Lalokau bona Hemataurai Ia Hahedinaraia Tauna
“Tau ese iena adava7na do ia lalokau henia, ia sibona ia lalokau henia hegeregerena.”—EFESO 5:33.
1, 2. (a) Tanobada ibounai dekenai, headava hadokoa karana be edena bamona? (b) To, taunimanima ma haida be edena bamona idia noho?
LAGANI 1985 bamona, Psychology Today ia gwau: “Lagani ta ta ai, [U.S.A. dekenai] headava taudia 1 milion mai kahana ese edia headava idia hadokoa; United States dekenai headava momo edia lata be lagani 9 bamona sibona. . . . Nega haida ita laloa diba headava moalena ta ia noho lasi.” (June 1985) Bema ita be taunimanima badadia bona natudia edia namba ita duahia neganai, ita itaia tano tamona sibona dekenai headava hadokoa karana ese lagani ta ta iboudiai taunimanima 3,000,000 ia hadikaia diba. To headava hadokoa karana be tanobada ibounai dekenai hekwakwanai ta, unai amo ita diba lalokau bona hemataurai be headava milion momo dekenai ia noho lasi.
2 To, “ma taunimanima haida idia noho bona nega momo ita lalodia lasi: unai headava taudia idia noho tamona diba, bona mase sibona ese edia headava ia hadokoa diba.” (Psychology Today) Unai dainai, headava taudia milion momo idia gaukara goada edia headava idia naria totona.
3. Dahaka henanadai ita henia ita sibona dekenai?
3 Oiemu headava be edena bamona? Tau bona hahine dekenai lalokau bona hemataurai ena mamina ia noho, a? Oiemu ruma bese dekenai tama sina bona natudia ese lalokau idia hahedinaraia heheni, a? Eiava nega haida mamina oi abia nega momo badu bona ura lasi karana ia noho? Ena be unai ruma bese taudia be Keristen kara idia karaia toho, to ita ta lasi be goevadae dainai, ruma bese dekenai hekwarahi haida idia vara diba, badina be “ita ibounai ita kara dika bona Dirava ena hairaina ita abia be hegeregere lasi.”—Roma 3:23.
4. Paulo bona Petro be edena bamona idia hahedinaraia ruma bese mai moalena ena hakaua tauna be daika?
4 Ruma bese dekenai hekwarahi idia vara diba dainai, daika ese ruma bese ia hakaua diba, maino bona lalo-tamona dalana dekenai? Aposetolo Paulo bona Petro be edia revareva dekenai idia haere bona sisiba idia henia. Paulo ia tore: “Lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.” Danu ia gwau: “Keriso umui matauraia dainai umui ibounai ta ta dekenai do umui matauraia. Hahine e, emui adavana do umui kamonai henia, Lohiabada umui kamonai henia hegeregerena, Badina tau be iena adavana ena kwarana, Keriso be ekalesia ena kwarana bamona.” (1 Korinto 11:3; Efeso 5:21-23) Unai bamona danu, Petro ia tore: “Hahine taudia e, emui adavana do umui kamonai henia.”—1 Petero 2:21–3:1.
Keriso—Laga-ani Ia Henia Haheitalaina
5, 6. Iesu Keriso be edena bamona haheitalai namona ia karaia ruma bese hakaua dagina ia hahedinaraia neganai?
5 Atai ia noho sisiba hegeregerena, Bible ia gwau tau be ruma bese ena kwarana. To edena dala ai ia be ruma ena kwarana? Iena kwarana dagi be edena bamona ia karaia? Headava tatau haida be reana idia hereva auka bona idia gwau idia be ‘ruma bese ena kwarana, bona Bible be unai bamona ia hereva danu.’ To Keriso ena haheitalai ida ita hahegeregerea neganai unai kara be edena bamona? Keriso be hekokoroku dekenai iena murinai idia raka taudia ia hamaorodia idia ese ia idia matauraia, a? Umui laloa nega ta ia ese idia dekenai ia hereva auka bona ia gwau: “Daika be Dirava ena Natuna? Lau umui matauraia be namo!”, a? Lasi, unai bamona ia hereva lasi, to idia sibodia idia ura Iesu idia matauraia. Badina be dahaka? Iena haheitalai namona, ena kara, ena hereva, bona ma haida dekenai ia hebogahisi dainai.—Mareko 6:30-34.
6 Unai dainai kwarana dagi karaia namonamo totona, headava tatau bona tamana taudia be Iesu Keriso ena haheitalai idia badinaia be namo. Ena be Iesu ia headava lasi, to iena kara ena hahediba taudia dekenai be haheitalai namona headava tatau dekediai. (Heberu 4:15; 12:1-3) To headava tauna ese Keriso ena haheitalai badinaia karana ia manadalaia neganai, ia dekenai ruma bese taudia edia lalokau bona hemataurai karana do ia bada ia lao. Unai dainai, namona be ita itaia Iesu be edena bamona tauna.—Efeso 5:25-29; 1 Petero 2:21, 22.
7. Iesu be dahaka ia henia toho ena murinai idia raka taudia dekenai, bona unai be edeseni amo ia mai?
7 Nega ta, Iesu be hutuma dekenai ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” Iesu be dahaka ia henia toho ena kamonai taudia dekenai? Laga-ani lauma dalanai! To unai laga-ani be edeseni amo ia mai? Ia be guna ia hereva vadaeni: “Natuna sibona ese Tamana ia diba. To bema Natuna ia ura tau ta dekenai Tamana ia hedinarai henia, be unai tau ese Tamana do ia diba.” Unai anina be Iesu be lauma dalanai laga-ani ia henia diba, ia murinai idia raka taudia dekenai ia ese ena Tamana ia hahedinaraia neganai. To Iesu ena hereva amo ita diba laga-ani ia mai diba ia danu ita hebamo neganai, badina ia be “dagedage lasi bona manau tauna.”—Mataio 11:25-30.
Headava Tatau bona Tamana Taudia ese Laga-ani Idia Henia Dalana
8. Edena daladia ai headava tauna bona tamana be laga-ani ia henia be namo?
8 Iesu ena hereva amo ita diba namona be Keristen tauna ese iena ruma bese laga-ani ia henidia, lauma dalana ai bona idia ta ta edia mauri dekenai. Iena dagedage lasi karana amo bona ena hadibaia karana amo, namona be iena ruma bese ia durua idia edia diba guba Tamana dekenai idia habadaia totona. Namona be iena kara ese Dirava ena Natuna ena lalona bona ena kara ia tohotohoa. (Ioane 15:8-10; 1 Korinto 2:16) Unai bamona tauna amo ruma bese ibounai be laga-ani idia abia diba ia be lalokau ia hahedinaraia adavana, tamana, bona turana. Namona be hekwakwanai idia davaria neganai hanaihanai idia lao henia diba bona namo lasi iena gaukara be momo dainai ia ese edia hereva henia dalana ia koua. Momokani, namona be ia kamonai momokani idia dekenai, namo lasi ia kamonai kava.—Iakobo 1:19.
9. Nega haida kongregesen elda taudia be dahaka hekwakwanai idia davaria?
9 Nega haida hekwakwanai ta ia vara kongregesen ena elda taudia dekenai bona edia ruma bese dekenai. Nega momo elda tauna ia gaukara bada kongregesen ena lauma dalana ia naria totona. Namona be ia ese haheitalai namona ia hahedinaraia Keristen hebou dekenai, haroro gaukara dekenai, bona mamoe naria gaukara dekenai. (Heberu 13:7, 17) To, elda taudia haida be kongregesen idia naria neganai edia goada ena siahu ia ore vadaeni. Edia gaukara idia karaia neganai, idia be edia ruma bese idia laloaboio, bona nega haida hisihisi idia davaria. Nega ta, elda ta ena gaukara be momo dainai ia be nega lasi ena natuna mero ia stadi henia totona. Unai dainai ia ese ma ta ia hadibaia ia ese ia karaia totona!
10. Elda taudia be edena bamona edia hakaua dagina idia hahegeregerea diba kongregesen dekenai bona ruma bese dekenai?
10 Unai amo dahaka ita diba? Namona be tau ese ena kongregesen gaukara bona ena maduna ena hahine bona ruma bese dekenai ia hahegeregeredia. Hegeregere, hebou murinai elda taudia be nega bada idia henia tadikaka edia hekwakwanai idia herevalaia totona. Bema dala ia noho, elda tauna ese ma ta ia hadibaia diba ena hahine bona natudia ia abia lao ruma dekenai, dika idia be hora momo Kingdom Hall dekenai idia naria kava? Bible ena taravatu hegeregerena, ita gwau diba ‘mamoe naria gaukarana ia hamatamaia gabuna be ruma bese taudia dekenai.’ Bema elda tauna ese ena ruma bese ia naria namonamo lasi, reana ena elda dagina ia haboioa diba.Unai dainai, umui elda taudia, umui hebogahisi bona emu ruma bese taudia edia lalona bona edia mauri hanamoa karadia lauma dalanai bona ma dala haida dekenai umui laloa.—1 Timoteo 3:4, 5; Tito 1:5, 6.
11, 12. Keristen tauna be edena bamona ena ruma bese ena heduru ia abia diba, bona unai tauna be sibona dekenai dahaka henanadai ia henia be namo?
11 Laga-ani ia henia Keristen tauna be dagedage bona kara auka lasi, ia be kara do ia karaia lasi bona ena ruma bese ia hadibaia guna lasi. Reana gaukara matamata totona, eiava ruma matamata abia totona, eiava ruma bese ena gadara totona ia hegaegae neganai, ruma bese taudia iboudiai be unai kara ena mamina do idia abia dainai, aonega bona hebogahisi karana be idia danu do idia kikilaia hebou guna, ani? Reana edia hereva ese iena lalohadai ia durua aonega bona hebogahisi lalohadaina ia karaia totona. Unai amo ruma bese taudia do idia hekwarahi lasi idia durua neganai.—Hereva Lada-isidia 15:22 danu hahegeregerea.
12 Atai hereva amo, ita diba Keristen tatau bona tamana taudia be ruma bese taudia edia sisiba henia tauna sibona lasi. Namona be laga-ani ia henidia danu. Headava tatau bona tamana taudia e, umui be Keriso bamona, a? Emui ruma bese dekenai laga-ani umui henidia, a?—Efeso 6:4; Kolose 3:21.
Idia ida Idia Noho mai Diba Danu
13. Petro be dahaka sisiba namona ia henia headava tataudia dekenai?
13 Guna ita itaia hegeregerena, Petro bona Paulo be headava taudia dekenai sisiba namona idia henia. Ia be headava tauna dainai, Petro be dala rua dekenai sisiba namona ia henia diba badina headava ia mamia dainai bona lauma helaga ese ia hakaua dainai. (Mataio 8:14) Ia be headava tatau ibounai dekenai ia sisiba goada, ia gwau: “Umui tatau e, unai bamona umui noho idia danu, diba dalana dekenai, idia umui matauraia uro manoka ta bamona, hahine unai.” Tau ta, J. W. C. Wand ese unai Bible sirina ia hahanaia inai bamona: “Unai bamona danu headava tatau be edia hahine ena turana karana dekenai Keristen kara mai aonegana idia karaia.”—1 Petero 3:7.
14. Dahaka henanadai idia vara?
14 Idia be hahine danu idia noho ‘diba dalana dekenai’ anina be dahaka, eiava edena bamona, idia dekenai “Keristen kara mai aonegana idia karaia”? Edena bamona tau ese ena hahine ia matauraia diba? Edena dala dekenai Keristen tauna ese Petro ena sisiba ia badinaia be namo?
15. (a) Dahaka dainai headava haida idia doko? (b) Headava taudia ese dahaka idia laloa bada be namo?
15 Headava momo idia vara badina idia be tau-anina eiava mahuta hebou karana idia laloa momo. To headava ia noho daudau totona kopina ena hairai ita laloa bada lasi, badina kopina ena hairai be ia noho hanaihanai diba lasi. Lagani momo idia headava vadaeni taudia edia huina ia kurokuro lao bona edia kopina idia makuku. To namona be oi laloa headava ese taunimanima rua edia lalona ia hatamonaia, edia kara ia hatamonaia, edia bese ia hatamonaia bona edia ura lauma dalana dekenai ia hatamonaia, bona edia gado danu. Unai be mai hekwarahi! To unai oi lalo-pararalaia neganai headava moalena oi davaria diba.—Hereva Lada-isidia 17:1; 21:9.
16. ‘Ia danu diba dalana dekenai ia noho’ ena anina be dahaka?
16 Bema Keristen tauna be iena hahine ida ia noho “diba dalana dekenai” namona be iena hahine ena ura ia diba guna. Iena ura tau-anina dalana dekenai sibona ia laloa lasi to iena lalona ena ura bona ena ura lauma dalana dekenai danu. Bema ia ida ia noho ‘diba dalana dekenai,’ Dirava ese ia henia maduna ena anina ia diba namonamo be namo. Anina danu be ia ese ena hahine ena dagi ia matauraia. Unai be Petro ena dina dekenai idia noho Gnostic taudia edia lalohadai bamona lasi, idia laloa “hahine be tatau hegeregere lasi, idia be tauanina ena ura hagugurua gaudia, bona miro gaudia sibodia.” (The Anchor Bible) Spanish gado dekenai idia hahanaia Bible ta ese Petro ena hereva inai bamona idia torea: “Tatau e: umui noho hebou tamona neganai kara manada umui karaia, hahine dekenai hebogahisi umui karaia, badina iena goada be hegeregere lasi dainai.” (Nueva Biblia Española) Nega haida headava tataudia be unai bamona lalohadai idia laloaboio.
17. (a) ‘Uro manokana’ ena “goada be hegeregere lasi” ena anina be dahaka? (b) Edena dala dekenai tau ese hahine ena dagi ia matauraia diba?
17 Badina be dahaka hahine edia “goada be hegeregere lasi”? Badina be momo, to badina ta be ia ese natuna ia havaraia diba dainai. Unai dainai hua iboudiai dina haida dekenai iena tauanina ena mamina ia idau bona sedira ia hegeregere lasi gaukara haida karaia totona eiava toana be mai metauna bamona. Bema tau ese unai ia laloa lasi bona hua ena dina ibounai metau tamona ia atoa ena hahine dekenai, ia ese ia matauraia lasi. Unai neganai, ia hahedinaraia ia be ia ida ia noho diba lasi dalana dekenai, diba maoro dalana dekenai lasi.—Levitiko 18:19; 1 Korinto 7:5.
Hahine Matauraia Uro Manokana Bamona
18. (a) Tatau haida be dahaka kara kerere idia karaia? (b) Namona be Keristen headava tauna be edena bamona ia kara?
18 Tau ese hahine ia lalokau henia bona ia matauraia dalana ma ta be iena kara ia moalelaia herevana ia gwauraia hedinarai. Sedira tatau haida ese hahine hevasehalaia karadia idia manadalaia. Reana unai bamona tauna ia laloa taunimanima be ia idia ura henia momo unai bamona ia karaia neganai. To lasi, idia be ia do idia ura henia momo lasi badina bema hanaihanai ia kara hegeregere iena hahine ia kavakava bamona, idia be inai henanadai do idia laloa: Badina be dahaka ia ese hahine kavakavana ta ia adavaia? Sibona ia matauraia momo lasi tauna be unai bamona ia karaia. Lalokau tauna ese ena hahine ia matauraia.—Hereva Lada-isidia 12:18; 1 Korinto 13:4-8.
19. Dahaka dainai tau ese ena hahine ia hevasehalaia be namo lasi?
19 Tano haida dekenai, tatau edia kastom be edia hahine idia gwauraidia dika hahine edia manau karana idia hahedinaraia totona. Haheitalai ta be, Japan tauna be ena hahine ia gwauraia “Gusai,” anina be ‘kavakava eiava diba lasi adavana.’ Unai bamona ia hereva neganai ia hereva henia tauna ese unai hahine ena namo do ia gwauraia namo. Bema Keristen tauna be iena hahine unai bamona ia gwauraia, oi laloa ia ese ena hahine ia ‘matauraia’ Petro ese ia herevalaia hegeregerena, a? Eiava, ia be ena dekena tauna ena kara ia gwauraia momokani, a? Momokani ia laloa ena hahine be ia kavakava, a?—Efeso 4:15, 25; 5:28, 29.
20. (a) Dahaka kara kerere ia vara diba tau bona ena hahine dekenai? (b) Edena bamona unai kara idia koua diba?
20 Nega haida tau ese lalokau bona hemataurai karana ia hahedinaraia lasi badina ia laloaboio iena hahine be iena Keristen taihuna ta, Kingdom Hall dekenai sibona lasi to ruma dekenai bona ma gabu haida dekenai danu. Kingdom Hall dekenai hebogahisi bona kara namo ita karaia be auka lasi, to ruma dekenai hereva auka bona hereva utua karana ita hahedinaraia be namo lasi! Unai dainai Paulo ena sisiba be namo momokani! Ia torea herevana be: “Maino daladia do ita tahua, bona ita ta ta ese iseda bamona ta ta edia abidadama do ita hagoadaia.” “Ita ibounai ta ta iseda ekalesia varavara tauna do ita hamoalea, iena namo bona iena goada havaraia totona, bona iena abidadama do ia goada totona.” (Roma 14:19; 15:2) Headava taudia edia dekena tauna momokanina be edia adavana.
21. Headava tataudia be dahaka idia karaia diba edia hahine idia hagoadaia totona?
21 Unai dainai, ena kara bona ena hereva amo lalokau Keristen tauna ese iena moale ia hahedinaraia ena hahine dekenai. Iena ladana ita diba lasi toretore tauna ta ia hereva bamona:
“Headava ena hekwarahi dekenai
Ena be gaukara eiava hekwarahi ai
Bema emu hahine namona-oi laloa bada
Namona be oi hamaoroa! . . .
Oi be iena bona iena sibona;
Oi diba vadaeni ia be oiemu sibona;
Oi naria lasi ela bona ia mase murinai—
Namona be oi hamaoroa!”
Inai hereva be gunaguna ia noho Pavapava Lemuele ena sinana ia hereva bamona. Ia be hahine namona ena kara haida inai hereva amo ia gwauraia: “Nega tamona ai, iena natudia ese idia gwauraia moale; iena adavana danu, bona ia ese ena kara ena ane ia karaia: ‘Hahine momo ese ena kara namo idia hahedinaraia; to oi ese iboudiai oi hereadia.’ ” (Hereva Lada-isidia 31:1, 28, 29, The New English Bible) Tatau e, hanaihanai emui hahine umui hanamoa, eiava unai be headava totona lalo-ani karana sibona?
22, 23. Headava namona ena badina be dahaka?
22 Inai hereva amo, ita itaia ia hegeregere lasi tau ta be ruma dekenai ena moni sibona ia mailaia iena headava dekenai lalokau bona hemataurai hahedinaraia totona, . Headava namona ia vara diba bema lalokau, abidadama bona hebogahisi turana karana ia noho. (1 Petero 3:8, 9) Lagani idia hanai murinai, unai turana karana ena goada ia bada ia lao be namo tau bona hahine ese edia adavana ena kara bona ena goada idia diba neganai. Bona idia ese edia adavana edia kerere maragidia idia gwauatao neganai.—Efeso 4:32; Kolose 3:12-14.
23 Bema tau be lalokau bona hemataurai karana ia hahedinaraia guna, ruma bese taudia iboudiai be hahenamo idia abia. To Keristen hahine ena gaukara be dahaka ruma ena moale besena ta dekenai? Gabeai stadi herevana dekenai unai henanadai do ita herevalaia.
Inai Hereva oi Laloa Tao A?
◻ Headava moalena dekenai, daika ena maduna ia bada, bona badina be dahaka?
◻ Headava tatau be edena bamona Keriso idia tohotohoa diba laga-ani idia henia totona?
◻ Kongregesen bona ruma bese ena maduna be edena bamona idia hahegeregeredia?
◻ Tau be edena bamona ‘iena hahine ida diba dalana dekenai ia noho’?
◻ ‘Ena hahine ia matauraia uro manokana bamona’ ena anina be dahaka?
[Picture on page 20]
Ena kara ia hegeregere elda tauna ia diba mamoe naria gaukara be ruma bese dekenai ia hamatamaia