Taunimanima Edia Noho be Momokani Ia Namo Ia Lao, A?
“East bona West tanodia idia gaukara hebou karana ia goada ia lao neganai, reana [Berlin] ena magu idia hanaia taudia edia namba do ia bada ia lao. To do ia moru momokani lasi ela bona lagani momo, eiava uru momo, do idia ore murinai. Germany tanodia ruaosi be do idia tamona lou lasi.” March 1989 lalonai America ena niuspepa badana ta be unai bamona ia torea.
To lagani eiava uru momo idia hanai lasi, bena dina 250 idia do ore lasi neganai, unai magu ia moru hamatamaia. Wiki haida lalodiai, unai magu ena kahana momo be, tanobada hegegemadai, taunimanima edia teibol latanai hahairaia gaudia ai idia halaodia vadaeni.
IA DIKA vadaeni Iron Curtain [politikol dalana dekenai East bona West ia hapararaia gauna] ia kehoa bona taunimanima idia laloa tanobada ibounai dekenai maino bona noho namo ia mai kahirakahira. Middle East kahana dekenai, ena be Persian Gulf tuarina idia karaia, to taunimanima edia helaro be East bona West huanai daudau ia noho baduna do ia ore bona tanobada matamatana ia kahirakahira.
Ma Dala Ta Ia Kehoa
Tanobada Ibounai Tuarina Iharuana murinai, ia hedinarai taunimanima idia gaukara Europe idia hatamonaia totona. Lagani 1951 lalonai, West Europe tanodia be European Coal and Steel Community oreana idia haginia. Unai murinai, 1957 lalonai, European Common Market oreana idia haginia. Unai tanobada ibounai oreana (hari ena taunimanima be 342 milion) ena memba tanodia 12 be, 1987 lalonai, idia gwau 1992 ia mai neganai, idia be moni gaukaralaia dalana ibounai dekenai do idia tamona diba. Toana be politikol dalana ibounai dekenai do idia tamona diba danu. Unai be idau momokani gau namona ta badina vanegai Europe ena sivarai ia hahedinaraia heai rarana bada idia bubua vadaeni!
To vanegai idia vara politikol idau karadia dainai, 1992 ai do ia vara gauna ena anina be bada. Taunimanima momo idia laloa East Europe lalonai guna komiunis tanodia bona Europe ena tano ma haida do idia tamona.
Dirava ese Ia Durudia, A?
East Europe dekenai, lagani momo lalodiai, gavamani ese taunimanima idia koua momo dainai, tomadiho oreadia haida be Keristen ena tuari lasi karana idia laloaboio bona politikol karadia dekenai idia vareai. Germany niuspepa ta, Frankfurter Allgemeine Zeitung, be unai ia herevalaia, ia gwau: “East kahana dekenai, ia hedinarai goevagoeva Keristen taudia ese unai gabu taudia edia kara idia haidaua, bona namo lasi ita laloa Keristen taudia be gaukara maragina idia karaia.” Ma danu hereva ia habadaia, ia gwau: “Haheitalai be Poland dekenai, tomadiho orea be unai tano ena bese taudia danu idia hebou, bona dubu ese lohia oreana ena inai taudia ai idia lao; GDR lalonai [guna unai be East Germany] gavamani dekenai idia hepapahuahu taudia idia gaukara totona be dubu dekenai heduru idia abia, bona edia orea be dubu rumadia idia gaukaralaia; Czechoslovakia dekenai, Keristen taudia bona democratic taudia be dibura rumana lalonai idia hedavari, idia turana karaia, bona murinai idia gaukara hebou.” Romania dekenai, “dubu oreadia be Ceauşescu ena gavamani idia abia isi momokani,” to gavamani ese dubu tauna, Laszlo Tökes, idia hadiburaia gwauraia neganai, taunimanima ese gavamani idia tuari henia.
Vatican danu be unai hepapahuahu lalonai idia vareai. Time magasin be December, 1989 lalonai, ia gwau: “Gorbachev ena gaukara dalana be unai gavamani dekenai koua karana ta ia karaia lou dainai, vanegai hua lalodiai, East Europe dekenai, tano momo idia tuari bona idia sibodia be gavamani amo idia ruhaia gwauraia. To namona be ita diba idau negai amo John Paul be unai kara ia durua. . . . Lagani 1980-89 lalonai, iena hereva lalonai, hanaihanai ia be Keristen abidadama ia gwauraia momo, bona ia gwau unai Keristen abidadama ese Europe, Atlantic kahana ia lao Ural Ororodia kahana ai do ia hatamonaia be namo.” Hegeregere ia be April, 1990 ai, Czechoslovakia ia vadivadi henia neganai, pope ia gwau ia ura iena vadivadi dainai dala do ia kehoa East bona West do idia tamona totona. Ia gwau Europe edia bisop be hebou do idia karaia bona dala idia hegaegaelaia, iena ura idia hagugurua totona, unai ura be “Europe ibounai do ia tamona badina gunaguna idia ibounai be Keristen taudia dainai.”
Bema Germany ia tamona Europe ia tamona dainai, reana unai ese dala ia kehoa Europe ibounai, bena gabeai tanobada ibounai, ia tamona diba, ani? Tomadiho oreadia be unai kara dekenai idia vareai dainai, unai ese Bible ia gwauhamatalaia gauna ia hamomokania, a? East bona West lalonai, dubu taudia be politikol dalana dekenai maino bona noho namo havaraia totona idia gaukara hebou dainai, nega kahirakahira unai do ia momokani, a? Do ita itaia.
[Map/Picture on page 4]
Leipzig dekenai, Protestant Nikolai Dubuna—Germany lalonai politikol ena heiriheiri karadia ia haheitalaia
European Common Market edia memba besedia