Tanobada Ibounai Moalena Ta

“ITAIA! Lau sibona egu hesiai taudia do idia boiboi mai edia moale bada danu, badina edia kudouna be namo herea.” (Isaia 65:14) Iehova be iena peroveta tauna Isaia amo unai bamona ia hereva, bona Iehova ena Witness taudia dekenai iena hereva ia guguru momokani! Edia kudou ena moale ena badina be dahaka? Idia be lalo-tamona dekenai Iehova Dirava idia tomadiho henia dainai. Ia be “moale Diravana,” bona idia tomadiho henia taudia be “Iehova idia moalelaia.” (1 Timoteo 1:11; Sekaria 10:7) Unai tomadiho moale karana dainai, idia be Basileia ena sivarai namona idia harorolaia neganai, bese tamona ai idia lao bona tanobada ibounai lalonai edia Dirava idia hanamoa.​—Apokalupo 7:​9, 10.

“Ta ese Ia Kokia Oho Diba Lasi Moalena”

Momokani, Dirava ena ladana bona iena Basileia idia harorolaia dainai, Iehova ena Witness taudia be hanaihanai idia moale. (Mareko 13:10) Idia be salamo torea tauna ena hereva idia badinaia: “Iena ladana helagana oi heagilaia. Kudou amo Iehova idia tahua taudia idia moale be namo.”​—Salamo 105:3.

Nega momo, unai idia karaia totona hekwakwanai idia hanaia guna. Spain dekenai, Isidro be Iehova dekenai sibona ia gwauhamatalaia, bona ia ura ma taunimanima haida dekenai Ia ia herevalaia. To ia be traka taria tauna bona iena gaukara lasi negadia be momo lasi, badina hanuaboi horadia iboudiai lalonai traka ia taria bona dina lalonai ia mahuta. Isidro ia ura ma traka taria taudia haida ia haroro henidia, to edena bamona ia karaia diba?

Iena traka lalonai CB (citizens band) reidio ta ia atoa bona ma traka taria taudia haida dekenai ia hereva diba. Ia davaria, channel ta, namba 13 dekenai, idia hereva momo lasi, bona unai channel ta ia gaukaralaia. Ia be ma traka taria taudia haida ia hamaorodia CB reidio dekenai Bible idia herevaherevalaia toho neganai, idia ura lasi. To haida idia kamonai. Ma haida be unai sivarai idia kamonai, bona Spanish traka taria taudia momo be channel 13 dekenai idia kamonai. Vanegai, Isidro ia kamonai idia ta be dala ia tahua iena stadi Bible dekenai ia habadaia totona.

Italy dekenai, tau ta be basi dekenai ma tau ta ida idia herevahereva neganai, Iehova ena Witness taudia edia sivarai ia diba. Iena hahine be ena turana ta amo danu witness taudia ia davaridia. Idia ruaosi be Bible idia stadilaia bona idia ura momokani idia diba gaudia be ma haida dekenai idia hadibaia. Unai idia ura momokani dainai, unai tau be iena bisinesi dekenai dagi badana ta ia dadaraia bona iena hahine ese moni gaukara namona ta ia rakatania, idia ruaosi be nega bada idia henia ma haida dekenai Basileia ena sivarai namona idia harorolaia totona. Davana namona idia davaria, a? Oibe. Unai tau ia gwau: “Hereva momokani ita davaria negana amo, lauegu hahine bona lau ai moale bada herea badina taunimanima 20 ai durudia Dirava ena ura dekenai diba maoromaoro idia abia totona. Dina lalonai Iehova ena hesiai gaukara lau karaia bena unai murinai hanuaboi ai egu ruma dekenai lau giroa. Unai neganai, momokani, lau hesiku. To lau moale, bona lau be Iehova lau tanikiu henia ta ese ia kokia oho diba lasi moalena be lau dekenai ia henia dainai.”

“Tanobada ena Kahana Ibounai”

Dirava ena moale besena taudia be idia noholaia gabudia iboudiai dekenai, “tanobada ena kahana ibounai” dekenai danu, unai bamona edia gaukara dekenai idia gaukara goada noho. (Kara 1:8) Greenland ena north kahana ia daudau herea momokani. To, unuseniai danu, kilomita 320 Arctic Circle ena mirigini kahanai, Ilulissat kongregesen maragina lalonai, taunimanima 19 idia noho. Idia be ataiai ai gwauraia Italy tauna bona hahinena ese idia harorolaia sivarai namona idia harorolaia danu, bona idia moale dikadika badina lagani gunanai, Greenland taudia 7 ese bapatiso amo edia gwauhamata Iehova dekenai idia hamomokania.

Greenland ena amo ia daudau momokani gabuna, Mauritius motumotu, Indian Ocean dekenai, Anjinee be unai bamona moale ia abia danu. Guna, Anjinee ia hekwarahi. Mauritius dekenai, taunimanima idia laloa ia namo lasi Hindu India headava lasi kekenina be Keristen hebou ia lao henidia bona taunimanima iboudiai dekenai Dirava ena hereva ia harorolaia. To Anjinee ia haheauka. Hari, iena Keristen karana ia hamatamaia negana amo lagani 9 murinai, iena varavara haida be Bible idia stadilaia danu.

Anjinee ita herevalaia dainai, namona be Emilio, tanobada ena kahana idauna ta ai, Honduras dekenai ia noho tauna ta, ita herevalaia danu. Emilio be gaukara taudia edia hereva ia kamonai Bible idia herevalaia neganai bona ia noinoi ia danu be edia kiki lalonai ia vareai. Ia duahiduahi diba lasi to Bible siri haida idia duahia neganai mai moale danu ia kamonai. Keristen hereva momokanina be iena kudou lalonai ia vareai neganai, Emilio ese iena sihari kava karana bona inuinu momo karana ia rakatania. Iehova ena Witness taudia ese ia idia hadibaia duahiduahi bona toretore dekenai, bona hari ia be hesiai tauna ta, Dirava ena moale besena lalonai.

Honduras ena northwest kahana amo kilomita tausen tausen dekenai, Alaska dekenai Eskimo hahine ta be unai Keristen hereva momokani ia davaria. Unai hahine be daudau hanuana ta dekenai ia noho, bona revareva sibona amo Iehova ena Witness taudia danu ia herevahereva diba. Unai dainai, revareva amo ia stadi, revareva amo iena henanadai ia henia, bona hari, mai ena ura bada danu iena dekena taudia dekenai ia diba gaudia ia harorolaia. Unai bamona haheitalai momo ita herevalaia diba bona sedira dokona be lasi. Tanobada ibounai lalonai, manau taudia idia mai “mai moale danu Iehova idia hesiai henia” totona.​—Salamo 100:2.

“Ta ta Dekenai Do Umui Lalokau Henia”

Unai taudia ia veridia gauna ta be Dirava ena moale besena dekenai ia noho lalokauna. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Unai Keristen taudia momokanidia edia mauri dinadia ibounai lalonai Keristen lalokau ia hedinarai, bona nega dikadia lalonai ia hedinarai momokani.

Africa ena tano ta dekenai, Iehova ena Witness taudia edia gaukara idia taravatua, bona madi, medu lasi negana ia vara. Taunimanima 10,000 idia mase, bona boromakau momo herea idia mase. Witness taudia be edena bamona idia roho mauri? Idia be tubutubu gaudia edia ramuna bona avocado uhe idia nadua bona idia ania! To ma tano haida dekenai idia noho Witness taudia be haraga herea gwaumaoro idia abia heduru kohudia ton 25 idia siaia totona, unai ese unai Africa tadikakadia edia hisihisi idia hanamoa. Momokani, ena be edia gaukara idia taravatua, to ami taudia ese unai kohu idia abia lao gabu maorona dekenai idia atoa totona!

Momokani, unai Africa Witness taudia idia moale dikadika edia tadikaka be unai bamona idia hamomokania idia lalokau henidia neganai, bona idia be Isaia ena hereva ia guguru karana idia itaia: “Itaia! Iehova ena imana ia kwadogi lasi, taunimanima ia hamauria diba; bona ena taiana ia kudima lasi, noinoi ia kamonai diba.”​—Isaia 59:1.

Maino Besena Ta

Manau taudia be Dirava ena moale besena dekenai idia ura idia lao badina ena orea taudia be tanobada ena hepapahuahu karadia idia rakatania bona ‘edia tuari kaia be tano geia gaudia ai idia halaodia.’ (Isaia 2:4) El Salvador dekenai, guna ami dekenai ia noho tauna ta ena ruma lalonai iena tuari gaukara ena kohu momo idia noho. To ia be Iehova ena Witness taudia danu Bible ia stadilaia hamatamaia neganai, ia be maino gaukara ia ura henia. Gabeai, ia be iena ruma lalonai idia noho tuari gaudia iboudiai ia negea bona mai goada danu haroro gaukara ia karaia.

Gavamani idia tuari henia taudia be iena hanua idia abia neganai, ia danu idia hadiburaia​—ta ese unai taudia ia hadibaia ia be guna ami dekenai ia noho tauna ta. To, ia hamaorodia hari ia be ami tauna ta lasi to ia be Iehova ena Witness tauna ta. Gavamani idia kokia toho taudia ese idia samania, idia gwau iena ruma lalonai tuari gaudia idia noho, to idia tahudia neganai idia davaridia lasi. Bena gavamani idia kokia toho taudia ia gunalaia tauna ese unai tau ena dekena taudia ia henanadai henidia unai tau be edena bamona. Idia momo edia hereva be inai bamona: “Ia be dina ibounai dala dekenai ia loaloa bona Bible ia harorolaia sibona.” Unai tau idia ruhaia nege. Ita daradara lasi, iena gaukara goada ese ia hamauria.

Africa tano ta ena sivarai ia gwau ami taudia rua be Iehova ena Witness taudia ida Bible idia stadilaia. Ta be gavamani ena ami dekenai, bona ta be gwau-edeede taudia edia ami dekenai ia noho. Gabeai, idia ruaosi be edia lalona idia hadaia “edia tuari kaia be tano geia gaudia ai idia halaoa” bona ami idia rakatania. Idia ruaosi be Keristen hebou idia lao henia nega ginigunana dekenai, gwau-edeede ami tauna ese gavamani ami tauna ia nanadaia: “Dahaka oi ura iniseniai?” Ia haere: “Bona oi, dahaka oi ura iniseniai?” Unai sivarai dekenai ia gwau: “Idia rosia heheni, mai moale bada idia taitai badina maino dekenai idia noho hebou diba.” Reana unai taudia ruaosi, guna ami dekenai idia noho, be Dirava idia guriguri henia: “Dirava e, lau oi hamauria Diravana, rara bubua karana amo lau oi hamauria, bena mai moale bada lauegu malana ese oiemu kara maoromaorona do ia herevalaia.”​—Salamo 51:14.

“Lauegu Hisihisi Oi Itaia”

“Do lau moale bona oiemu hebogahisi do lau moalelaia, badina lauegu hisihisi oi itaia; lauegu hekwarahi oi diba vadaeni.” (Salamo 31:7) Salamo ia torea tauna be unai bamona ia guriguri, bona hari inai negai, momo idia moale badina Dirava ena Hereva ese ia durudia edia hisihisi idia hanaia totona. France dekenai, Iehova ena Witness tauna ta ese hahine ta ia stadi henia, unai hahine ese schizophrenia gorerena ia abia. Unai hahine be nega daudau lalonai darana idia hanamoa doketa taudia dekenai ia lao, to idia durua lasi. Iena stadi ia hamatamaia wiki tamona murinai, darana ia hanamoa doketa tauna ese ia nanadaia: “Unai hahine be oi dekenai Bible amo ia herevalaia gaudia oi lalo-pararalaia, a?” Wiki gabenai, Witness tauna be iena opesi dekenai ia lao bona ia vairanai unai hahine danu Bible stadi ia karaia.

Stadi murinai, unai darana ia hanamoa doketa tauna ese Witness ia hamaoroa: “Lagani momo lalonai lau be lau hanamoa gorere taudia edia tomadiho lau laloa, to lau itaia tomadiho ta lasi be heduru ia henia momokani. To oi be idau. Nega ibounai, Mrs. P​— be wiki tamona lalonai, nega rua lau dekenai ia mai, bona lau dekenai moni davana ia henia. To, oiemu Bible hadibaia hereva bona sisiba namona amo, gaukara namo hereana ta oi karaia davana lasi. Ia be ia namo ia lao. Oi karaia noho, bona bema oi ura neganai, oi do lau durua.”

Bible ia gwau: “Moale boiboi idia diba taudia idia moale. Iehova e, oiemu vairana ena diari dekenai idia raka noho. Oiemu ladana dekenai idia moale dina ibounai bona oiemu kara maoromaoro ese ia abidia isi.” (Salamo 89:​15, 16) Iehova ena Witness taudia iboudiai idia diba unai salamo hereva ia momokani. Edia uduna amo, tanobada ibounai, Iehova hanamoa moale boiboina idia karaia. Taunimanima hutuma be bese idauidau amo idia mai, idia danu Dirava idia hanamoa totona. Oi be idia danu umui hebamo bona unai moale oi mamia be namo, ani?

[Picture on page 7]

Hari, Iehova ena Witness taudia East Europe tanodia dekenai idia moale, badina hari sibona edia dala idia kehoa “Gima Kohorona” be edia gado ai idia abia diba bona idia stadilaia diba