Moale Besena

MOALE besena! Hari ia noho tanobada besena ta be unai bamona idia gwauraia diba, a? Bese ta be mai moale danu idia hereva diba idia ese dagedage, taravatu utua kara, ogogami, tanobada hamiroa kara, tauanina hadikaia goreredia, politikol kara dikadia, bona tomadiho inai heheni karadia idia haoredia vadaeni, a? Bese ta be mai ena dala momokani unai bamona do idia karaia totona, a? Lasi momokani!

Tanobada ibounai toana be edena bamona? Mikhail Gorbachev, U.S.S.R. ena presiden, be July 16, 1990 ai ia gwau: “Ita be tanobada ibounai taunimanima idia herevahereva heheni negana ta ita rakatania, bona lau laloa ita be ma nega ta, nega daudau do ia noho maino goada negana ta, lalonai ita vareai.” To, unai dina ena Time magasin ia gwau United States ese niuklia tuari ipidi 120 ia atoa hegaegae Moscow dekenai idia negea diba totona, unai gau tamona sibona ese unai hanua ia hadikaia ore diba momokani. Bona momokani, Soviet taudia idia hegeregere vadaeni unai kara danu do idia karaia totona. United Nations ena memba ma haida be hari mai edia diba unai niuklia tuari kohu idia karaia totona. Daika ese do ia negea guna ita laloa neganai be ita moale diba lasi.

Moale Momokani Besena

Gunaguna​—lagani 3,500 gunanai​—moale momokani besena ta ia noho. Unai be idau negai Israel. Dirava be Aigupito ena dagedage amo unai taudia ia hamauridia neganai, idia be Mose danu kwalimu ane idia abia hebou, bona edia Dirava bona Hamauria Tauna idia badinaia noho neganai, idia moale diba.​—Esodo 15:​1-21; Deuteronomi 28:​1, 2, 15, 47.

Solomon ia lohia neganai, “Iuda bona Israel idia hutuma, davara ena kone miri ena hutuma bamona, idia aniani, idia inuinu bona idia moale.” Unai be moale bada negana, bona unai negai ruma hairai hereana idia haginia, tanobada ena sivarai ibounai lalonai unai ruma be herea, ia be Iehova ena tomadiho dubuna Ierusalem dekenai.​—1 Hanua Pavapavadia 4:20; 6:​11-14.

Iseda Nega Lalonai Ia Noho Moale Besena

Idau negai Israel ese hari inai negai ia noho besena ia laulaulaia. Edena bese? Middle East dekenai ia noho politikol Israel, a? Tanobada ena sivarai ia hahedinaraia unai bese ia hekwarahi bada dainai ia moale lasi. United Nations ese ena memba besedia dekenai moale ia havaraia, a? Lasi, hari inai negai idia noho politikol besedia dekenai moale korikori ita davaria lasi. Mataganigani, kara dikadia, bona koikoi karadia be momo; bona tano momo dekenai, ladana maragi taudia be mai lalo-metau idia hekwarahi bada idia mauri noho totona.​—Hereva Lada-isidia 28:15; 29:2.

To, hari inai negai bese idauna ta ia noho bona ia moale bada herea. Ia be politikol besena ta lasi, badina iena Kwarana, Keriso Iesu, be iena taunimanima inai bamona ia herevalaia: “Umui be tanobada ena lasi.” (Ioane 15:19) United Nations ese ena memba taudia ia hatamonadia momokani lasi, to hari moale besena ese “bese idauidau, iduhu idauidau, kopina idauidau, bona gado idauidau” amo ena bese taudia ia abia. (Apokalupo 7:​4, 9) Hari unai bese taudia edia namba be 4 milion ia hanaia, unai dainai ena namba ese UN ena 160 memba besedia amo, bese 60 edia namba ia hanaia. Unai taunimanima 4 milion mai kahana edia gado be 200 bamona; to idia iboudiai be “gado goevadaena” tamona dekenai idia hereva tamona.​—Sefania 3:9.

Bese idauidau momo be gado tamona idia herevalaia diba be idau, ani? Lasi, badina unai hatamonaia gadona dekenai sivarai ta ia noho, unai be gabeai do ia mai Dirava ena kara maoromaoro Basileiana ena sivaraina unai. Unai moale besena be “tanobada ena dokona amo” ia mai bona tanobada ibounai idia gwauraia ‘Iehova ena Witness’ taudia. (Isaia 43:​5-7, 10; Sekaria 8:23) Oi laolao gabudia iboudiai dekenai, inai tanobada ena kopina dekenai, unai taudia do oi davaridia.

Isaia 2:​2-4 dekenai, Dirava ena peroveta tauna ese bese ibounai amo idia mai taudia be inai bamona ia herevalaia, ia gwau: “Umui taunimanima e, umui mai, Iehova ena ororo dekenai do ita daekau, Iakobo ena Dirava ena dubu ai; bona ia ese ena kara ita do ia hadibaia, bona ita be ena dala dekenai do ita raka!” Mai goada bada, unai taudia ese ma haida Iehova dekenai idia boiridia iena Hereva, Bible amo, diba idia tahua totona, bona idia be iena ura karaia dalana idia diba totona. Unai bese tamona ese maino korikori ena dala ia badinaia, ena taunimanima ese ‘edia tuari kaia be tano geia gaudia ai idia halaoa, edia io be au rigidia utua pakosidia ai idia halaoa, bona tuari dalana do idia hadibaia lou lasi.’ Ia be moale besena momokani!

Oi danu be unai moale oi abia diba. Ia mai haraga dinana, Pavapava, Keriso Iesu, ese dika idia havaraia taudia bona gavamanidia do ia kokia dinana, bona tanobada be Paradaiso ai do ia halaoa lou dinana dekenai diba oi abia diba. (Daniel 2:44; Mataio 6:​9, 10) Hari inai negai danu, lalo-tamona momokani besena ta bamona, Iehova ena Witness taudia be edia gaukara dekenai idia moale bada, idia be maino korikori negana hereadaena totona idia hegaegae, rau gabedia ese do idia hahedinaraia bamona.