Iehova ida Ita Gaukara Hebou mai Iseda Kamonai Ida

“Taunimanima e, ia ese oi ia hamaoroa vadaeni, kara namona be dahaka. Bona Iehova ena ura oi dekenai be dahaka? Inai sibona: do oi hahemaoro goevagoeva, hebogahisi do oi ura henia, bona oiemu Dirava ida do oi raka hebou mai emu manau ida.”​—MIKA 6:8.

1. Edena Bible siridia hegeregeredia ita ese Iehova ena hesiai taudia, hari inai negai idia noho taudia, be ‘Iehova ida idia gaukara hebou taudia’ ita gwauraidia diba?

KERISTEN aposetolo tauna Ioane ia torea herevana be inai: “Mani do umui laloa, iseda Tamana ese lalokau bada ita dekenai ia henia vadaeni, badina ia ese iena natuna ita ia gwauraia noho. Momokani ita be iena natuna.” (1 Ioane 3:1) Aposetolo Paulo ese sibona bona ena bamona Apolo be inai bamona ia gwauraia: “Ai ruaosi be Dirava ena gaukara ai karaia hebou noho.” (1 Korinto 3:9) Unai hereva ruaosi idia gwauraia taudia be Iesu Keriso ena horoa hahediba taudia. To unai hereva be mai anina, Dirava ena hesiai taudia momokanidia iboudiai dekenai. Edia anina be inai bamona ita gwauraia diba: ‘Mani do umui laloa, iseda Tamana ese lalokau bada ita dekenai ia henia vadaeni, unai dainai ita be Iehova ida ita gaukara hebou noho.’

2. Dahaka dainai Iehova ena hesiai taudia be ia ida idia gaukara hebou diba?

² Dahaka dainai, ena be ita ia karaia Diravana be mai ena siahu bada herea bona mai ena aonega bada herea, bona ena hahemaoro be goevadae bona lalokau ena anina korikori be ia lalonai ia hedinarai, to ita taunimanima mai eda manoka bona mai eda kerere be ia ida ita gaukara hebou diba? Ita be mai eda dala, badina be Dirava bona ia ida ia gaukara hebou tauna, Hereva eiava Logo, ese iseda tubudia ginigunadia idia karadia, sibodia edia toana bona edia laulau hegeregeredia. (Genese 1:​26, 27; Ioane 1:1) Unai dainai Dirava ese iseda tubudia ginigunadia na aonega, kara maoromaoro, siahu bona lalokau ia henidia. Unai dainai Iehova be ena peroveta tauna ta amo ena hesiai taudia tanobada dekenai ia hamaorodia, ia gwau: “Taunimanima e, ia ese oi ia hamaoroa vadaeni, kara namo be dahaka. Bona Iehova ena ura oi dekenai be dahaka? Inai sibona: do oi hahemaoro goevagoeva, hebogahisi do oi ura henia, bona oiemu Dirava ida do oi raka hebou mai emu manau ida.”​—Mika 6:8.

3. Mika 6:8 ena anina be dahaka, bona ta be Iehova ida idia gaukara hebou totona, namona be dahaka ia karaia guna?

³ Inai hereva, “Iehova ena ura oi dekenai be dahaka?” ia gwauraia murinai, iena ura taunimanima dekenai ia gwauraia​—Dirava dekenai bona taunimanima dekenai do idia karaia karadia ia gwauraia unai. Unai ena anina be inai stadi lalonai do ia hedinarai goevagoeva. Momokani, Iehova ida ita raka hebou be mai ena taravatu. Iehova ida idia gwaubou vadaeni taudia sibodia be ia ida idia raka hebou diba. (Amos 3:3) Edena bamona? Stadi herevana gunana ese ia hahedinaraia hegeregerena, idia ese edia mauri ibounai Iehova dekenai idia gwauhamatalaia, bona unai idia hahedinaraia totona bapatiso idia abia. Vadaeni, Mika 6:8 ena hereva ena anina be dahaka unai taudia dekenai?

“Do Oi Hahemaoro Goevagoeva”

⁴ Dirava ena ura ta be, ‘do ita hahemaoro goevagoeva.’ Ita be Iehova Dirava ida ita gaukara hebou dainai, namona be iseda lalona idia goeva. ‘Ita hahemaoro goevagoeva’ anina be kara maoromaoro ita karaia, Dirava ena ura ita dekenai hegeregerena. Iena ura badana ta be, ia sibona do ita tomadiho henia. (Nahumu 1:2) Ia be vagege Diravana dainai, biaguna rua edia hesiai gaukara ita karaia diba lasi.​—1 Korinto 10:22; Mataio 6:24.

5. Edena dala amo Iesu ese ia hahedinaraia kara maoromaoro ia ura henia bona kara dika ia inai henia?

⁵ ‘Ita hahemaoro goevagoeva’ totona, namona be ‘kara maoromaoro ita ura henia bona kara dika ita inai henia,’ Iesu ia karaia bamona. Kara maoromaoro ia ura henia dainai, ‘ia kara dika lasi, ia kara kerere lasi, bona kara dika taudia ia bamodia lasi.’ (Salamo 45:7; Heberu 7:26) Bona Iesu be kara dika ia inai henia dainai, ia ese iena negai idia noho tomadiho gunalaia taudia, koikoi bona mataganigani taudia unai, be mai ena badu ida ia gwau henidia.​—Mataio 23:​13-36; Ioane 8:44.

6. Dahaka dainai ena be iseda lalona dekenai ita abia dae kara dika be taravatu, to unai sibona be hegeregere lasi?

⁶ Iesu ena kara amo ita diba, kara maoromaoro ita ura henia be namo, to unai sibona be hegeregere lasi. Namona be kara dika ita inai henia bona ita dadaraia vaitani. Ita be maragi negana amo iseda lalona idia dika bona iseda kudouna idia koikoi herea, unai dainai ena be iseda lalona dekenai ita abia dae kara dika be taravatu, to unai sibona be hegeregere lasi. (Genese 8:21; Ieremia 17:9) Bema kara dikadia bona hedibagani ita inai henidia momokani lasi, ita do idia veria ita kara dika totona. Namona be kara dika ita inai henia, Fineha ese ia inai henia hegeregerena; Israel tauna ta ese Midian hahinena ta ia sihari henia bona Peoro ena Baal ia tomadiho henia be Fineha ese ia itaia neganai, idia ruaosi be io ta amo ia gwadaia mase.​—Numera 25:​5-8.

7. Edena hereva dainai ita diba Iehova ese kara dika taudia ia abidia dae lasi ia ida idia gaukara hebou totona?

⁷ Iehova ese kara dika taudia ia ura henidia lasi, bona do ia abidia dae lasi ia ida do idia gaukara hebou totona. Iena lalohadai ia hahedinaraia goevagoeva Salamo 50:​16-18 ai; ia gwau: “Kara na Dirava ese do ia hereva henia, do ia gwau: ‘Dahaka dainai oi ese lauegu taravatu oi gwauraia bona lauegu gwauhamata herevana oiemu uduna amo oi gwauraia? Badina be matahakani oi inai henia, bona egu hereva be murimuri ai oi negedia. Henao tauna oi itaia neganai oi tura henia; bona heudahanai taudia oi bamodia.’”

8. Edena sivarai ese ia hahedinaraia, bema ita kara dika Dirava ena ladana ita hadikaia diba?

⁸ Ena be Iehova ena hesiai gaukara, Dirava ena Basileia harorolaia gaukarana, ita goadalaia, to bema iseda tauanina ita biagua namonamo lasi, ita manoka dainai ita kara dika diba, bona Iehova ena ladana ita hadikaia diba. Unai hegeregerena, lagani haida gunanai, elda ta be kongregesen hahinena ta ida idia heudahanai, unai hahine ena adavana be murimuri tauna. Unai elda be kongregesen amo idia atoa siri herevana be kongregesen ena hebou ai idia gwauraia hedinarai neganai, unai hahine ena tau be mai ena badu ida Kingdom Hall lalonai ia raka vareai bona unai kerere taudia ruaosi ia pididia. Idia ruaosi idia mase lasi, to kerukeru United States ena niuspepa badana ena rau ginigunana ai, unai sivarai ia hedinarai! Momokani, kara dika ese hemarai ia havaraia.​—Hereva Lada-isidia 6:32.

9. Hereva Lada-isidia 4:23 ena hereva hegeregerena, namona be dahaka ita naria, bona dahaka dainai?

⁹ Unai dainai Bible ese ita ia sisiba henia, ia gwau: “Gau idauidau oi naria, to oiemu kudouna oi naria namo herea, badina be iena amo mauri ia lohilohi.” (Hereva Lada-isidia 4:23) Oibe, namona be iseda kudouna o lalona ita biagua, gau namodia sibodia do idia laloa totona. Televisen, vidio, magasin bona buka amo matabodaga karadia idia hahedinaraia momo eiava idia herevalaia momo. Unai dainai, bema ita ura buka o magasin ita duahia o ita ura laulau ita raraia o ita ura sivarai ita kamonai, namona be ita naria namonamo bona goeva gaudia sibodia ita abia hidi. Sibona eda darana ita biagua be gau badana! Reana lebulebu karadia, ita laloa do ita karaia lasi karadia, be iseda lalona dekenai ita helalolaia, bona unai amo moale ita davaria. (Mataio 5:28) To, nega momo unai bamona kara dainai taunimanima be gabeai idia kara dika. Unai bamona kara ita laloa loulou be namo lasi, to idau, namona be lauma helaga ese ia havaraia huahuana, tauanina ena ura koua karana, ita hahedinaraia bona Filipi 4:8 lalonai ia gwauraia karadia ita laloa loulou.​—Galatia 5:​22, 23.

“Hebogahisi Do Oi Ura Henia”

¹⁰ Dirava ena ura iharuana Mika 6:8 lalonai ia gwauraia be ‘hebogahisi do ita ura henia.’ Inai hereva ‘hebogahisi ura henia’ be Heberu gado herevana cheʹsedh amo idia hahanaia, unai hereva ena anina ma ta be “lalokau mai hebogahisina”; bema ta be mai ena lalokau unai bamona, ena be idia dibagania bada eiava hekwarahi bada ia davaria, to ia lalokau henia tauna do ia rakatania diba lasi bona do ia dadaraia diba lasi. Bible ese ia hahedinaraia Iehova Dirava bona ena hesiai taudia namodia be mai edia lalokau unai bamona. Iehova inai bamona ia gwauraia: “Oi ia badinaia tauna be oi ese do oi badinaia.”​—2 Samuel 22:26.

10, 11. Dirava ena Natuna ese edena bamona ia hahedinaraia Dirava ia badinaia?

¹¹ Guba dekenai Dirava ena Natuna ese Iehova ia badinaia. Tanobada dekenai taunimanima ta, Iesu Keriso ai ia lao bona ena kamonai amo ia hahedinaraia Iehova ia badinaia noho. Heberu 5:​7-9 ese unai ia hahedinaraia, ia gwau: “Ia be tanobada dekenai ia noho neganai Iesu ese Dirava ia guriguri henia mai taitai bona mai matana ranu danu. Ia noinoi badina ia diba Dirava ese mase dekena amo ia hamauria lou diba. Bona Dirava ese Iesu ena noinoi ia abia dae, badina Iesu be sibona ena ura ia noia lasi, bona ia be Dirava henunai ia manau noho dainai. Iesu be Dirava ena Natuna, to ia ese hisihisi ia abia, bona unai hisihisi ese Dirava kamonai henia dalana ia hadibaia. Ela bona ia be namo momokani vadaeni, iena namo ese ibounai edia namo ia hanaia. Unai dainai ia be hegeregere vadaeni ia dekenai idia kamonai henia taudia ibounai mauri hanaihanai do ia henidia.”

Dirava bona Iena Orea Badinadia Karana Tohoa Gaudia

¹² Bema Iehova Dirava ita badinaia, namona be iena hesiai taudia tanobada ai, iseda Keristen bamodia unai, ita badinadia danu. Aposetolo Ioane ese unai kara ia gwauraia goevagoeva, ia gwau: “Tau ta . . . be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?” (1 Ioane 4:20) Taunimanima edia manoka karadia ese Dirava ita badinaia karana idia tohoa diba. Hegeregere, tadikaka haida be ma tadikaka haida edia lalona idia hahisia neganai, Dirava ena orea idia badinaia momokani lasi, to Keristen heboudia idia reaia. Iseda tadikaka badinaia karana tohoa gauna ma ta ia vara, Iehova ese ia hagaukaradia ena orea gunalaia totona taudia be gau ta idia lalohadailaia kerere neganai. Nega haida, unai bamona kerere dainai, haida idia badu bena Dirava ena orea amo idia siri. To unai bamona idia karaia be maoro, a? Lasi, lasi vaitani!

13. Dahaka dainai ta be Iehova ena orea amo ia siri be maoro lasi, bona unai bamona idia karaia taudia be dahaka dekenai idia lao diba?

¹³ Dahaka dainai unai bamona taudia ese Dirava ena orea idia rakatania be maoro lasi? Badina be Bible ese ita ia hamaoroa, ia gwau: “[Iehova ena] taravatu idia ura henia taudia be maino badana idia abia, gau ta ese do ia hahekwakwanaidia diba lasi.” (Salamo 119:165) Danu, Bible ese ita ia oda henia, ia gwau: “Umui lalokau heheni mai emui lalona ibounai danu, badina lalokau ese kara dika momo ia hunia.”(1 Petro 4:​8, NW; Hereva Lada-isidia 10:12) Vadaeni, bema ta be Iehova ena orea amo do ia siri, edeseniai do ia lao? Nega ta Iesu ena hahediba taudia momo ese idia rakatania bena Iesu ese oredia ia nanadaidia, ia gwau, “Umui danu do umui raka siri a? Aposetolo Petro ese ia haere henia, ia gwau: ‘Lohiabada e, ai be daika dekenai do ai lao? Mauri hanaihanai herevadia be oi dekenai idia noho.’” (Ioane 6:68) Bema ta be Iehova ena orea amo ia siri, ia be gabu rua sibodia dekenai ia lao diba​—gabudia be Babulono Badana, tanobada ibounai ena tomadiho koikoi basileiana, eiava Satana ena politikol “dagedage gauna.” (Apokalupo 13:1; 18:​1-5) Iehova ena orea idia rakatania taudia momo be Dirava ia hahemaraia oreana, Babulono Badana, ida idia gaukara hebou.

“Oiemu Dirava ida Do Oi Raka Hebou mai Emu Manau Ida”

¹⁴ Manau tauna be ia diba ena diba bona goada be hegeregere lasi gau iboudiai do ia karaia, bona ia hekokoroku lasi. Bema ita hekokoroku bona sibona ita laloa bada to Iehova Dirava ita laloa maragi, Iehova ida do ita gaukara hebou diba lasi.

14, 15. (a) Dahaka dainai ita manau be gau badana? (b) Dahaka dainai Keristen taudia idia hekokoroku lasi be namo?

¹⁵ Mika 6:8 ena hereva hegeregerena Hereva Lada-isidia 11:2 ia gwau: “Hekokoroku ia mai vadaeni a? Bena hemarai danu do ia mai; to aonega be manau taudia dekenai.” Manau tauna ese Iehova ia gari henia dainai aonega ia davaria. (Salamo 111:10) Iehova garina ia gari, badina ia diba Iehova ese ia hereaia momokani; ia diba Dirava be mai ena kara maoromaoro bona mai ena siahu bada danu, to ia be goevadae lasi tauna mai ena manoka. Unai dainai, manau tauna be mai ena gari bona mai ena heudeheude danu ena hahemauri ia tahua.​—Filipi 2:12.

16. Edena Bible siridia ese idia hahedinaraia Keristen taudia idia manau be namo?

¹⁶ Iehova ida idia gaukara hebou taudia idia manau be mai badina momo! Herevana iseda aonega be bada, o iseda tauanina idia goada herea, o ita be mai eda kohu momo, unai ita heagilaia be kerere. (Ieremia 9:23) Badina be dahaka? Badina 1 Korinto 4:7 ia gwau: “Be, edena bamona oi be hekokoroku momo? Oi davaria gaudia ibounai be Dirava ese oi ia henia vadaeni, ani? Oibe, Dirava ese inai gau oi ia henia, harihari gaudia bamona. Unai dainai, badina dahaka oi hekokoroku, sibona oiemu goada dekena amo oi abia bamona?” Danu, iseda haroro gaukara lalonai anina ita davaria dainai ita heagi diba lasi, badina be 1 Korinto 3:​6, 7 lalonai Paulo ia gwau: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua. Hadoa tauna bona dairia tauna edia gaukara be herevana, badina Dirava sibona ese hadoa gauna ia hatubua.” Iesu ena hereva Luka 17:10 lalonai ese ita idia durua ita manau totona; ia gwau: “Umui dekenai Dirava ia hereva karadia ibounai do umui karaia, vadaeni do umui gwau, ‘Ai be hesiai taudia namodia lasi, badina be ai dekenai idia hereva karadia sibona ai karaia vadaeni.’”

17. Dahaka dainai ita manau be aonega dalana?

¹⁷ Momokani, ita manau be aonega dalana. Bema ita manau, herevana dahaka dagi ita abia eiava edeseniai Dirava ena hesiai gaukara ita karaia, do ita moale. Bema ita manau, ladana badana do ita tahua lasi, to do ita kara “maragi momokani tauna” ta bamona. (Luka 9:48) Bena, salamo torea tauna ia laloa bamona ita danu do ita laloa; ia gwau: “Dina tamona oiemu magu ai ese dina 1,000 idau gabu ai ia hereaia. Egu Dirava ena ruma ena iduara dekenai lau naria be namo herea, to kara dika taudia edia kamepa dekenai lau noho be namo lasi.” (Salamo 84:10) Danu, bema ita manau, iseda lalokau ese ita do ia doria taunimanima ita matauraidia totona.​—Roma 12:10.

Uhau bona Ulato Idia Manau be Namo

¹⁸ Namona be Keristen uhaudia bona ulatodia idia manau. Elihu ena haheitalai namona idia tohotohoa be namo! Ena be hereva maorona ia diba, to mai ena hemataurai ida ia naria ela bona tatau badadia idia hereva guna. (Iobu 32:​6, 7) Uhau bona ulato momo idia laloa edia diba be bada, to idia diba lasi edia diba be gau iboudiai totona ia hegeregere lasi. Edia tauanina idia goada bona idia be mai edia diba dainai, reana idia laloa taunimanima badadia idia hereadia. To diba be idau bona aonega be idau, badina aonega ena anina be dala maorona ai diba oi gaukaralaia, namo havaraia totona. United States lalonai uhau bona ulato edia sivarai dikana be inai: Kara dika badadia idia karaia taudia 100 100 amo 63 63 be lagani 25 idia abia lasi taudia, bona idia 100 100 amo 30 30 be lagani 18 idia abia lasi taudia. Danu, “America ai, edia lagani be 15 bona 24 padadiai taudia momo idia mase, kekero muramurana o drag ese ia hakekerodia neganai motuka o motabaik idia taria dainai.” Unai tano dekenai, “lagani 20 do idia abia lasi neganai idia headava taudia momo edia headava idia hadokoa,” to ripoti ta ia gwau “idia ura headava taudia bema lagani haida lalodiai idia naria ela bona edia aonega idia habadaia guna bena gabeai idia headava, edia headava do idia doko lasi reana.”

19. Namona be uhau bona ulato ese edena sisiba Bible lalonai idia badinaia?

¹⁹ Dirava ena sisiba herevadia Bible lalonai ese taunimanima idia ha-aonegadia momokani, ani? Ia ese uhau bona ulato, memero bona kekeni ia hamaorodia, namona be nega ibounai edia tamadia bona sinadia do idia matauraidia bona do idia kamonai henidia. (Efeso 6:​1-3; Kolose 3:20) Namona be uhau bona ulato ese inai aonega sisibana idia badinaia: “Iehova oi abidadama henia mai emu kudouna ibounai danu bona oi sibona emu aonega dekenai oi tabekau lasi. Oiemu dala iboudiai lalodiai ia oi abia dae bena ia ese emu dala do ia hamaoromaorodia.”​—Hereva Lada-isidia 3:​5, 6.

20. Bema Dirava idia gwauhamata henia bona bapatiso idia abia taudia ese Mika 6:8 idia badinaia, dahaka davana namona do idia davaria diba?

²⁰ Bema gwauhamata bona bapatiso amo ita hahedinaraia vadaeni Dirava ita abidadama henia, bena bema unai murinai ‘ita hahemaoro goevagoeva, hebogahisi ita ura henia, bona iseda Dirava ida ita raka hebou mai eda manau ida,’ dahaka davana do ita abia diba? Davana hereadaena be, Iehova ese ita do ia lalo-namo henia badina iena ura ita badinaia, bona unai amo ena kudouna do ita hamoalea, badina iseda kara amo iena ladana badana mai garina be ita hahelagaia dainai. (Hereva Lada-isidia 27:11) Danu, iseda mauri lalonai do ita hamomokania Bible ena hereva be maoro; ia gwau: “Lauma hagoadaia kara be namo bada herea, badina be Dirava ena durua be bada inai mauri lalonai, bona iena gwauhamata gaudia be bada herea mauri gabeai dekenai danu.”​—1 Timoteo 4:8.

Edena Bamona Do Oi Haere?

◻ Mika 6:8 ena hereva hegeregerena, ita “hahemaoro goevagoeva” ena anina be dahaka?

◻ Bema Iehova ita badinaia, iseda Keristen bamodia be edena bamona do ita kara henidia?

◻ Dahaka dainai ‘Dirava ida ita raka hebou mai eda manau ida’ be namo?

◻ Dahaka dainai Keristen uhaudia bona ulatodia idia manau be gau badana?

4. ‘Ita hahemaoro goevagoeva’ anina be dahaka?

12. Dirava ita badinaia karana idia tohoa gaudia haida be dahaka, bona unai hahetoho idia davaria taudia haida be edena bamona idia kara?

18. (a) Dahaka dainai uhau bona ulato idia manau be gau badana? (b) Edena sivarai ese ia hahedinaraia uhau bona ulato idia manau be namo?

[Picture on page 22]

Oiemu kudouna oi naria totona, do oi raraia gauna, do oi kamonai henia gauna, bona do oi duahia gauna be oi abia hidi namonamo, a?

[Picture on page 23]

Petro ia diba ma gabu ta dekenai ia lao diba lasi, badina be “mauri hanaihanai herevadia” be Iesu dekenai idia noho. Oiemu lalona oi hadaia vadaeni, Iehova ena orea do oi badinaia noho a?