Emu Natuna Oi Durua Aonega Dekenai Ia Tubu Daekau Totona

DIBA taudia bese idauidau amo idia gwau, Iesu be hadibaia tauna namo hereana bona kara maoromaoro tauna. To ena tamana bona sinana ese ia maragi neganai idia hadibaia dalana ese ia durua unai bamona ia lao totona, a? Tama bona sina, hari inai negai idia noho taudia, ese dahaka idia dibaia diba, ia be ena tamana bona sinana ida idia noho hebou dalana bona idia hadibaia dalana amo?

Bible ese Iesu ena maragi negana ia herevalaia momo lasi. Ena vara negana amo ela bona ena mauri laganidia be 12 idia vara gaudia ia herevalaia neganai, ia gwau: “Lohiabada ena taravatu kara ibounai be Iesu ena tamana bona sinana ese idia badinaia haorea momokani, vadaeni Galilea dekenai idia giroa lou, edia hanua korikori Nasareta dekenai idia lao. Vadaeni mero be ia tubu, ia bada ia lao, mai goada bona mai aonega danu, bona Dirava ese ena hariharibada ia dekenai ia henia.” (Luka 2:39, 40) Inai siri ese gau haida na tama bona sina ia hadibadia diba. Unai mero matamatana be “ia tubu, ia bada ia lao, mai goada.” Unai dainai ita diba ena tamana bona sinana ese tauanina dalanai idia naria. Danu, ia be “mai aonega danu.”* Daidia edia maduna be, diba bona lalo-parara do idia hadibalaia, aonega tauna ai do ia lao totona?

Mose ena Taravatu hegeregerena, unai maduna be ena tamana bona sinana edia. Unai Taravatu ese Israel taudia, tama bona sina, ia hamaorodia, ia gwau: “Inai dina ai oi dekenai lau hadibaia herevadia, be emu kudouna dekenai idia noho be namo; bona oiemu natuna dekenai oi hadibaia namonamo, bona ruma lalonai umui helai negadia ai, bona dala dekenai umui raka negadia ai, bona umui hekure negadia ai, bona umui toreisi negadia ai, oi herevalaia.” (Deuteronomi 6:6, 7) Iesu be “mai aonega,” bona Dirava ese ena hariharibada ia dekenai ia henia”; unai ese ia hahedinaraia Iosef bona Maria ese unai taravatu idia badinaia.

Reana haida idia laloa, Iesu be natuna goevadaena dainai, tama sina ese ena tamana bona sinana edia hadibaia karana idia tohotohoa diba lasi edia natudia hadibadia totona. To, Iosef bona Maria idia goevadae lasi. Ena be ma natudia haida idia havaradia bona idia be mai edia maduna idia danu do idia naridia, to tauanina dalanai bona lauma dalanai Iesu idia durua noho. (Mataio 13:55, 56) Danu, ena be Iesu ia goevadae, to ena beibi negana amo ia tubu daekau ela bona ia be tau badana ai ia lao. Unai nega lalonai ena tamana bona sinana ese nega momo idia hadibaia namonamo bona idia sisiba henia namonamo.

Iesu ena Lagani be 12 Neganai

“Lagani ibounai Iesu ena tamana bona sinana danu Ierusalema dekenai idia lao, Paseka ena aria neganai.” (Luka 2:41) Dirava ena Taravatu hegeregerena, memero bona tatau iboudiai be Ierusalem dekenai idia lao aria totona. (Deuteronomi 16:16) Bible ia gwau: “Ena tamana bona sinana danu … idia lao.” Iosef ese Maria, bona ena ruma bese iboudiai, be dala daudauna amo, kilomita 100 mai kahana, Ierusalem dekenai ia abidia lao unai moale negana totona. (Deuteronomi 16:6, 11) Unai be vaia edia kara—nega iboudiai unai bamona idia karaia. Danu, idia noho ela bona aria dinadia iboudiai idia ore.—Luka 2:42, 43.

Unai be haheitalai namona, hari inai negai idia noho tama bona sina dekediai. Lagani ta ta iboudiai unai aria Ierusalem dekenai idia karaia. Idia be hebou helagadia mai moaledia. (Levitiko 23:4, 36) Idia ese Iosef, Maria, bona edia natuna Iesu, be lauma dalanai idia hagoadadia. Namona be hari inai negai idia noho tama bona sina ese edia natudia idia hakaudia lao unai bamona heboudia dekenai, idia moale totona bona lauma dalanai idia goada idia lao totona. Lagani ta ta iboudiai Iehova ena Witness taudia, tama bona sina, ese edia natudia idia hakaudia lao sekit bona distrik hebouhebou dekediai. Unai amo edia natudia ese laolao idia moalelaia diba bona dina haida lalodiai ma kamonai taudia momo idia bamodia diba. Tama ta be lagani 45 gunanai ia bapatiso. Ia gwau, unai negana amo ema, ia be sekit bona distrik hebouhebou iboudiai dekediai ia lao. Ia laloa unai dainai ia be hegeregere ena natudia 10 do ia durudia lauma dalanai idia tubu daekau totona. Bona ena ruma bese taudia iboudiai ia hagoadadia, idia danu be hebouhebou iboudiai dekediai idia lao totona.

Gau Ta Ia Vara

Iesu ia maragi neganai, ena tamana bona sinana badinai ia raka lao, lagani ta ta iboudiai Ierusalem dekenai idia lao negadiai. To, ia bada ia lao neganai, reana idia dogoatao lasi, idia badinai ia raka lasi. Iuda taudia idia laloa, mero ta ena mauri laganidia be 12 bamona neganai, ia be mero badana ai ia lao. Reana unai lalohadai dainai, Iesu be 12 neganai, gau ta ia vara, Iosef be mai ena ruma bese ida Ierusalem idia rakatania bona edia hanua dekenai idia lou lao neganai. Bible ia gwau: “Idia giroa lou, to Iesu be Ierusalema dekenai ia noho. Ena tamana bona ena sinana be idia diba lasi. Idia laloa ia be taunimanima edia huanai ia raka noho. Dina tamona idia raka, unai murinai edia varavara taudia dekenai bona edia turana dekenai Iesu idia tahua.”—Luka 2:43, 44.

Tama sina bona natu ese unai idia vara idia vara gaudia haida idia diba vadaeni. To gau ta ia idau; gauna be inai: Iesu ia goevadae. Ia ese Iosef bona Maria ia kamonai henidia dainai, ita diba bema oda herevana ta idia henia, edia hereva do ia laloaboio lasi. (Luka 2:52) Reana; idia be ia ida idia herevahereva namonamo lasi dainai, unai kerere ia vara. Idia laloa Iesu be ena varavara bona ena turadia edia huanai ia raka lao.(Luka 2:44) Ierusalem idia rakatania totona gau ibounai idia hegaegaelaia neganai, reana edia natudia maragidia idia lalodia momo, to Iesu idia laloa momo lasi ia bada dainai, bona idia laloa ia be edia huanai ia raka lao.

To Iesu ia laloa ena tamana bona sinana be ena noho gabuna idia diba, unai dainai gabeai ia hereva henidia neganai ia gwau: “Dahaka dainai lau umui tahua? Umui diba lasi egu Tamana ena ruma be lauegu noho ruma, a?” Ena tamana bona sinana ia dadaraidia lasi. Ena hereva ese ia hahedinaraia ia hoa badina ena tamana bona sinana be ena noho gabuna idia diba lasi. Idia gwau bou goevagoeva guna lasi dainai unai kerere ia vara. Tama bona sina, edia natudia idia tubu daekau noho taudia, be unai bamona hekwakwanai idia diba.—Luka 2:49.

Iosef bona Maria edia lalo-hekwarahi mani oi laloa; edia laolao ena dina ginigunana dokonai, idia diba Iesu be idia danu ia noho lasi neganai, idia lalo-hekwarahilaia. Bona unai murinai dina rua lalodiai Ierusalem dekenai idia tahua neganai, edia lalo-hekwarahi ia bada ia lao. To, unai hekwakwanai ia vara neganai, Iesu ese taunimanima dikadia ia bamodia lasi, badina be idia hadibaia namonamo guna dainai. Iesu idia davaria neganai, ia be “Dubu Helaga lalonai … hadibaia taudia edia huanai ia helai, edia hereva ia kamonai bona ia henanadaia danu idia dekenai. Ena hereva idia kamonai taudia ibounai be ena diba bona ena haere dekenai idia hoa bada.”—Luka 2:46, 47.

Ena nega be unai bamona ia gaukaralaia bona Bible ena taravatu ia diba momo ese ia hahedinaraia Iosef bona Maria ese idia hadibaia namonamo vadaeni. To , Maria be hahine edia kara korikori hegeregerena ia karaia; ena natuna ia davaria ia noho namo neganai, ena lalo-hekwarahi ia doko; bena ena lalo-hekwarahi ia gwauraia hedinaraia, ia gwau: “Egu natuna e, dahaka dainai inai bamona oi karaia ai dekenai? Lau bona emu tamana be mai tai danu oi ai tahua noho.” (Luka 2:48) Vaia hahine edia kara hegeregerena, Maria ese ena lalo-hekwarahi ia gwauraia guna, Iosef be gabeai. Vadaeni, uhau bona ulato momo be unai sivarai idia duahia neganai do idia gwau: “Unai be lauegu sinana ena kara hegeregerena!

Ita Ia Hadibaia

Unai sivarai ese ita dahaka ia hadibaia? Uhau bona ulato momo idia laloa edia tamana bona sinana idia diba vadaeni dahaka idia laloa noho. Nega momo idia gwau: “Lau laloa oi diba vadaeni.” Tama sina e, bema emui natuna ta be unai bamona ia hereva daradara ta ia vara neganai, umui diba umui sibona lasi be unai hekwakwanai umui davaria, to ma haida ese danu.

Natu edia kara korikori be, idia tubu daekau bona uhau bona ulato ai idia lao lalonai, edia tamana bona sinana edia heduru idia tahua momo lasi, guna idia tahua bamona. Unai dainai namona be tama bona sina ese edia kara idia dekenai idia haidaua. Ena be tama bona sina ese edia natudia do idia hadibadia namonamo, to hekwakwanai o daradara haida do idia vara bena do idia laloa momo. To, bema Iosef bona Maria edia kara namona idia tohotohoa, hekwakwanai do idia vara neganai, edia hahediba ese edia natudia do ia durudia idia kara namo totona.

Iesu ena tamana bona sinana be ia ida idia gaukara hebou ela bona tauhau ai ia lao. Ita gwauraia vadaeni hekwakwanaina ia vara murinai, Iesu be “idia danu Nasareta dekenai idia lao, bona ia kamonai henia idia dekenai.” Unai dainai dahaka ia vara? “Iesu ia tubu daekau noho mai aonega danu, Dirava bona taunimanima ese idia ura henia.” Unai hekwakwanai murinai namo ia vara. (Luka 2:51, 52) Bema tama sina ese Iosef bona Maria edia kara hegeregerena do idia karaia, unai dala amo edia natudia do idia durudia, Dirava ena amo ia mai aonegana lalonai idia tubu daekau totona, ruma lalonai mauri namona idia davaria totona, bona Dirava badinaia taudia idia bamodia totona. Unai bamona natudia ese mauri mai ena moale do idia abia diba, do idia tubu daekau bena Keristen taudia badadia ai do idia lao neganai.

[Footnote]

Greek gado ai inai hereva “mai aonega danu” idia torea neganai, anina be aonega ia abia noho, ena aonega ia bada ia lao noho.