Kudouna Idia Hamoalea Harihari Gaudia

INAI rau henuai Kerisendom ena tomadiho oreadia ese idia siaia letadia rua idia noho, inai bamona leta idia siaidia moni idia abia totona. Oi laloa inai bamona leta ese kudou ia hamoalea, a? Lasi momokani! Dirava ia hanamoa tomadihona habadaia bona gaukarana durua totona moni idia abia be gau badana. To, Keristen ena orea be edena dala amo moni idia abia Dirava ena ura idia karaia totona?

Haere do ita diba bema Keristen kongregesen ginigunana ena kara ita tahua, bona unai kongregesen ia haginia tauna, Iesu Keriso ena hereva Luka 6:38 dekenai ita laloa, ia gwau: “Taunimanima dekenai umui henia lao, vadaeni taunimanima do [idia] henia umui dekenai. Taunimanima ese emui puse do idia hahonua ela bona do ia bubua danu. Oibe, umui dekenai idia haria gauna be do ia hegeregere momokani, bona ia hanaia danu.” Iesu idia kamonai henia taudia ese unai haheitalai herevana idia lalopararalaia. Badina idia edia dabua dekenai poketi ta ia noho gau haida udaia totona. Unai poketi, (Greek herevana, kol’pos) idia hahanaia “mamuna” eiava “kemena,” bona edia beleta ataina dekenai edia dabua idia lokua poketi ta karaia totona, bona gau ta idia hoia neganai, do idia bubua vareai unuseniai.

Oi laloa hoihoi taudia ese poketi dekenai idia bubua vareai gauna do idia pataia diho namonamo hoia tauna dekenai ia be kohu bada herea ia henia totona, a? Sedira, ta lasi! To, bema Keristen taudia ese ogogami taudia idia durudia hebogahisi karadia amo, idia ese hebogahisi bada do idia davaria danu. Taunimanima oi kara henidia hegeregerena do oi davaria, ena be oi durudia bada eiava oi durudia maragi, taunimanima amo hahenamo do oi abia, to Iehova Dirava ese oi do ia hanamoa be gau badana.—2 Korinto 9:6; Galatia 6:7 oi hahegeregeredia.

Iesu ese sibona ena goada bona kohu ia henia taunimanima ia durudia totona, unai dainai gau momo ia davaria. Ia be durua tauna hereadaena. Mai ena goada bona ura ibounai ida ia ese Dirava ena Basileia ena sivarai namona ia harorolaia ogogami taudia dekenai. Ia karaia davana lasi, ia ura lasi moni idia henia ia haroro dainai. To gau ta dekenai ia dabu lasi. Taunimanima be mai moale ida idia durua noho haroro gaukara ia karaia totona.—Luka 7:22; 8:1-3.

Iesu ena henia karana dainai Simona, Petro, Iakobo, Ioane bona aposetolo taudia 12 oredia ese Iesu idia tohotohoa bona gau iboudiai idia rakatania haroro gaukarana karaia totona. (Luka 5:10, 11; 9:1-6) Unai bamona henia karana be namo ia havaraia hari inai nega lalonai danu. Iehova ena Witness taudia ese edia nega, goada bona kohu idia gaukaralaia haida ese Dirava ena Basileia ena sivarai namona idia kamonai henia totona. Bena murinai unai kamonai taudia danu idia haroro, bona ma haida idia bamodia sivarai namona harorolaia gaukarana habadaia totona.—Hereva Lada-isidia 11:25.

Iseda haroro gaukarana be harihari gauna ta, to kudouna hamoalea gauna ma ta ia noho danu. Tomadiho korikorina ena kara ta be heduru moni ita henia lalohadai maorona bona badina korikori dainai. (2 Korinto 9:9-14) Keristen ginigunadia be edena dala amo idia heduru?

Keristen Ginigunadia Idia Karaia Dalana

Lagani 33 C.E. ai, Keristen kongregesen idia haginia ena dina ginigunana dekenai, bapatiso idia abia taudia 3,000 ‘idia heduru heheni, idia aniani hebou, bona idia guriguri noho.’ Dahaka dainai unai bamona idia karaia? Idia ura edia abidadama matamatana idia hagoadaia idia ese “aposetolo edia hadibaia herevadia idia kamonai” noho totona.—Kara 2:41, 42.

Iuda bona Iuda tomadiho idia abia dae idau bese taudia be Ierusalem dekenai idia mai Pentekoste Ariana karaia totona. To idia momo ese Keristen tomadiho idia abia dae neganai idia ura idia noho gau haida idia diba totona bona edia abidadama matamatana hagoadaia totona. Vadaeni hekwakwanai ia havaraia, aniani bona ruma idia hegeregere totona. Unai vadivadi taudia haida be moni lasi ma nega sisina idia noho totona, to ma haida edia moni be bada. Unai dainai edia kohu idia haboudia bona idia haridia idia dabu taudia dekenai.—Kara 2:43-47.

Edena bamona unai taudia idia ubudia bona edia ruma idia henidia diba? Aposetolo taudia, hakaua orea hegeregerena, ese harihari gaudia idia haboudia bona idia haridia ta ta dekenai, edia ogogami hegeregerena. Unai dainai Keristen kongregesen ginigunana taudia ese sibodia edia kohu idia laloa bada lasi, to idia gaukaralaidia kongregesen taudia iboudiai durudia totona. (Kara 2:44; 4:32) Ma danu, “mai edia tano o ruma taudia ese edia gau idia hoia, bona edia davana moni idia abia lao, aposetolo taudia edia vairana dekenai idia atoa diho. Bona aposetolo taudia ese ta ta dekenai idia henidia, edia ogogami hegeregerena.”—Kara 4:34, 35.

Tano o ruma idia hoia bona unai moni idia atoa hebou karana idia karaia badina idia ura dainai. Ta ese idia doria lasi edia kohu harihari gauna ta idia henia totona; bona taravatu idia atoa lasi idia ogogami totona. Keristen taga taudia ese edia kohu iboudiai idia hoia lasi idia ogogami totona. To, unai nega lalonai edia Keristen tadikakadia dabu dainai, bona idia bogahisihisi henidia dainai, edia tano haida idia hoia bona unai moni idia henia Basileia gaukarana durua totona.—2 Korinto 8:12-15.

Hari inai nega lalonai danu, taunimanima ta ta ese edia tano o kohu idia henia International Bible Students Association of Papua New Guinea dekenai, eiava pepa ta dekenai, ( edia will unai), idia gwau idia mase murinai idia ura unai orea ese edia kohu o moni do idia abia. Vadaeni, unai anina be Iehova ena Witness edia Hakaua Oreana ese unai moni do idia gaukaralaia diba Basileia gaukarana durua totona. Unai harihari gaudia be heduru bada taunimanima ese lauma dalanai idia goada totona, Pentekoste dekenai heduru idia abia hegeregerena. To harihari gaudia henia karana be taravatu lasi.

Haboua Noho be Namo

Lagani 20 bamona, Pentekoste 33 C.E. murinai, aposetolo Paulo ese Korinto kongregesen taudia ia hamaorodia harihari gauna idia henia totona. Ia gwau: “Ekalesia orea durua totona moni lau ura herevalaia. Galatia ekalesia orea lau hamaoroa hegeregerena, umui danu lau hamaoroa, moni do umui haboua.” Bena murinai sisiba ia henidia, ia gwau: “Pura ena dina ginigunana ibounai umui ta ta ese emui rumai moni taina do umui haboua noho, ena bada be emui gaukara ena bada hegeregerena. Vadaeni do lau ginidae neganai boubou haboua gaukara be lasi. Vadaeni umui dekenai lau ginidae neganai, umui ese umui abia hidi taudia dekenai revareva ta do lau henia. Vadaeni unai taudia mai revareva danu do lau siaia, emui harihari gauna moni, Ierusalema dekenai do idia abia lao.” Reana, ruma bese ibounai, herevana idia taga eiava idia ogogami, idia kiki hebou bona moni hida idia henia idia herevaherevalaia, ita diba unai bamona idia karaia badina idia haboua “edia rumai.”—1 Korinto 16:1-3.

Paulo ena sisiba moni henia karana dekenai be hari inai nega kongregesen taudia ese idia badinaia diba danu. Edena bamona? Wiki ta ta iboudiai haboua noho be dala namona. Peru ena branch opesi tauna ia gwau, oiemu kongregesen ese hebou gabuna o Kingdom Hall ena renta davana bona ruma hanamoa davana ia karaia totona, gau badana be “moni bada henia lasi, to wiki ta ta o hua ta ta iboudiai sisina sisina oi haboua noho Basileia gaukara durua totona.” Oi laloa unai bamona kara be ia namo, a? Natudia oi hadibaia diba harihari gauna idia henia lou lou totona badina unai be edia tomadiho karana ta.

Unai dainai, harihari gaudia ita henia lalohadai maoromaoro bona ena badina korikori dainai, Dirava bona taunimanima edia kudouna idia hamoalea. 2 Korinto 9:7 lalonai, ia gwau: “Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.”

[Box on page 29]

Kerisendom la Gaukaralaia Letadia

“Lohiabada ese lau ia hamaoroa, inai leta oi dekenai lau torea totona … Inai leta do lau torea diba lasi oi dekenai, to Dirava ia gwau inai leta do lau torea oi dekenai, ia gwau bema K20.00 oi siaia haraga lau oi durua totona ia ese oi do ia hanamoa bada, guna unai bamona hanamoa do oi abia lasi.”—Haroro tauna Canada dekenai ese inai leta ia torea, bona ia sainia, “Oiemu haroro tauna bona Turana.”

“Inai Dehoro Helagana oi kehoa, ( sisina taina oi hamorua lasi). Iesu be inai abidadama dehorona lalonai ia noho. Emu baguna dekenai dehoro amo satauro toana oi torea, bena mai abidadama danu oi sibona be daiutu dekenai oi vareai. Oi dekenai ia noho monina oi kokia bona dehoro amo satauro toana oi torea unai pepa monina dekenai, Dirava ese oiemu hekwakwanai moni dekenai ia hanamoa, bona emu moni ia habadaia totona Luka 6:38 ena hereva hegeregerena … Moni oi hahelagaia neganai inai dehoro amo, oi dekenai idia noho pepa monina iboudiai dekenai oi hahelagadia. Unai pepa monina iboudiai dekenai satauro toana oi torea, bena moni badana oi kokia, herevana ia be K20.00, K10.00 eiava K5.00, bona inai dehoro helagana amo satauro toana oi torea, bona oi siaia Dirava ena gaukara totona.”—Inai leta be “fada” tauna amo United States dekenai, bona ia sainia, “Dirava ena Peroveta tauna lagani 30 lalodiai.”

[Box on page 31]

Haida ese Basileia Gaukara Harihari Gaudia Idia Henia Dalana

◆ HARIHARI GAUDIA: Haida be moni idia henia International Bible Students Association, Inc., Box 636, Boroko, N.C.D. dekenai. Moni eiava harihari gaudia idia siaia neganai, namona be revareva danu idia siaia bona namona be unai revareva ia gwau inai be sibodia edia ura dainai idia henia.

◆ IDAU HARIHARI GAUDIA: Haida be moni idia henia Association dekenai, to idia gwau, bema gabeai idia ura unai moni idia abia lou, Association do ia henia lou idia dekenai.

◆ INSURANCE: Haida be mai edia life-insurance monina eiava banka dekenai mai edia moni, bema idia ura idia mase neganai Association dekenai unai moni idia henia diba. Bema unai bamona idia ura, namona be Association idia hadibaia.

◆ WILLS: Bema loia tauna dekenai pepa oi torea bona oi gwauhamata oiemu moni o kohu be oi ura oi henia Association dekenai, namona be unai pepa ena kopi ta oi siaia Association dekenai.

Bema oi ura ma hereva haida oi diba inai gaudia dekenai namona be International Bible Students Association oi tore henia.