Oiemu Natudia Oi Lalodia Momo
OIBE, ani? Oi diba oiemu natudia idia hadikaia gaudia dikadia toi be, gorere dikadia, drag ania kava karana, bona gwau-edeede karana. Vaia edia kara, tama sina ese edia natudia idia lalodia momo—bona idia lalo-hekwarahilaidia danu.
Bible ese ia hahedinaraia, idau nega amo ema bona hari, tama sina momo be unai bamona idia karaia. Oi laloatao, Iakobo ese Iosef ia siaia ena kakadia ia itaia totona, idia namo eiava, badina ena natudia ia lalodia momo dainai. (Genese 37:13, 14) Iobu danu, ena be ena natudia idia bada vadaeni bona idia headava vadaeni, to ena natudia memerodia ia lalodia momo. Ia laloa: “Reana lauegu natudia idia kara dika vadaeni bona edia lalona dekenai Dirava idia gwauraia dika vadaeni.”—Iobu 1:4, 5.
Oibe, Iosef bona Maria danu ese edia natuna goevadaena, Iesu, idia laloa momo! Nega ta, Iesu ena mauri laganidia be 12 neganai ia boio, unai dainai idia laloa momo. To, edia natuna Iesu ena kara be namo herea na idia hemarailaia lasi be maoro. Namona be unai negai ia vara gauna ena sivarai ita tahua, bona ena anina hari inai negai idia noho tama bona sina dekediai ita laloa namonamo be namo.
Natuna Ia Boio
Bema oi be tama o sina ta, reana oi be Maria ena lalona ena mamina Iesu ia gwau henia neganai oi diba vadaeni, ia gwau: “Egu natuna e, dahaka dainai inai bamona oi karaia ai dekenai? Lau bona oiemu tamana ai laloa momo, oi ai tahua neganai.” Dina toi lalodiai Iosef bona Maria ese Iesu idia itaia lasi. Unai dainai edia lagani 12 natuna merona idia laloa momo be maoro, ani?—Luka 2:48, Today’s English Version.
Dahaka dainai Iosef bona Maria ese Iesu idia dogoatao lasi? Mai ladana bada tauna ta ese edia kara ia gwauraia dika; ia gwau: “Idia diba ia be natu hereadaena, vadaeni dahaka dainai idia tahua haraga lasi? Ena sinana ese ia lalokau henia lasi bona ia laloa momo lasi, a?” Bema ia vara gauna ita tahua namonamo, do ita diba Iosef bona Maria idia kerere bada lasi.
Bible ese ia hahedinaraia Maria be hahine namona bona sina namona. Aneru Gabriel be Iesu ena vara perovetalaia totona Maria dekenai ia lao neganai, ia hamaoroa ia gwau, ia dekenai “Dirava ia moale vadaeni.” (Luka 1:28, 30) Inai natuna idauna havaraia bona ubua bona hadibaia gaukarana, be mai ena moale ida ia abia dae. Ia be lalo-manau hahinena bona ena abidadama Dirava dekenai ia goada. Iesu ia vara murinai, ia be Iehova “ena taravatu dekenai ia torea hegeregerena,” ia karaia.—Luka 1:38, 45-48; 2:21-23, 39.
Iosef, Maria ia adavaia bena Iesu ena heubu tamana ai ia lao tauna, be kara maoromaoro tauna namona. Nega 4 ia be Iehova ena aneru ida idia herevahereva. (Mataio 1:19, 20; 2:13, 19, 22) Mani oi laloatao, Iehova ese Iosef bona Maria ia abidia hidi, ia lalokau henia bada Natuna idia naria totona. Hari natuna be Dirava amo ia mai aonegana dekenai do ia tubu daekau totona do idia durua namonamo lasi taudia be do ia abidia hidi lasi, ani?
Momokani, hari inai negai tama sina ese edia natudia idia lalodia momo, badina dika bona gwau-edeede negana lalonai idia noho. Bona idia diba edia natudia be Iesu bamona lasi, idia goevadae lasi. To, Iosef, Maria, bona Iesu edia haheitalai amo namo ita davaria diba.