Puripuri Rakatania Dalana

LAUEGU lagani be 14 neganai, lauegu ruma bese ese dika ia davaria. Ala-ala tauna ta mai dagedagena ese lauegu bese taudia ia hamasedia ore hamasedia taudia ginigunadia be lauegu kakana ena natudia 9. Bena ena adavana ia hamasea. Unai murinai lauegu tadina ta ia hamasea. Ma gabeai lauegu taihuna bona tadikaka 4 ia hamasedia. Lauegu sinana bona lau, ai ruaosi sibona ai mauri noho. Lau gari dikadika!

Unai murinai mai gari bada danu lau aniani, lau gaukara, bona lau mahuta. Lau laloa, ‘Edena negai ta ma do ia hamasea? Daika do ia hamasea guna​—Sinagu eiava lau?’

Lauegu Mauri

Gabeai ia vara gauna oi lalo-pararalaia totona, lauegu mauri do lau gwauraia. Lagani 1917 ai lau vara. Lau be Paramaccaner Bush-Negroe iduhuna hahinena. Lau vara gabuna be motumotu ta, Maroni Sinavai lalonai, Suriname dekenai. Lauegu sene taudia be den lowenengre, o heau oho hegui hesiai taudia. Uda dekenai idia noho mai edia ura kwalimu bona mai edia hekwarahi ida. Unuseniai idia be taunimanima edia hegui hesiai taudia lasi, to demoni ese idia biagudia.

Aiemai hanua lalonai, demoni bona sene taudia tomadiho henidia karana ese emai mauri ia biagua. Taunimanima hagoreredia bona hamasedia totona, taunimanima haida ese wisi, meamea karana unai, idia karaia eiava koenoe ena heduru idia tahua. Idia gwau koenoe be mase laumadia, idia do mase lasi neganai edia varavara ese idia kara dika henidia taudia. Ma idia gwau idia mase murinai edia lauma idia giroa edia varavara edia davana henidia totona. To hereva momokani be inai, unai koenoe be demoni, taunimanima idia doridia idia tomadiho henidia totona.

Lau be Evangelical Brother Community tomadiho oreana ena memba ta, unai dainai Dirava lau diba sisina. Ena be Dirava tomadiho henia dalana lau diba lasi, to uda dekenai lau noho dainai lau diba ia be harihari bada Diravana. Egu lalona dekenai lau gwau: ‘Lau ura Dirava namona do lau tomadiho henia, lau ura lasi hisihisi ia havaraia laumana dikana ta do lau tomadiho henia.’ Lau diba koenoe idia ura taunimanima do idia hahisidia ela bona idia mase.

Egu lagani be 14 neganai, lau hoa bada herea, badina sivarai lau kamonai, aiemai varavara idia inai henidia taudia ese koenoe ta idia siaia ai dekenai, ai ia hamasea totona. Bena lagani 26 murinai, Sinagu bona lau sibona ai noho.

Nega Ginigunana Lau Ia Hadikaia Toho

Sinagu be gaukara goada hahinena. Dina ta, uma dekenai ia gaukara neganai, koenoe ese ia botaia bona tano dekenai ia negea, bena ia gini tore diba lasi. Iena goada ia maragi ia lao bona ena aena idia mase. Lau durua be namo, to lau lalo-rua. Sinagu lau lalokau henia, to ia boloa laumana garina lau gari. Koenoe ese ia boloa neganai, madi, Sinagu be hisihisi bada ia ania dainai ia boiboi. Hebogahisi dainai ena kwarana be egu aena dekenai lau atoa, ena lalona hagoadaia totona. Unai neganai ena boiboi ia doko, to mamina lau abia, hegeregere “ima” ese lauegu tauanina idia gigia bamona.

Lau ura heau oho neganai, Sinagu ia boiboi lou. Unai dainai ena lalona hagoadaia totona lau noho bona unai ala-ala laumana ena hagaria karana lau haheaukalaia. Unai neganai egu lagani be 40.

Ena Kara Ia Habadaia

Vadaeni, Sinagu ia mase. Dina toi murinai gado namona ta lau kamonai, ia gwau: “Lintina e, Lintina e, lau oi kamonai a? Oi lau boiria inai.” Hisihisi negana ena matamana be unai. Unai hisihisi be bada herea dainai, lau ura do lau mase haraga.

Matamana ai, lau mahuta gwauraia neganai sibona, unai demoni ese lau ia hahekwarahia. Kahirakahira lau mahuta neganai, gado ta ese lau ia haoa, gara gabudia bona mase ia herevalaidia. Lau mahuta diba lasi dainai egu tauanina ia manoka ia lao, to egu natudia lau do naridia noho.

Gabeai, demoni ese ena kara ia habadaia. Nega momo egu mamina be hegeregere lauegu aiona ia gigia toho lau ia hamasea totona. Ena be lau heau oho toho, to lau hegeregere lasi badina lauegu mamina be hegeregere metau bada gauna ese lauegu tauanina ia hametaua. Lau ura boiboi, to rege ta lau halasia diba lasi. To, lau ia hadikaia laumana lau do tomadiho henia lasi.

Lau ia hahisia negadia muridiai, lau namo lou negadiai, biru gaukara lau karaia lou. Maniota bona tohu lau hadoa bona kone hanuana maragina ta ena maketi ai lau hoihoi-laia. Moni lau abia be hekwarahi bada lasi, to gabeai dika bada herea lau davaria.

Gorere Hanamoa Gauna Lau Tahua

Dina ta ai demoni ena gadona dikana lau kamonai, ia gwau: “Oiemu bogana do lau hagudua, do ia bada bolo ta bamona.” Gabeai lauegu bogana ia gudu ela bona egu toana be lau rogorogo bamona. Lau gari dikadika dainai lau laloa, ‘Gau ibounai ia havaraia Diravana ese lau ia durua diba, inai koenoe lau lulua totona a? Siahu bada laumana ta Ia siaia diba ia lulua totona a?’ Unai lau diba totona bonoeman, babalau tauna unai, dekenai lau lao.

Babalau tauna ginigunana ese tapoes, gana unai, lau ia henia, to lauegu bogana ia do gudu noho. Lau ura bada hanamoa gauna do lau davaria, unai dainai babalau taudia idauidau dekediai lau lao, to lauegu gorere ia ore lasi.Biru gaukara lau karaia noho, unai amo moni lau abia, bia, uaina, bona rami lau hoia, babalau taudia edia davana karaia totona. Nega momo babalau taudia ese lau idia hamaoroa, idia gwau: “Koenoe vairanai oi tui diho. Oiemu biaguna bamona oi noia. Oi tomadiho henia, bena oi do ia rakatania.” To lau ia hahisia bona lau ia hamasea gwauraia laumana be lau tui diho henia diba lasi.

Vadaeni, babalau taudia ese lau idia hadibaia karadia ma iboudiai lau karaia. Idia ta be hua 5 lalodiai lauegu gorere ia hanamoa noho.Muramura idauidau lau ia hadigulaia, bona ava idauidau 11 edia ranu be egu matana dekenai ia atoa. Lauegu matana idia hisihisi bada dainai lau boiboi, to ia gwau unai ese do ia “hagoevadia.” To babalau taudia ese lau idia kara henia murinai, lauegu ruma dekenai lau lou lao neganai, lau ogogami momokani, lau dika, bona lauegu gorere ia bada momokani.

“Oiemu Dokona be Inai”

Lauegu natuna merona ta, Netherlands dekenai ia noho tauna, ese moni lau dekenai ia siaia heduru do lau tahua noho totona. Siti badana dekenai lau lao hospital ena doketa lau itaia totona. Lauegu gorere ia tahua, bena ia gwau: “Oi lau durua diba lasi. Oi lao bonoeman oi itaia.” Unai dainai East India ena babalau tauna ta dekenai lau lao, to lau ia durua diba lasi. Lauegu hanua dekenai lau giroa gwauraia, to lau hegeregere lasi. Lauegu natuna kekenina ena ruma dekenai lau lao, siti badana dekenai. Lau ginidae neganai lauegu goada ia ore momokani, lau be moni lasi bona lau gorere. Lagani 17 lalodiai lau hekwarahi kava vadaeni bona guilders 15,000 (K8,300) lau negea kava vadaeni heduru abia totona. Unai neganai egu lagani be 57.

Unai murinai unai demoni ese lau ia hagaria, ia gwau: “Oi lau hesikulaia. Oiemu dokona be inai.”

Mai egu tai danu lau gwau: “To oi be Dirava lasi, oi be Iesu lasi.”

Demoni ia haere, ia gwau: “Dirava ese lau ia koua diba lasi. Oiemu dina lau hagaudia vadaeni.”

Hekwarahi Ginigabena

Pura haida idia ore murinai lauegu natuna ena dekena hahinena ta, ladana Meena, Iehova ena Witness taudia edia pioneer hahinena ta unai, ese lauegu gorere na lauegu natuna ia nanadalaia, bena ia gwau: “Bible sibona ese emu sinana ia durua diba.” Edia herevahereva lau kamonai dainai, lau raka henidia. Idia dekenai lau do ginidae lasi neganai, siahu ta ese lau ia negea tano dekenai. Meena ia heau mai haraga bona ia gwau: “Unai demoni ese oi do ia rakatania lasi. Iehova sibona ese oi ia durua diba, ma ta be lasi.” Lau dainai Iehova Dirava ia guriguri henia, bena unai murinai lau ia vadivadi henia loulou. Lau ia vadivadi henia momo negadiai, demoni ese lau ia heatu henia badabada. Hanuaboi ai lauegu tauanina ia heudeheude bada dainai, ruma taudia idia mahuta diba lasi. Lau anivaga bona nega haida lau kava.

Lau dika momokani lau lao, unai dainai lauegu natuna memerodia be hanua amo idia mai, lau be hanua dekenai do idia abia lao, unuseniai do lau mase totona. Lauegu goada be hegeregere lasi laolao totona, unai dainai lau noho. Mase ena mamina lau abia dainai, Witness hahinena lau boiria lau bamahuta henia totona. Meena ese Bible ena hereva ia gwauraia lau dekenai. Ia gwau bema lau mase, do lau toreisi lou diba.

Lau gwau: “Toreisi lou, unai be dahaka?”

Ia haere, ia gwau: “Dirava ese oi ia hamauria lou diba. Paradaiso lalonai mauri do oi abia diba.” Helaro namona unai!

To unai hanuaboi ai demoni ese lau ia boloa. Lau matahanai. Koenoe lau itaia, ia murinai hutuma idia raka. Lau ia kirikirilaia, ia gwau: “Ia laloa do ia toreisi lou.” Unai hutuma idia kiri mase. Bena guna lau karaia lasi karana ta lau karaia. Lau boiboi, lau gwau: “Iehova e! Iehova e!” Unai sibona lau gwauraia, badina ma hereva ta lau diba lasi. Bena demoni ese lau ia rakatania!

Lauegu natuna memerodia idia giroa mai, lau idia noia, idia gwau: “Sinamai, inai siti lalonai do oi mase lasi. Ai ura oi do ai laohaia oiemu hanua dekenai.” Lau koudia, badina lau ura lauegu diba Iehova dekenai do lau habadaia. Lau hamaorodia, lau gwau: “Reana do lau mase, to lau ese ita ia havaraia Diravana ena ura do lau karaia guna.”

Kohoro Aukana Bamona

Meena bona ma Witness taudia haida ese lau idia vadivadi henia loulou. Iehova guriguri henia dalana lau idia hadibaia. Lau idia hadibaia gaudia ta be inai: Diabolo ese Iobu ia hahisia, badina be ia ura unai dala amo do ia doria Iehova do ia dadaraia totona. Unai lau dibaia dainai, lauegu lalona lau hadaia demoni do lau tomadiho henidia lasi. Witness taudia ese idia duahia Bible sirina ta lau ura henia momokani; ia gwau: “Iehova ena ladana be kohoro aukana. Kara maoromaoro tauna be ia lalonai ia heau vareai bena Iehova ese ia naria.”​—Hereva Lada-isidia 18:10.

Metairametaira lau goada lou. Lauegu natuna merona ia lou mai neganai, lau hamaoroa ruma murimurinai do ia naria nega sisina. Dabua ramina bona diampa lau hahedokilaia. Lauegu gabana dekenai diampa be dabua ramina lalonai lau udaia, unai amo lau hahedinaraia diba gudu ia diho momokani. Bena ruma amo lau raka lasi.

Lauegu natuna ia hoa, ia gwau: “Oi be Sinagu Lintina a?”

Lau haere, lau gwau: “Oibe, lau inai. Lauegu Dirava Iehova ena heduru dainai lau mauri noho!”

Lau Gini Goada

Lau raka lou diba negana ema, Iehova ena Witness taudia edia Kingdom Hall dekenai lau lao. Tadikaka bona taihu ese lauegu lalona idia hagoadaia dainai, hebou dekenai lau lao loulou. Hua haida murinai Witness taudia be ruma ta ruma ta dekenai idia haroro neganai lau bamodia. Nega sisina murinai bapatiso lau abia. Lau ia hamauria Diravana, Iehova, ena hesiai hahinena ai lau lao. Unai neganai egu lagani be 58.

To, ma gau ta do lau karaia be namo. Lagani haida gunanai, hanua dekenai, lauegu ruma lalonai boubou patana ta lau karaia, ia dekenai boubou gaudia lau karaia lauegu sene taudia dainai. Lauma dalanai lau goeva totona, namona be unai pata do lau hadikaia ore. Iehova ena heduru lau noia, badina reana hanua taudia ese egu kara do idia badulaia momokani. Lauegu ruma dekenai lau ginidae bona iduara lau kehoa neganai, ta ia boiboi badabada, ia gwau: “Pingos!” (Uda boromadia!) Unai boroma be sinavai lalonai idia roho diho noho, idia nahua hanai totona. Kara haraga hanua taudia iboudiai, burukadia bona matamatadia, idia heau lao abidia Lau moale bada, badina Iehova ese lauegu dala ia kehoa, unai dainai lau tui diho bona lau tanikiu henia. Kara haraga boubou patana lau veria lasi, keresini be ia latanai lau bubua bena lau gabua. Hanua taudia idia do giroa mai lasi neganai, lahi ese ia araia ore. Oibe, gabeai lauegu kara idia diba, to kara ta idia karaia diba lasi. Vadaeni, mai lalo-maino ida siti badana dekenai lau giroa lao.

Lalohisihisi ia Doko, Moale Ia Vara

Hahenamo ma haida lau davaria. Lauegu natuna merona, Netherlands dekenai ia noho tauna, ese lauegu sivarai ia abia dae diba lasi, unai dainai ia mai Suriname ia hamomokania moale dikadika badina lau goada lou, unai dainai siti badana dekenai ruma namona ia hoia lauegu. Lauegu noho ia idau vaitani​—guna lau be demoni edia hesiai hahinena ogogamina, to gabeai lau be Iehova ena hesiai hahinena mai egu kohu!

Lau bapatiso bena lagani 11 murinai, ma gau ta lau moalelaia. Hahenamo momo lau davaria dainai, lauegu natuna toi bona egu ravana ta ese Bible ena hereva momokanina idia tahua, bena gabeai Iehova Dirava dekenai edia mauri idia gwauhamatalaia. Nega haida tadikaka bona taihu ese lau idia hakaua lao idia stadi henidia taudia dekenai, badina be unai stadi taudia be demoni rakatanidia garina idia gari dainai, bena lau ese demoni lau rakatanidia sivaraina lau gwauraia idia dekenai. Unai dala amo unai lagani dikadia edia sivarai be haida lau durulaidia, Basileia harorolaia gaukarana lalonai.

Lauegu hereva be hegeregere lasi, lauegu Dirava Iehova do lau tanikiu henia. Oibe, lau itaia vadaeni Iehova ena imana siahuna ese lau ia durua. Momokani, Iehova ese lau ia kara namo henia!​—Salamo 18:​17-19.

[Picture on page 7]

Lintina van Geenen ese puripuri ia dadaraia neganai, ia diba “Iehova ena ladana be kohoro aukana”

[Picture on page 9]

Suriname ena gunika, unuseniai puripuri ese taunimanima momo edia mauri ia biagua