Basileia Haroro Ripoti
Bible Ena Hereva ese Puripuri amo Ia Ruhadia
IEHOVA ese Israel besena ia haganidia, ia gwau: “Toa tahua karadia bona meamea karadia do umui karaia lasi.” (Levitiko 19:26) To meamea karadia bona puripuri karadia ia karaia tauna be demoni edia siahu amo edena bamona idia ruhaia diba? Iesu ia gwau: “Hereva momokani be do umui diba, bona hereva momokani ese umui do ia ruhaia.” (Ioane 8:32) Witness hahinena ta France dekenai ese unai ia hamomokania, ia gwau:
“Lauegu ruma matamatana dekenai lau hanai neganai, nega sisina murinai egu dekena hahinena ta be turana ta bamona lau ia vadivadi ura lauegu vara dinana ia diba, hisiu edia toana tahua karana amo gabeai lau dekenai do ia vara gauna ia gwauraia hedinarai totona. Kara haraga lau laloa, namona be lau bamoa lasi momokani, to unai bamona lau karaia be auka, badina ia be taunimanima tura henidia bada hahinena ta.
“November 1980 ai gorere lau abia, bona unai hahine be lau dekenai ia mai lau ia durua totona. Iena hebogahisi karadia lau moalelaidia bona lau bogaia hisi bada, badina lau ia hamaoroa, nega momo gari dikadika ese ena laga ia koua dainai mahuta amo ia noga. Guna lau laloa ia be moale hahinena, to hari lau diba ia moale momokani lasi. To iena hekwakwanai, puripuri karana unai, be edena bamona ia hanaia diba? Vadaeni, egu lalona lau hadaia hereva momokani do lau herevalaia ia dekenai.
“Ai headava lasi hahinedia emai hekwakwanai moni dekenai ai kikilaia guna. Bena ia gwau: ‘Unai hekwakwanai hanaia dalana ta lau diba. Tarot kadi duahidia karana amo moni lau davaria.’ Unai dainai lauegu Bible amo lau hahedinaraia, siahu bada lauma dikadia hereva henidia karana amo dika bada ia davaria diba.
“Bena puripuri ai gwau unai kadi amo ia perovetalaia gaudia iboudiai idia vara momokani: Lau durua toho unai kara ia laloa namonamo totona. Mose ena hereva Deuteronomi 18:10, 11 lalonai lau hahedinarai henia; ia gwau: ‘Ta ese . . . babalau eiava mea eiava toa tahua karadia . . . eiava lauma hereva henia karadia, eiava gabeai do idia vara gaudia gwauraia karadia eiava mase taudia henanadai henia karadia do ia karaia lasi.’ Kiki ai haorea bena lau rakatania gwauraia neganai, ia gwau: ‘Guna lau laloa lauegu hekwakwanai hanaia dalana lau davaria vadaeni.’ Ena hereva ese lau ia hagoadaia, badina nega tamona sibona Bible ena hereva ai kikilaia hebou, to ia hereva hegeregere puripuri karana ia rakatania vadaeni! Ena hereva dainai lau laloa ai kikilaia herevana ena anina ia lalo-pararalaia momokani.
“Lauma anianina ia ura henia bada dainai, hanuaboi ai Bible ia duahia ela bona 3 eiava 4 okaloka daba kahanai. Lau stadi henia matamaia neganai, wiki ta ta iboudiai nega rua ai stadi. Hebou dekenai ia mai bona lauma dalanai ia goada haraga. Stadi lalonai Bible bona Watch Tower oreana ena buka idauidau ai tahudia, puripuri karadia idauidau ai tahudia goevagoeva totona, bena sibona ena lalona ia hadaia iena puripuri gaudia iboudiai do ia gabudia.
“Nega daudau lasi murinai unai hahine be ‘sivarai namona’ ia harorolaia matamaia. Nega ta ta ai, puripuri karana amo guna ia durudia taudia ese idia rini henia, to ia hamaorodia unai kara ia hadokoa vadaeni, bena ena ruma dekenai ia boiridia mai, puripuri ia hanaia gauna ta ena sivarai idia kamonai totona. Bapatiso ia abia bona hari ia be iseda taihu ta.”