia Iesu ese inai gau rua ia laloa namonamo. Ia gwau bema tau ta ese tauanina durua gaudia bona lauma durua gaudia ia hahegeregeredia, “gau namona ia abia hidi” gauna be lauma durua gaudia, badina unai gaudia do idia ore lasi. (Luka 10:39-42) Hari inai tanobada dikana lalonai gorere bona ogogami taudia idia do ore lasi, unai dainai ita kara namo henidia be namo. (Mareko 14:7) To, heduru hereadaena bona namo hanaihanai ia havaraia gauna be Dirava ena Basileia ita harorolaia taunimanima dekenai. Iesu ese unai gaukara ia goadalaia. (Luka 4:16-19) Inai dala amo ogogami, gorere, bona tauanina dika taudia ese namo hanaihanai do idia abia diba. Ita moale bada tadikaka bona taihu ita durudia neganai bona Dirava dekenai idia helaro bona idia ese “edia mauri gabeai do ia durua.”—1 Timoteo 6:17-19.
Oi Laloatao Noho A?
◻ Keristen kongregesen lalonai edena “kara namodia” be mai anina bada?
◻ Tauanina dalanai, elda taudia ese tadikaka bona taihu be edena “kara namodia” amo idia durudia diba?
◻ Elda taudia be dahaka dahaka idia karaia diba tadikaka durudia totona?
◻ Dahaka do oi karaia idia dabu tadikaka bona taihu durudia totona?
[Box on page 17]
Kongregesen Taudia ese Ai Idia Naria
Tau ta mai adavana be kongregesen maragina gunika kahana dekenai idia lao, bona idia ese inai sivarai namona idia siaia, idia gwau: ‘Lagani toi gunanai lau bona egu adavana ese aiemai ruma ai hoia, bona ai lao kongregesen daudauna ta dekenai, badina idia ura lo tadikaka ena heduru idia abia, idia be mai edia hekwakwanai haida dainai. Idia ese lau dekenai kongregesen ena maduna 4 idia henia. Unai tadikaka bona taihu ai lalokau henidia bada bona ai ura idia danu ai gaukara hebou. Hua haida murinai kongregesen ena mamina be ia namo ia lao, bona ma elda rua unai gabu dekenai idia mai heduru totona.
‘Murinai egu adavana be ia gorere, bona lagani gunanai doketa taudia ese idia ivaia badina iena gorere ia bada dainai. Hospital dekenai ia vareai dinanai, lau ese gorere dikana, ladana hepataitas lau abia. Hua rua murinai, egu moni gaukara amo lau idia hadokoa gaukara be momo lasi dainai. Madi ai be moni lasi, lau gaukara lasi, bona ai ruaosi be gorere dainai ai goada momokani lasi. Distrik hebouhebouna be ia kahirakahira bona lau ese tok ta do lau henia, bona wiki rua vairanai lau ese sekit hebouhebouna dekenai be tok ta do lau henia danu. Unai dainai lau lalohisihisi badina lau be moni ta lasi, lau be dala lasi unai hebou rua dekenai lau lao, bona lau be dala lasi egu ruma bese lau ubua danu. Daba ta lauegu adavana ia lao haroro totona, to lau be ruma dekenai lau noho bona dahaka do ia karaia lau laloa noho.
‘Lau be uindo amo lau roha lao, bona sibona dekenai lau gwau, Iehova dekenai lau abidadama eiava? Egu adavana lau hamaoroa do ia wori lasi, to hari lau wori momo. Vadaeni, Iehova lau guriguri henia ena heduru abia totona, bona egu “abidadama maragi” ia dekenai lau hahedinaraia. Egu guriguri lau hadokoa neganai, tadikaka ta ese iduara dekenai ia pidipidi. Ia ura ia danu lau lao kofe lau inua totona. Lau hamaoroa do lau lao lasi, badina tok ta, unai hanuaboi ena hebou totona lau hegaegae noho. To ia ura dikadika lau mai, ia gwau nega bada do ia haorea lasi. Vadaeni ai lao. Miniti 30 murinai ai giroa lao ruma dekenai, ena motuka amo lau diho neganai egu lalohisihisi mamina ia ore unai.
‘Egu ruma dekenai lau vareai neganai, lau itaia aniani idauidau momo herea be pata dekenai idia noho. Lau laloa egu adavana be sitoa dekenai ia lao hoidia totona. Bena ma lau laloa: “To ai be moni lasi, edena bamona ia hoidia diba?” Murinai leta ta lau itaia unai aniani badinai. Unai leta vairana ia gwau: ‘“Emui tadikaka bona taihu ese inai harihari gaudia idia henia umui dekenai, idia lalokau henimui dainai. Inai moni ta umui atoa lasi contribution mauana dekenai. Moni ai atoa vadaeni umui totona.”
‘Edia hebogahisi dainai lau tai, bona lauegu “abidadama maragi” karana lau laloa dainai ma lau tai. Murinai egu adavana ia ginidae. Lau ese aniani bona harihari gaudia ma haida lau duduia henia, bona ia danu ia tai bona idia bamoa taihudia rua idia tai danu. Ai hamaorodia unai harihari gaudia be momo herea, haida sibona ai abidia be namo, to unai taihu rua idia gwau, inai harihari gaudia idia haboudia bona idia diba lasi daika daika ese dahaka dahaka idia henia. Kongregesen taudia iboudiai idia heduru, badina idia gwau harihari henia karana ai oi hadibaia dainai idia ura karaia danu. Unai lau kamonai neganai ma lau tai!’
Gabeai, inai sivarai ia siaia neganai unai tadikaka ese ena moni gaukara karaia lou. Ia bona ena adavana ese heduru pioneer gaukara idia karaia noho.
[Box on page 18]
Keristen ena Lalokau Karana
Iehova ena Witness taudia edia kongregesen ta western United States lalonai ese Bible ia gwauraia Keristen lalokau karana idia hahedinaraia. Unai gabu dekenai gavamani ese ruma ta, hospital bamona, idia kehoa bona cerebral palsy gorerena idia abia dainai edia tauanina idia dika, bona idia raka diba lasi taudia unai, idia vareai diba heduru abia totona. Unai ruma dekenai ia vareai tauna ginigunana ena ladana be Gary, ena mauri laganidia be 25. Ena gorere ia bada dainai ena ruma taudia idia naria namonamo diba lasi. Inai gorere dainai ena imana bona aena idia mareremarere diba lasi, bona ia hereva namonamo diba lasi danu.
Gary be bapatiso ia abia bona lagani 7 lalodiai ia be Witness tauna. Unai hospital dekenai ia vareai neganai, ia ura unai gabu ena Witness taudia ida ia hebou edia kongregesen lalonai. Ena tamana bona sinana be unai gabu kahirakahira dekenai idia noho, bona nega haida idia abia bona idia laohaia hebou dekenai. To idia buruka dainai tadikaka haida kongregesen lalonai durua matamaia. Ta be mai ena basi maragina. Unai dainai ia bona adavana, bona natudia kekeni maragidia rua be hebou totona idia hegaegae haraga, bona miniti 45 hebou vairanai edia ruma idia rakatania, bona idia lao Gary udaia totona. Hebou ia ore murinai ma idia laohaia hospital dekenai unai dainai sibodia edia ruma dekenai idia ginidae haraga lasi.
To gau ta ia vara unai hospital dekenai. Cerebral palsy gorerena idia abia taudia ma haida ese Bible ena hereva momokani idia kamonai. To edena bamona unai taudia iboudiai be idia abidia mai diba hebou dekenai? Ruma bese tauna ma ta ese basi maragina ta ia hoia, bona mai edia bisinesi Witness taudia ma haida ese edia basi maragina idia gaukaralaia unai taudia udadia totona. To nega haida unai heduru karana be ia hegeregere lasi. Vadaeni, kongregesen ese heduru dalana ma ta idia henia diba eiava?
Elda taudia idia kiki hebou bona idia gwau namona be basi badana idia hoia unai tauanina dika taudia iboudiai ida udadia bona hebou dekenai ia laohaidia bona ma ia atodia lou hebou ia ore murinai. Kongregesen taudia idia ura bona moni idia haboua unai basi hoia totona. Idau gabu kahirakahira Witness taudia ese inai sivarai idia kamonai neganai heduru monina idia siaia danu. Vadaeni basi ta idia abia, helai gaudia idia kokidia bona uilisea idia vareai bona idia mareremarere lasi gabudia idia karaia.
Harihari, hua ta ta iboudiai Kongregesen Buka Stadi group ta ta ami edia nega unai basi idia laohaia kongregesen heboudia bona hebouhebou badadia dekenai. Unai cerebral palsy hospital amo taunimanima 5 be hanaihanai idia hebou, idia 4 be bapatiso Witness taudia hari. Tadikaka bona taihu momo ese idia durudia dainai, idia dibadia bona idia lalokau henidia. Edena bamona idia durudia ? Idia badinai idia helai bona hebou lalonai ane buka idia abia isi, bona Bible siridia idia kehoa idia itaia totona. Sekit bona distrik hebouheboudia dekenai bema idia haida be sibodia idia aniani diba lasi, aniani do idia atoa edia uduna dekenai. Inai heduru karana dainai idia hetura heheni, bona unai be moale gauna. Unai tau Gary be edena bamona? Unai Keristen lalokau ia hahedinaraia kongregesen lalonai ia ese hesiai tauna ena dagi ia abia.—Kara 20:35.