Marquesas bona Tuamotus Taudia ese “Mauri Hanaihanai Paradaiso Lalonai” ena Sivarai Idia Kamonai

LAU bona egu adavana be peleini dekenai Tahiti ena northeast kahanai, kilomita 1,450 ai hanaia bena Nuku Hiva motumotuna dekenai ai ginidae, unai be Marquesas ena motumotu badana, mapu dekenai South Pacific davarana lalonai inai motumotudia be idia maragi herea. Inai motumotudia ai itadia neganai ai hoa bamona badina idia be mai hairaidia.

Marquesas motumotudia momo dekenai ororo badadia idia noho, bona idia daekau ori lalonai, bona koura gabudia ena tano be namo herea, niu audia ena uma badadia idia tubu bona tubutubu gaudia idauidau danu. Unai koura be idia diho idia lao ela bona davara dekenai, bona davara amo unai gabu oi raraia neganai do oi laloa unai be kone namodia. To, davara hurehuredia be idia bada bona aru ia goada, bona moemoe lasi dainai, bouti be kone kahirakahira dekenai ia lao be auka momokani. Tuamotus motumotudia dekenai ororo be idia bada lasi unai dainai daudau amo davara lalonai oi itadia haraga be auka. Idau negai bouti taudia ese unai motumotudia idia gwauraidia Motumotu Maragidia eiava Dika Ia Vara Gabuna.

Inai motumotudia dekenai ai lao taunimanima hereva henidia totona. Emai hereva bona Bible stadi buka ena ladana be idia hegeregere, Mauri Hanaihanai Paradaiso Lalonai oi abia diba. Nuku Hiva dekenai ai be bouti ta dekenai ai guia, ena ladana be Araroa, unai bouti be kohu ia abia lao. Vadaeni dina 21 lalodiai unai bouti dekenai 4,000 kilomita ai lao unai Marquesas bona Tuamotu motumotudia dekenai. Unai bouti be motumotu ta dekenai ia kau ena kohu haida atoa diho totona, ai danu ai diho bona sivarai namona ai harorolaia taunimanima dekediai.

Motumotu Taudia Edia Mauri Dalana

Reana oi ura diba, unai motumotudia dekenai ai davaria taudia be edena bamona. Marquesas taudia momo edia hanua be kone kahanai eiava sinavai badinai idia noho. Hanua haida dekenai ruma bese toi sibona idia noho, ma haida dekenai taunimanima handred bamona idia noho. Ruma bese momo edia natudia be momo, 8 ia lao 10 bamona, haida edia natudia be 18 o 20 bamona. Kohu momo idia abia lasi bona idia hekwarahi bada aniani abia totona. Davara amo idia abia gaudia idia ania, bona nega ta ta ai idia ubudia boroma bona kokoroku idia ania. Uda dekenai idia lao bona nanigosi bona hosi idia tahudia idia hamanadadia totona, bena idia gaukaralaidia gau metaudia veria totona eiava ma gaukara haida lalodiai. Niu audia be momo dainai kobara idia karaia, (inai kobara idia hakaukaua neganai dehoro idia abia bona inai amo sopu bona ma gau haida idia karaia). Unai motumotudia dekenai kobara idia hoia moni abia totona; bisinesi idia karaia unai. Danu moni sisina idia abia au idia utua gau ta laulauna hegeregerena, o tapa, (au kopina amo dabua idia karaia), bona piere (biku idia hakaukaudia).

Gunaguna Marquesas taudia ese taunimanima idia anidia bona taunimanima idia hamasedia edia tiki diravadia dekenai idia bouboulaidia dainai, edia dirava be nadi amo idia karadia. Hari inai nega lalonai edia tomadiho be Katolik. Edia ruma dekenai Maria bona Iesu edia piksa bona laulau idia atodia. Katolik bisop ena ruma Nuku Hiva dekenai ia lao henia dalana kahana kahana dekenai, inai nadi laulaudia o tiki momo idia haginia. Tuamotus motumotudia dekenai Mormon tomadiho be ia bada, Katolik bona ma tomadiho ta idia gwauraidia Sanitos.

Unai motumotu taudia ese Marquesas gado idia herevalaia, to France bona Tahiti edia gado idia diba danu. Edia mauri dalana be Polynesian taudia hegeregeredia, hari dina ena hekwarahi sibona idia laloa, idia gava lasi kara ta idia karaia totona. Nega haida sibona bouti idia mai inai motumotudia dekenai, unai dainai inai gabu taudia be henari dalana idia manadalaia vadaeni. January 1979 ai paoa idia abia, bona hari televisen idia abia, unai dainai hari idia diba dahaka dahaka idia vara ma tanobada haida dekediai.

Nuku Hiva Dekenai

Taunimanima 1,800 idia noho Nuku Hiva motumotuna dekenai. Inai motumotu amo Marquesas motumotudia iboudiai idia naridia. Gavamani rumana, bouti idia vareai diba gabu badana, bona bisop ena ruma be inai gabu, Taiohae Gohu dekenai idia noho. Haroro gaukara be inai gabu dekenai ai hamatamaia.

Ruma dekenai ai lao neganai ai pidipidi lasi; ai boiboi ai gwau houhou. Bema ta ia haere neganai do ai gwau, Kaoha! (“Helo!”) bona mai moale danu ai hamaorodia dahaka dainai ai mai. Idia momo herea ese buka idia abia, bona idia gwau: “Tanikiu bada umui mai dainai. Ai be guna inai bamona heduru bukana ta ai abia lasi, Dirava ena Hereva ai dibaia totona.” Idia dekenai Bible, Tahiti gado ai, bona Evanelia buka toi Marquesas gado ai, idia abia; unai sibona.

Buka idia abia taudia haida ese ai idia hamaoroa haida ai hereva henidia totona. Mero matamatana ta ese lauegu adavana ia hamaoroa ia murinai ia raka totona, ia gwau: “Unuseniai! Unuseniai!” Bema ia gwauraia lasi egu adavana ese unai ruma bema reaia, unai ruma dekenai nadi amo laulau ia utua tauna ia hereva henia, madi unai tau ia ura dikadika unai buka ia abia.

Hakaui dekenai, ruma bese rua sibona be sinavai maragi kahana kahana dekenai idia noho. Ai ginidae neganai ai itaia ruma bese ta be idia bisi. Unai dainai bouti taudia idia hebogahisi dainai bouti amo ai idia laohaia sinavai unukahanai. Ai ginidae neganai ai itaia hahine rua be tano dekenai idia helai bona boroma be idia bogaraginai idia loaloa ruma kahirakahira dekenai—idia ruaosi be ogogami momokani. To idia dekenai buka ai haheitalaia neganai idia noho gaudia idia henia toho buka idia abia totona. Ai laloa inai ogogami hahine rua be Luka 21:2-4 ia herevalaia vabuna hegeregerena, ia ese ena moni orena ia henia dubu totona.

Murinai ai lao Taipivai dekenai, ia be Nuku Hiva ena southeast kahanai, tau ta ladana Herman Melville ese buka ta ia torea ladana Typee, unai dainai taunimanima momo ese inai gabu idia diba. Inai gabu be koura badana, ia be mai hairaina bona niu audia ena uma badadia idia noho. Daba kahanai 6 okoloko ai, bouti lalonai ai heau sinavai dekenai. Sinavai ranuna be hevarivari ta bamona bona niu laulaudia be ranu dekenai idia hedinarai. Ai itaia ruma momo be au henudiai idia noho.

Ai laloa, “Iniseniai bouti do ia noho daudau eiava?” Lau idia hamaoroa kobara pusedia do ia mailaia tarakana be ia dika. Unai dainai, ai laloa bema hosi dekenai ai gui bona ai lao haraga inai koura ena atai gabuna, sinavai ranuna ororo amo ia moru diho gabuna ia mai henuai rumadia iboudiai ai vadivadi henidia diba. Ena be ai noho daudau lasi, to unai gabu ena ruma bese 12 bamona ese ai idia kamonai henia namonamo.

Motumotu Ma Haida Dekenai

Kilomita 40 bamona Nuku Hiva ena east kahana motumotu ta ladana Ua Huka ia noho. Inai motumotu be ia maragi, ena tano be namo momokani lasi, bona ororo momo idia noho. Vadaeni daba kahana 6 okoloko ai, kone dekenai ai lao. Unai kone be nadi kavakava, bona ai raka hanaia neganai dala maragina dekenai ororo ai daekau lao ela bona hora tamona, bena ai ginidae hanua badana dekenai, ena ladana be Hane. Vaia edia kara bamona edia dubu badana ia noho. Unai nega lalonai taunimanima momo be unai dubu dekenai idia lao, idia ese gado idauidau dekenai idia hereva ena tomadiho idia abia dae vadaeni dainai. To unai hanua dekenai ia noho mero badana ta ia lalo-hekwarahi momo tanobada ena kara dikadia dainai, bona ia ese tanobada paradaisona lalonai do ia noho diba sivaraina ia moalelaia.

Murinai ai lao Ua Pu motumotuna dekenai. Ai hoa nadi dubaduba ororodia ai itaia neganai, unai ororo ena lata be mita 1,200, bona edia tubuana be ori lalonai. Guna inai roro be ia pou bona lahi ia ore murinai inai nadi dubaduba idia noho. Inai motumotu dekenai hanua idauidau 5 idia noho, bona ai vadivadi henidia. Taunimanima dekenai paradaiso sivaraina ai harorolaia neganai idia moale bada, bona buka idia itaia neganai, idia gwau, “Mea kanahau!” (“Ia be mai hairaina!”) Unai gabu taudia momo ese unai buka idia ura henia dainai aiemai puse dekenai davara koukoudia, sipora, vaivai, orange, bona grapefruit idia udadia. Haakuti ena hanua maragina be ororo dekenai ia noho, bona unuseniai hahine ta mai natuna kekenina idia moale bada idia kamonaia herevana dainai, bona raruosi be ororo amo idia raka diho ela bona bouti ia naria noho gabuna, bona taunimanima iboudiai idia hamaorodia aiemai hereva idia kamonai bona buka idia abia totona.

Hanua badana, ladana Hakahau dekenai ai ginidae neganai ia daradara sisina, badina bouti nega sisina sibona ia noho unuseniai, edena bamona unai taunimanima 1,000 bamona do ai vadivadi henidia diba? Vadaeni, sivarai namona ia moalelaia tauna ta ese ena motuka ia henia ai totona, ia gwau: “Umui ura henia gabudia dekenai do ita lao.” Lagani haida gunanai Iehova ena Witness taudia ese buka bona magasin idia hariharilaidia inai gabu dekenai, to idia lao murinai fada tauna ta ia lao bona iboudiai ia abidia bona ia gabudia. Unai ia karaia dainai taunimanima idia gari. To sivarai namona idia ura kamonai henia dikadika dainai ruma bese 12 bamona ese edia gari idia koua bona buka idia abidia.

Murinai ma motumotu ta dekenai ai lao, ena ladana be Hiva Oa, Marquesas motumotudia iboudiai amo ia be namo herea, tubutubu gaudia idauidau momo idia tubu noho. Piksa ia penia tauna, Paul Gauguin ese unai gabu ena piksa momo ia penia. Ia ese Atuona dekenai ia noho ela bona ia mase. Hari ai ginidae unai gabu dekenai. Vadivadi taudia ese inai motumotu dekenai idia ginidae neganai hanua taudia idia gwau: “Umui lao vadaeni aiemai nadi diravana (tiki) umui itaia totona, a?” Inai nadi diravana be lata herea (mita 2.4), French Polynesia dekenai idia noho nadi diravadia iboudiai edia bada ia hanaia. Idia dekenai ai haere inai bamona: “Ia be mai ena matana to ia itaia diba lasi, ia be mai ena uduna to ia hereva diba lasi. Ai be nega sisina sibona ai noho iniseniai unai dainai ai ura mauri taudia ai hereva henidia, bona gau namona ai hahedinaraia idia dekenai.” Hahine ta be buka ia moalelaia bada herea dainai ena turana ia doria ta ia abia totona. Ena turana dekenai moni ia henia ia abia totona. Ma hahine ta ia gwau: “Lau lalo-parara vadaeni, Bible lau duahia be mai anina bada, hanuaboi iboudiai dubu dekenai lau lao guriguri totona ena anina be maragi.”

Hanuaboi ia kahirakahira neganai ai ginidae Hanaiapa dekenai, bona lamepa ena diari amo nese dekenai taunimanima ai hereva henidia totona. Ai be hel ena sivarai ai kikilaia hebou. Ai hamaorodia, ai gwau: “Bema natuna ta ia gwau-edeede, oi ese lahi badana do oi karaia bona lalonai oi negea, a?” Idia gwau: “Lasi!” Bena ai gwau: “Vadaeni, oi laloa Dirava ese ena natudia do ia hahisihisidia hanaihanai lahi dekenai, a?” Hahine 4 bona tau tamona idia kamonai namo herea. Dirava ese taunimanima ia “boiridia” tanobada dekenai do idia noho, bona “kara dika tauna do ia noho lasi” sivaraina idia moalelaia. Idia diba kara dika taudia do idia ore, hisihisi idia hanaihanai lasi.—Salamo 37:10.

Hiva Oa ai rakatania bona daudau lasi ai ginidae Tahuata motumotu maragina dekenai. Bouti tauna ta ia hevaseha, ia gwau lagani 100 gunanai inai hanua taudia ese tau kurokurodia haida idia anidia. To ai be idia danu ai herevahereva hebou sibona. Unai motumotu dekenai gado idauidau dekenai idia hereva ena tomadiho ia haginia tauna ai hereva henia, ia ura lasi buka ta ia abia, to ai ia doria galasi mai ranuna ai abia totona. Ai abia neganai, ia ese Iesu ena hereva Ioane 4:14 dekenai ena anina ia herevalaia kerere, ia gwau: “Lau henia ranuna do ia inua tauna be do ia ranu mase lasi ia lao bona hanaihanai.” Ai tanikiu henia, bona ai gwau: “Inai be ranu kavakava sibona, bona mai moale danu ai abia. To oi ese mauri ia havaraia ranuna bona lauma anianina ai henimu toho neganai oi dadaraia, a?” Inai hereva ese ena lalona ia veria bona buka haida ia abidia. Gabeai, bouti ia noho gabuna dekenai taunimanima ese ai idia kirikirilaia, idia gwau: “Reana ta ese emui buka ta idia abia lasi, a?” Unai gabu ena gaukara taudia edia biaguna ia gwau ia ura unai buka ia itaia, bona idia iboudiai vairadiai ta ia abia. Idia kamonai haida ese inai buka idia abia neganai idia hoa bamona!

Marquesas ena south kahana motumotu dokona ai lao henia, ena ladana be Fatu Hiva. Lagani 1595 ai, Spain tauna, ladana Álvaro de Medaña de Neyra, ese inai motumotu ia davaria, bona Peru ena gavana ta ena adavana ladana ia henia—La Marquesa de Mendoza. Fatu Hiva motumotuna be hairai momokani gabuna. Hanua badana, Omoa dekenai, ruma bese ta idia kamonai namo herea. Ai rakatanidia neganai ma haida ai hereva henidia totona, unai ruma hahine ia lao ena turadia ia haboudia totona, bona ai giroa mai neganai idia helai hegaegae, mai moale danu ai idia naria. Idia ura buka idia abia Bible ena hereva idia dibaia totona, bona hanuaboi dekenai Bible idia stadilaia neganai diba idia abia totona. Bouti dekenai ai giroa mai neganai, aiemai puse badana ta lalonai gau ta ia noho lasi, to ma puse ta ia honu orange bona sipora hauhuadia amo.

Tuamotus Dekenai Ai Lao

Bouti dekenai, dina tamona bona hanuaboi rua southwest kahanai ai heau lao, bena Tuamotus ena motumotu ta, Pukapuka dekenai ai ginidae. Dala ai hegaegaelaia unai bouti Araroa ena kapena tauna ese dina ta ta dekenai unai motumotu maragidia rua dekenai ia lao totona. Inai dala amo unai taudia ai haroro henidia diba, badina ma dala haida idia noho lasi idia kamonai totona.

Inai motumotu maragidia dekenai Pomotus taudia be tausen tamona bamona, bona ruma bese 30 bamona ese ai “boiboilaia” sivaraina idia kamonai henia mai moale danu. Kohu momo lasi rumana, niu audia henunai ai lao henia, bena haraga herea ruma hahine ia lao karu ranuna ia hoilaia, bona moni ia abia buka haida ai abidia totona. Unai ruma bese do ia laloaboio diba lasi, idia ese ai idia doria edia tini guhina henunai idia taua dae gwarume gabugabuna ai abia totona.

Ai Laloatao Noho

Taunimanima momo herea idia moale ai hereva henidia neganai, bona do ai lalodia boio diba lasi, bona ai diba Iehova ese do ia naridia. Ai moale bada Marquesas bona Tuamotus motumotudia dekenai ai lao haroro dainai. Ai itaia “Mauri Hanaihanai Paradaiso Dekenai” ena sivarai ai “boiboilaia” gaukarana ena siahu be bada herea!—Ta ese inai sivarai ia siaia.

[Maps on page 22]

(For fully formatted text, see publication)

Marquesas Islands

Nuku Hiva

Taiohae

Ua Huka

Ua Pu

Hiva Oa

Atuona

Tahuata

Fatu Hiva

Omoa